හිමාලි සිරිවර්ධන කියන්නේ අපේ කලා ක්ෂේත්‍රයේ ඉහළ ජනප්‍රියත්වයක් හිමිකරගෙන සිටින සම්මානලාභී රංගන ශිල්පිනියක් සහ දක්ෂ නර්තන ශිල්පිනියක්. මේ දිනවල ඇය ගැන වැඩි කතාබහක් ඇතිව තිබෙන්නේ සාර්ථකව තිරගත වන ‘එදා රෑ‘ චිත්‍රපටය නිසා. එහි ඇයට ලැබුණු භූමිකාව සුවිශේෂියි. ඒ අපේ සිනමාවේ සහ සංගීතයේ නොමැකෙන සලකුණක් වෙන ‘රුක්මණී දේවී‘ගේ චරිතය. ‘රුක්මණී දේවී‘යගේ 48 වන ගුණසමරුව පසුගිය 28 වනදාට යෙදී තිබුණා. රසඳුන මේ කතාබහ එදා රෑ හි ‘රුක්මණී දේවී‘ට ජීවය දුන් හිමාලි සිරිවර්ධන සමඟයි
රුක්මණී දේවී‘ වැනි අසහාය චරිතයක් රඟපාන්න ඔබට ඇරයුම් ලැබෙද්දී මුලින්ම මොකද හිතුණේ?
කලාවට සම්බන්ධ වෙලා අවුරුදු ගණනාවක් වුණත් මට සිනමාවට දායක වෙන්න ලැබුණේ හරිම අඩුවෙන්. ඒ එක්කම මම ටික කාලයක් ක්ෂේත්‍රයෙන් ඈත් වෙලා හිටියා මගේ පුතා ලැබුණට පස්සේ. ඊට පසුව මෑත කාලයේදී සම්බන්ධ වෙන්න අවස්ථාව ලැබුණු චිත්‍රපටයක් තමයි ‘එදා රෑ‘ කියන්නේ. ඒ නිසා එතැනම තියෙනවා මට සුවිශේෂී බවක්. කාලයක් තිස්සේ ටෙලි නාට්‍ය සිනමාව කියන අංශ දෙකෙන්ම ඈත් වෙලා හිටිය නිසා. නැවත රංගනයට ආවත් සිනමාවට අවස්ථාව ලැබුණේ නැහැ. කාලයකට පස්සේ ලැබුණු හොඳම අවස්ථාවක් තමයි එදා රෑ. කලාවට ආ කාලයේ ඉඳන්ම මම සිනමාවට ආස කළා. පුංචි තිරයේ මට චරිතාංග නිළියක් විදියට මගේ හැකියාවන් පෙන්නුම් කරන්න පුළුවන් විදියේ නිර්මාණ ලැබුණා. ඒ හරහා සම්මානත් ලැබුවා.
නමුත් මම ආස කරන විදියේ සිනමා නිර්මාණ මට ලැබුණේ නැහැ. සමහර ආරාධනා මගේ තියෙන යම් යම් සීමාවන් නිසා ප්‍රතික්ෂේප කරන්නත් සිද්ධ වුණා.
ඒ නිසා මට හැමදාම සිනමාවට දායක වෙන්න බැරි වුණා කියන දුකක් මගේ හිතේ තිබුණා. ඔය අතරේ තමයි ‘එදා රෑ‘ චිත්‍රපටයේ අධ්‍යක්ෂ අරුණ අයියා මට කතා කරන්නේ. ඔහුගෙන් ඒ ඇමතුම ලැබුණම ඔහු කිවුවේ, නංගි අපි මිල්ටන් මල්ලවආරච්චි මහතාගේ ජීවිත කතාව සිනමාවට ගේනවා, එකේ ‘රුක්මණී දේවී‘ චරිතයට ඔයාව තෝරා ගත්තා කිවුවම මම පොඩි වෙලාවක් නිහඬව හිටියා. මම හිතුවේ කවුරු හරි මට කරන විහිළුවක් කියලා.
ඒ වෙලාවේ නම් මට කිසිම ප්‍රතිචාරයක් හිතට ආවේ නැහැ. මම ඒ ඇරයුම බොහොම ආසාවෙන් භාර ගත්තා. ගොඩාක් සීන්ස් නෑ නංගි, සීන්ස් දෙකයි තුනයි තියෙන්නේ’ කියලත් අරුණ අයියා මට කිවුවා. මට ඇත්තටම ඒකේ එක සීන් එකක්ද දෙකක්ද තුනක්ද තියෙන්නේ කියලා අදාළම වුණේ නැහැ. මම ආස කළේ ඒ චරිතය කොයි තරම් වටිනා චරිතයක් ද කියන එක පමණයි.
මීට පෙර ඔබ කළ ප්‍රබන්ධ චරිතවලට වඩා, මුළු රටම හොඳින්ම හඳුනන සැබෑ චරිතයක් ප්‍රතිනිර්මාණය කිරීමේදී නිළියක් විදිහට ඔබට මුහුණ දීමට සිදු වූ ප්‍රධානම අභියෝගය මොකක්ද?
ඒක අභියෝගයක්. ආරාධනාව ලැබුණට පස්සේ මම රුක්මණී ගැන හොයන්න ගත්තා. එතුමිය කතා කරපු විලාසයක් තිබුණානේ, මම හිතුවා මට ඒක ඉමිටේට් කරන්න වෙයි කියලා. හැබැයි කොයි වෙලාවකවත් අධ්‍යක්ෂකවරයා කිවුවේ නැහැ ඒ කතා විලාසය ගන්න ඕනේ නැහැ කියලා.
ඒ වගේ කතා කරන්න ගියොත් සමහර වෙලාවට අපිට ඒක හරියටම නිරූපණය කරගන්න බැරිවුණොත් ඒක විහිළුවට ලක්වෙන්නත් පුළුවන්. ඒ නිසා මම බොහොම පරිස්සම් වුණා.
මේ අපේ රටේ ඇත්තටම හිටපු සහ මිනිස්සුන්ගේ හිත්වල තදින්ම කාවැදිච්ච චරිත. අලුත් චරිතයක් මවාගෙන නිර්මාණය කරනවා වගේ නෙවෙයි. ඒගොල්ලොන්ගේ ජීවිත කතාවල් කරද්දී හරිම පරිස්සම් වෙන්න ඕනේ කියලා මම තදින්ම විශ්වාස කරනවා.
රුක්මණී දේවීගේ එදා යුගයට ගැළපෙන පෙනුම කොණ්ඩ විලාසිතා සහ ඇඳුම් පැලඳුම් සමඟින් ඔබව හැඩගැන්වූ පළමු දවසේ කැඩපත ඉදිරියේ ඔබ, ඔබවම දුටුවම දැනුණු හැඟීම සහ රිදී තිරයෙන් පළමු වතාවට එදා රෑ චිත්‍රපටය බලද්දී දැනුණු හැඟීම මොනවගේද?
ඇත්තටම ඒකත් අපිට තිබුණු එක අභියෝගයක්. ඒ ස්වරූපය මවා ගන්න එක. කොණ්ඩ විලාසිතා සහ ඇඳුම් පැලඳුම් සියල්ලම. හැබැයි චිත්‍රපටයේ අංග රචනා ශිල්පියා විදිහට කටයුතු කළේ බුවනෙක රණවක ඇතුළු කණ්ඩායම. ඇඳුම් පැලඳුම් කළේ පවිත්‍රා ඇතුළු කණ්ඩායම.
ඒ තෝරා ගෙන තිබුණු ප්‍රවීණ ශිල්පීන් නිසා මට ඒ බර දැනුණේ නැහැ. හැබැයි මම ඔවුන් එක්ක කතා බහ කළා. මුල් කාලයේ ඇය සිහින් සිරුරක් තිබුණු කෙනෙක්. ඒ එක්කම මුල් කාලයේ ඇයගේ මුහුණ දිගටියි. ඒ නිසා මාව හැඩගැන්නුවට පසුව මට බොහෝ දෙනෙක් කිවුවේ, එතුමියගේ රුව වගේ කියන එක. ඒ ලැබුණු ප්‍රතිචාර මට සතුටක් ගෙන ආවා.
ඉදිරියට එන්න තියෙන සිනමා නිර්මාණ මොනවද?
නලින් මාපිටිය අධ්‍යක්ෂණය කළ තානාපතිලාගේ ගෙදර චිත්‍රපටය සහ ලකී ඩයස් මහතා අධ්‍යක්ෂණය කළ ‘බ්‍රේකින් නිව්ස්‘ චිත්‍රපටය.
චරිතයකට ආරාධනා ලැබුණාම භාර ගන්නවද නැද්ද කියලා තීරණය කරන්න මූලිකවම සලකා බලන්නේ මොනවද?
දැන් නම් මම මුලින්ම බලන්නේ මට ඇරයුම් ලැබෙන චරිතය මට සුදුසු ද කියන එක. මම කවදාවත් නිරුවත් දර්ශන තියෙන චිත්‍රපට චරිත භාර ගන්නේ නෑ. ඒ හැරෙන්න මම ආසයි මට දැනෙන චරිතයක් කරන්න. මම හරිම ආසයි මට දෙයක් කරන්න තියෙන චරිත කරන්න. ඒ වගේම තමයි මම චිත්‍රපටවලට ලෝභයි. ඒකට හේතුව මට තවම චිත්‍රපට හරියට ලැබුණේ නැති නිසා. ඒ නිසා මම ආසාවෙන් ඉන්නවා හොඳ චිත්‍රපටයක හොඳ චරිතයක් කරන්න.
නර්තනයෙන් කලාවට ඇවිත්, අද වෙද්දී පුංචි තිරය සිනමාව හරහා ප්‍රේක්ෂකයින්ට සමීප වෙනවා. ආපු ගමන් මඟ ගැන අද මොකද හිතෙන්නේ?
ඇත්තටම රංගනයට වඩා නර්තනයෙන් ආව ගමන ගැන මම සීයට දෙසීයක් සතුටු වෙනවා. නර්තන කණ්ඩායමක් හදලා ඒ නම මිනිස්සු අතරට ගෙන යන්න මහන්සි වුණා. සෙන්සේෂන් නර්තන කණ්ඩායම නතර කරලා දැන් අවුරුදු 7ක් 8ක් වෙනවා. තාමත් මට ආරාධනා ලැබෙනවා. ඒ කියන්නේ මගේ නර්තන කණ්ඩායම තුළ තිබුණු කොලිටි එක නිසා වෙන්න ඕනේ. නැත්නම් එහෙම වෙන්නේ නැහැනේ. ඒ නිසා නර්තනය පැත්තෙන් මම ආව ගමන ගැන මම ගොඩක් සතුටු වෙනවා.
