කොවිඩ් ඉවර වුණ ගමන් මම විවාහ වනවා - ඉසුරු ලොකුහෙට්ටිආරච්චි





ටෙලි නාට්‍යය හා සිනමා නිර්මාණ රැසකින් ප්‍රේක්ෂක ඔබ මුණ ගැසුණ ඉසුරු ලොකුහෙට්ටිආරච්චිගේ දක්ෂ.. තරුණ.. රංගන ශිල්පියෙකි. මේ දිනවලද ටෙලි නාට්‍යය කිහිපයකින්ම දකින ඔහු ඉදිරි කාලයේදී වැඩිපුරම සිනමා නිර්මාණ හරහා ඔබට දැක ගැනීමට හැකිවේ. මෑතකදී එක්වූ පුවත්පත් සාකච්ඡාවකදී  ඉසුරු තම විවාහය ගැන ඉහි මෙසේ පළ කොට තිබුණි. විවාහ වෙන්න තමයි හිතාගෙන ඉන්නේ ඉතින්. වයස හරි කියලා එකක් නැහැ. මට හිතෙනවා පවුල් ජිවිතයක් ගොඩනගන්න දැන් කාලේ හරි කියලා. හැබැයි මේ කොවිඩ් වසංගත තත්ත්වය ඉවර වෙනකල් මම බලාගෙන ඉන්නවා මගේ විවාහය ගන්න. මගේ යාළුවෝ ගොඩක් ඉන්නවා. 



ඒ හින්දා පනස් දෙනෙකුට විතරක් කියලා විවාහ උත්සවයක් ගන්න බැහැ. පනහකට කිව්වොත් තව පන්දාහක් විතර මාත් එක්ක තරහා වෙනවා. ඉතින් මේ ‘කෝවිඩ්’ වසංගත තත්ත්වය පහවෙලා ගියාම විවාහය ගැන සැළසුම් කරනවා. විවාහයත් මම වෙනස්ම විදිහට ගන්න තමයි හිතාගෙන ඉන්නේ. ඒ පිළිබඳව මම විවාහය ගන්න ළං වෙලා කියන්නම්.






මට ඕන වුණේ සමාජයට පණිවිඩයක් දෙන්න මිසක් මට සෝෂල් මීඩියාවලින් ජනප‍්‍රිය වෙන්න නෙමේයි





 ”ඇත්තටම මේ වෙලාව කතා කරන්න පුළුවන් අවස්ථාවක් නෙමෙයි. මගේ මව මිය ගිහින් පැය කිහිපයකින් ආදාහනය කළා. මට මූණ බලාගන්න පුළුවන් වුණෙත් පොඩි වෙලාවකට විතරයි. අනපේක්ෂිත ලෙසින් මගේ අම්මගේ වෙන්ව යෑම තවමත් විශ්වාස කරන්න සහ ඒ වේදනාව දරා ගන්න අමාරුයි. කොහොම උනත් මම මේ වචන ටික කතා කරන්නේ මට ආදරය කරන හැම දෙනාම වෙනුවෙන්. මම ඒක සමාජ මාධ්‍යයට වීඩියෝ එකක් දාලා කිව්වෙත් කොරෝනා අපේ ආදරණීයයන්ගේ ජීවිත බිලි ගන්න පටන් අරන්, මේ මොහොතේ හැමදෙනාම ආරක්ෂා වෙන්න කියන එක.

 


 ජනප‍්‍රිය රූපලාවන්‍ය ශිල්පිනියක් හා රංගන ශිල්පිනියක් වන ගයාත‍්‍රී ඩයස්ගේ මව කොරෝනා ආසාදනය වීම නිසා පසුගිය 13 වැනිදා අභාවප‍්‍රාප්ත වූවාය. ඒ සම්බන්ධව කනගාටුව ප‍්‍රකාශ කිරීමට දුරකථනය ඔස්සේ අපි ඇයව සම්බන්ධ කරගතිමු. සුහද කතාබහකට අවස්ථාව නොවූවත් ඇගේ මවගේ වියෝව හා කොරෝනා සම්බන්ධයෙන් අදහස් කිහිපයක් ගයාත‍්‍රී අප සමඟ බෙදා ගත්තාය.

 

 ”මගේ අම්මා හෘදයාබාධයක් නිසා නෙවිල් ප‍්‍රනාන්දු රෝහලේ දැඩි සත්කාර ඒකකයේ ප‍්‍රතිකාර ලබමින් හිටියේ. දින කිහිපයකින් සුව අතට හැරෙමින් තිබියදී හදිසියේ නැවත ශ්වසන අපහසුතාවක් ඇති වුණා. පසුගිය 13 වැනිදා කොරෝනා වෛරසය ආසාදනය වීම නිසා අනපේක්ෂිත ලෙස දැඩි සත්කාර ඒකකයේදීම මගේ අම්මා මිය ගියා.

 

මවගේ අභාවය පිළිබඳව සමාජ මාධ්‍යයට නිකුත් කරලා තිබුණ වීඩියෝ එක ගැන මේ දවස්වල විවිධ මත පළවෙනවා.

 

 මම මේ වෙලාවේ ඉන්නේ මගේ අම්මගේ වෙන්ව යාමත් එක්ක ලොකු වේදනාවකින්. ඇත්තටම මට සෝෂල් මීඩියාවලින් ජනප‍්‍රිය වෙන්නවත් පත්තරේකට ඉන්ටර්විව් එකක් දෙන්නවත් පුළුවන් කමක් නෑ. අවශ්‍යතාවයකුත් නෑ. හැබැයි එහෙම තියෙද්දිත් මට අවශ්‍ය වුණේ මට ආදරය කරන හැමෝටම පණිවුඩයක් දෙන්න. සමහර අය පුද්ගලික ව කතා කරලා මගෙන් වුණ දේ අහනවා. කනගාටුව ප‍්‍රකාශ කරනවා. ඒ හැමෝම එක්ක කතා බහ කරන්න මට අපහසුයි. ඒ හැම දේටම පිළිතුරක් විදිහට තමයි ඒ වීඩියෝ එක දැම්මෙ.

කත්‍රිනා - විකී ආදර කතාව ඇත්තක්



බොලිවුඩය යනු ආදර කතාවලින් අඩුවක් නොවන තැනක් . කාලයෙන් කාලයට විවිධ ආදර කතා ගොඩනැඟුණද ඇතැම් ඒවා සවිමත් ලෙසින් බැඳී තිබුණත් බොහොමයක් කතා ඉක්මනින් අවසන් වූ කතා පමණක්ම වන අයුරු දැකගන්න පුළුවන් . කත්‍රිනා කයිෆ් සහ විකී කෙශාන්ගේ සබඳකමත් මේ ලෙසින් දිගු කලක් ආරංචියක් බවට පත් වී තිබූ ආදර කතාවක්. මේ වන තෙක් දෙදෙනාගෙන් කිසිවෙකුත් ඒ පිළිබඳ හෙළිකර සිටියේ නැහැ.


මීට පෙර අවස්ථා කිහිපයකදීම් කත්‍රිනා මෙන්ම විකී කෞශාල් ඔවුන්ගේ සබඳතාව පිළිබඳ විසීමේදී නිරන්තරයෙන් අදහස් දැක්වීම ප්‍රතික්ෂේපෙ කර සිටියා. විකී කෞෂාල් වරෙක සමිමුඛ සාකච්ඡාවකදී පවසා සිටියේ මෙය ඔහුගේ පෞද්ගලික ජීවිතය බවත් එය ආරක්ෂා කිරීමට තමා කැමති බවයි . නමුත් මෑතකදී හර්ෂශ්වර්ධන් කපූර් මේ ආදර කතාව තහවුරු කර සිටියා. කත්‍රිනා - විකී ආදර කතාව සත්‍යයක් බව පැවසූ හර්ෂ මේ ප්‍රකාශයෙන් තමාට කරදරයක් විය හැකි බවත් සඳහන් කළා.


කත්‍රිනා සහ විකී කෞශාල් යන දෙදෙනාම ඔවුන්ගේ නව නිර්මාණවල කාර්යබහුල වී සිටිනවා. විකී කෞශාල් අතමා දි ඉහෝටල්චිත්‍රපටයට දායක වී සිටින අතර ආරක්ෂක සීමාවන් ලිහිල් වීමත් සමඟ කත්‍රිනා ටයිගර් 3 චිත්‍රපටයේ රංගන කටයුතු ආරමිභ කිරීමට සූදානම් වී සිටිනවා. දෙදෙනාම එම චිත්‍රපටවල සුපිරි වීරයන් ලෙස පෙනී සිටීම විශේෂයි.






මගේ නමෙන් පෙනී ඉන්නේ මම නොවෙයි - කාංචනා මෙන්ඩිස්




අනූව දෙදහ දශකවල ටෙලිතිරය ඈ බදු අරගෙන සිටියාය. ඇගේ රුව සෑම නාළිකාවකම පාහේ දිස් විය. රංගනය මගින් ප්‍රේමයේ චමත්කාරය එකල තාරුණ්‍යයට කියාදෙන්නට ඈ සමත්වූවාය. ආකර්ෂණීය රූසපුව නිසාම ඈ එකල තරුණයන්ගේ සිහින කුමරිය වූවාය. ප්‍රසිද්ධ වීම ලේසි වුවද ජනප්‍රිය වීම, ජනකාන්ත වීම ලේසි පහසු කටයුත්තක් නොවේ. තවමත් නම ඇසෙන විට සහෘද හදසන්තානයේ ගැඹුරු තැනක සිට සිනාසීම එතරම් පහසු නැත. ඇය ඒ සියල්ලට සමත්වූවාය. මේ තරම් දීර්ඝ පූර්විකාවක් ගත්තේ එකල තරුණ හදවත් ප්‍රේමයෙන් ස්පර්ෂ කළ යුවතිය ගැන කියන්නටය. ඇය නමින් කාංචනා මෙන්ඩිස්. මේ වන විට රංගනයෙන් මඳක් ඈත් වී එංගලන්තයේ සිය පවුල සමඟින් ජීවත් වන ඇයව අප  ඇගේ කලාවේ යටගියාව .ගැන  සහ අනාගතය ගැන ෙමලස පුවත්පතකට විස්තර කියා තිබුනා.


 කොරෝනා වසංගතය එක්ක දුරු රටක ගෙවන ජීවිතය කොහොමද?


කොරෝනා වසංගතය මුලින්ම යුරෝපා රටවල පැතිර යනවා කියලා ආරංචි වෙනකොටම අපි දැනගත්තා එංගලන්තයටත් එයි කියලා. ඒ වගේම ආවා. ඒ භයානක අත්දැකීම කියන්න හරි අමාරුයි. ලංකාවේ නම් අපි ඔක්කොම එකට ඉන්නේ. මොන දේ වුණත් අපි වටේ අපේ අය ඉන්නවා. මේ රටේ අපි හැමෝම තනියම ඉන්නේ. මගේ ලොකු අක්කා මෙහෙ හිටියාට ටිකක් දුරින් ඉන්නේ. ඒ අත්දැකීම ලොකු බයකින් වින්දේ. මෙහෙ වසංගතය නිසා දිනකට මියයන ප්‍රමාණයත් වැඩි වුණා. 1500 - 2000 අතර ප්‍රමාණයකට වැඩි වුණා. මගේ අම්මා ලංකාවේ ඉන්නේ. එයාලා හරිම බයෙන් හිටියේ අපි ගැන. දැන් ඒකම අපිට අනිත් පැත්තට දැනෙනවා ලංකාව ගැන. වැක්සින් කරපු ඉක්මණින් වසංගතය තත්ත්වය සමනය වෙමින් පවතිනවා.


 

මේ කාලේ ලංකාවේ හිටියා නම් හොඳයි කියලා හිතෙන්නේ නැද්ද?


 ලංකාවේ වෙන සමහර දේවල් දැක්කාම මට දුක හිතෙනවා. මගේ රට කොච්චර උතුම් රටක්ද? ඉතිහාසය ගත්තාම වෙනත් දියුණුවෙන රටවල් ලංකාවේ දිහා බලාගෙන හැදෙන්න ගත්තා. මම ජීවිතයේ ගොඩක් දේවල් කොරෝනා වසංගතයක් එක්ක අධ්‍යයනය කරන්න පටන් ගත්තා. මොකක්ද මේ අපේ ජීවිතය? අපි හැමදාම මෙතන ඉන්න ඇවිල්ල නැහැ. දවසක අපි මේ හැමදේම නැති කරගෙන යනවා. මිනිස්සු හරිම තරගකාරී. මේ වසංගතය නිසා තරගකාරීබවට වඩා මනුස්සකම වටිනවා කියන එක තේරුණා.



ඔබ රංගනයෙන් දායක වුණු චිත්‍රපටයක් පසුගිය කාලේ තිරගත වුණා නේද?


ඔව්. ඒ "සෙනහසක සිහිනය". ඒ චිත්‍රපටය මම රඟපාද්දී මට අවුරුදු විසිදෙකයි. ඒක හරිම ලස්සන චිත්‍රපටයක්. ඒක දෙමළ අධ්‍යක්ෂවරයෙකුගේ චිත්‍රපටයක්. ඉන්දියාවෙන් ලොකු කාර්ය මණ්ඩලයක් ආවා චිත්‍රපටයට. මට ඒක හොඳ අත්දැකීමක්. ඒක මගේ ලස්සනම කාලයක්. සනත් ගුණතිලක අයියා එක්ක මම මගේ පළවෙනි චිත්‍රපටය වන "රාජ්‍ය සේවය පිණිසයි"හි මීට කලින් රඟපාලා තිබුණා. මේ චිත්‍රපටයේදීත් මට ඔහු එක්ක රඟපාන අත්දැකීම ලැබුණා. සනත් අයියා කියන්නේ හරිම ප්‍රෙෆෙෂනල් එක්කෙනෙක්. මම හරිම කැමතියි එයා එක්ක වැඩ කරන්න. එයාට වැඩේ නම් වැඩේ තමයි. අපි ගොඩක් දේවල් එයාගෙන් ඉගෙනගත්තා. රොෂාන් පිලපිටිය, මංජුලා තිළිණි අපි ඔක්කොම හරිම සතුටින් වැඩ කළේ. දැන් ඒක දකිනකොට හරිම ආසයි. දැන් මගේ ස්වරූපය ගොඩක් වෙනස් වෙලා. මම එංගලන්තේ පදිංචියට ආවේ 2014දී. කාලෙකට පස්සේ මම රඟපාපු චිත්‍රපටයක් තිරගත වෙනවා කියන එක ලොකු දෙයක්. ඒ නිසා මගේ ප්‍රේක්ෂකයන්ට මාව මතක් වුණා.


 

ප්‍රේක්ෂකයන්ට තියෙන ලොකුම ප්‍රශ්නේ කාංචනා රඟපාන්නෙ නැද්ද කියන එක?


රංගනය මම අතහැරලා නැහැ. එංගලන්තේ කරන ලංකාවේ නිර්මාණයකට මම දායක වෙන්න කැමතියි. ඒ වගේ නිර්මාණ කීපයක්ම කරන්න පහුසිය කාලේ කතා වුණා. ඒත් කොරෝනා නිසා ඒවා හරියට වුණේ නැහැ. කොරෝනා එන්න කලින් මට හොඳ චිත්‍රපටයකට ආරාධනා ලැබුණා. පරාක්‍රම නිරිඇල්ල මහත්මයා මට කතා කළා චිත්‍රපටයකට. ඒක මට හරිම වටින ආරාධනයක්. ඒ ගැන මට දෙවරක් හිතන්න දෙයක් නැහැ. මිස්ටර් නිරිඇල්ල එක්ක මම කලින් වෙළෙඳ දැන්වීම් එහෙම කරලා තියෙනවා. එතුමා එක්ක කලා නිර්මාණයකට සම්බන්ධ වෙන්න ලැබුණේ නැහැ. ඒ චිත්‍රපටයට සූදානම් වෙද්දිම තමයි මේ කොරෝනා ප්‍රශ්නය ආවේ. චිත්‍රපටයේ රූගත කිරීම්වලට මම ලංකාවට එන්න සූදානම් වෙලා හිටියේ. ඒ වගේ හොඳ නිර්මාණ ලැබුණොත් මම අනිවාර්යයෙන්ම සම්බන්ධ වෙනවා.


 

කාංචනා ජනප්‍රිය වුණේ මදුරු දඟර වෙළෙඳ දැන්වීමකින් නේද?


ඔව්. මම අවුරුදු දොළහේ ඉඳලා රඟාපාන්නේ. ධර්මසේන පතිරාජ අංකල්ගේ "සුබ අනාගතයක්" ටෙලිනාට්‍යයේ. මම ජනප්‍රිය වුණේ මදුරු කොයිල් ඇඩ් එකෙන්. ඒක ලොකු හිට් එකක් වුණා. මම ඒ වෙනකොට උසස් පෙළ හදාරනවා. ඒ වෙළඳ දැන්වීම ගොඩක් ජනප්‍රිය වුණාම මට උපකාරක පංතිවල ගුරුවරු පවා විහිළු කළා. ළමයි ඒකේ තියෙන විසිල් එක ගහලා පෙන්නනවා. ඒකෙන් ගොඩක් අය මාව දැනගත්තා. ඒ වෙළෙඳ දැන්වීමේ පිටපත දිලීප අබේසේකරගේ. අධ්‍යක්ෂණය කළේ ජයන්ත චන්ද්‍රසිරි. ඒ සම්මිශ්‍රණය නිසා තමයි ඒ තරම් ජනප්‍රිය වුණේ. සනත් විමලසිරි අයියාව පවා හැමෝම හඳුනගත්තේ ඒකෙන්. මටත් ඊටපස්සේ ගොඩක් නිර්මාණවලට ආරාධනා ආවා.



ඔබ ලංකාවේ ටෙලිනාට්‍යවල දීර්ඝ කාලයක් අගතැන් වුණු චරිතයක්. මේ තරම් කාලයක් ඒ ජනප්‍රියත්වය පවත්වාගත්තේ කොහොමද?


 

කලා ක්ෂේත්‍රයේ රංගන ශිල්පිනියන් තැනකට එන්න ගොඩක් මහන්සි වෙනවා. අවස්ථා ළඟා කරගන්න විවිධ දේවල් කරනවා. ඒ අතින් බලනකොට මම හරිම වාසනාවන්තයි. මම අධ්‍යක්ෂවරුන්ගෙන් වැඩ ඉල්ලුවේ නැහැ. වැඩ ඉල්ලගන්න මහන්සි වුණේ නැහැ. මට හැමෝම නිර්මාණවලට කතා කළා. මම රඟපාපු හැම චරිතයක්ම මගේ වාසනාවට මට ලැබුණු චරිත. මම වැඩ ඕනේ කියලා දැඟලුවේ නැහැ. ගොඩක් අය කියන දෙයක් තමයි මාත් එක්ක වැඩ කරන්න හරි පහසුයි කියලා. මම වැඩේට සියයට සියයක් කැපවෙන කෙනෙක්. මම ටෙලිනාට්‍ය සියයකට වැඩිය රඟපාලා තියෙනවා, කවදාවත් කාර්යමණ්ඩලය එක්ක කිසිම ප්‍රශ්නයක් දාගෙන නැහැ. සමහර ප්‍රායෝගික හේතූන් මත රූගත කිරීම්වලට දින වැඩිපුර යනවා. කිසිම අයකිරීමකින් තොරව මම වැඩිපුර දින දහය දොළහා කැප කරලා තියනවා නිර්මාණ වෙනුවෙන්. රංගනය කියන දේට විතරයි මම ආදරේ. මම භෞතික දේවල් පස්සේ ගියේ නැහැ. මුදල්වලට වඩා මම හම්බ කළේ මිනිස්සුන්ගේ ගෞරවය සහ ආදරය.


 

ඔබ රගපෑ ටෙලිනාට්‍යවලින් තවමත් මතක චරිත පෙළගැස්සුවොත්?


"ඉසුරු යෝගය" ටෙලිනාට්‍යයේ රේවතීගේ චරිතයට මම කැමතියි. "බිඳෙන බැඳුම" ටෙලිනාට්‍යයේ මගේ චරිතයට කැමතියි. "මේ වසන්ත කාලයයි" ටෙලිනාට්‍යයේ නෙරංජලාගෙ චරිතයට කැමැතියි. ඒකට මට හොඳම නිළිය සම්මානය ලැබුණා. මම අවසානයට රඟපාපු "ගිරිකුල" නාට්‍යය මුතු මැණිකාගේ චරිතයත් මතක් කරන්න ඕනේ.


 

කාංචනා මෙන්ඩිස් වැඩිපුර ගැමි චරිත අතර කොටු වුණා කිව්වොත් ඒක පිළිගන්නවා ද?


වෙන්න පුළුවන්. මගේ ස්වරූපයත් එක්ක මට වැඩිපුර ලැබුණේ එහෙම චරිත. ලාංකික මුහුණු කිව්වාම මතක් වෙන්නේ ගැමි, අහිංසක පාට තියෙන චරිතනේ. සමහර අවස්ථාවල ඊට වඩා එහා ගිය චරිතත් මට කරන්න පුළුවන්කම තිබුණා. ඒ කාලේ මම ගොඩක් කාර්යබහුලයි. එක ටෙලිනාට්‍යයක් ඉවරවෙලා ගෙදර ගිහිල්ලා ඊළඟ ටෙලිනාට්‍යයට සූදානම් වෙනවා. ඒ නිසා සමහර හොඳ නිර්මාණ ගොඩක් මට මඟහැරුණා. අදටත් ඒ ගැන මම දුක්වෙනවා. තිස්ස අබේසේකර අංකල් මට කතා කළා "වනසරණ" නාට්‍යයට. ඒක මට මඟහැරුණා. ආනන්ද අබේනායක මහත්මයා මට කතා කළා නාට්‍යයකට. ඒකට සම්මාන ගොඩක් ලැබුණා.



සිනමාව තුළ ලැබුණු ඉඩකඩ මදි කියලා හිතෙන්නේ නැද්ද?


මම චිත්‍රපට තිහකට විතර සම්බන්ධ වෙලා තියෙනවා. ඒ නිර්මාණ ගැන මම ගොඩක් සතුටු වෙනවා සහ සෑහීමකට පත් වෙනවා. මොකද ඒ නිර්මාණ ඇතුළේ ඉවතට දාන්න පුළුවන්, වැඩකට නැති නිර්මාණ එකක්වත් නැහැ. ඉතා සීමිත ගානක් වුණත් මම ආරම්භයේ ඉඳන්ම හොඳ අධ්‍යක්ෂවරුන් හොඳ චිත්‍රපටවලට සම්බන්ධ වුණා. මුලින්ම උදයකාන්ත වර්ණසූරිය අයියාගේ "රාජ්‍ය සේවය පිණිසයි" චිත්‍රපටයේ රඟපාලා හොඳම සහාය නිළිය සම්මානයත් මට ලැබුණා. ඊටපස්සේ එයාගෙම "රෝස වසන්තය" චිත්‍රපටිය සෑහෙන්න ජනප්‍රිය වුණා. මිනිස්සු නැවත සිනමාශාලාවට ඇඳී එන්න ගත්තේ ඒ චිත්‍රපටයෙන්. සුමිත්‍රා පිරීස්ගේ "සක්මන් මළුව", මහාචාර්ය සුනිල් ආරියරත්නගේ "සුදු සෙවණැලි" වගේ හොඳ නිර්මාණ රාශියකට මට සම්බන්ධ වෙන්න ලැබුණා.


 

ඔබ සමඟ රඟපෑ නළුවන් අතරින් පෙම්වතාගේ චරිතයට සුදුසුම කෙනා කවුරු කියලාද හිතන්නේ?


ඒ කාලේ අපි ජනප්‍රිය වෙනකොටම අපිව කපල් කරනවා. ඉසුරු යෝගය ටෙලිනාට්‍යයේ හිටියේ මමයි රොෂාන් පිලපිටියයි. ඉතින් ඒක ගොඩක් ජනප්‍රිය වෙනකොට තවත් නිර්මාණවලට අපි දෙන්නටම ආරාධනා කරලා තිබුණා. මාත් එක්ක පෙම්වතාගේ චරිතය රඟපාපු හැමෝම ඒ චරිත හොඳට කළා. විශේෂයෙන් මම කමල් අද්දරආරච්චිට ගොඩක් කැමති කෙනෙක්. අපි දෙන්නා එක ටෙලිනාට්‍යයක රඟපෑවා. "සමාරා" චිත්‍රපටයේත් අපි දෙන්නා එකට රඟපෑවේ. කමල් අයියා එක්ක වැඩ කරද්දි හොඳ සහයෝගයක් ලැබෙනවා. වේදිකා නාට්‍යවල හිටපු නිසා රංගනය ගැන එයාට හොඳ පළපුරුද්දක් තියෙනවා. අපේ අඩුපාඩු පවා හදලා ලොකු සහයෝගයක් දෙනවා. ඒ වගේම මහේන්‍ද්‍ර පෙරේරා අයියා එක්ක වැඩ කරන්නත් මම කැමතියි. ඒ වගේම ජනක කුඹුකගේ අයියාව මතක් කරන්න ඕනේ. ජනක අයියාට ලොකු දැනුමක් තියෙනව රංගනය ගැන. එයා නිතරම පොතපත කියවන කෙනෙක්. අපි දෙන්නා කතා වෙලා හොඳට චරිත කරපු නිර්මාණ තියෙනවා.


 තාමත් ආසයිද පෙම්වතියෙගේ චරිතය රඟපාන්න?


ආදරයට වයස් සීමාවක් නෑනේ. මගේ වයස මට්ටමේ ආදරයක් ගැන පිටපතක් ලියවුණොත් මම පෙම්වතියගේ චරිතය රඟපාන්න කැමතියි.


 

ඔබට කලා ක්ෂේත්‍රයේ පූර්වාදර්ශී චරිතයක් ඉන්නවාද?


කලාව කියන එක මට පොඩි කාලේ ඉඳලා තිබුණ දෙයක්. මගේ මහ ගෙදරට එහා පැත්තේ තමයි හියුගෝ ප්‍රනාන්දු (මාස්ටර් මාමා) හිටියේ. එයාගේ ගෙදරට හැම නළු නිළියක්ම එනවා. අපි පොඩි කාලේ ඉස්සර එහෙ සෙල්ලම් කරන්නේ. මේ අයව මම පොඩි කාලේ ඉඳලම දැක්කා ඒ වගේම මගේ ආච්චි සීයයි රුක්මණී දේවිගේ ඥාතීන්. ඒ නිසා අම්මා ගොඩක් වෙලාවට හිටියේ ඩේසි (රුක්මණීදේවි) ඇන්ටිලාගෙ ගෙදර. මගේ සීයා මිනර්වා නාට්‍ය සමාජයේ හිටියා. කලා ක්ෂේත්‍රයේ ජ්‍යෙෂ්ඨයෝ හැමෝම මගේ පූර්වාදර්ශ තමයි. ජෝ අබේවික්‍රම, සිරිල් වික්‍රමගේ, ඩබ්ලිව්. ජයසිරි අංකල්ලා එක්ක මම වැඩ කරලා තියෙනවා. එයාලගෙන් මට ගොඩක් ගුරුහරුකම් ලැබිලා තියෙනවා. නීටා ප්‍රනාන්දු වගේ ගොඩක් ප්‍රවීණ රංගන ශිල්පිනියන්ගෙන් පවා මම ගොඩක් දේවල් ඉගෙනගත්තා.


 

වෙන රටක ඉඳලා බලද්දි වර්තමාන ලංකාවේ කලා ක්ෂේත්‍රය ගැන මොකද හිතෙන්නේ?


ලොකුවට සතුටු වෙන්න පුළුවන් කාරණාවක් නැහැ. මිනිස්සු අතර ජනප්‍රියයි කියන ටෙලිනාට්‍ය දිහා බැලුවාම මේ මොනවද කියලා හිතෙනවා. මම වැඩිහිටි පරම්පරාව එක්කත් වැඩ කරලා තියෙනවා. තරුණ පරම්පරාව එක්ක වැඩ කරලා තියෙනවා. දැන් සමහර නිර්මාණ දිහා බැලුවාම ඒ පිටපත්වල දෙබස් සෑහෙන්න ප්‍රාථමික මට්ටමේ ඒවා. හරිම අර්ථ ශුණ්‍ය, දෙපිට කැපෙන වචන ඒවා. ඉස්සර ටෙලිනාට්‍යවල පිටපත් නාළිකාවල අධ්‍යක්ෂ මඩුල්ලක් හරහා අනුමත වුණා. දැන් ටෙලිනාට්‍ය දකිනකොට ලොකු දුකක් දැනෙනවා කලාවට වෙලා තියෙන්නේ මොකක්ද කියලා.


 ඔබ කියන විදිහට දැන් හැදෙන ටෙලිනාට්‍ය ගුණාත්මකත්වය අඩු වෙන්නේ පිටපත නිසා?


පිටපත විතරක් නෙමෙයි හැමදෙයම ගුණාත්මකත්වයෙන් අඩුයි. විශේෂයෙන් අපි ඉස්සර නිර්මාණයක පිරිවැයට වඩා ගුණාත්මකබව ගැන හිතුවා. ඒත් දැන් එක දවසින් ජවනිකා තිහ හතළිහ රූගත කරනවා. මට ඒක හිතාගන්න බැහැ. අපි වැඩ කරද්දි සමහර දවසකට ජවනිකා තුනක් විතරක් කරපු දවස් තිබුණා. ගුණාත්මකත්වය තියාගන්න ඕනේ නම් හොඳ පුහුණුවක් එක්ක කාලය අරගෙන නිර්මාණ කරන්න ඕනේ. මේ අතරත් හොඳ ගුණාත්මක නිර්මාණ කරන්න උත්සාහ කරන නිර්මාණකරුවො ඉන්නවා.


 තරුණ රංගන ශිල්පිනියන්ගේ රංගනය ගැන ඔබේ අදහස?


 

කලා ක්ෂේත්‍රයේ ගොඩක් දක්ෂ තරුණ රංගන ශිල්පිනියන් ඉන්නවා. ඒත් බහුතරයකගේ දක්ෂතා ගැන සෑහීමකට පත් වෙන්න බැහැ. ඒකට ඒ අයට වරදක් කියන්නත් බැහැ. මොකද මේ වර්තමාන ක්‍රමවේදයට ඔවුන් අනුගත වෙලා තියෙන්නේ. ඒ අය රඟපානවා කියලා කරන්නේ දෙබස් කියන එක විතරයි. ඔවුන්ට රඟපාන්න කාලයක් නැහැ. අපිට ඉස්සර පිටපත ලැබෙන්නේ රූගත කිරීම්වලට මාස දෙකකට කලින්. ඒත් දැන් පිටපත දෙන්නේ රූගත කිරීම්වලට ආවාම. ඒ නිසා රංගන ශිල්පිනියන්ට දොස් කියන්නත් බැහැ. ඔවුන්ට දක්ෂතා තිබුණත් ඒවා පෙන්නන්න හොඳ නිර්මාණ නැහැ.


 

කාංචනා සෝෂල් මීඩියා භාවිතා කරන්නේ හරි අඩුවෙන්?


ඔව්. ඒක විශේෂයෙන් කියන්න ඕනේ. මම කිසිම සෝෂල් මීඩියා එකක නැහැ. මට මගේම කියලා ෆේස්බුක් එකවුන්ට් එකක්වත් නැහැ. මම ඒවා භාවිත කරන්න අකමැති කෙනෙක්. මම විශ්වාස කරනවා කලාකරුවෙක් වුණාම එහෙම ලොකුවට සමාජයට පෞද්ගලිකත්වය නිරාවරණය කරන්න අනවශ්‍යයි කියලා. එතකොට වටිනාකමත් අඩු වෙනවා. ඒ වගේම කියන්න ඕනේ මගේ නමින් ව්‍යාජ ගිණුම් සමාජ ජාලාවල තියෙනවා. ඒවායේ ඉන්නේ මම නෙමෙයි. ඒවායෙන් අපහසුතාවට පත්වුණු අයට මම කියනවා ඒ ගැන අදාළ අංශවලට පැමිණිලි කරන්න කියලා.



කලා නිර්මාණයක් අධ්‍යක්ෂණය කරන්න හෝ නිෂ්පාදනය කරන්න බලාපොරොත්තුවක් නැද්ද?


 මාත් එක්ක ක්ෂේත්‍රයට ආපු කලා ශිල්පීන් ඒ මට්ටමට ගිහින් තියෙනවා. ඒ ගැන මට සතුටුයි. මම ඉන්නේ ලංකාවේ නෙමෙයිනේ. මට තියෙන්නේ වෙනම ජීවිතයක්. මගේ දරුවන් එක්ක ඒ අයගේ වැඩ කටයුතු එක්ක මගේ ජීවිතේ දැන් කාර්යබහුල වෙලා තියෙන්නේ. දරුවො ටිකක් ලොකු වුණාම මම නිදහස් වෙනවා. කලා නිර්මාණයක් කරන්න නම් මගේ මනස නිදහස වෙන්න ඕනේ. වගකීම් අඩු වෙන්න ඕනේ. ඒකට දැන් මේ කාලය නෙමෙයි. ඉදිරියේදී අපි බලමු.


 කාංචනාගේ පවුලේ විස්තර කිව්වොත්?


මගේ සැමියා රොෂාන් රණවක. මට පුතාලා දෙන්නෙකුයි දුවෙකුයි ඉන්නවා. ලොකු පුතා සෙනිත රයන්. එයාට අවුරුදු දොළහයි. දුව කෙයිෂා රයිලි. එයාට අවුරුදු අටයි. පොඩි පුතා නිමාන රෙයෝන්. එයාට අවුරුදු හතරයි.


 

දවසක දරුවෝ කිව්වොත් රඟපාන්න ඕනේ කියලා?


මම එයාලට කිසිම බාධාවක් කරන්නේ නැහැ. මම කවදාවත් මගේ ක්ෂේත්‍රය හෑල්ලුවට දකින කෙනෙක් නෙමෙයි. මගේ ජීවිතේ මම ගොඩක් දේවල් ලබාගත්තේ කලා ක්ෂේත්‍රයෙන්. මට මිනිස්සුන්ට ආදරය, ජනප්‍රියත්වය, ගෞරවය ලැබුණේ කලාවෙන්. මම හිටපු විදිහට මගේ ළමයින්ටත් ඉන්න පුළුවන් නම් මගේ කිසි බාධාවක් නැහැ දක්ෂතාවක් තියෙනවා නම්. ඒ තුන්දෙනාට යම් යම් කලා හැකියාත් තියෙනවා. මේ වගේ රටක එයාලට කලාව කරන්න පුළුවන් වුණොත් ගොඩක් හොඳයි. මොකද මෙහෙ එයාලට රංගනය ගැන ඉගෙනගන්න හොඳ විශ්වවිද්‍යාල පවා තියෙනවා.


 ඉදිරි බලාපොරොත්තු මොනවාද?


මම රංගනයෙන් ඈත් වෙලා නැහැ. හොඳ වැඩකට ආරාධනා ලැබුණොත් මම ඒකට සම්බන්ධ වෙන්න කැමතියි. ලංකාවේ හැදෙන හොඳ නිර්මාණ දකිද්දි පොඩි දුකක් ඇති වෙනවා "අනේ මම හිටියා නම්" කියලා. විශේෂ බලාපොරොත්තු නම් නැහැ. මේ වගේ කාලෙක පරිස්සම් වෙලා පවුලේ අය එක්ක ජීවත් වෙන්නයි මට ඕනේ.







ගොසිප් නොවදින විදියට ජීවත්වුණාම කිසිම ප්‍රශ්නයක් නැහැ - ගිවන්ත අර්ථසාද්




මේ දවස්වල හදවිල අරණ විසල් පූර්ණජිත් ලෙස ඔබට සමීප වන ජනප්‍රිය රංගන ශිල්පියකු වන ඔහු ගිවන්ත අර්ථසාද්. ඔහුට මේ දවස්වල අන්තර්ජාලය ඔස්සේ මඩ ප්‍රහාරයක් පැතිර යනවා. ඉතින් ඔහු මේ ප්‍රශ්නයට මුහුණ දෙන විදිය ගැන මේ විදියට පුවත්පතක් සමඟින් විස්තර කියා තිබුනා.


 ගිවන්තට එරෙහිව මේ දවස්වල මඩ ප්‍රහාරයක් යනවා නේද?

ඔව් නේ… ‘හදවිල අරණ’ ටෙලිනාට්‍යයේ මම නිරූපණය කරන විසල්ගේ චරිතයට තමයි එවැනි මඩ ප්‍රහාරයක් සිදුවන්නේ. ඔය දේවල් කලා ක්ෂේත්‍රයට සම්බන්ධ ජනප්‍රිය ඕනෑම කෙනකුට මුහුණ දෙන්න වෙන් දේවල්. විසල් ජනප්‍රිය ගායකයෙක්. ඉතින් නෙත්මිගේ ආදරයට මම ආදරය කරන්නෙ නැති නිසා නෙත්මි කණ්ඩායමක් සමග එකතු වෙලා කරන දෙයක් තමයි මේ දවස්වල විකාශය වෙන්නේ.


 ඔබටත් සාමාන්‍ය ජීවිතයේදී මෙවැනි ප්‍රශ්නවලට මුහුණ දෙන්න වෙලා තිබෙනවද?

අපේ මට එහෙම වෙලා නැහැ. මම සියලු දෙනා සමග සහයෝගයෙන් වැඩකරන කෙනෙක්. ගොසිප් එකක් නොවදින විදියට ජීවත් වුණාම කිසිම ප්‍රශ්නයක් නැහැ. අනෙක මේ ගොසිප් ගහන අය මොනව බලාපොරොත්තුවෙන් එවැනි පහත් වැඩ කරනවද කියලා හිතාගන්න බෑ.


 හැබැයි ඉතින් විසල්. නෙත්මිට ආදරය කරලා පසුකාලකදී හඬකට වශී වෙලා ඒ ආදරය පසුපස යන එක හරිද?

නෙත්මිට වඩා නදීගේ තිබෙන හැකියාව වගේම ඇගේ ගතිගුණ, අහිංසකකමට විසල්ගේ හිත යනවා. හැබැයි ඉතින් අවසානයේ විසල්ට නෙත්මිගේ ආදරය නැවත ලැබෙනවා.


ඔබ රංගන ශිල්පියකු වගේම තවත් පැත්තකින් ටෙලිනාට්‍ය අධ්‍යක්ෂවරයකු ලෙසත් කටයුතු කළා. ඉතින් ‘කාසි’ ඔබේ කුළුඳුල් නිර්මාණය, එය තවම අපට දැකගන්න ලැබුණේ නැහැ?

ඔව්, මමත් ගොඩක් ආශාවෙන් හිටියේ ‘කාසි’ විකාශය වෙනකම්. ඒ වගේම එය විකාශය කරගැනීමට ගොඩක් මහන්සි වුණා. ඒත් තවම විකාශය කරගන්න බැරි වුණා. මං වගේම මේ ක්ෂේත්‍රයේ බොහෝ දෙනෙක් නිර්මාණ කරලා ඒවා විකාශය කරගන්න බැරිව ගෙදර තියාගෙන ඉන්නවා.


 ඒ කියන්නේ ඔබ නැවත නිර්මාණයක් කරන අදහස හිතින් ඇත්හැරලාද?

ඔව්, ඉතින් නිර්මාණ කරලා ගෙදර තියාගන්න කවුද කැමැති. දැන්නම් මම ඒ අදහස අත්හැරලා තියෙන්නේ. ආශාව, හැකියාව තිබුණට අලුත් පරපුරට අවස්ථාවක් දෙන්නේ නැත්නම් ඔවුන්ගේ හැකියාවන් යටපත් කරගෙන පැත්තකට වෙලා ඉන්නවා. මේ නිර්මාණකරණයට ක්‍රමවේදයක් අනුව හොඳ සැලසුමක් තිබුණොත් ගොඩ බොහෝ දෙනකුට ඔවුන්ගේ නිර්මාණ විකාශය කරගන්න දොර විවර වෙයි කියලා මම හිතනවා.


 ඔබ වෘත්තීය රංගන ශිල්පියෙක් ලෙස කටයුතු කරන කෙනෙක් බව අපි දන්නවා. රටේ තිබෙන කොවිඩ් වසංගතයත් එක්ක ආර්ථික ගැටලුවලට මුහුණ දෙන්නේ කොහොමද?

ඔව්, ඒක තමයි ලොකුම ප්‍රශ්නය. මේ ක්ෂේත්‍රයේ ගොඩ දෙනෙක් වෘත්තීය ශිල්පීන් ලෙස කටයුතු කරනවා. ඒ සියලු දෙනාටම මේ ප්‍රශ්නයට මුහුණ දෙන්න සිදුවෙලා. මේ අවස්ථාවේ සියලු දෙනාට සහනදායී පිළිවෙතක් ලැබෙනව නම් වටිනවා.


 මේ දවස්වල ඔබේ වැඩකටයුතු කොහොමද?

නිර්මාණ වැඩකටයුතු කරන්න බැරි නිසා ගෙදරට වෙලා තමයි කාලය ගෙවෙන්නේ. කරපු නිර්මාණ තිබෙනවා ඉදිරියේදී විකාශය වීමට. පසුගිය දවස්වල නිශාන්ත ප්‍රදීප් අධ්‍යක්ෂණය කළ ‘මොනර දැල’ චිත්‍රපටයට සම්බන්ධ වෙලා හිටියේ.


වසන්ත විතාරණගේ





මියුසික් වීඩියෝ හයසීයක මම පෙම්වතා වෙලා තියෙනවා - විරාජ් පෙරේරා





මියුසික් වීඩියෝ තුළින් ආදරණීය පෙම්වතා ලෙස ප්‍රේක්ෂක හදවතට සමීප වුණු විරාජ් පෙරේරා දැන් ජනප්‍රිය රංගන ශිල්පියකු බවට පත්වී හමාරයි. මේ දිනවල විකාශය වන පාර දිගේ ටෙලිනාට්‍යයේ රෙක්සි ලෙසින් ඔබට සමීප වන්නේද ඔහුයි. දිගු කාලයකට පසු  ඔහුෙග් අලුත් විස්තර ගැන  මේ විදියට පවසා තිබුනා .


විරාජ් මේ දවස්වල ‘පාර දිගේ’ සැරිසරන බව දකිනවා. අපි කැමැති ඒ ගැන මුලින්ම දැනගන්න?


‘පාර දිගේ’ ටෙලිනාට්‍යයේ මම රෙක්සිගෙ චරිතය තමයි රඟපාන්නේ. ඒ වගේම රෙහාන්ගෙ අවංක යාළුවෙක්. රෙක්සි වගේ හොඳ අවංක මිතුරන් අද සමාජයෙත් ඉන්නවා, මගේ ජීවිතයටත් එවැනි මිතුරන් ඉන්නවා. ‘පාර දිගේ’ ටෙලිනාට්‍යයට මට ආරාධනා කළ ටෙලිනාට්‍ය අධ්‍යක්ෂ ජයප්‍රකාශ් සිවගුරුනාදන්ට, ඒ වගේම සද්ධාමංගල සූරියබණ්ඩාර මගේ ගුරුපියාණන්ට, ඒ වගේම නිෂ්පාදක චාමර සමරවික්‍රමටත් විශේෂයෙන් ස්තුතිය පුද කරනවා. මොකද මේ සියලු දෙනාගේ සාකච්ඡාවලින් තමයි රෙක්සි චරිතයට මාව සුදුසුයි කියලා තෝරාගෙන තියෙන්නේ. ඒ වගේම උද්දික ප්‍රේමරත්න අයියා සමග තමයි මට වැඩිපුරම රඟපෑමට තියෙන්නේ. ඔහුගෙන් ලැබෙන ගුරුහරුකම් මට ගොඩක් වටිනවා.



‘සිල්ලර සමනල්ලු’ ටෙලිනාට්‍යයේ ඔබ නිරූපණය කළ චරිතය මතුපිටින් දිවයන චරිතයක් ලෙස තමයි අපට දැකගන්න ලැබුණේ. ඊට වඩා වෙනසක් දැනෙනවද රෙක්සි තුළ?


ටෙලිනාට්‍යයකට සම්බන්ධ වෙනකොට අපට සම්පූර්ණ පිටපතක් ලැබෙන්නේ නැහැ. ඒ නිසා මට චරිතයක දිග පළල විස්තරාත්මකව කියන්න බැහැ. නමුත් ‘පාර දිගේ’ ටෙලිනාට්‍යයේ රෙක්සි චරිතය ගැඹුරින් යන චරිතයක් නිසා ලොකු වෙනසක් දැනෙයි. හැබැයි මොන විදියට චරිතය ගලාගෙන යාවිද කියලා මට දැන්ම කියන්න අපහසුයි.


 රෙක්සි කරන්නේ තමන්ගේ මිතුරාව මුලාවේ දැමීමක්ද මේ?

රෙහාන්ට විවාහයක් සිදුකරන්නේ ඔහුට ඉහළ රැකියාවක් ලබාදීම සඳහායි. මොකද ඒ තනතුර ලබාගැනීම සඳහා විවාහ වී සිටිය යුතුයි. ඉදිරියෙදි මේ ප්‍රශ්නය මොන විදියට විසඳෙනවාද කියලා බලන්න මගේ ප්‍රේක්ෂක ජනතාවට ‘පාර දිගේ’ අපිත් සමග එන්න කියලා මම ආරාධනා කරනවා.


 ඔබ මියුසික් වීඩියෝ සඳහා දුන්නු දායකත්වය තරම් දායකත්වයක් ටෙලිනාට්‍ය රංගනයට තවම ලබාදී නැහැ නේද?

මම තවම මේ ක්ෂේත්‍රයට නවකයෙක් බව තමයි මම හිතාගෙන ඉන්නේ. මියුසික් වීඩියෝ හයසීයක විතර මම පෙම්වතා වෙලා තියෙනවා. නමුත් එතැනින් එහාට මට ලොකුවට යමක් කරන්න බැරි වුණා. මමත් කැමැතියි ටෙලිනාට්‍යවල, චිත්‍රපටවල විවිධ චරිත නිරූපණය කරන්න. ඒ සඳහා වාසනාවක් තිබිය යුතුයි. ඉතින් මෙහෙම හෙමින් මගේ අඩුපාඩු හදාගෙන ඉදිරියට යන්න තමයි බලාපොරොත්තුව.


 කලාවට මුල් තැන දෙන බොහෝ දෙනෙකුගේ පවුල් ජීවිතවල ප්‍රශ්න අතිවෙලා තිබෙන බව අපි දකිනවා. ඔබේ ජීවිතයේ මුල් තැන කාටද හිමිවන්නේ?

මගේ ජීවිතයේ වටිනාම වස්තුව තිබෙන්නේ මගේ පවුල තුළයි. මගේ දරුවන් තරම් වටිනා වස්තුවක් මට කොහෙවත් නැහැ. මගේ බිරිය උපාධිධාරී ගුරුවරියක්. ඇයටත් හොඳට තේරුම් ගැනීමේ හැකියාවක් තිබෙනවා. ඉතින් අපි දෙන්නාගෙම එකම අරමුණ දරුවන්ගේ අනාගතය සුරක්ෂිත කරන එක තමයි. මම කැමැති නැහැ වෙන ප්‍රශ්න නිසා මගේ ජීවිතය අවුල් වෙනවා දකින්න. මගේ දුවයි පුතයි මට නම් ඉරයි හඳයි වගේ.


 වසන්ත විතාරණගේ






මිදුණු විශ්වයේ සුමධ්‍යාගේ චරිතය මාව වෙනස් තැනකින් ඔසවා තබාවි - චුලක්ෂි රණතුංග




රූපය වනාහී රංගනය නම් විෂය කෙරෙහි අවශ්‍යම වූ අනිවාර්ය කාරණාවක් නොවූවද රූමත් බව අනිවාර්ය වන්නාවූ අවස්ථා රංගන කාර්යයේදී බහුලව දක්නට ලැබෙන්නේය. එසේම මේ තත්ත්වය යටතේ රූපය පමණක් සතුව රංගනයට පිවිසෙන්නන් මේ කාලයේ බහුලව දක්නට ලැබෙන්නේය. රූපණය නම් සංකීර්ණ විෂය හඳුනා නොගෙන රූපය වනාහී එයට අවශ්‍ය වූ එකම සුදුසුකම ලෙස සිතා එය භාවිත කරන්නට පෙළෙඹෙනා විශාල පිරිස අතරේ චුලක්ෂි රණතුංග නම් රංගන ශිල්පිණිය අපට සුවිශේෂී වන්නේ තම සුරූපී ගුණය ගැන පමණක් විශ්වාසය නොතබා රංගනය යනු හැදෑරිය යුතු සුවිශේෂී කලාවක් බැව් වටහාගෙන එකී මඟ යන්නට ඉමහත් උනන්දුවකින් හා කැපවීමකින් කටයුතු කරන්නියක වීම නිසාවෙන්ය. ඒ පිළිබඳව ඇගේ ප‍්‍රකාශනය මෙසේයි.


”මේ ක්ෂේත‍්‍රයට මගේ පිවිසීම ගැන කතා කළොත් මම මුලින්ම එන්නේ නිරූපිකාවක් ලෙස. 2014 මිස් ශී‍්‍ර ලංකා කිරුළ දිනාගන්නවා සහ එම වර්ෂයේම එක්සත් රාජධානියේ පැවති ලෝක රූ රැුජන තරගය ශී‍්‍ර ලංකාව වෙනුවෙන් නියෝජනය කරන්නට මට අවස්ථාව ලැබෙනවා. ඒ අතර මිස් ශී‍්‍ර ලංකා තරගයට ඉදිරිපත් වූ තරගකාරියන්ට ආරාධනාවක් ලැබෙනවා චිත‍්‍රපටයක ප‍්‍රධාන චරිතයක් සඳහා වූ ඔඩිෂන් එකකට. ඒ අනුව මම සිනමා ක්ෂේත‍්‍රයට පිවිසෙන්නේ ප‍්‍රියන්ත කොළඹගේ මහතාගේ ‘‘දේදුනු ආකාසේ’’ චිත‍්‍රපටයෙන්. සනත් අබේසේකර මහතාගේ ”ගුත්තිල’’, මහාචාර්ය සුනිල් ආරියරත්න මහතාගේ ”විජයබා කොල්ලය’’ හා ජයන්ත චන්ද්‍රසිරි මහතාගේ ‘‘මිදුණු විශ්වය’’ ඉන්පසුව මා රඟපෑ චිත‍්‍රපට යි. මේ දිනවල උදයකාන්ත වර්ණකුලසූරිය මහතාගේ ’’ගිනි මල් පොකුරු’’ චිත‍්‍රපටයට රංගනයෙන් දායකවනවා.


මගේ පළමු චිත‍්‍රපටයෙන් පසු මම තේරුම්ගත් දෙයක් තමයි, රංගනය කියන පුළුල් විෂයය සඳහා රූපය කියන සාධකය පමණක් ප‍්‍රමාණවත් නොවන බව. රංගනය නම් මහා පරාසයක පැතිරුණු මේ විෂයෙහි රැුඳී සිටින්නට නම් යම් හැදෑරීමක් කිරීම අත්‍යාවශ්‍ය බව මට දැනුනා.ඒ අනුව තමයි මම ඩිල් ෆිල්ම්ස් ආයතනයෙහි පැවති ප‍්‍රවීන අධ්‍යක්ෂ ජයන්ත චන්ද්‍රසිරි මහතාගේ රූපණ පාඨමාලාවට ඇතුළත් වෙන්නේ. ඒ වනවිට මම කෞශල්‍යා ප‍්‍රනාන්දු මහත්මියගේ රංගන පාඨමාලාවේ ඩිප්ලෝමාව දක්වා හැදෑරීමක් කර තිබුණා. එම හැදෑරීම් වලින් පසු මා මුලින්ම රඟපෑවේ මහාචාර්ය සුනිල් ආරියරත්න මහතාගේ ”විජයබා කොල්ලය’’ චිත‍්‍රපටයේ හමිදුම්මාගේ චරිතයයි. එතෙක් මා උගත් දේවල් වලින් චුලක්ෂි යන පුද්ගලිකත්වයෙන් බැහැරව එම බැ?රුම් චරිතයේ ගැඹුර හඳුනාගෙන ඊට සාධාරණයක් ඉටු කළා කියන තෘප්තිය මට දැනුනා. සුන්දරත්වය පමණක් රැුගෙන රංගනයට පිවිසි මට රූපණය කියන විෂයෙහි පරාසය ගැඹුරින් හඳුනාගත්තේ එම හැදෑරීවලින් පසුව බව මට වැටහුණා. මට සුවිශේෂම චරිතය තමයි ජයන්ත චන්ද්‍රසිරි මහතාගේ ”මිදුණු විශ්වය’’ චිත‍්‍රපටයේ සුමධ්‍යාගේ චරිතය. එය ඉදිරියේදී තිරගත වීමට නියමිතයි. සුමධ්‍යාගේ චරිතය මාව වෙනස් තැනකින් ඔසවා තබාවි. චරිතයක අධ්‍යාත්මයට පිවිසීමෙන් ඊට අනුගතව එම චරිතය තුළ ජීවත්වන්නේ කෙසේද කියා ප‍්‍රායෝගිකව මම අත්දැකපු රංගනය එයයි. ජයන්ත චන්ද්‍රසිරි මහතාගේ පාඨමාලාවෙන් පසු ඔහුගේම අධ්‍යක්ෂණය යටතේ බොහෝ දේවල් ඉගෙන ගනිමින් කළ එම චරිතය මගේ රංගන ජීවිතයේ කඩඉමක් වේවි.


-නිමල් ෆ‍්‍රැන්සිස්-