මේ දිනවල නිපුන් විදේශගත වෙලා සිටින බව ආරංචියි?
ඔව්. මම මේ වනවිට කටාර්වල ඉන්නේ. මගේ ෆැමිලි එක මෙහේ. මගේ බිරිඳ ගුවන් සේවිකාවක්. මට පුතෙක් ඉන්නවා. ඉතින් මම නිවාඩුවට විදේශගත වෙනවා. නැවත කලා කටයුතු පටන් ගත්තම ලංකාවට එනවා. ඔය විදියට තමයි රටවල් දෙකේම මගේ කාලය ගතවෙන්නේ.
තමන්ට අයිති නැති වැඩක් නේද මේ දවස්වල කරන්නේ?
ඔව්. හිතුවේ නැති විදියට චනුත්තර ගැන ගොඩ දෙනෙක් කතාබහ කරනවා. ප්රතිචාර නම් ගොඩක් හොඳයි. ප්රේක්ෂකයන් මගෙන් ගොඩක් බලාපොරොත්තු වෙන්නේ ආදරණීය චරිත. ඇත්තටම ආලේ ටෙලිනාට්යය ගොඩක් ජනප්රියයි. ඒත් මම හිතුවේ නැහැ ආලේ සමග පෙම් බඳින්න මට අවස්ථාවක් ලැබෙයි කියලා. මට කිහිප දෙනෙක් කිව්වා ‘ආලේ’ කියලා ටෙලිනාට්යයක් යනවා මාරම ලස්සනට ඒ කතාව පෙළගස්වලා තියෙනවා කියලා. ඒ නිසාම මාත් කොටස් කීපයක් බැලුවා. මටත් ගොඩක් හිතට දැනුණා ඒ කතාව. මට ආරාධනාව කරපු සැණින් මම කැමැති වුණා. හැබැයි මගේ චරිතය මොන විදියට ගලාගෙන ඉදිරියට යාවිද කියලා තවම මමවත් දන්නේ නැහැ.
ප්රේක්ෂකයන් ඔබට මගතොටදි මොකද කියන්නේ?
ගොඩ දෙනෙක් අතරට චනුත්තර චරිතය ගිහින් තියෙනවා. සමහරු කියන්නේ කුරුලු කූඩු කඩන්න එපා කියලා. සහෙලි – නවිත් ආදරය අවංක ආදරයක්, පවු ඒ දෙන්නා කියලා. මගේ චරිතය වුණත් ඒ තරමට ප්රේක්ෂකයන්ට දැනෙන තරමට බැඳිලා තියෙනවා. ප්රේක්ෂකයන් මගේ රඟපෑමට අකැමැති නැහැ. හැබැයි අවංක ආදරයක් නැතිවෙන එක දුකයි කියනවා. තවත් සමහරු මට පෞද්ගලිකව මැසේජ් දානවා ඔවුන්ගේ ජීවිත කතාවත් මේ වගෙයි කියලා. ආදරයෙන් පැරැදිලා තවමත් ඒ ආදරය ගැන හිතන කොල්ලෝ ඕනෙ තරම් ඉන්නවා.
නිපුන්ටත් ඒ කාලේ මේ වගේ ආදරයක් තිබුණද?
මටත් ආදරය අහිමි වෙලා තියෙනවා. ලස්සන මතකයන් තියෙනවා. මේ විදියට මවුපියන්ගේ ප්රශ්න සමග බොඳවෙලා ගියා. තවත් සමහර ආදර කතාවන් මගේ ඕනෑකමින් මම අතහැරියා.
ඔබ කලාවට සම්බන්ධ වෙන්නේ පාසල් අවධියෙන්?
ඔව්. අවුරුදු දහසයේ ඉඳලා තමයි මම නිරූපණ ක්ෂේත්රයට සම්බන්ධ වෙන්නේ. මගේ ගම් පළාත වෙන්නප්පුව. රඟපාන්න ලොකු ආශාවක් තිබුණා. නීල පබළු ටෙලිනාට්යයේ නිර්වාන් චරිතය හරහා මාව ප්රේක්ෂකයන් දැනහඳුනා ගත්තා. මම මුලින්ම රඟපෑවේ සත්වර්ෂා ටෙලිනාට්යයේ. පසුකාලීනව සිත නිදි නෑ, තත්පර 60, අම්මා ටෙලිනාට්ය සඳහා සම්බන්ධ වුණා.
කැමැති හීරෝ චරිත වලට විතරයි කියන්නේ ඇත්තද?
ඇත්තටම කිව්වොත් මට විවිධ චරිතවලින් ආරාධනා ලැබුණා. මම විලන් චරිතවලට නම් කොහොමත්ම කැමැති නැහැ. මට හිතාගන්නත් බැහැ ඇයි කියලා. මම තවම මගෙන් අහනවා ඇයි මම අකැමැති කියලා. සමහර චරිත මම ප්රතික්ෂේප කළා. ඒ වෙලාවට සුදුසු නැහැ කියලා හිතෙනවා. පසුගිය වසරේ තෝරා බේරාගෙන සුළු ප්රමාණයකට තමයි මම සම්බන්ධ වුණේ.
වෘත්තීය මට්ටමෙන් ඔබ කලාවට යොමුවෙන නිසා රිජෙක්ට් කරන එක ඇඟට ගුණ නැහැ නේද?
ඔව්. ඒක නම් එහෙම තමයි. සමහර ඒවා රිජෙක් කරන්න වුණේ සරිලන මුදලක් නැති නිසා. ටෙලිනාට්ය වෙනුවෙන් මම මුළු කාලයම යෙදෙව්වොත් මට යැපෙන්න අමාරුයි. එයට අමතරව ක්ෂේත්රයේ තව වැඩ කිහිපයකට සම්බන්ධ වෙමින් මම වැඩ කරගෙන යනවා. ඒ නිසා මම සැලසුමක් ඇතිවයි වැඩ කරගෙන යන්නේ.
නිරූපණ ක්ෂේත්රයේ ගොඩ දෙනෙක් කැමැති සිනමාව පැත්තෙන් ඉදිරියට යන්න?
මම සෝනා චිත්රපටයේ ප්රධාන චරිතය රඟපෑවා. සෝනා චිත්රපටය නරඹනකොට මට සිනමාව පැත්තට යොමුවෙන්න ආශාවක් ආවා. ඒත් මම වැඩිපුරම කැමැති ටෙලිනාට්ය පැත්තෙන් ඉදිරියට යන්න තමයි. මොකද තවම මම සිනමාව පැත්තෙන් ඉදිරියට යන්න ලොකු දෙයක් කරලා නැහැ කියලා හිතනවා. ඇක්ටින් පැත්තෙන් වුණත් 50% විතරයි මම සම්පූර්ණ කරලා තියෙන්නේ. මට ලොකු කාලයක් ගියා. මම තව ඉදිරියට යනවා. දක්ෂ රංගන ශිල්පියෙක් වෙන්න තමයි අදහස.
සෝෂල් මීඩියා හරහා වුණත් ඔබ ජනප්රියතාව පාවිච්චි කරන්නේ නැද්ද?
මගේ රඟපෑම් කටයුතු, ජනප්රියතාවය වෙනුවෙන් මම සෝෂල් මීඩියා ලොකුවට පාවිච්චි කරන්නේ නැහැ. අලුත් අයට ලොකු පහසුවක් තියෙනවා සෝෂල් මීඩියා හරහා මේ ක්ෂේත්රයට යොමු වෙන්න. ඒ කාලවල මම පත්තරවලින් දැකලා තමයි ස්ක්රීන් ටෙස්ට් හොයාගෙන ගියේ. මොකද ඒ කාලේ මේ ක්ෂේත්රයට සම්බන්ධ වෙන්න අවස්ථාවක් ගන්න අමාරුයි. ඔඩිෂන්වලට ගියත් කවදාවත් අවස්ථාවක් ලැබිලා නැහැ. සමහර විට බොරු ඇඩ් වෙන්නත් පුළුවන්.
ඔබ විනෝදාංශයක් විදියට විදේශ සංචාරවල යන බව අපි දකිනවා?
මම ඒ කාලේ ඉඳලා විනෝදාංශයක් විදියට සංචාරයේ යනවා. මේ වනවිට රටවල් ගණනාවකට ගිහින් තියෙනවා. ඒ අත්දැකීම් වෙනස්ම දෙයක්. දැන් ඉතින් මම පවුලේ අයත් සමග තමයි රට රටවල ඇවිදින්නේ.
නිපුන්ව රූපෙන් දැක්කත් නමින් ගොඩ දෙනෙක් දන්නේ නැති තරම්?
ඔව්. ඒක නම් ඇත්ත. මම අහවල් කෙනා කියලා මගේ නමින් මාව ගොඩ දෙනෙක් දන්නේ නැති තරම්. චරිතවලින් තමයි මාව ප්රේක්ෂකයන්ට මතක. රූපවාහිනී වැඩසටහන්වලට සම්බන්ධ වෙලා නැහැ. අවුරුදු උත්සව සඳහා මම සම්බන්ධ වෙලා නැහැ. ආරාධනා ලැබුණත් එක්කෝ මම භාරගත්තු වෙන වැඩක. එහෙමත් නැත්නම් මම ලංකාවේ නැහැ.
