මම කාටවත් චෝදනා කළේ නෑ , වෙච්ච දේ කිව්වා - කේ සුජීවා



ආදරය නිසා රිදුම් විඳින තැවුණ ඒ හිත ආයෙමත් ආදරය ගැන සුන්දර ගීතයක් ගායනා කරලා. ඒ තමයි ‘සුන්දර ගීයකි ආදරේ.’ ඇත්තටම ජීවිතේ ගීතයක් තරම් සුන්දරයිද කියලා සුජීවා මෙන්න මේ විදියට පුවත්පතක් සමඟින් පවසා තිබුනා. 


සුජීවා නවතම ගීතය ගැයුවෙත් ආදරය ගැනම නේද?


ඔව්, ආදරය හරිම සුන්දර දෙයක්නේ. ඒ නිසා ‘සුන්දර ගීයකි ආදරේ’ නමින් අලුත්ම ගීතය රසිකයන්ට තිළිණ කළා. ‘පාදා දුන් ආකාසෙ’ ගීතයට පස්සෙ මගේම නිෂ්පාදනයක් විදිහට කරපු ‘සුන්දර ගීයකි ආදරේ’ පහුගිය එකොළොස් වැනිදා හවස පහයි එකට එළිදැක්වූවා.



පහයි එකට ගීතය එළිදක්වන්න තීරණය කළේ නැකතක් බලලද?


නැහැ, මම නැකැත් බලලා ජීවිතේ දේවල් කරන කෙනෙක් නෙවෙයි. මේ වෙලාවට මේ ගීතය එළිදක්වන්න කියන එක ඉල්ලීමක් තිබුණා. ඒ ඉල්ලීමට අනුව මම ඒ ගිතය එම වෙලාවට එළිදැක්වූවේ.


රෝස් දක්වපු දස්කම ගැනත් අපි තව ටිකක් කතාකරමු…


ඇත්තටම රෝස් මේ ගීතයට සංගීත අධ්‍යක්ෂණය කරමින් ලංකාවේ ළාබාලම සංගීත අධ්‍යක්ෂවරු අතරට එක්වෙලා අවසන්. හැබැයි සමහරුන්ට ඒක ප්‍රශ්නයක්. රෝස්ට ඒ වගේ දෙයක් කරන්න පුළුවන්ද කියලා ප්‍රශ්න කරනවා. මම අහනවා ඇයි රෝස්ට ඒ වගේ දෙයක් කරන්න බැරි? එයාගෙ තාත්තා දක්ෂ සංගීත අධ්‍යක්ෂවරයෙක්, අම්මා සංගීත ශිල්පිනියක්. එයාට උපතින්ම ඒ හැකියාව උරුම වෙලා තියෙනවා. එයා හැදුනෙ සංගීත පරිසරයක. රෝස් කොහොමද මේ තරම් දෙයක් කරන්නේ කියලා අහන අයගෙන් මම පෙරළා අහන්න කැමතියි කෙනෙක්ට තවත් දරුවෙකුගේ දක්ෂතාවක් දැකලා සතුටු වෙන්න බැරි ඇයි කියලා. ඒ වගේ අය මේ ගීතය ඇහුවෙ නැතත් මට කමක් නෑ.


සුජීවා මේ හැම වැඩකටම එළියට බහිද්දි රෝස් හා අංජලීත් ඔබ සමග යනවද?


ගොඩක් වෙලාවට මම මගේ වැඩවලට ගියේ අංජලී එක්ක. එතකොට රෝස්ව ගෙදර තියලා යන්න බැරි නිසා එයාවත් එක්ක යනවා. ඒ නිසා අපි තුන්දෙනාම එකට යන්න පුරුදුවෙලා හිටියා. හැබැයි මේ දෙසැම්බර් මාසෙන් පස්සේ ඒ තත්ත්වය වෙනස් කර ගත්තා. පහුගියදා නත්තල් වැඩසටහනට මම රෝස්ව ගෙනිහින් ඇරලලා එයාට කිව්වා කාගෙවත් අදහස් අරන් නෙවෙයි, ඔයා ඔයාම විදිහට ඔය වැඩේට මුහුණ දෙන්න කියලා. රෝස්ට වගේම අංජලීටත් වැඩසටහන් තියෙනවා. මම ඒ දෙන්නව ඒවට තනියම ගිහින් මුහුණ දෙන්න හුරු කරමින් ඉන්නෙ.


පහුගිය දවස්වල විරහ වේදනාවයි චෝදනාවලටයි එකටම මුහුණ දෙන්න වුණා නේද?


මගේ ජීවිතයේ මම කාටවත් චෝදනා කරල නැහැ. හැබැයි මම මගේ ජීවිතයට වෙච්ච දේවල් කිව්වා. ඒ වෙලාවෙ ඇතැමුන් ඒක තමන්ට කරගත්තා. මම ප්‍රතිපත්තියක් විදිහට මගේ ජීවිතය ළඟින් කවුරුන් හෝ හිටියා නම් වේලක් හරි එකට කෑම ටිකක් කෑවා නම් ආදරයෙන් හිටියා නම් ඒ වගේ කෙනෙකුට ආපහු හැරිලා පහර ගහන්න තරම් පහත් තත්ත්වයට වැටෙන්නෙ නැහැ.



ඔබලාගේ ප්‍රශ්නය මාධ්‍ය තුළ මහ ඉහළින් කතා වුණා නේද?


මාධ්‍ය මගින් මට ලොකු හානියක් වුණේ නැහැ. සමාජ මාධ්‍ය මගින් මොනවා හරි දෙයක් වුණා නම් මට ඒවා අදාළ කරගන්නෙ නැහැ. මොකද මම ගායිකාවක් විදිහට මගේ රසික රසිකාවියන්ට මගේ නිර්මාණ ගැන කියනවා. ඔවුන් මම කරපු නිර්මාණයක දොස් දැක්කා නම් ඒ ගැන මම හිතනවා. හැබැයි මගේ පෞද්ගලික ජීවිතයේ මම කාටද ආදරය කරන්නෙ, මම කවුරු එක්කද ජීවත් වෙන්නේ, මම යන්නේ එන්නේ කොහෙද වගේ දේවල්වලට උත්තර දෙන්න මට වුවමනාවක් නැහැ.


සුජීවා තනි මවක් විදිහට මේ ගෙවන ජීවිතය ලොකු බරක්ද?


single parent කියන්නෙ තමන්ගේ දරුවාගේ සියලු වගකීම් දරන මවකට හෝ පියකුටයි. ඔව්, මම සිංගල් පේරන්ට් කෙනෙක් තමයි. හැබැයි ඒක මට බරක් නෙවෙයි. මගේ දරුවො දෙන්නා වෙනුවෙන් හැම දෙයක්ම කරන්නේ සතුටින්. මම ඇඳුමක් ගත්තත් ගන්නේ ඒ දෙන්නටත් අඳින්න පුළුවන් ඇඳුමක්.


සුජීවා වැඩිපුර ස්වර්ණාභරණ පලඳින ගායකාවක් ලෙස කැපී පෙනෙන්න උත්සාහ කරනවද?


මම කවදත් වැඩිපුර ස්වර්ණාභරණ පලඳපු කෙනෙක්. මං හිතන්නේ ස්වර්ණාභරණ එක්රැස් කරන එක හොඳ ආයෝජනයක්. කිසිම දෙයක් ස්ථිර නැති මේ ලෝකේ මාව ඊළඟ මොහොතේ නැතිවෙන්න පුළුවන්. ඒ වගේ මොහොතක මගේ දරුවෝ දෙන්නට අනිත් දේපළවලින් මුදලක් ලැබෙනකම් ජීවත් වෙන්න ක්ෂණික මුදල් බවට පත්කරගන්න පුළුවන් දෙයක් විදිහටයි මම ස්වර්ණාභරණ දකින්නේ. ඒ නිසා මගේ සල්ලිවලින් මම ස්වර්ණාභරණ මිලදී අරන් ඒවා පලඳිනවා. ඒවා මට කවුරුවත් අරන් දීපුවා නෙවෙයි.


සුජීවා නැවතත් ආදර සම්බන්ධතාවක් ඇතිකරගන්නෙ නැහැ කියන්නෙ ඇයි?


ආදරය කියන්නේ හරිම සුන්දර දෙයක්. ආදරය සුන්දරයි කියන එක මම හැමදාම කියනවා. හැබැයි අපට ආදරයේ සුන්දරත්වය විඳින්න හරියන කෙනා හමුවෙන්න ඕනෑ. අද මම බැඳීම්වලිත් තොර ඉතා නිදහස් දිවියක් ගත කරනවා. ඒ නිදහස මගේ හිත සතුටින් තියනවා. ඉතින් මම කැමැති නැහැ ආයෙමත් ඒ නිදහස, ඒ සතුට නැතිකර ගන්න බැහැ.


සුජීවා තව කෙනෙක් වෙනුවෙන් හම්බ කරපු කාලයක් තිබ්බද?


ඒ ප්‍රශ්නයට මම උත්තර නොදී ඉන්නවා.






මේ අපේ වංශ කතාවයි - රවීන්ද්‍ර රන්දෙණිය

 



සිනමාවක් බිහි වන්නට නම් රංගන ශිල්පීන් සිටිය යුතුය. නේක හැඩ රටා ප්‍රේක්ෂක හද සන්තානය තුළ සිත්තම් කරන්නට රංගන ශිල්පීන් අවැසිමය. විටෙක කුරුලු කොබෙයියන් සේ පෙම් කරමින්ද, විටෙක නයි මුගටින් සේ සටන් කරමින්ද විටෙක වී කුරුල්ලන් සේ අසාධාරණයට එරෙහිව නැඟී සිටිමින්ද ඔවුන් රිදී තිරය මත ගෙනහැර දැක්වූ සිනමාත්මක හැඩයන් අපරිමිතය. මෙරට කථානාද සිනමාවට වසර 75ක් සපිරෙන මේ මොහොතේ මෙරට සිනමාව එකලු කළ රංගන ශිල්පීන් ශිල්පිනියන් පිළිබඳව කතා කළ යුතුමය. ඒ සඳහා අප සම්මුඛ වූයේ පනස් වසරකට අධික කාලයක් මෙරට සිනමාවේ විශිෂ්ට චරිත රැසක් මැවූ රංගවේදී රවින්ද්‍ර රන්දෙණියටය. ‍ප්‍රධාන ප්‍රවාහයේ මෙන්ම අනු ප්‍රවාහයේ රංගන ශිල්පීන් පිළිබඳව ඔහුගේ මතකයට අනුව ඔහු බොහෝ දෑ පුවත්පතක් සමඟින් මේසේ පවසා තිබුනා. 


 සිනමාවේ රංගන ශිල්පීන් ගැන කතාබහ කඩවුණු පොරොන්දුවෙන්ම පටන්ගමු?


මෙරට සිනමාවේ මුල් කාලයේ රංගන ශිල්පීන්ගෙන් අපිට පැහැදිලිවම පෙනුණේ දකුණු ඉන්දියානු රංගන සම්ප්‍රදාය. මෙරට කථානාද සිනමාවේ පළමු චිත්‍රපටය වන කඩවුණු පොරොන්දුව චිත්‍රපටයේත් එකී දකුණු ඉන්දියානු රංගන ශෛලිය පෙනෙන්නට තිබුණා. අපේ අසහාය රංගන ශිල්පිනිය රුක්මණී දේවි අපේ සිනමා ලෝකයට බිහි වන්නේ කඩවුණු පොරොන්දුවෙන්. ඇය අසහාය වෙන්නේ ඇගේ රූපසොබාව, රංගන හැකියාව සහ උපරිම තලයක තිබුණි ඇගේ නිසා. ඇය ලැබූ ජනකාන්ත බව, පිළිගැනීම සහ ආදරය මම හිතන්නේ නැහැ මෙරට සිනමාවේ කිසිම රංගන ශිල්පියෙක් ලබාගෙන තියෙනවාද කියලා. රුක්මණී දේවියව දකින්න ඇගේ නිවෙස ඉදිරිපිට මිනිස්සු විශාල සංඛ්‍යාවක් රැස් වෙලා ඉන්න මට්ටමට ජනකාන්ත බවක් ඇයට තිබුණා. කඩවුණු පොරොන්දුව චිත්‍රපටයේ අනෙකුත් රංගන ශිල්පීන් ගත්තොත් එඩී. ජයමාන්න, බී.ඒ.ඩබ්ලිව්. ජනමාන්න, ජෙමිනි කාන්තා යන රංගන ශිල්පීන් නරඹන්නන්ගේ ප්‍රසාදයට ලක්වන හොඳ රංගන ශිල්පීන් බවට පත් වුණා. මගේ නිරීක්ෂණය අනුව හියුගෝ ප්‍රනාන්දු ඒ කාලයේ ශෛලීගත සම්ප්‍රදායෙන් මිදිලා එහි යම් මට්ටමක තාත්වික රංගනයක යෙදෙනවා.


 ඉන්පසුව මෙරට සිනමාවේ මුල් යුගය ගැන කතා කළොත්?


මුල් යුගයේ බිහි වුණු රංගන ශිල්පීන් අතර මාක් සමරනායක, ලැඩී රණසිංහ වගේ කීපදෙනෙක් හිටියා භාවාතිශය නොවූ කැපී පෙනෙන රංගන ශෛලියක් තිබුණු. අරුණ ශාන්ති, ස්ටැන්ලි පෙරේරා, ප්‍රේම්ජයන්ත් ආදී රංගන ශිල්පීන් ඒ යුගයේ විශාල ජනප්‍රසාදයක් දිනාගත් ජනප්‍රිය නළුවෝ. ඒ යුගයට ගැලපෙන රංගන කාර්යය ඔවුන් සාර්ථකව ඉටු කළා. ඔවුන්ට ලොකු ප්‍රේක්ෂක ආදරයක් තිබුණා. එදිනෙදා සමාජ ජීවිතයේදී ඒ වෘත්තියට ආඩම්බරයක් එන ආකාරයට ඔවුන් තමන්ගේ වටිනාකම රැකගත්තා.


ඒ කාලේ රංගන ශිල්පීන් උත්සවයකට පවා පැමිණෙන්නේ ඉතාම ක්‍රමවත් ලෙස හැඳපැලඳ ගෙන. රුක්මණී දේවි ප්‍රසිද්ධියේ සාප්පු සවාරියක්වත් යනවා දැකපු කෙනෙක් ඉන්නවා ඇති කියලා මම හිතන්නේ නැහැ. ඒ කාලේ රංගන ශිල්පීන් සුලභ වුණේ නැහැ. සිනමා නළුවෙක් කියන සමාජයේ ලැබෙන ඉහළ තැන සහ පිළිගැනීම තමන් රැකගත යුතුයි කියලා ඔවුන් නිතරම හිතුවා.


ඉන්පසුව සිනමාව මත සිත්තම් වන රංගන ප්‍රතිරූ පිළිබඳ අවධානය යොමු කළොත්?


රේඛාව චිත්‍රපටය බිහිවෙන්නේ 1956දී. අධිතාත්වික රංගනයෙන් බැහැර වෙලා වර්තමානයේ පිළිගැනෙන තාත්වික රංගනය මුල්වරට අන්තර්ගත වන්නේ ආචාර්ය ලෙස්ටර් ජේම්ස් පීරිස්ගේ රේඛාව චිත්‍රපටයේ. ඩී.ආර්. නානායක්කාර, ශේෂා පළිහක්කාර, ආනන්ද වීරකෝන්, මල්ලිකා පිලපිටිය වැනි රංගන ශිල්පීන් මතක් කරන්න ඕනේ. රේඛාව චිත්‍රපටයෙන් අද වන තෙක් කතා කළ හැකි අග්‍රගණ්‍ය රංගන ශිල්පිනියක් බිහි වනවා. ඒ අයිරාංගනී සේරසිංහ. එතුමිය අපේ සිනමාවේ මහේෂිකාව ලෙස හඳුන්වන්න මම කැමැතියි. එදා සිට අද දක්වා අපේ රංගන ක්ෂේත්‍රයට කළ දීර්ඝකාලීන දායකත්වය සහ ජාතික මට්ටමෙන් පිළිගැනෙන මහා කලාකාරිනියක් ලෙස සිනමාවේ කළ රංගනයන් අගය කළ යුතුමයි. හැට දශකය වන විට හුදෙක් විනෝදාස්වාදය සඳහා පමණක් නොවෙයි, සිනමාව කියන මාධ්‍යයට සමීප වෙලා එය හදාරන, විචාර විවේචන කරන මට්ටමට පැමිණි ප්‍රේක්ෂකයන් පිරිසක් බිහිවුණා. එයට හේතුව වුණේ ලෙස්ටර් ජේම්ස් පීරිස් ඇතුළු විශිෂ්ට අධ්‍යක්ෂවරු රැසක් මෙරට සිනමාවට බිහි වීම. ඔවුන් හොඳ රංගන ශිල්පීන් රැසක් සිනමාවට හඳුන්වා දුන්නා. හැටේ දශකය කියන්නේ ජෝ අබේවික්‍රම, ගාමිණී ෆොන්සේකා, මාලිනී ෆොන්සේකා, ටෝනි රණසිංහ, ස්වර්ණා මල්ලවආරච්චි වැනි අග්‍රගණ්‍ය රංගන ශිල්පීන් රැසක් සිනමාවට බිහි වුණු යුගයක්. අදටත් සිනමාවේ විශිෂ්ටයන් ලෙස සැලකිය හැකි බොහෝ අයගේ ආගමනය සිදුවුණේ හැටේ දශකයේදී. ඔවුන්ගේ ආගමනයට ඊට පෙර යුගයේ සිටි රංගන ශිල්පීන් තමන්ගේ ජනකාන්ත මට්ටම පවත්වාගැනීම සහ ක්ෂේත්‍රය තුළ ඔවුන්ගේ පිළිගැනීම හේතුවක් වුණා.


 

හැටේ දශකයේ බිහි වුණු විශිෂ්ට රංගන ශිල්පීන් ගැන කතා කරමු?


ගාමිණී, ජෝ ප්‍රමුඛ විශිෂ්ට රංගන ශිල්පීන් රැසක් මේ සමයේ බිහිවුණා. එතැනින් ජෝ අබේවික්‍රම ප්‍රධාන තැනක් ගන්නවා. මගේ පළමු චිත්‍රපට පහේම එතුමා සමඟ රඟපාන්න මම වාසනාවන්ත වුණා. ඔහු සමඟ වැඩ කරද්දි රංගන පිළිබඳ විශ්වවිද්‍යාලයකට ගියා වගේ හැඟෙනවා. ඔහුගේ විශිෂ්ට රංගනය මෙන්ම ඔහුගේ සැහැල්ලු බව, නිහතමානීකම ඉතාම සුවිශේෂයි. දර්ශන තලයේදී විහිළු තහළු කරගෙන ඉන්න ජෝ මොහොතකින් කැමරාව පැත්තට හැරිලා අවමඟුලකට දින ගණනක් වැළපුණු කෙනෙකුගේ චරිතය රඟපානවා. ඔහුට එවැනි අසමාන දක්ෂතාවක් තිබුණා. ඔහු චරිත ගොඩනැඟුවේ සැබෑ ජීවිතයේ අධ්‍යයනයන් සහ නිරීක්ෂණයන් තුළින්. වැලිකතරේ "ගෝරිං", බඹරු ඇවිත් "ඇන්ටනී", දෑස නිසා "නිරුධක", බැද්දේගම "සිළිඳු" පුරහඳ කළුවර "වන්නිහාමි" ආදී ඔහු රඟපෑ එකම එක චරිතයකවත් අපි ජෝ අබේවික්‍රමව දුටුවේ නැහැ. ඒ තමයි රංගනය. ඒ හා සමානවම ගෞරවයකින් කතා කරන්න ඕනේ අපේ සිනමා සක්විති ගාමිණී ෆොන්සේකා ගැන. ඔහුගේ රංගනය පිළිබඳ අමුතුවෙන් කතා කරන්න අවශ්‍ය නැහැ. එය අදත් ඉන්න කුඩා දරුවාගේ සිට මහල්ලා දක්වා හැමෝම දන්නවා. ගාමිණී ෆොන්සේකාට තිබුණා අසාමාන්‍යය ප්‍රතාපවත් බවක්. ඔහු හැම චරිතයකටම ඇතුළු වෙන්නේ මහා ශක්තියක් සමඟ. ඒ ප්‍රභාව නිසා ඔහුගේ චරිතය වටා ප්‍රේක්ෂකයන් සියලුදෙනා එක් වෙනවා. අන් කවරෙක් සිටියත් ඔහුගේ ආලෝකයෙන් මැකිලා යනවා. ගාමිණී ෆොන්සේකා තුළ කැපී පෙනෙන විශාල ශක්තියක් තිබුණා සාමාන්‍ය කෙනෙක්ට වඩා. ඉබේම සියලුදෙනා ඔහු වටා එක්වන මට්ටමට පෞරුෂයක් තිබුණා. ඔහු දැන හෝ දැන ඒ ශක්තිය සහ පෞරුෂය උපරිමයෙන් ඔහුගේ රංගනයට භාවිත කළා. මේ ලෝකෙ කිසිම නළුවෙක් සමඟ සන්සන්දනය කරන්න තබා එසේ සිතියවත් නොහැකි මට්ටමේ ලෝක පූජිත චරිත රැසකට ඔහු පණ පෙව්වා. නිධානය "විලී", පරසතුමල් "බොනී මහත්තයා", කස්තුරි සුවඳ "කමල්", යුගාන්තය "සයිමන් කබලාන" ආදි ඔහු රඟපෑ හැම චරිතයකදීම අපි කවදාවත් ගාමිණී ෆොන්සේකාව දුටුවේ නැහැ. පරසතු මල් චිත්‍රපටයේ බොනී මහත්තයා නම් මැදිවියේ පුද්ගලයා ඔහුගේ අයහපත් හැසිරීම නිසා අකාලයේ මියෑම දක්වා ඒ බරපතළ චරිතය ඔහුම අධ්‍යක්ෂණය කරමින් ඔහුම රඟපාන විට ගාමිණී ෆොන්සේකාට අවුරුදු තිහක්වත් නැහැ. ඔහුගේ ප්‍රතිභාව සහ පරිකල්පන ශක්තිය පිළිබඳ අවිවාදිතයි. නළුකම කියන්නේ අන්න එයට. ඔහු චිත්‍රපට සියයකට අධික සංඛ්‍යාවක රඟපෑවා. ඒ හැම චිත්‍රපටයකම ඔහුගේ චරිත ගත්තොත් ඒවා වෙන් වෙන් වශයෙන් ගෙන දීර්ඝ ලෙස සාකච්ඡා කළ හැකි මට්ටමේ ගැඹුරු චරිත. සිනමාවේ දැවැන්තම චිත්‍රපට කීපයක් අධ්‍යක්ෂණය කරමින් ඔහු අධ්‍යක්ෂණයට දැක්වූ දක්ෂතාවය පිළිබඳවත් අගය කළ යුතුයි. නිධානය චිත්‍රපටයේ ඔහුගේ රංගනය ලෝකයේ කිසිම රංගන ශිල්පියෙකු හා සසඳන්නට නොහැකි මට්ටමේ සුවිශිෂ්ට රංගනයක්. ඒ වගේම අපේ ආදරණීය නළුවා ටෝනි රණසිංහව මතක් කරන්න ඕනේ. ඔහුට සිනමාව ජයගන්න වෙන කිසිදු දෙයක් අවශ්‍ය නැහැ, ඔහුගේ ප්‍රසන්න බවම සෑහුණා. දීර්ඝ කාලීනව වේදිකාවෙන් අත්දැකීම් ලබාගෙන ඒ දක්ෂතා ඔහු සිනමාවට එක් කළා. එකල සිටි ජනප්‍රියම කඩවසම්ම නළුවා ටෝනි. විශාල රංගන හැකියාවක් තියෙන කෙනෙකුට කඩවසම් බව සහ ප්‍රියමනාප බව එකතු වුණාම තවත් වෙන මොනවද අවශ්‍ය? දොලොවක් අතර, රන්සළු, දහසක් සිතුවිලි, දුහුළු මලක්, ගම්පෙරළිය ඇතුළු රංගනයෙන් දායක වුණු හැම චිත්‍රපටයකම ඔහු පෙන්වූ හැකියාව අගය කළ යුතුයි. මේ යුගයේ රංගන ශිල්පීන් ගැන කතා කරන විට විජය කුමාරතුංග ගැන කතා නොකර කොහොමද? ඔහු අපේ සිනමාවේ සදා කුමාරයා. මම "ඊඩඥ ර්‍ථපඪදජඥ ධට ඉඪදඩචතච ඛ්ඪදඥථච" කියලා ඔහුව හඳුන්වන්න කැමැතියි. ඔහු ලබාගත් ජනප්‍රියත්වය ඒ සමයේ පමණක් නොවෙයි, අද ඉන්න නළුවෙක්ටවත් හිතාගන්න නොහැකියි. ඔහුට පවතින නිසඟ ආකර්ෂණය ඔහු උපතින්ම ගෙන ආ එකක්. ඔහුගේ හිනාව, කතාබහ ආදී හැම ඉරියව්වක්ම බොහොම ප්‍රියමනාපයි, ආකර්ෂණීයයි. ඔහුට තිබුණේ හරි සංග්‍රහශීලී පෞරුෂයක්. ඒ වගේම ඔහුට ඉතාම ජනප්‍රිය තලයේ චිත්‍රපට ගණනාවක් ලැබුණා. ඔහු රංගනයෙන් මොන තරම් ලස්සන සිතුවම් රිදී තිරයේ මැව්වාද කියලා ඔහුගේ ඒ චරිතවලින් පෙනෙනවා. විජය ගැන කතා කළ පසු අපේ නිළි රැජණ මාලිනී ෆොන්සේකා ගැන කතා නොකර කොහොමද? මගේ හොඳම රංගනය සහිත චිත්‍රපට ගණනාවක් ඇය සමඟ රඟපෑවේ. මාලිනීගේ රංගන හැකියාව විස්තර කරන්න පොත් ගණනාවක් වුණත් ලියන්න පුළුවන්. ඇගේ රංගනය තුළ තිබුණු පුදුමාකාර දෙය වන්නේ දර්ශන තලයේදී මාලිනී ෆොන්සේකා නොසිටීම. එතැන තියෙන්නේ ඇයගේ චරිතයම පමණයි. ඇයගේ සුන්දර බව අසීමිතයි. එවැනි සුන්දර මුහුණක් අපේ සිනමාවේ වෙන නැහැ. ඒ සුන්දර මුහුණෙන් ඉතාම සියුම් හැඟීම් සමුදායක් නිරූපණය කළ හැකි දක්ෂතාවක් ඇය තුළ තිබුණා. අග්‍රගණ්‍ය කලාශිල්පිනියකට තිබිය යුතු සියලුම දෑ ඈ සතුව තියෙනවා. ඒ වගේම මට ස්වර්ණා මල්ලවආරච්චි ගැන කතා නොකර සිටිය නොහැකියි. ඇය අපේ සිනමාවට බිහිවුණු විශිෂ්ටතම රංගන ශිල්පිනියක්. පොළොවේ පය ගහලා ජීවත් වන, පීඩිත වින්දිත පංතියේ ගැහැනිය ඇය සැමදා චරිත තුළින් මනාව පිළිබිඹු කළා. ස්වර්ණා දඩයම චිත්‍රපටයේ මා සමඟ රඟපෑ හැටි ගැන මට පොතක් ලියන්න පුළුවන්. ඒ තරමට ඇයගේ දක්ෂතාව විස්තර කරන්න පුළුවන්. පුණ්‍යා හීන්දෙණිය, අනුලා කරුණාතිලක, සන්ධ්‍යා කුමාරි, ජීවරාණි කුරුකුලසූරිය, විජිත මල්ලිකා, ස්වර්ණා කහවිට, ශ්‍රියානි අමරසේන, සුවිනීතා වීරකෝන් ආදී මේ සියලුදෙනාම සිනමාවේ දෙවැනි දශකයේ ආරම්භ වන විට ජනප්‍රියත්වයේ හිනිපෙත්තටම ගිය රංගන ශිල්පිනියන්. නම් සඳහන් කළ නොකළ මේ හැම රංගන ශිල්පියෙක් ශිල්පිනියකගේම දායකත්වයෙන් සිනමාව කියන මහා කර්මාන්තයේ බිහිවෙන්නේ. 70, 80 දශකය කියන්නේ සිනමාවේ ස්වර්ණම යුගය. මේ සමයේ බිහි වුණු රංගන ශිල්පීන් රාශියක් ඉන්නවා.


70 දශකය මට කවදාවත් අමතක කළ නොහැකියි. මොකද මමත් සිනමාවට පයගහන්නේ 70 දශකයේදී. 70, 80 දශකය ගැන කතා කළොත් ඉතා දීර්ඝ රංගන ශිල්පීන් පෙළක් පෙළගස්වන්න පුළුවන්. ඔවුන් සියලුදෙනා නම් පෙළගස්වන්න අපහසු නිසා ප්‍රධාන ප්‍රවාහයේ රංගන ශිල්පීන් සිහිපත් කරන්නම්. තිස්ස විජේසුරේන්ද්‍ර, ජීවන් කුමාරතුංග, ජයලත් මනෝරත්න, විජය නන්දසිරි, නීටා ප්‍රනාන්දු, වීණා ජයකොඩි, අනෝජා වීරසිංහ, ගීතා කුමාරසිංහ, සබීතා පෙරේරා, වසන්ති චතුරාණි යන රංගන ශිල්පීන් ශිල්පිනියන් පිරිසක් ඉන්නවා.


 චරිතාංග රංගන ශිල්පීන් ගැන වෙනම කතා කළ යුතුයි.


අපි හැමදාම ප්‍රධාන ප්‍රවාහයේ රංගන ශිල්පීන් ගැන පමණයි කතා කරන්නේ. නමුත් ප්‍රධාන චරිත රඟ නොපෑමුත් සිනමා නිර්මාණවලට සමහර අවස්ථාවල ප්‍රධාන චරිතයටත් වඩා එහා ගිය රංගන ප්‍රතිභාවක් දැක්වූ චරිතාංග රංගන ශිල්පීන් රාශියක් අපේ රටේ ඉන්නවා. සිරිල් වික්‍රමගේ, අමරසිරි කලංසූරිය, විමල් කුමාරද කොස්තා ඇතුළු අතිදක්ෂ රංගන ශිල්පීන් රාශියක් ඉන්නවා. සිරිල් වික්‍රමගේ කියන්නේ වෙනම දක්ෂතාවක් තියෙන රංගන ශිල්පියෙක්. ඔහුගේ චරිත එකිනෙක විශ්ලේෂණය කළ විට ඒ චරිත කොයිතරම් බරයිද ගැඹුරුයිද ප්‍රශස්තයිද කියලා පෙනෙනවා. ඒ වගේම අමරසිරි කලංසූරිය සිහිපත් කරන්නම ඕනේ. තාරුණ්‍යයේ පවතින කෙළිලොල් දාංගලය, දඩබ්බරකම ඔහුට තරම් වෙන කාටවත් කළ නොහැකියි. ඔහුගේ දඟකාරකම හුරුබුහුටිකම හරිම ආකර්ෂණීයයි. විමල් කුමාර ද කොස්තාගේ තිබුණු රංගන ශෛලිය වෙන කිසිවෙකුට තිබුණෙ නැහැ. ඔහුගේ ඒ අමුතු රංග ශෛලිය එනතෙක් ප්‍රේක්ෂකාගාරයේ සියලුදෙනා බලාගෙන ඉන්නේ. ඉතා දීර්ඝ නම් පෙළක් පෙළගස්වන්න වෙනවා චරිතාංග රංගන ශිල්පීන්ගේ ලැයිස්තුවට. එය අපහසු නිසා මම සමස්තයක් ලෙස ඔවුන්ගේ දක්ෂතා පිළිබඳ කතා කරන්නම්. එදා සිනමාව තුළ සිටි චරිතාංග රංගන ශිල්පීන් නිසා තමයි චිත්‍රපටය මායාවක් නොවෙයි යථාර්ථයක් බවට ප්‍රේක්ෂකයෝ තේරුම් ගත්තේ. ඔවුන්ගේ රංගනය ඒ තරම් ගැඹුරුයි. ඒ වගේම ඔවුන් චරිත පිළිබඳව ගැඹුරු අධ්‍යයනයකින් පසුවයි රංගනයේ යෙදෙන්නේ. සමහර රංගන ශිල්පීන් චරිත පිළිබඳව කතා කරන විට අපට එය විශ්වවිද්‍යාල දේශනයක් මට්ටමට ගැඹුරුයි. අපේ සමහර රංගන ශිල්පීන්ගේ දක්ෂතා ලෝක සිනමාවේ විශිෂ්ට රංගන ශිල්පීන් සමඟ සැසඳීය හැකි මට්ටමට තිබුණා. 70, 80 දශකය වනවිට ආසියානු කලාපයේ වඩා හොඳ සිනමාත්මක චිත්‍රපට හැදුණේ අපේ සිංහල සිනමාවේ. ඒ තත්ත්වයට අපේ සිනමාව රැගෙන එන්න මේ රංගන ශිල්පීන් කොයිතරම් දායක වුණාද කියලා ඔබට සිතාගත හැකිද? ඔවුන් නිසා අපේ සිනමාවට ගෞරවණීය බවක් ලැබුණා. අදටත් මම රංගන වෘත්තියට මේ තරම් ගරු කරන්නේ ඒ නිසාමයි.


 90 දශකය කියන්නෙ දක්ෂ රංගන ශිල්පීන් බිහිවුණු අවධියක්.


අනූව දශකය කියන්නේ කමල් අද්දරාරච්චි, ශ්‍රියන්ත මෙන්ඩිස්, මහේන්ද්‍ර පෙරේරා, ජක්සන් ඇන්තනී, සංගීතා වීරරත්න, දිල්හානි අශෝකමාලා, යශෝධා විමලධර්ම, දමිතා අබේරත්න ඇතුළු රංගන ශිල්පීන් ශිල්පිනියන් රාශියක් මෙරට සිනමාවේ කැපී පෙනෙන දක්ෂතා දැක්වූ යුගයක්. ඔවුන් සියලුදෙනාට උපතින් ලද හොඳ රංග ප්‍රතිභාවක් තිබුණා. ඔවුන් සියලුදෙනාම ආවාට ගියාට චරිත රඟපෑවේ නැහැ. හැම චරිතයකම ඔවුන්ගේ ලොකු වෙනස්කමක් පෙනෙනවා. චරිතයකට සූදානම් වීමේ සිට ඔවුන්ගේ කැපවීම, දක්ෂතාව සහ රංගන වෘත්තියට එක් කළ අභිමානයත් අගය කළ යුතුයි. ටිකෙන් ටික වර්තමානයට එන විට එවැනි අගය කළ යුතු රංගන ශිල්පීන් අඩු වෙමින් පවතින එක කනගාටුවට කාරණාවක්.


 

දුෂ්ටයන්, එසේත් නැති නම් ප්‍රතිවීරයන් නැතිව සිනමාවක් බිහි වන්නේ නැහැ.

අපේ සිනමාවේ ප්‍රතිවීර චරිත ගැන කතා කරන විට ඩොමී ජයවර්ධන මහත්මයාව අමතක කරන්න බැහැ. ඔහු තමයි අපේ හිටපු කඩවසම්ම දුෂ්ටයා. මාක් සමරනායකත් සිහිපත් කරන්න ඕනේ. ඉන් පසු පරම්පරාවේ විශිෂ්ටයා රොබින් ප්‍රනාන්දු. සටන් කලාවට ඔහුට තිබුණු නිපුණත්වය නිසා ප්‍රතිවීර චරිත මැනවින් නිරූපණය කරන්න හැකි වුණා. ඒ වගේම පියදාස ගුණසේකර ඉතා බරපතළ දුෂ්ට චරිත කරපු කෙනෙක්. ඒ වගේම විල්සන් කරූ, රෙක්ස් කොඩිප්පිලි, රවීන්ද්‍ර රන්දෙණිය (සිනහා වෙමින්), ටෙඩී විද්‍යාලංකාර යන රංගන ශිල්පීන් තමන්ගේ ප්‍රතිවීර කාර්ය කැමරාව ඉදිරිපිට හරියටම කළා කියලා මම හිතනවා. අපේ සිනමාවේ සියලුම වීරයන් වීරයන් බවට පත් වුණේ ප්‍රතිවීරයන් නිසා. කැමරාව ඉදිරිපිට වීරයාගෙන් ගුටි කාලා, ප්‍රේක්ෂක අප්‍රසාදය මැද, චිත්‍රපටයෙන් පසුව ඔවුන්ගෙ බැණුම් ටිකත් අහගෙනයි ප්‍රතිවීර චරිත කළ රංගන ශිල්පීන් සිටිය යුත්තේ. එය ලේසි පහසු කටයුත්තක් නෙමෙයි. ඒ වගේම අපේ ගාමිණී ෆොන්සේකා වගේ වීරයන්ගෙන් ලැබෙන ගුටිත් එසේ මෙසේ ඒවා නෙමෙයි. ඒ වගේම රූපගත කිරීම්වලදී ගුටි කාගෙන, මාරාන්තික තුවාල ලබාගෙන, වෙඩි කාගෙන ජීවිත පවා පරදුවට තැබූ ප්‍රතිවීර රංගන ශිල්පීන් අපේ සිනමාවේ ඉන්නවා. දියුණු සිනමාවේ නළු නිළියන්ගේ රංගන කාර්යය පහසු කරන්න, අවදානම අඩු කරන්න මොනතරම් උපක්‍රම යොදනවාද? තාක්ෂණිකව වගේම මානව සම්පත්වලින්. දියුණු රටවල රංගන ශිල්පීන් බහුතරයකට තමන්ගේ ස්වරූපයට සමාන තවත් කෙනෙක් ඉන්නවා අවදානම් ජවනිකා රූගත කරන්න. ඒත් අපේ රටේ ඒවා භාවිතා කළේ ඉතාම අවම වශයෙන්. සටන් ජවනිකාවලදී පවා ඔවුන් ඒ අවදානම ගත්තා. මගේ ජීවිතයේදී මම දුවන කෝච්චියේ වහල උඩට නැඟලා තියෙනවා, කළු ගඟේ පාලමේ ඉඳලා කිසිම ආරක්ෂාවක් නැතිව ගඟ මැද්දට පැනලා තියෙනවා, සරදියෙල් රූගත කරද්දි පිට විනිවිද යන්න මාරාන්තික වෙඩි පහරක් කාලා තියෙනවා. නමුත් කිසිදු වෙනත් රංගන ශිල්පියෙක් ඒ සඳහා භාවිත කරලා නැහැ. මම වගේම අනිත් හැම රංගන ශිල්පියෙක්ම එහෙමයි. මේ සටන් නළුවන් කිසිවෙකුත් මේ වෘත්තිය අවදානම් කියලා පසුබෑවේ නැහැ.


හාස්‍ය රංගන ශිල්පීන් පිළිබඳ කතා නොකළොත් එය මේ කතාබහට අඩුවක්.


විකට රජවරු හිටපු සිනමාවක් අපිට තිබුණා. එඩී ජයමාන්න මහත්තයාගෙන් පටන් අරගෙන දොන් සිරිසේන, බී.එස්. පෙරේරා, බර්ටි ගුණතිලක මේ හැමෝම සිහිපත් කරන්න් ඕනේ. ඒ වගේම දීර්ඝ කාලයක් හාස්‍ය රංගන ශිල්පියෙකු ලෙස රටක් පිනවූ කෙනෙක් ප්‍රෙඩී සිල්වා කියන්නේ. ප්‍රෙඩී සිල්වා හිටපු නැති චිත්‍රපටයක් නැති තරම්. ඒ කාලේ මණ්ඩල පහේ තිරගතවුණු චිත්‍රපටි පහේම ප්‍රෙඩී සිල්වා ඉන්නවා. ඒ වගේම ජෙමිනි කාන්තා, ලැටීෂියා පීරිස් ආදී අතිදක්ෂ හාස්‍ය රංගන ශිල්පිනියන් පිරිසකුත් අපිට හිටියා. ටෙනිසන් කුරේ සහ බන්දු සමරසිංහවත් අපට අමතක කළ නොහැකියි. බන්දු කියන්නේ වෙනම තමන්ට අනන්‍ය හාස්‍ය ඉරියවු තිබුණු රංගන ශිල්පියෙක්. ඊට හාත්පසින්ම වෙනස් ආකාරයකට ප්‍රේක්ෂකාගාරය හිනස්සන රංගන ශිල්පියෙක් ටෙනිසන් කුරේ. ප්‍රේක්ෂකාගාරය සිනා සාගරයේ ගිල්වන එක ලේසි පහසු නැහැ. සාමාන්‍ය පිළිගැනීමට අනුවත් අමාරුම රංගනය තමයි හාස්‍ය රංගනය. ඉතාම දක්ෂ ලෙස විනාඩි දෙකක ජවනිකාවකින් වුණත් මිනිස්සු හිනස්සන්න පුළුවන් රංගන ශිල්පීන් හිටියා වගේම ඔවුන්ගෙන් අපේ සිනමාවට ලොකු දායකත්වයක් ලැබුණා.


 අනූව දශකයෙන් පසුව බිහි වුණු රංගන ශිල්පීන් ගැන ඔබේ අදහස?


දෙදාහා දශකයේදී සිනමාව අර්බුදයකට ගමන් කළා. මේ කාලයේ සිනමා කෘති බිහිවීම අඩු වුණා. ඒ වගේම රූපවාහිනිය, පරිගණක, දුරකතන ආදී වශයෙන් වෙනත් මාර්ගවලින් විනෝදාස්වාදය සඳහා සිනමා ප්‍රේක්ෂකයන් යොමු වුණා. ඒ වගේම සුනාමිය, යුද්ධය වගේ විවිධ ව්‍යසනවලට අපි මුහුණ දුන්නා. මේ සියලු දේ මධ්‍යයේ ඉතා අපහසුවෙන් මෙරට සිනමාව පවත්වාගෙන ගිය රංගන ශිල්පීන් පිරිසක් අපිට ඉන්නවා. පසුගිය දශක දෙක තුළ ඉතා විශිෂ්ට අධ්‍යක්ෂවරු, දක්ෂ රංගන ශිල්පීන් රැසක් බිහි වුණා. ප්‍රධාන වශයෙන් හොඳ නිර්මාණ බිහි නොවීම රංගන ශිල්පීන්ට අවාසිදායක වුණා. ඔවුන්ට හොඳ නිර්මාණයක් නැතිව රංගන දක්ෂතා පෙන්විය නොහැකි වුණා. එය නව පරපුරේ රංගන ශිල්පීන්ට වුණු අසාධාරණයක් ලෙස මම දකිනවා. නව පරපුරේ ඉතාම දක්ෂ රංගන ශිල්පීන් රැසක් ඉන්නවා. හොඳ චිත්‍රපට හැදුණා නම් ඔවුන්ට දක්ෂ රංගන ශිල්පීන් වන්නට හැකියාව තියෙනවා.


 සිනමා රංගන ශිල්පියෙකු ලෙස ඔබට අවසාන වශයෙන් යමක් කියන්න ඇති?


කැමරාව ඉදිරිපිට ආකර්ෂණීයව පෙනී ඉඳලා දෙබස් කීමට එහා ගිය බොහොම ගැඹුරු හැදෑරීමක් සහිත කාර්යයක් රංගනය කියන්නේ. හැම රංගන ශිල්පියෙක්ටම තමන් සතු අනන්‍යතාවක් තිබුය යුතුයි. හොඳම රංගන ශිල්පීන් හැමකෙනෙක්ටම පාහේ එකිනෙකාට වෙනස් වුණු සුවිශේෂත්වයක් සහ ප්‍රතිභාවක් තියෙනවා. ඒ තැනට එන්න නම් අනිවාර්යයෙන්ම හැදෑරීමක් තිබිය යුතුයි. සිනමා රංගන ශිල්පියෙක් වන්න පහසු නැහැ. දීර්ඝ කාලයක් චරිතයට පුහුණුවීම් කරලා තමන්ව අමතක කරලා තමන්ගෙ පෞද්ගලික වටපිටාවේ සියලුම දේවල් අමතක කරලා චරිතයකට කැප වෙන එක, අවදානම් ගන්න එක ලේසි පහසු නැහැ. සිනමා චරිත විශිෂ්ට ලෙස නිරූපණය කරන එක ලේසි පහසු නැහැ. කොයිතරම් චරිතයකට මහන්සි වුණත් චිත්‍රපටය තිරගත වූ පසුව එන විචාර විවේචන දරාගෙන ඉන්න එක පහසු නැහැ. මේ වගේ රටක ඉතාම අඩු පහසුකම් යටතේ, ඉතාම අවම ගෙවීම් යටතේ රංගන ශිල්පියකු ලෙස ජීවත් වීම ලේසි පහසු නැහැ. එදා සිට අද දක්වා මේ ආකාරයෙන් අපේ සිනමාව පවත්වාගෙන එන්න වෙහෙසුණු, කැප වුණු සියලු රංගන ශිල්පීන්ට මගේ ආචාරය, ගෞරවය සහ ආදරය පුද කරන්න මේක අවස්ථාවක් කරගන්නවා.


 නිර්මාණි බණ්ඩාරනායක






කොටුවෙලා නෙවෙයි , ලැබෙන්නෙම මැර චරිත - පසිඳු සිංහාරගේ




මහාපොළොව සමග පොරබදිමින් ජීවිතය ගොඩයන්න සිහින දකින ඔහු රංගන ශිල්පියෙක්, හඬකැවීම් ශිල්පියෙක්, ඒ වගේම නිවේදකයකු ලෙසට කටයුතු කරන පසිඳු සිංහාරගේ. මේ වන විට ටෙලිනාට්‍ය රැසක චරිත නිරූපණය කර ඇති පසිඳු, මේ දිනවල විකාශය වන රේස්, ගුග්ලි ටෙලිනාට්‍ය හරහාද ඔහුගේ දක්‍ෂතාවයන් අපිට දැකගන්නට පුළුවන්. ඉතින් මහපොළොවටත්, කලාවටත්, හදවතින් ආදරය කරන මේ සොඳුරු මිනිසා ප්‍රථම වතාවට මාධ්‍ය කතාබහකට ‘මව්රට’ අපි සමග හඬ අවදි කළා.


පසිඳු ඔබ ගැන දැනගන්න ගොඩදෙනෙක් කැමැත්තෙන් ඇති. කියමුකො ඔබ ගැන මුලින්ම විස්තර ටිකක්..?

මම පසිඳු සිංහාරගේ. මගේ ගම්පළාත් ආටිගල, හංවැල්ල. පාසල ගියේ ආටිගල කනිෂ්ඨ විiාලයට. උසස් අධ්‍යාපනය සඳහා හංවැල්ල මායාදුන්න විiාලයට ගියා. මම විවාහකයි. දැනට ගල්ගමුව ප්‍රදේශයේ තමයි පදිංචිය.


පසිඳුගේ මේ දවස්වල කලාකටයුතු කොහොමද..?

මේ දවස්වල ටෙලිනාට්‍ය දෙකක වැඩ කරගෙන යනවා. මේ දිනවල ස්වර්ණවාහිනියේ විකාශවන ‘ගුග්ලි’ ටෙලිනාට්‍යයේ ‘චූටියා’ ලෙසට රඟපානවා. ඒ වගේම ජයසේන අපොන්සු අධ්‍යක්‍ෂණය කරන ‘සන්තෑසියේ ලන්තෑරුම’ ටෙලිනාට්‍යයේ ‘උංගා’ ලෙසට රඟපානවා. ඒ වගේම ‘රේස්’ ටෙලිනාට්‍යයටත් සම්බන්ධ වෙලා වැඩ කරනවා.


‘චූටියා’ මොන විදියටද ‘ගුග්ලි’ තුළ ගලාගෙන යන්නේ..?

‘ගුග්ලි’ ටෙලිනාට්‍ය දරුවෙක් වටා ගෙතුණු කතාවක්. මම මෙතෙක් රඟපාපු නිර්මාණ අතර සුවිශේෂී චරිතයක් තමයි ‘චූටියා’ චරිතය. මට ඒ දරුවාගේ ක්‍රියාකාරකම් නිරීක්‍ෂණය කරන්න කියලා දරුවාගේ මාමා වගකීමක් දෙනවා. මුළු නාට්‍ය පුරාම ඒ දරුවා පසුපස යනවා. මමයි, මගේ මිතුරයි යනවා දරුවා හොයාගෙන කොළඹ ඉඳලා උඩවලවට. ඔය විදියට තමයි මගේ චරිතය ගලාගෙන යන්නේ.


අපි දකින විදියට පසිඳුගේ රංගනයන් වැඩිහරියක්ම මැර චරිත..?

ඒ දේ මමත් පිළිගන්නවා. මම මේ වන විට ටෙලිනාට්‍ය තිහක විතර රඟපාලා තියෙනවා. ඒ අතරින් ටෙලිනාට්‍ය විසිදෙකක විතර මම දුෂ්ට චරිත නිරූපණය කරලා තියෙනවා. ඇත්තටම මටත් එය ප්‍රශ්නයක්. ගොඩාක් නිර්මාණවලින් මට කතා කරන්නේ දුෂ්ට චරිත සඳහා තමයි. සමහරු හිතයි මම කොටුවෙලා කියලා. ඒත් මට එවැනි චරිතම ලැබෙන්නේ මම දුෂ්ට චරිතවලට සාධාරණයක් කරන නිසා කියලයි හිතෙන්නේ. මගේ බාහිර පෙනුම, මගේ පෞරුෂත්වය, හඬ මේ හැමදෙයක්ම එයට ගැළපෙනවා ඇති. මමත් කැමැතියි විවිධ චරිත රඟපාන්න.


සාමාන්‍ය ජීවිතයේදී ඔබ කොයි වගේද..?

ඇත්තටම හාත්පසින්ම වෙනස්. මම කොණ්ඩ, රැවුල් වවලා ඉන්න කොට දුෂ්ටයෙක් කියලා නිර්මාණවල දකින චරිතවලට වඩා හාත්පසම වෙනස්, සරල කෙනෙක්. මම කොයි වෙලෙත් විනෝදයෙන් තමයි ඉන්නේ.


චරිත නිරූපණය කරනකොට සිදුවුණු අනතුරුත් ඇති නේද?

මම දුෂ්ට චරිත කරන අවස්ථාවල සටන් කරන්න සිදුවුණු අවස්ථා තියෙනවා. මම ශ්‍රී ලංකා යුද හමුදාවේ මල්ලවපොර කරපු ක්‍රීඩකයෙක්. 2018 මල්ලවපොර තරගයේ මම සම්මාන ගත්තා. මම සමග සටන් කරන හිරෝට කියන්නේ මට ඇත්තටම ගහන්න කියලයි. ඔය අතර ඉතින් කැඩුම් බිඳුම් වුණු අවස්ථා තියෙනවා. මම ඒ දේවල් වේදනාවක් විදියට හිතන්නේ නැහැ.


නවක රංගන ශිල්පියෙක් ලෙසට ඔබ මේ ක්‍ෂේත්‍රයේ නිර්මාණකරණය ගැන පැහැදීමකින්ද ඉන්නේ..?

මම වසර දෙකක් විතර වෙනවා මේ ක්‍ෂේත්‍රයට සම්බන්ධ වෙලා. හොඳ නිර්මාණ බිහිවෙනවා. දක්‍ෂ අධ්‍යක්‍ෂවරු බිහිවෙලා ඉන්නවා. හැබැයි ප්‍රශ්නය තියෙන්නේ එකම විදියට තමයි නිර්මාණ බිහිවෙන්නේ. නව විදියට, අලුත් විදියට නිර්මාණය වෙනවා නම් වටිනවා. මම කියන්නේ නැහැ දැන් නිර්මාණ හොඳ නැහැ කියලා. නමුත් ප්‍රේක්‍ෂකයා රූපවාහිනියේ රඳවාගන්න නම් අපේ ගැමිකමත් එක්ක සුන්දරත්වය ගැන වටිනාකමක් දෙන්න පුළුවන්නම් තවත් වටිනවා.


ෂූටින් බලන්න ගිහින් ආපු මේ ගමන ගැන මොකද හිතෙන්නේ..?

මට තවමත් හීනයක් වගේ. යුද හමුදා සොල්දාදුවෙක් ලෙසට කටයුතු කරපු මම දැන් ඉතාමත් කෙටි කාලයක් තුළ නළුවෙක් වෙලා. ආපස්සට හැරිලා බලන කොට සතුටක් තමයි තියෙන්නේ. අහම්බෙන් තමයි මම මේ ගමන ආවේ. මගේ මවුපියන් අද ලබන සතුට මට වචන නැහැ කියන්න.


-වසන්ත විතාරණගේ





මට හැදුණු කාතාවක් නෑ , මේක මාර වැඩක්නේ - කාංචනා ඛාන්




කලා ක්‍ෂේත්‍රයේ ශිල්පීන්ට නිරන්තරයෙන්ම කතා හැදෙනවානේ. එය සාමාන්‍ය දෙයක්. හැබැයි මේ කියන්නට යන්නේ වෙනස්ම කතාවක්. ජනප්‍රිය රංගන ශිල්පිනී මනිෂා නාමල්ගමගේ ආදරණීය නැඟණිය තමයි කාංචනා ඛාන් (Kanchana Kaan) කියන්නේ. ඇගේ අක්කා වගේම දක්‍ෂ රංගන ශිල්පිනියක්. ඉතින් පසුගිය දවසක කාංචනාට අමුතුම කතාවක් හැදිලා තියෙනවා. ඒ කතාවේ සුලමුල ගැන මේ විදයට ඇය පුවත්පතක් සමඟින් පවසා තිබුනා. 


කාංචනාට මේ හැදුණු කතාව මොකක්ද..?

මොනවා ගැනද අහන්නේ කියලා මට තේරෙන්නේ නැහැ. එහෙම කතාවක් මට හැදිලා නැහැ මම දන්න තරමින්.


එහෙනම් අපි ‘මේක පුදුම කතාවක්’ ගැන කතා කරමුකෝ. ඒ ගැන තමයි අහන්නේ..?

ලාල් ප්‍රියදේව අධ්‍යක්‍ෂණය කරන සිනමා නිර්මාණයක් තමයි ‘මේක පුදුම කතාවක්.’ සුනිල් ටී. ප්‍රනාන්දු සහ තුෂාර පෙරේරා තමයි ඒ චිත්‍රපටය නිෂ්පාදනය කරන්නේ. මම මේ චිත්‍රපටයේ ‘සොනාලි’ ලෙසට තමයි රඟපාන්නේ.


‘සොනාලි’ චරිතය හරහා ඔබේ ඉදිරි සිනමා ගමන වෙනසක් සිදුවෙයිද..?

අනිවාර්යෙන්ම… මටත් එහෙම හිතෙනවා. මම මේ වගේ චරිතයක් මෙයට පෙර කරලම නැහැ. උප ප්‍රධාන චරිතයක් තමයි මම රඟපාන්නේ.

මගේ රංගන ජීවිතයත් හැරවුම් ලක්‍ෂය්‍යක් කියලා කියන්නත් පුළුවන්. මම මවකගේ චරිතයක් රඟපාන්නේ. මට දරුවෝ දෙන්නෙක් ඉන්නවා. මගේ නංගිගේ දරුවා හදාගන්නෙත් මම. මුලදි සොනාලි අහිංසක බව පෙනුණට පස්සේ නපුරු වෙනවා. ඉතින් මේ චිත්‍රපටයට මාව තෝරාගත්ත සියලුමදෙනාට ස්තුතිය පුද කරනවා.


පසුගිය කාලෙ නම් ඔබට පාරේ බැහැලා යන්න බැරි තත්ත්වයක නේද හිටියේ..?

අම්මෝ ඔව්… ‘හදවතේ කතාව’ ටෙලිනාට්‍ය මම නිරූපණය කළ ‘කාන්ති’ චරිතය නිසා ගොඩදෙනෙක් මාව ප්‍රතික්‍ෂේප කළා. සමහරු මගතොටදී පවා මට බනින්න ගත්තා. හැබැයි ඉතින් පස්සේ හොඳට කතා කළා. ඒ චරිතයට ලැබුණු ප්‍රතිචාර නම් ඉහළයි. ඉතින් මම ‘කාන්ති’ චරිතයට හොඳ සාධාරණයක් කළා කියලා ලැබුණු ප්‍රතිචාරත් එක්ක හිතාගන්න පුළුවන්.


ඉතින් අද ඔබ ඉන්න තැන ගැන සතුටු වෙනවද..?

ඇත්තටම ගොඩාක් සතුටුයි. මම හෙමින් ගමනක් තමයි ආවේ. හෙමින් ආවත් බාධක නැතුවාමත් නෙවෙයි. හැබැයි මම ගැහැනියක් විදියට ඒ සියල්ලටම මුහුණ දුන්නා. ඉතින් මට ලැබෙන හැම නිර්මාණයකටම, චරිතයකටම මම උපරිම සාධාරණයක් කරමින් මගේ ගමන මේ විදියටම ඉදිරියට යනවා.


‘නිරාවරණය’ ටෙලිනාට්‍ය තුළින් නේද ඔබේ ගමන වෙනස් වුණේ..?

‘නිරාවරණය’ ටෙලිනාට්‍යයේ මම නිරූපණය කළ චරිතයෙන් තමයි මාව ගොඩදෙනෙක් දැනහඳුන ගත්තේ. ඒ ගැන සතුටුයි. ‘නිරාවරණය’ ටෙලිනාට්‍යයේ අධ්‍යක්‍ෂ රොෂාන් කුරුප්පු අයියාව මම කවදාවත් දැකලා තිබුණෙත් නැහැ. ඉතින් මම ගැන තැබූ විශ්වාසයට ඔහුට මම ස්තුතිය පුදකරනවා.


කාංචනා වඩාත් කැමැති සිනමාවටද, එහෙමත් නැතිනම් ටෙලිනාට්‍ය සඳහාද..?

එහෙම කිසිම වර්ගීකරණයක් නැහැ. හැබැයි පසුගිය කාලේ චිත්‍රපට වෙනුවෙන් වැඩි කාලයක් යොදවන්නට සිදුවුණා. සමහරවිට මගේ උස, පෙනුම නිසා මාව චිත්‍රපට සඳහා තෝරාගන්නවා වෙන්නත් පුළුවන්. වේදිකාවට මම ගොඩාක් කැමැතියි. ඒත් වේදිකාව වෙනුවෙන් මට ලොකු කාලයක් යොදවන්න අපහසුයි.


ඔබ රංගනයට වගේම නර්තනයටත් දක්‍ෂයි නේද..?

මම පුංචිම කාලේ ඉඳලා නර්තනය හැදෑරුවා. ඒ තුළින් වෙනම ශාරීරික අභ්‍යාසයක්ද ලැබුණා. උපුල් අරුණශාන්ත ගුරුවරයා යටතේ බැලේ පවා හැදෑරුවා.


ඔබේ සහෝදරිය ජනප්‍රිය රංගන ශිල්පිනියක්. ඇයගෙන් ලැබෙන සහාය..?

මගේ අක්කා තමයි මනිෂා නාමල්ගම කියන්නේ. ඇය මට ගොඩාක් ආදරෙයි. මමත් ඒ වගේම තමයි. හැබැයි මම කවදාවත් මගේ අක්කා මනිෂා නාමල්ගම කියලා නම පාවිච්චි කරමින් රඟපාන්න අවස්ථාවක් ඉල්ලගෙන ගිහින් නැහැ. මගේ පාර මගේ උත්සාහයෙන්මයි හදාගත්තේ.


අක්කා – නඟාලා දෙන්නා ප්‍රේක්‍ෂකයන්ට මාරුවෙන අවස්ථාත් ඇති නේද..?

එහෙම නැහැ… මම අක්කාට වඩා ගොඩාක් වෙනස්. අපි දෙන්නාගේ කොණ්ඬේ විතරයි එකවගේ සමානකම් තියෙන්නේ. මම අක්කාට වඩා ගොඩාක් උසයි. පැහැයෙනුත් වෙනස්.


පෞද්ගලික වැඩකටයුතුත් එක්ක කොහොමද කලාකටයුතු කරගෙන යන්නේ..?

මගේ පෞද්ගලික ජීවිතය ගැන මාධ්‍යයට තවම කියලා නැහැ. ඒ වගේම මොන වැඬේ තිබුණත් මම කරන කලාකටයුතුවලදී ඒ දේවල් පටලගන්නේ නැහැ. මට පැවරෙන වැඬේ මම හරියට කරනවා. නිදහසේ, සරලව ඉන්න කෙනෙක් මම.


වසන්ත විතාරණගේ


’මරු පුතේ’ කියලමයි තාත්තා කියන්නේ - ගයාන් ගුණවර්ධන




ගයාන්.. මේ දවස්වල මොනවද කරන නිර්මාණ කටයුතු?


මේ දවස්වල මගේ කාලයෙන් මූලික තැන දීලා තියෙන්නේ ජයප්‍රකාශ් සිවගුරුනාදන් මහතා අධ්‍යක්ෂණය කරන ''පාර දිගේ'' ටෙලිනාට්‍යයටයි. අනිත් හැමදේටම කාලය ලබා දෙන්නේ ''පාර දිගේ'' වෙනුවෙන් ඉඩකඩ ලබා දීලයි. මීට අමතරව තවත් ටෙලිනාට්‍යයක රූගත කිරීම්වලට සම්බන්ධවෙලා ඉන්නවා. ඒ නාට්‍ය තාම විකාශය වෙන්න පටන් ගත්තෙ නැහැ. ඔය අතරේ මම ස්වර්ණවාහිනියේ සංගීත වැඩසටහනකට නිවේදනයෙන් සම්බන්ධ වෙනවා. ඒ වගේම මගේ ස්ටූඩියෝ එකේ මම ගීත පටිගත කිරීම් කටයුතු කරනවා. ඒ අතරතුර හඬ පුහුණුව, කීබෝඩ් ගිටාර් වාදනය කියලා දෙනවා. ඒ නිසා මේ වැඩත් එක්ක චුට්ටක් විතර කාර්යබහුලවෙලා ඉන්නවා.


නුවන් ගුණවර්ධනගේ පුතා, ගයාන් ගුණවර්ධනව මිනිසුන් හඳුනා ගත්තේ ගායකයෙක් විදිහටයි. අද වෙද්දි රංගන ශිල්පියෙක් වෙලා අවසානයි. මේ හැරවුම වුණේ කොතැනද?


මගේ ජීවිතේ එවැනි හැරවුම් කිහිපයක්ම වෙලා තියෙනවා. මම ගායකයෙක් වෙලා පසුව නිවේදකයෙක් වුණා. මගේ පළවෙනි ටෙලිනාට්‍ය වුණේ ''හිතුවක්කාරයා'' ටෙලිනාට්‍යයයි. එතැනින් පසුව මම රංගනයට යොමු වුණා. කලාකරුවෙක් විදිහට මේ ක්ෂේත්‍රයේ මට පුළුවන් හැමදේකටම වගේ මම සහභාගිවෙලා තියෙනවා. මගේ හැකියාවන් පුළුවන් උපරිමයෙන් මම පෙන්වලා තියෙනවා. මගේ තාත්තා නුවන් ගුණවර්ධන කියලා ඔහු මේ කිසිමදේකට මාව බලෙන් දාලා නැහැ. එයාගේ යාළුවන්ට කතා කරලා ''මචං මගේ කොල්ලා ගනිං'' කියලා කිසිම දවසක කියලා නැහැ. මට මගේ ගමන යන්න ඉඩ දීලා එයා නිහඬවම උදව් කළා මිසක්, කිසිම තැනක බල කරලා, තල්ලු කරලා මගේ ගමන කාගෙවත් කර මතින් ගෙනියන්න උදව් කළේ නැහැ. අදටත් එහෙමයි. මම රඟපෑ දෙවැනි ටෙලිනාට්‍ය වන රවීන්ද්‍ර විජේරත්න මහතා අධ්‍යක්ෂණය කළ ''හුස්මක් තරමට'' ටෙලිනාට්‍ය රඟපාන්න මට අවස්ථාව ලැබුණා. ''පාර දිගේ'' ටෙලිනාට්‍යයත් මගේ ජීවිතේ වෙනම ආකාරයක හැරවුමක් වුණා. ජයප්‍රකාශ් සිවගුරුනාදන් මහතා අධ්‍යක්ෂණය කළ, සද්ධාමංගල සූරියබණ්ඩාර මහතා තිර රචනය කළ ''පාර දිගේ'' ටෙලිනාට්‍ය බොහෝ හැදෑරීම් එක්ක මගේ රංගන ජීවිතේ කණපිට පෙරළුවා. නුවන් ගුණවර්ධනගේ පුතා ගායකයෙක් කියලයි බොහෝ දෙනෙකුගේ හිතේ මැවුණේ. වර්තමානයේදි කලාකරුවා කියන කෙනාට උදාවෙලා තියෙන තැන හරි දුක්බරයි. එක ක්ෂේත්‍රයක ඉඳලා හම්බ කරන්න හරි අමාරුයි. මට වගේම මගේ ගෙදර අය ජීවත් කරවන්න මම මේ කලාවේ මට පුළුවන් හැම ඉසව්වකටම යන්න සිදුවෙලා තියෙනවා. ඒ සල්ලි හම්බ කරන්න විතරක් නෙමෙයි. කලාවට තියෙන ආදරේ සහ අපි එක ක්ෂේත්‍රයකට පමණක් කොටු වුණොත් අපිට සරිලන වැටුපක් අපිට ලැබෙන්නේ නැති නිසා. ඒ නිසා තිස් දවසේ පැය දෙකක් හෝ නිදාගෙන මම මේ හැමදේටම කැපවීමෙන් වැඩ කරනවා. එහෙම නොවුණොත් මේ අසීරු කාලේ ජීවත් වෙන්න හරි අමාරුයි.




නිවේදකයා, සංගීතවේදියා, ගායකයා, රංගන ශිල්පියා ඇතුළු මේ ක්ෂේත්‍ර කිහිපය අතරින් ඔබ කොහොම හඳුන්වනවටද වැඩිය කැමති?


මම මේ හැමදේකින්ම එකතු වුණු ''කලාකරුවා'' කියන චරිතයට කැමතියි. කලාකරුවා එකම දේකට කොටුවෙන්නෙ නැහැ. ඔහුගේ හෝ ඇයගේ දක්ෂතාව මත මිනිසුන්ව සතුටු කරන්න පුළුවන් නම් හොඳ කලාකරුවෙක් බව මම විශ්වාස කරනවා. ගයාන් ගුණවර්ධන කියන්නෙ කලාකරුවෙක්, නිර්මාණකරුවෙක්, ජනතාව සතුටු කරන්න, ඔවුන් සතුටින් තියන්න මිසක්, දුක ''මාකට්'' කරන්න, ප්‍රසිද්ධ වෙන්න මට අවශ්‍ය නැහැ. අපිට මොන ප්‍රශ්න තිබුණත් ජනතාවට හොඳ නිර්මාණ ලබා දීලා ඔවුන් පිනවීම අපේ යුතුකමයි.


රංගන ශිල්පියෙක් වීමෙන් පසුව ගායකයා ඔබ තුළින් යම් තරමකට හෝ මඟහැරුණා?


නැහැ. මම ඒ හැමදේම සමබරවයි කරගෙන ගියේ. ගිය වසරේ මම ගීත දෙකක් එළිදැක්වුවා. ඒ ගීත දෙකටම ඉතා හොඳ ප්‍රතිචාර ලැබුණා. අදටත් මම ඒ ගීත උත්සවවල, ප්‍රසංගවල ගායනා කරනවා. පාර දිගේ රෑගත කිරීම් කරන අතරතුරේ කොහොම හරි මම කාලය වෙන් කරගෙන මේ අවුරුද්දෙ අප්‍රේල් මාසයට පෙර ගීතයක් නිර්මාණය කරන්න බලාපොරොත්තු වෙනවා.


''පාර දිගේ'' චරිතයට ලැබෙන ප්‍රතිචාර කොහොමද?


''පාර දිගේ'' චරිතයට ඉතා හොඳ ප්‍රතිචාර ලැබෙනවා. මෙච්චර කාලයක් මම පෙම්වතාගේ චරිතයයි කළේ. එයින් මිදිලා සංගීතයට ආදරය කරන, අඟුලාන ඉන්න අහිංසක කොල්ලෙක් එයාගේ යාළුවෝ කට්ටියත් එක්ක සංගීතයෙන් ගේමක් ගහලා සල්ලි හම්බ කරන්න උත්සාහ කරන චරිතයක් තමයි මම රඟපාන්නෙ. ගයාන් ගුණවර්ධන කියන කෙනා වගේම චරිතයක් තමයි භානු කියන්නෙ. කොහොම හරි සල්ලි හොයාගෙන, යාළුවොත් ගොඩ දාගෙන නිර්මාණයක් එළියට දෙන්නයි භානු උත්සාහ කරන්නෙ. ඒ නිසා භානුක මගේ ජීවිතේට හුඟාක් සමීපයි.


නුවන් ගුණවර්ධන මේ ආදරණීය පුතා ගැන අද මොකද කියන්නෙ?


අද වෙද්දි තාත්තා ඉන්නෙ ඉතාමත් සතුටින්. එයාගේ නිර්මාණයක් තමයි ගයාන් ගුණවර්ධන කියන්නෙ. තාත්තා හැමවෙලේම මට සුබ පතනවා. මම ඇඳුමක් අරගෙන ගියත් ඒ හැමදේම බලනවා. එයා මගේ ලොකු රසිකයෙක්. මෙතෙක් කල් ඔහුගේ ලොකුම රසිකයා මමයි. අද මගේ ලොකුම රසිකයා එයා කියලයි තාත්තා කියන්නෙ. හැම නිර්මාණයකදීම ''මරු පුතේ'' කියලා මාව දිරිමත් කරනවා. මගේ අඩුපාඩු හදාගෙන, මගේ ළඟින් ඉන්න, මගේ සෙවණැල්ල මගේ තාත්තා. මගේ සහෝදරයා, මගේ දෙවියා තමයි නුවන් ගුණවර්ධන කියන්නෙ.


දිශානි ජයමාලි





මම මෙතැන ඉන්නේ වාසනාව හින්දා - රොෂාන් රණවන




රොෂාන් රණවන (Roshan Ranawana) ගැන පුංචියට වාගේ විස්තරයක් කරනවා නම්, ඔහු සිනමාවට ආවේ ‘සිරිපොද වැස්සට’ තෙමෙමිනුයි. පළමු චිත්‍රපටය ‘බොක්ස් ඔෆිස්’ වාර්තා තබමින් තිරගත වන විට රොෂාන්ව කවර්පේජ්වලට ගන්න පුවත්පත් ආයතනවල ප්‍රධාන කර්තෘවරු එක පොදියට තරගයට ආවා. ඒ අතරට ‘සුවඳ දැනුණා ජීවිතේ’ එතකොට ලස්සන පූජා සමග රොෂාන් කළ පෙම් රැඟුම් බලන්න රසිකයන් පෝලිම් ගානේ රස්තියාදු වුණාය කිව්වොත් ඒක හරියටම හරි. 2.10 ෂෝ එක බලන්න ආව ප්‍රේක්‍ෂකයන් ඒක ‘House Full’ වුණාම ගෙදර නොගිහින් එහෙමම 6.30 ෂෝ එක බලන්න නැවැතුණෙත් ‘සුවඳ දැනුණා ජීවිතේ’ චිත්‍රපටය ඒ තරමටම ආකර්ෂණීය වූ නිසයි. ඉන් පස්සේ රොෂාන් පුංචි තිරයටත් අවතීර්ණ වුණා. පෙම්වතාගේ චරිත තුළින් තව, තව ජනප්‍රිය වෙනකොට වෙළෙඳ දැන්වීම්වලටත් රොෂාන්ව නැතුවම බැරි තරම් වුණා. කොයි දේ කොහොම සිද්ධ වුණත් රොෂාන් රණවන කියන්නේ හරිම රිලැක්ස් කැරැක්ටර් එකක්. කා එක්කවත් තරග කරන්න රොෂාන්ට ඕනෑ වුණේ නැහැ. තමන්ටම කූපන් දමාගෙන ජනප්‍රිය වෙන්න ඔහුට ඕනෑ වුණේ නැහැ. රොෂාන් ඔහුගේ ගමන ගියේ හරි හෙමින්, බොහො පාඩුවේ. පසුගිය දවස්වවල රොෂාන් හිටිහැටියේම වාගේ මඳ කලකට නිහඬ වුණා. ‘කොරෝනා’ උවදුරත් සමග රොෂාන් රංගනයෙන් ඈත්වෙලාද..? චූටි දූ එක්ක වැඩි කාලයක් ගතකරන්න තියෙන ඕනෑකම නිසා ඔහු රංගනයට මඳකට තිත තියලවත්ද..? 


ඉතින් රොෂාන් කොහොමද තොරතුරු..?

වරදක් නැහැ… සුවෙන්, සතුටින් දවස ගෙවනවා.


ඔබ යම් නිහඬතාවකට මැදිවෙලා වගේ පෙනෙන්නේ..?

ම්ම්… නිහඬතාවයකට මැදිවෙලාය කියලත් නැහැ… හැබැයි ‘කොරෝනා’ ප්‍රශ්නය නිසා බොහෝමයක් කලා කටයුතුවලින් ඈත්වෙලා හිටියාය කිව්වොත් හරි…


චූටි දෝණි එක්ක කාලය ගතකරන්න තියෙන ඕනෑකමත්, එතන තියෙන්න ඇති නේද රොෂාන්..?

දූ එක්ක කාලය ගතකරන එක දැන් මගේ ජීවිතයේ කොටසක් වෙලා… ‘කොරෝනා’ විරාමය තුළත් එයට පසුවත් ගෙදරට වෙලා හිටියෙත් හුඟක්ම එයාගේ ආරක්‍ෂාව ගැන හිතලා තමයි.


මේ දවස්වල ඔබ ආයෙමත් කාර්යබහුල වෙලා..?

ඔව්… අලුත් චිත්‍රපටයකට ආරාධනා ලැබුණා. එහි රූගත කිරීම් නිමවෙමින් පවතිනවා.


අලුත් චිත්‍රපටය ගැන තොරතුරු ටිකක් ඔබේ රසිකයන්ට කියමුද..?

ඒක කාටත් එක සේ රස විඳින්න පුළුවන් බයිස්කෝප් ගණයේ චිත්‍රපටයක්. බයිස්කෝප් ගණයේ යැයි කීවේ… ආදරය, ත්‍රාසය, විනෝදය සියල්ල එහි කැටිව තිබෙන නිසයි.

චිත්‍රපටය අධ්‍යක්‍ෂණය කරන්නෙ අපේ ‘පිං පොං මිත්‍රයා’ රජිත හිරාන්… ඇත්තටම මට දැනෙනවා… මට හිතෙනවා රසිකයන් ‘රයිඩර්’ වටා එක්රොක් වේවි කියලා.


‘රයිඩර්’ චිත්‍රපටය අතරතුර ඔබට ‘නිමි’ චිත්‍රපටයටත් ආරාධනා ලැබුණා..?

නැහැ… ‘නිමි’ චිත්‍රපටයේ රූගත කිරීම් නිමවෙමින් තියෙනකොට තමයි ‘රයිඩර්’ට ආරාධනා ලැබුණේ. ඉසුරු වීරපුලිගේ ‘නිමි’ චිත්‍රපටය තව නොබෝ දිනකින් තිරගත වේවි.


‘රයිඩර්’ සහ ‘නිමි’ සඳහා ඔබ රඟන්නේ විදේශීය නිළියන් සමගද..?

නැහැ… චිත්‍රපට දෙකෙහිම මට සහාය නිළියන් ලෙස ලැබුණේ ශ්‍රී ලාංකේය නිළියන්… ඔවුන් දෙදෙනාගේම පළමු රංගනය එයයි.


රංගනය සඳහා බොහෝ විට ඔබට ලැබුණේ විදේශීය නිළියන්…?

ඔව්… ‘රෝස කැලේ’ සහ ‘සුවඳ දැනුණා ජීවිතේ’ චිත්‍රපට සඳහා මා හා සහායට පැමිණියේ දකුණු ඉන්දියානු නිළියන්.


‘පූජා’ සමග රංගනය ඉතාම සුන්දර අත්දැකීමක් යැයි කියා ඔබ ඒ දවස්වල පුවත්පත්වල කියා තිබුණා..?

ඔව්… ඒක සම්පූර්ණ ඇත්තක්… පූජා උමා ශංකර් කියන්නේ ඉතාම සුහද රංගනවේදිනියක්. රංගනයේදී පූජා මට දුන් සහයෝගය ඉතාම සුහදයි… බොහෝ දේ මම ඇගෙන් ඉගෙනගත්තා. අප හොඳ මිතුරන් වුණා… මගේ පෞද්ගලික දේවල් ඈ සමගත් ඇගේ පුද්ගලික දේවල් මා සමගත් කියන තරමට අපේ යහළුකම ළෙන්ගතුව තිබුණා.


ඔබ හොඳ පවුල් ජීවිතයක් ගෙවන කෙනෙක්, තරුණ නිළියන් සමග රඟන විට වයිෆ් කලබල වෙන්නැද්ද රොෂාන්..?

අයියෝ නැහැ… එයා මාව හුඟාක් හොඳින් තේරුම් ගත්ත කෙනෙක්.

සමහර දවස්වලට මගේ සහායට අවැසි නිළියන් සොයා දෙන්නේ ඇයයි. රජිත හිරාන්ගේ නවතම චිත්‍රපටයෙහි සහාය සඳහාද තරුණ නිළියකව තෝරා දුන්නේ ඇයයි… ඇගේ මනාපය රජිත හිරාන්ද අනුමත කළා.


ඔබ රංගනයෙන් දායක වූ සෑම චිත්‍රපටයක්ම ‘බොක්ස් ඔෆිස්’ වාර්තා තැබුවා..?

ඔව්… එය සතුටට කාරණයක්… කොහොමත් සිනමාවට ආ දා ඉඳන්ම ඒ වාසනාව ඉබේම හිමිව තිබුණා.


‘හිරිපොද වැස්ස’ තව ඩිංගෙන් ඔබෙන් ගිලිහී යන්න තිබුණා..?

සත්තකින්ම ඔව්… එය මට ලැබුණේ පුදුම අහම්බයකින්. ඔඩිෂන් එකට එන්නය කියල එවපු ලියුමත් ලැබුණෙ දවස් දෙකක්, තුනක් ප්‍රමාද වෙලයි.

ඒත් අම්මා කිව්වා ගිහින් කතා කරලා විස්තරය කියලා බලන්න, චාන්ස් එකක් ලැබෙන්න පුළුවන් කියලා… පස්සෙ මම ගිහින් උදය කාන්ත මහත්තයව හම්බවෙලා විස්තරය කිව්වා. එයා මං එක්ක ටිකක් කතාබහ කරලා මම ඔයාට දන්වලා එවන්නම් කිව්වා. ඒ වචන ටික ගැන මට ඒ හැටි විශ්වාසයක් තිබුණේ නැහැ. ගෙදර ආවේ මොකක්දෝ හිස්බවකිනුයි.


නළුවෙක් වෙන හීනේ උපන්ගෙයිම මියගියා කියලා දැනෙන්න ඇති…?

නළුවෙක් වෙන්නය කියලා එහෙම ලොකුවට හීන තිබුණේ නැහැ. අලුත් චිත්‍රපටයකට අලුත් මූණක් හොයනව කියන සිනමා දැන්වීමකට ඉල්ලුම් කළෙත් අම්මගේ බලකිරීමටයි.

හැබැයි ඒ ලියමන අතට ඇවිදින් උදය කාන්ත එක්ක කතා කළාට පස්සේ රඟපාන්න ආශාවක් හිතෙන්න ගත්තා.


ආශාව හිත කොනක තියාගෙන ඔබ ආයෙමත් උදය කාන්තව හමුවන මාර්ගයක් ගැන විමසිලිමත් වුණාද රොෂාන්..?

නැහැ… එහෙමමත් පස්සෙන් දිව්වේ නැහැ. මොකද ඒ වෙනකොට මම ‘මිස්ටර් ශ්‍රී ලංකා’ දිනලා ඇඞ්වටීස්මන්ට්වලටයි, මොඞ්ලින් ෂෝවලටයි ආරාධනා ලබන කාලේ..,

මේ විදියට මෙහෙම ඉදිරියට යනවා කියලා හිතල අලුතෙන් ආව ඇඞ්වලට ගිවිසුම් අස්සන් කරන්න ගත්තා.


ඇඞ් එකක රූගත කිරීමක් කරන කොට ඇඞ් එක අධ්‍යක්‍ෂණය කරපු ජයනාත් ගුණවර්ධන මගෙන් ඇහුවා ෆිල්ම් එකක රඟපාන්න ආස නැද්ද කියලා. ‘ඔව්… මම ආසයි’ කියන ගානට මම එතැනදි හිනාවුණා. පස්සෙ එයා කිව්වා අපි අලුත් ෆිල්ම් එකකට අලුත් කට්ටිය හොයනවා. ඒකේ ඩිරෙක්ටත් ඇවිත් ඉන්නෙ මෙතැනට… ඉන්න මං එයාට ඔයාව අඳුන්නලා දෙන්නම් කියලා..,

මමත් ආශාවෙන් බලා උන්නා ඩිරෙක්ටර් එනකල්… මගේ ඉස්සරහට ආවේ ‘උදයකාන්ත’ මාව දැක්කම එයාට හිනා ආවා. එයා ජයනාත්ට කිවුවා මෙයාව මම දන්නවා ඔයාට කලිනුයි මම මෙයාව ඉන්ටර්වීව් කළේ කියලා.


එතැනදී ‘හිරිපොද වැස්ස’ ප්‍රධාන චරිතය ඔබට ලැබුණා..?

ඒත් නැහැ… දන්වලා එවන්නම් කියලා ගිහින් ටික කාලයක් ගෙවුණට පස්සේ තමා එන්න අපි ඔයාව තෝරාගත්තා කියලා පණිවුඩය දුන්නේ.


බාධක මැද්දෙ සිදුවූ ඒ අහම්බය ඔබට ‘හිරිපොද වැස්ස’ක් වී වාසනාව අරං ආවා..?

ඔව්… ‘හිරිපොද වැස්ස’ වාගෙම… එහි ගී පදත් ප්‍රේක්‍ෂකයෝ අතර තවමත් ජනප්‍රියයි. ඔවුන් ඒ අලුත් තාලේ කතාපුවතට බොහෝ ප්‍රිය කළා.


මගතොටක යන්න බැරි තරමට කතාබහට ලක්වුණේ ‘සුවඳ දැනුණු ජීවිතේ’ තුළිනුයි..?

ඔව්… අදටත් එහි ගී පද ප්‍රේක්‍ෂකයන් මුමුණනවා. දහපාරකට එය රූපවාහිනියේ විකාශනය වුණොත් ඒ දහපාරම හැමදෙනෙකුම පාහේ එය නරඹනවා.


හැඩකාර යෞවනයකු ලෙස පෙම් චරිත රඟපෑවත්, කවදාවත් ඔබ කටකතාවලට මැදිවුණේ නැහැ..?

මම හරිම පරෙස්සමෙන් තමයි රංගන ක්‍ෂේත්‍රය තූළ ජීවත් වුණේ. මගෙන් වෙන්න ඕනෑ දේ මොකක්ද, මම මට අදාළ දේ කරලා පැත්තකට වෙනවා. පුංචි කාලේ ඉඳලම අපි අපේ සීමාව මොකක්දැයි කියන එක අපේ මවුපියන්ගෙන් ඉගෙනගත්තා.

ඒ හින්දා කටකතා වැනි දෑ මට කවදාවත් බාධාවක් වුණේ නැහැ.


පුංචි තිරය ඔබ සම්පූර්ණයෙන්ම අතහැර දැමුවා..?

ලැබෙන චරිතය මට සෑහෙනවා නම් තමයි මම ටෙලිනාට්‍ය බාර ගන්නේ. හැමදාමත් ටීවී. එකේ මූණ පෙන්නන්න ආශාවක් මට තිබුණේ නැහැ. හොඳ නිර්මාණයකට දායක වෙන්න වරමක් ආවොත් මම එය බාරගන්නවා.


සොඳුරු, සුපෙම්වත් චරිත රඟපෑ ඔබ හිටි අඩියේ නපුරු, රස්තියාදුකාරයකු වුණා..?

ප්‍රේක්‍ෂකයන් වෙනස් දේට හරිම කැමැතියි. කවුරුත් ඉල්ලන්නේ ‘වෙනස’ ඉතින් මමත් ඒ වෙනසට බඳුන් වුණා.


ජනප්‍රිය කලාකරුවකු වීමට හැකියාව, පෙනුම වාගෙම වාසනාවද අවශ්‍යයි කියන තැන ඔබ ඉන්නවද?

අනිවාර්යයෙන්ම උත්තරය ‘ඔව්’ කියන වචනයයි…


ඇයි මම එහෙම කියන්නෙ කියල ඔබ අහනවා නම්, මම මෙහෙම උත්තර දෙනවා..,

කලාකරුවකු ලෙස මම මෙතැන ඉන්නෙත්, වාසනාව නිසයි. බොහෝ අහම්බයන් මා සොයා ආවේ ඒ වාසනාව මුල්කරගෙනයි. සත්තකින්ම ටිකක් නෙවෙයි.., ‘වාසනාව’ කියන අකුරු හතර ජීවිතයට එහි සාර්ථකත්වයට බොහෝ අවශ්‍යයයි.


දමයන්ති රේණුකා ප්‍රනාන්දු






ශලනි මට ආදරය කරන එකක් නැහැ - සචින් ලියනගේ




කලින් කලට කලා ලොවේ විවිධ ආරංචි පැතිරෙනවා. විවිධ කතාබහ ඇති වෙනවා. ඒ වගේ කතාබහක් අපට අසන්නට ලැබුණේ සචින් ලියනගේ ගැන. බොහොම ඉක්මනට කලා ක්ෂේත්‍රයට ආ තරු අතර නමක් දිනාගත් සචින් මේ දවස්වල නරඹන්නන් අතර ජනප්‍රිය චරිතයක්. ඒ ජනප්‍රිය බව නිසාම දෝ කොහෙද මේ දවස්වල ‘කියා දෙන්න ආදරේ තරම්’ ටෙලි නාට්‍යයේ ඔහුත් එක්ක රංගනයේ යෙදන ශලනිත් එක්ක සචින්ගේ නම ඈඳිලා. ඒ ගැන ඔහු මෙන්න මේ විදියට පුවත්පතක් සමඟින් පවසා තිබුනා.

ඔයාට නිර්වාන් ගැන තියෙන්නේ මොන වගේ හැඟීමක්ද?


නිර්වාන් ගැන මට ගොඩක් දුකයි. එයාගේ හිතේ අනෙක් අය ගැන ලොකු ආදරයක් තියෙනවා. අම්මාට, තාත්තාට, මල්ලිට, දිගැසිට. ඒ වගේම දැන් දැන් තේරෙන විදියට ස්නේහටත් පොඩි ආදරයක් එයාගේ හිතේ නැතිවම නොවෙයි. කොයි තරම් කරදර ආවත් වගකීම් ඉෂ්ට කරන හොඳ කෙනෙක් නිර්වාන් කියන්නේ.


ස්නේහා නිර්වාන්ට ආදරය කරනවා?


මම හිතන්නේ දැන් දැන් එයා ගොඩක් ආදරය කරනවා. ස්නේහා මේ දේවල් කරන්නේ අපේ ආදරය නිසා කියලා කියනවා.


සැබෑ ජීවිතයේදි ස්නේහා නිර්වාන්ට ආදරය කරනවා කියලා කිව්වොත්?


මට තේරෙන්නේ නැහැ.


ඒ කියන්නේ ශලනි ඔබට ඇත්තටම ආදරය කළොත් ඔබ මොකද කරන්නේ?


නැහැ. මම හිතන්නේ නැහැ එයා මට ආදරය කරයි කියලා. මේ ක්ෂේත්‍රයේදි හමු වුණු අපි හොඳ යහළුවෝ. එයා මම විශ්වාස කරන ගොඩක් හොඳ කෙනෙක්. හැම දෙයම කියන්න පුළුවන්; නිහතමානීකම ගොඩක්ම තියෙන‍ කෙනෙක්. ඈ මගේ චරිතයට ගොඩක් උදව් කරනවා. අපි දෙන්නා අතර එහෙම දෙයක් ඇති වෙන එකක් නැහැ.


ඒ වුණාට ගොඩක් අය කියනවානේ ශලනියි, සචිනුයි පෙම්වතුන් කියලා?


ප්‍රේක්ෂක ජනතාවට ඒ ගැන වැරැද්දක් කියන්න බැහැ. ඔවුන් ස්නේහාව හා නිර්වාන්ව කැමරාවේ පිටතදිත් ඒ විදියටම බලාපොරොත්තු වෙනවා. එහෙම වුණාම අපි යහළුකමට ෆොටෝ එකක් දැම්මට පස්සේ ඒ අය එක එක විදියට හිතනවා. මේ දෙන්නා නයිස් කපල්; ගැළපෙනවා කියලා. එහෙම හිතන එක එයාලගේ වැරැද්දක් නොවෙයි.


ඒ අය කියන්නේ බොරුවක්ද?


අපි දෙන්නා අතර එහෙම දෙයක් නැහැ. ඒත් අපි දෙන්නා ගොඩක් දේවල් ශෙයාර් කර ගන්නවා. අපි ගොඩක් ‍හොඳ දේවල් කතා කරනවා. ඉදිරියට සිදුවන දේවල්. ඒ වගේම අපි යාළුවෝ නිසා ගොඩක් එළියට යනවා. බලාගෙන ගියාම කතා හදන එකේ වරදක් නැහැ.


ඒ වුණාට ක්ෂේත්‍රයේම අය කියනවානේ ඔය දෙන්නා පෙම්වතුන් බව?


ඒක ගැන නම් මම කොහොමත් දන්නේ නැහැ. මම ඔය වගේ දේවල් ගැන ලොකුවට හොයන කෙනෙක් නොවෙයි. සාමාන්‍යයෙන් මම වැඩේ කරලා ගෙදර යන කෙනෙක්. මම එච්චර පිට් වුණේ ශලනිට වගේම ශලනිත් ගොඩක් කාලයකට පස්සෙයි මට ෆිට් වුණේ. ඒ හින්දා වෙන්න ඇති කතාවක් හදන්නේ.




යාළුකම ආදරයකට පෙරළෙන්න බැරිද?


මම හිතන්නේ නැහැ. අපි දෙන්නාගේ තියෙන්නේ වෙනම සම්බන්ධයක්. අපි දෙන්නා යහළුවෝ. මම හිතන්නේ නැහැ එහෙම දෙයක් වේවි කියලා. මම හිතලත් නැහැ එහෙම දෙයක්.


මේ වෙනකොට සචින්ට පෙම්වතියක් ඉන්නවද?


නැහැ.


එහෙම කෙනෙක් ඉඳලත් නැද්ද?


ඉඳලා තියෙනවා. ඒ සම්බන්ධය නැතිවෙලා දැනට අවරුදු තුනක් විතර වෙනවා.


ඒක නැති වුණේ රඟපාන්න ආව නිසාද?


ඇත්තම කතාව ඒ සම්බන්ධය නැති වුණේ මට සල්ලි නැති නිසා. මට වුවමනා සල්ලි හම්බ කරලා සමාජයේ හොඳ තැනක් ගන්න. හැබැයි මම සල්ලි හම්බ කරන්න ගත්තේ හරි විදියට. ඒ වගේම මම කාටවත් මුට්ටියක් අල්ලලා, කා වෙනුවෙන්වත් වැඩ කරලා, කාවවත් කපලා නොවෙයි මෙතනට ආවේ. මගේ මහන්සියෙන්. ඉදිරියේදි අම්මා වෙනුවෙන් ගොඩක් දේවල් කරන්න ඕන. එයත් එක්කම දිගු කාලයක් ඉන්න ඕන. ඒ වගකීම් එක්ක ආදරය පස්සට දාන්න වෙලා තියෙන්නේ.


ඒ කියන්නේ ශලනිගේ කතාව බොරුවක්?


ඒක බොරුවක්.


ඒක එහෙනම් ඉදිරියේදි ඇත්තක් වෙන්නේ නැතිවෙයිද?


නැතිවෙයි.


බාගයට උත්තර දෙන්නේ ඇයි?


අනාගතයටත් එක්කයි උත්තරයක් දුන්නේ. එහෙම දෙයක් වෙන එකක් නැහැ.


ශලනි හොඳ යහළුවකු නම් ඔබ ඇගේ අගය කරන ලක්ෂණ මොනවද?


ඈ නිහතමානියි. මම ආධුනික කෙනක් කියලා බලන්නේ නැතිව මට ගොඩක් උදව් කළා. අනෙක් අයටත් උදව් කරන කෙනෙක්. එයාගේ ලොකුකමක් නැහැ. හැම වෙලාවෙම සිනාවෙලා සතුටින් ඉන්න බලන්නේ. උස් පහත් නැතිව එයා මිනිස්සු ආශ්‍රය කරනවා.


සචින්ට පසුගිය උපන්දිනේදි පුදුම කිරීමක් ලැබුණා නේද?


ශලනිගෙන්ද?


ඔව්?


ඔව්. එදා අපි දෙන්නා රෑ 7.30 වෙනතුරු ෂූට් එකක හිටියේ. මම ඒ වෙලාවේ තමයි යන්න ආවේ. එයා හිටියේ හොඳටම නිදිමතේ. මම කිව්වා එහෙනම් මමත් යනවා. ඔයත් යන්න කියලා. රෑ දොළහට අපේ ගෙදරට වෙන දවස්වලත් මාව පුදුම කරවන්න කට්ටිය එනවා. ඒත් එයා එයි කියලා මම බලාපොරොත්තු වුණේ නැහැ. එයා නිදිමතේනේ හිටියේ. එයා මගේ කේක් එකත් සරසලා තිබුණේ ක්‍රිකට්වලට අදාළ විදියට. ඇත්තටම මම සප්‍රයිස් වුණා අටට ගිය ළමයා දොළහට විතර ආවට පස්සේ.


ශලනි ඔයාට ආදරය ප්‍රකාශ කළොත් ඔයා භාර ගන්නවද?


මට ටිකක් වෙලා හිනා යයි.


ඇයි ඒ?


මම එහෙම දෙයක් එයාගෙන් බලාපොරොත්තු වෙන්නේ නැහැ. මට ඒක ගොඩක් වෙලාවට පැහැදිලි කරන්න බැරි වෙයි. එයාට ඒක කොහොමත් කරන්න බැරි වෙයි. කළොත් මට ඒකට හිනා යයි.


ඒ අදහස එයා පිළිගන්නවද?


මම හිතන්නේ නැහැ එයා ඒ වගේ දෙයක් කරයි කියලා. අපි දෙන්නා අතරේ එහෙම දෙයක් නැහැ. භාර ගන්න දෙයක් කියන්න එපැයි. අනෙක මම එයාව රිජෙක්ට් කරන්න තරම් කෙනෙක් නොවෙයි. එයත් එහෙම ප්‍රොපෝස් කරන්න තරම් මම කෙනෙකුත් නොවෙයි. අපි දෙන්නා යාළුවෝ නිසා. එයා එහෙම කරයි කියලා මම හිතන්නේ නැහැ.


තිලානි ශානිකා විතානාච්චි