ආමීර් ඛාන් ප්රඩක්ෂන්ස් ආයතනයේ විසිපස් වැනි සංවත්සරය සැමරීම සඳහා පසුගිය සෙනසුරාදා පැවැති උත්සවයට එක්වූ බොලිවුඩ් සුපිරි නළු සල්මාන් ඛාන්ගේ නවතම පෙනුම කාගේත් අවධානයට ලක් විය. සම්පූර්ණයෙන්ම හිස මුඩු කර සිටි සල්මාන් කළු පැහැති කබායකින් සහ ඉරී ගිය ජීන්ස් කලිසමකින් සැරසී උත්සවයට පැමිණි අතර ඔහුගේ මෙම වෙනස් පෙනුම සම්බන්ධයෙන් සමාජ මාධ්ය ඔස්සේ බොහෝ දෙනා අදහස් පළ කරමින් සිටිති. තරු රැසකගේ සහභාගීත්වයෙන් අති උත්කර්ෂවත් ලෙස පැවැති මෙම උත්සවය සිනමා ලොවේ සුවිශේෂී සන්ධිස්ථානයක් සනිටුහන් කරමින් ආමීර් ඛාන්ගේ නිෂ්පාදන සමාගම වෙනුවෙන් පැවැත්විණි.
එමෙන්ම මෙම අවස්ථාව ආමීර් ඛාන්ගේ වෘත්තීය ජීවිතයේ සුවිශේෂී සිනමා නිර්මාණයක් වන ‘ලගාන්’ චිත්රපටයේ විසිපස් වැනි වසර සැමරීම සඳහා ද යොදාගෙන තිබුණි. 2001 වසරේදී අශුතෝෂ් ගොවාරිකර්ගේ අධ්යක්ෂණයෙන් එළිදැක්වුණු මෙම සිනමාපටය වාණිජමය වශයෙන් මෙන්ම විචාරක පැසසුමට ද ලක්වූ අතර ඔස්කාර් සම්මාන උළෙලේ හොඳම විදේශීය භාෂා චිත්රපටය ලෙස ද නාමයෝජනා ලැබූ සුවිශේෂී නිර්මාණයකි. බ්රිතාන්ය පාලන සමයේ එනම් 1893 වසරේදී බදු බරින් නිදහස් වීම සඳහා ගම්වැසියන් පිරිසක් බ්රිතාන්ය නිලධාරීන්ට එරෙහිව ක්රිකට් තරගයකට අභියෝග කිරීම මෙහි කතා තේමාව ලෙස ගොඩනැඟී තිබුණි. ග්රේසි සිං, රේචල් ෂෙල්ලි, පෝල් බ්ලැක්තෝන් ඇතුළු නළු නිළියන් රැසකගේ රංගනයෙන් හැඩවුණු මෙම චිත්රපටයේ ඒ.ආර්. රහ්මාන් විසින් සංගීතවත් කළ ගීත අදටත් රසිකයන් අතර බෙහෙවින් ජනප්රියය.
පවුලේ සමීප හිතවතෙකුගේ අවමංගල්ය උත්සවයකට සහභාගී වීමෙන් අනතුරුව සල්මාන් ඛාන් මෙම උත්සවයට එක් වූ අතර ඔහු සිය ඉදිරි වැඩකටයුතු පිළිබඳව ද අවධානය යොමු කරමින් සිටී. ඒ අනුව සල්මාන් මීළඟට 'මාතෘභූමි: මේ වෝ රෙස්ට් ඉන් පීස්' හරහා ප්රේක්ෂකයන් හමුවීමට නියමිත අතර වාම්ෂි පයිඩිපල්ලිගේ අධ්යක්ෂණයෙන් නිමවන 'එස්.වී.සී. 63' චිත්රපටයේ රූගත කිරීම් සඳහා ද ඔහු මේ දිනවල කාර්යබහුලව සිටී. නයන්තාරා ද රංගනයෙන් දායක වන එම චිත්රපටය ඔහුගේ ඉදිරි සිනමා දායකත්වයන් අතර වැදගත් නිර්මාණයක් වනු ඇතැයි අපේක්ෂා කෙරේ.
