ගොඩගන්න බැරි තරමට සිනමාව ඇදවැටිලා - ධර්මප්‍රිය ඩයස්

Wednesday, February 24, 2021 , 0 Comments

 



මචං’ චිත්‍රපටය බැලූ කෙනකුට ධර්මප්‍රිය ඩයස් ගැන හේතුපාඨ කීමට අවැසි නැත. පසුගිය සමයක ටෙලි කලාව උඩු යටිකුරු කළ ස්වාධීන රූපවාහිනියේ විකාශනය වූ කූඹියෝ ටෙලිකතාවද ධර්මප්‍රිය ඩයස්ගේ සියුම් රංගන ශෛලිය ප්‍රේක්ෂක සිත් තුළ නිධන්ගත කළ අමන්දානන්දනීය වූ මතකයන් සුළුකොට තැකිය නොහැකිය. කමකට නැති නොහික්මුණු චරිත නිරූපණයන් හරහා වැඩිපුරම ආලින්දයේ සිනමාව තුළින් රසිකයන් පිනවූ ධර්මප්‍රිය ඩයස් නම් මේ අතිදක්ෂ රංගනවේදියා ඔහුගේ අලුත් තොරතුරු ගැන පුවත්පතකට මෙලෙස කියා තිබුනා.


කොහොමද ඉතින් මේ දවස්වල ජීවිතේ?

වරදක් නැහැ. සාමාන්‍ය විදියට දවස ගෙවිලා යනවා.


කොරොන්ටයින් විරාමයෙන් පසුව කාර්යබහුල වී සිටින බොහෝ කලාකරුවන් අතර ඔබත් එක් අයෙක්?

නැහැ. එහෙම ලොකු බිසී එකක් නැහැ. දෙවැනි ඉනිම ඇතුළුව මම රඟපෑ තවත් ටෙලි නාට්‍ය දෙකක් මේ දවස්වල විකාශනය වෙනවා. එය මීට ටික කලකට ඉහත නිර්මාණය වූවක්.


රංගවේදියකු ලෙස ඔබ පැමිණියේ වේදිකාවෙන්?

බොහෝ රංගවේදීන් තම ගමන ආරම්භ කළේ වේදිකාව හරහා තමයි. මමද එහි එක් අයකු වීම ආඩම්බරයක්.


 රඟපෑමේ කැමැත්ත ඇතිවුණේ කුඩා කොලුගැටයකු අවදියේමයි?

ඔව්. අපි පුංචි කොලු පැටව් කාලේ අපේ වැඩිහිටි අය කැස්බෑවේ වැව මැද්දේ පොල් කොට උඩ ස්ටේජ් ගහලා නාට්‍ය පෙන්නපු හැටි බලා හිටපු සුන්දර අවදිය අද වාගේ මතකයි. ඔරුවෙන් කට්ටිය වැව මැදට ගිහින් තමයි ස්ටේජ් එක පොල් කොටන් හිටවලා හදන්නේ. නාට්‍ය පෙන්නන්නේ ලවුඩ්ස්පීකර එහෙම දාලයි. ගමේ අය ඒවායේ රඟපානකොට මම පැත්තකට වෙලා ඉඳගෙන හිතනවා ඇයි ඒගොල්ලො මාව ගන්නේ නැත්තෙ කියලා. පුංචිම චරිතයක්වත් මට නොදුන්න එක ගැන ඒ කාලේ මතකයි මට හිත් තැවුලෙන් උන්නා. ඔය කියන හිත්තැවුල තමයි මං හිතන්නේ රංගවේදියකු වීමේ බලාපොරොත්තුව හිතට දුන්නේ.


 බලාපොරොත්තුවට ආරම්භය වුණේ පාසල් වේදිකාව?

උසස් පෙළට මම කළේ නාට්‍ය සහ රංගකලාව. එවකට මගේ ගුරුතුමා වුණේ ප්‍රේම්කුමාර් කරුණාරත්න මහත්තයා. මගේ හැකියාව හඳුනාගෙන මාව රංගවේදියකු කරා ගෙන ආවේ ඔහුගේ අත්වැලයි. පැහැදිලිවම කියනව නම් ධර්මප්‍රිය ඩයස් කියන රංගවේදියාව නිර්මාණය කළේ ඔහුයි.


ප්‍රසිද්ධ වේදිකාව තුළ ඔබ පන්නරය ලබා ගත්තේ බන්ධුල විතානගේ නාට්‍යකරුවා වෙතිනුයි?

මෙහෙමයි. ප්‍රසිද්ධ වේදිකා නාට්‍ය කලාවට මම සම්බන්ධ වුණේ බන්දුල විතානගේ මහතාගේ ‘රෝමය ගිනිගනී’ තුළිනුයි. එහිදී මම සහාය වේදිකා පරිපාලක ලෙස කටයුතු කළා. ඒ අත්දැකීම මට ලබාදුන් පන්නරය අතිවිශාලයි. ප්‍රවීණ රංගන ශිල්පීන්, අධ්‍යක්ෂවරුන්, සංගීතවේදීන්, වෙස්ගැන්වීමේ ශිල්පීන් හරහා මා ලබාගත් දෑ ඇත්තෙන්ම අමිලයි. එයට පසුව මම කේ.බී. හේරත්ගේ, වාසුදේව, දෙවැනි මහින්ද සහ දෝන කතිරිනා යන නාට්‍යවලට සම්බන්ධ වුණා. ඒ අතර තමයි ජයලත් මනෝරත්න මහත්තයා කනේරු මල්හි රංගනයට මට ආරාධනා කළේ.


‘සාදය මාරයි සල්ලි හමාරයි’ නාට්‍ය සාර්ථක වීමට ඒ පන්නරය බලපෑවා නේද?

ඔව්. ඒ සියලුම අත්දැකීම් හරහා මා ලබාගත් දැනුම එයට සාර්ථක පිටිවහලක් වන්නට ඇති.


‘සාදය මාරයි සල්ලි හමාරයි’ එච්චර සාර්ථක ගමනක් යන බව ඔබ විශ්වාස නොකළා වෙන්නට පුළුවන්?

නැහැ. ‘සාදය මාරයි සල්ලි හමාරයි’ ලංකාවේ මිනිසුන්ගේ හිත්වලට තදට වදින බව මම දැනගෙන හිටියා. කිසි විටෙකවත් එහි සාර්ථකත්වය අහම්බයක් කියා මම කියන්නේ නැහැ. ‘රෝමය ගිනිගනී’ නාට්‍ය සමඟ සිටින හැම දවසකම වාගේ මම හිතුවේ රේ කුනීගේ නාට්‍යයක් මමත් කවදා හෝ කරනවාමයි කියලයි. එය මගේ හිතේ තිබුණු ලොකු බලාපොරොත්තුවක් වාගෙම ඉලක්කයක්.


 ඉලක්කය දර්ශනවාර තුන්සියයකට කිට්ටු වන තෙක් ගමන් කරයි කියලා නම් ඔබ හිතුවේ නැහැ?

වේදිකාවට මම ඒ ගෙන ආවේ අවුරුදු 20ක 21ක අත්දැකීමක්. අවංකවම ප්‍රේක්ෂකයා මෙය පිළිගනීවි කියන හැඟීම මා තුළ තිබුණා. ඒ වාගේම හිතා ගන්නට බැරි වේගයෙන් ‘සාදය මාරයි සල්ලි හමාරයි’ ජයග්‍රාහී ගමනකට මැදිවුණා.


 රංගන ජීවිතයේදී ඔබ පළමු තැන දෙන්නේ වේදිකා නාට්‍ය කලාවටයි?

වේදිකාව මට දුන් දෑ අපමණයි. හැබැයි මගේ පළමු මනාපය සිනමාවටයි. ‘නහී වේරේන වේරානි’ තුළින් ඒ මනාපයට මම ආරම්භය දුන්නා. මගේ වේලාවටද අවේලාවටද දන්නෙ නැහැ. තවම එය ප්‍රදර්ශනය වූයේ නැහැ. ‘මචං’ට පසුවද මම චිත්‍රපට කිහිපයක රඟපෑවත් ඒවාද තවම තිරගත වූයේ නැහැ.


 එයට හේතුව කුමක්ද?

මම හිතන විදියට එක් හේතුවක් වන්නේ සිනමාව කෙමෙන් කෙමෙන් ඇදවැටී යෑමයි. අද ගොඩ ගන්නට බැරි තරමට සිනමාව අගාධයකට වැටී හමාරයි. කවුරුත් ඒ ගැන කතා කරන්නේවත් නැහැ. වගකිවයුත්තන්ද නිහඬයි. ඇත්තෙන්ම යම් නිර්මාණකරුවන් පිරිසක් එක්ව කළ විශාල සාමූහික ක්‍රියාවක ප්‍රතිඵලයක් වූ සිනමා නිර්මාණයන් ප්‍රදර්ශනය නොවී මුළුගැන්ව තිබීම කනගාටුවට හේතුවක්.


 වගකිවයුත්තන් යැයි සඳහන් කළේ පැවතුණු රජයන් සහ පවතින රජය ගැනද?

මෙහෙමයි. ඕනෑම රජයක් බලයට පත්වෙලා එහා මෙහා හැරෙනකොටත් ඔවුන්ගේ කාලය ගෙවී හමාරයි. හැබැයි ඇදවැටී තිබෙන සිනමා කර්මාන්තය ගොඩ යන්නට නම් කාලය මදිවෙයි.


එතරමට කලකිරීමෙන් කතා කරන්නේ කවදාක හෝ සිංහල සිනමාව ගොඩ එතැයි අනුමානයක්වත් නැතිද?

අවුරුදු 20ක, 30ක පමණ කාලයක සිට මේ ඇදවැටීම සිදුවෙනවා. හැබැයි තවමත් නැග්මක සේයාවක්වත් පේන මානෙක නැහැ. ඉතින් මොන අනුමානද ඒ ගැන. ඇත්තෙන්ම මෙය ලොකු කනගාටුවක්.


රංගන ජීවිතයෙහි ඔබේ ඉදිරි බලාපොරොත්තු?

ඔබ අර කීවා වාගේ සිනමාව යම් තැනකට පැමිණියහොත් අඩුම ගණනේ එක චිත්‍රපටයක් අධ්‍යක්ෂණය කිරීමේ බලාපොරොත්තුවක් වාගේම තව වේදිකා නාට්‍ය අධ්‍යක්ෂණය කිරීමේ බලාපොරොත්තුවක්ද මා සතුව තිබෙනවා.


පණිවුඩයක් දෙනවා නම් කුමක් හෝ?

කොරෝන හදාගන්නේ නැතිව හැමෝම පරිස්සම් වෙනවා නම් හොඳයි. දෙසැරයක්ම මම කොරෝනා අවදානමට හසුවෙලා පී.සී.ආර්. පරීක්ෂණයට මැදිවුණා. සෞඛ්‍ය නීති පිළිපැදලා තමන් වාගේම අනිත් අයවත් ආරක්ෂා කරන්න කියලා තමා කියන්නට තියෙන්නේ.


දමයන්ති රේණුකා ප්‍රනාන්දු