තමිල්නාඩුවේ නව මහ ඇමතිවරයා ලෙස සුපිරි නළු විජේ මැයි 10 වනදා දිවුරුම් දුන් ඓතිහාසික අවස්ථාවේදී, කාගේත් වැඩිම අවධානයක් දිනාගත් තැනැත්තිය බවට ජනප්රිය නිළි තෘෂා ක්රිෂ්ණන් පත්වූවාය. චෙන්නායි හි ජවහර්ලාල් නේරු ගෘහස්ථ ක්රීඩාංගණයේ පැවැති මෙම උත්සවයට තෘෂා සහභාගී වූයේ නිල් පැහැති සාරියකින් සැරසී සිය මව වන උමා ක්රිෂ්ණන් සමඟය. උත්සව ශාලාවට ඇතුළු වීමට පෙර පිටත රැඳී සිටි මාධ්යවේදීන් හමුවේ අදහස් දක්වමින් ඇය කියා සිටියේ මෙය තමිල්නාඩුවට ඉතා වැදගත් දිනයක් බවත්, තමන් මහත් උනන්දුවෙන් ඒ දෙස බලා සිටින බවත්ය.
විජේ මහ ඇමතිවරයා ලෙස නිල වශයෙන් දිවුරුම් දීමෙන් අනතුරුව සිය මංගල දේශනය පවත්වන අවස්ථාවේදී තෘෂා දැඩි හැඟීම්බරව සිටින අයුරු දැක්වෙන දර්ශන මේ වන විට සමාජ මාධ්ය පුරා ලැව්ගින්නක් සේ පැතිර යමින් පවතී. එම වීඩියෝවල දැක්වෙන්නේ විජේගේ කතාවට ඉතා ඕනෑකමින් සවන් දෙමින් සිටි ඇය, නෙතඟට නැගුණු කඳුළු සඟවා ගැනීමට උත්සාහ කරමින් සිනාමුසු මුහුණින් යුතුව අසුන්ගෙන සිටින ආකාරයයි. ඇය සහ විජේ අතර පවතින සමීප සම්බන්ධතාවය පිළිබඳව විවිධ කටකතා පැතිර යන පසුබිමක මෙම සංවේදී දර්ශන රසිකයන් අතර දැඩි කතාබහට ලක්ව තිබේ.
මහ ඇමති විජේ සිය කතාවේදී තමිල්නාඩුවට නව පාලනයක් ලබා දීමට එක්වන ලෙස ජනතාවගෙන් ඉල්ලා සිටි අතර එය ලෞකික හා සමාජ සාධාරණත්වයේ නව යුගයක ආරම්භය ලෙස හැඳින්වීය. තමා කිසිදු දිව්යමය දූතයෙකු හෝ අනාගතවක්තෘවරයෙකු නොවන බවත්, සාමාන්ය ජීවිතයක් ගත කරන සාමාන්ය මනුෂ්යයෙකු පමණක් බවත් ඔහු එහිදී අවධාරණය කළේය. කිසිවිටෙකත් ජනතාව බොරු පොරොන්දුවලින් නොරවටන බවත්, තමාට කළ හැකි දේ පමණක් පොරොන්දු වන බවත් පවසමින් විජේ ජනතාවට සහතිකයක් ලබා දුන්නේය.
දේශපාලන නායකයන්, සිනමා තරු සහ විජේගේ පවුලේ සාමාජිකයන් රැසක් සහභාගී වූ මෙම සුවිශේෂී අවස්ථාවේදී තෘෂා මෙතරම් හැඟීම්බර වීම සම්බන්ධයෙන් අන්තර්ජාලය හරහා විවිධ අදහස් පළවෙමින් පවතී. ගිලි, තිරුපාචි, ලියෝ සහ ද ග්රේටස්ට් ඔෆ් ඕල් ටයිම් වැනි චිත්රපට රැසක මෙම නළු නිළි යුවළ එකට රංගනයෙන් දායක වී ඇති බැවින් ඔවුන් අතර ඇති වෘත්තීය මිත්රත්වය ඉක්මවා ගිය බැඳීමක් මෙම දර්ශන හරහා පිළිබිඹු වන බව බොහෝ රසිකයන්ගේ මතය වී තිබේ.
