පසුගියදා යෙදුණු මව්වරුන්ගේ දිනය වෙනුවෙන් ප්රවීණ රංගන ශිල්පිනී සෝනි රස්දාන් සිය දියණියන් වන ආලියා භාත් සහ ශහීන් භාත් අගයමින් සමාජ මාධ්ය ඔස්සේ ඉතා සංවේදී පණිවිඩයක් නිකුත් කර තිබේ. තම දියණියන්ගේ ඡායාරූපයක් ඉන්ස්ටග්රෑම් ගිණුමට එක් කරමින් ඇය සඳහන් කර තිබුණේ, දරුවෙකුගේ ආත්මය විසින්ම මව තෝරාගනු ලබන බවට පවතින විශ්වාසය සැබෑවක් නම්, තමන්ව මව ලෙස තෝරා ගැනීම පිළිබඳව ඔවුන් දෙදෙනාට හදවතින්ම ස්තූතිවන්ත වන බවයි. එය දෛවෝපගත සිදුවීමක් වුවද, තම දියණියන් දෙදෙනාගේ මව වීමට ලැබීම දෙවියන්ගෙන් ලැබුණු උතුම්ම ආශිර්වාදයක් ලෙස තමන් සලකන බව ඇය එහි වැඩිදුරටත් සටහන් කර තිබුණි.
ප්රකට සිනමාකරු මහේෂ් භාත් සමඟ 1986 අප්රේල් 20 වනදා විවාහ වූ සෝනි රස්දාන්, 1988 නොවැම්බර් 28 වනදා සිය වැඩිමහල් දියණිය වන ශහීන් මෙලොවට බිහි කළ අතර දෙවන දියණිය ආලියා උපත ලැබුවේ 1993 වසරේදීය. මීට අමතරව මහේෂ් භාත්ගේ පළමු විවාහයේ දරුවන් වන පූජා භාත් සහ රාහුල් භාත්ගේ සුළු මව ලෙසද ඇය කටයුතු කරයි. රංගන ක්ෂේත්රයේ ප්රවීණයෙකු වන සෝනි රස්දාන්, නළුවෙකු මුහුණ දෙන අභියෝග පිළිබඳව ඉඟි කරමින් තමන්ගේ අලුත්ම කලා කටයුත්තක් පිළිබඳවද පසුගියදා සමාජ මාධ්ය ඔස්සේ යම් ඉඟියක් පළ කර තිබුණද එහි වැඩි විස්තර මෙතෙක් අනාවරණය කර නොමැත.
මේ අතර සෝනිගේ දියණිය මෙන්ම ජනප්රිය නිළියක වන ආලියා භාත් සහ රන්බීර් කපූර් 2022 අප්රේල් 14 වනදා මුම්බායිහිදී පෞද්ගලික උත්සවයකදී විවාහ වූ අතර එම වසරේම නොවැම්බර් 6 වනදා ඔවුන්ගේ දියණිය රාහා මෙලොවට බිහි විය. වෘත්තීය ජීවිතය තුළ කාර්යබහුල කාලසීමාවක් ගත කරන ආලියා, ඉදිරියේදී යෂ් රාජ් ෆිල්ම්ස් ආයතනයේ 'Alpha' චිත්රපටයෙන් ප්රේක්ෂකයන් හමුවීමට නියමිතය. එසේම ඇය ලබන වසරේ තිරගත වීමට නියමිත සංජේ ලීලා භන්සාලිගේ 'Love & War' සිනමා පටය හරහා යළිත් වරක් රන්බීර් කපූර් සහ විකී කෞෂාල් සමඟ රංගනයෙන් එක්වීමට සූදානමින් සිටියි.
