මේ ආදරේ රහස හැකියාවයි හැදියාවයි - රොෂාන් ප්‍රනාන්දු

Wednesday, January 13, 2021 , 0 Comments

 



ලංකාවේ ජනප්‍රියම සංගිත කණ්ඩායමක් වූ "Flash Back" හි නියමුවා වූ ඔහු රටක් වසඟ කළ ගායන තරුවක්. විටෙක ගී පද රචකයෙක්. කලා ක්ෂේත්‍රයේ ගායන අංශයේ විවිධ ඉසව් ඔස්සේ දතා දැක් වූ ප්‍රතිභාපූර්ණ කලාකරුවෙක්. ඒ ආදරණීය කලා ශිල්පියා රොෂාන් ඔහුගේ උපන්දිනය ගැන මතකය පුවත්පතකට මෙලෙස අවදි කර තිබුනා. 



 ඔබේ උපත ගැන දන්නා විස්තර මොනවද? 

මගේ උපත සිදු වන්නේ දෙසැම්බර් 29 දවසක. නත්තල් අවසානයත් අලුත් අවුරුද්දේ උදාවත් එක්ක තමයි මගේ උපත සිදු වෙලා තියෙන්නේ . 29 වැනිදා ඉපදුනු මාව ගෙදරට අරන් ගිහින් තියෙන්නේ . ජනවාරි පළවෙනිදා. හරියටම අලුත් අවුරුද්ද උදාවෙනවත් එක්කම. ඉතින් එදා මාව ගෙදරට ගේද්දී ගොඩක් දෙනෙක් කියලා තියෙන්නේ අවුරුදු කුමාරයා ගෙදරට ගෙනාවා කියලා. ගෙදර පළමු දරු උපත තමයි මම. මට පසුව සහෝදරියන් දෙනෙක් ඉන්නවා. මේ ටික තමයි විශේෂයෙන් දන්න දේවල්. 


 පුංචි කාලේ උපන් දින සැමරුම් ගැන එහෙම මතකයක් තියෙනවද?

 ඇත්තටම අපි හොඳ ආර්ථික වටපිටාවක් තිබුණු පවුලක් නෙමෙයි. බොහොම දුක් කම් කම්ටොලු ආර්ථික  අපහසුතා මැද්දේ ආපු පවුලක්. නමුත් අම්මාට, තාත්තාට පුළුවන් විදිහට අපි වෙනුවෙන් පුංචිම දෙයක් හෝ කළා. ඒ දවසට ඇඳුමක් ගෙනත් දීලා. කේක් එකක් කපලා පවුලේ අය විතරක් එකතු වෙලා පුංචි සැමරිමක් සිදු වුණා මතකයි. ආර්ථික අපහසුතා මැද්දේ වුණත්. 


පාසැල් කාලේ මතකය?

පාසල් කාලේ උපන් දිනයට කේක් කපලා නම් නැහැ. නමුත් ඉතින් යාළුවන්ගෙන් නම් බේරෙන්න බැහැ. ඒ දවසට උඔගේ උපන් දිනේ අපිට කන්න මොනවා හරි අරන් දීපන් කියනවා. ඉතින් ඒ කාලේ මොනවා හරි කන්න අරන් දිලා පුංචි සාදයක් වගේ පැවැතුණා මතකයි. මගේ උපන් දිනයට පොඩියට හරි මොනවා හරි කළා ඇරෙන්න යාළුවගෙන් නම් ඒ කාලේ අපිට සාද ලැබිලා නැහැ.


අද කොයි විදියට ද උපන් දින සැමරුම් සිදු වෙන්නේ?

දැන්නම් ඒ දවසට අනිවාර්යයෙන්ම කරන්නේ ළමා නිවාසෙකට දානයක් දෙන එක. විශේෂයෙන්ම අපි යන ළමා නිවාසයක් තියෙනවා. ඒ ගිහින් ඒ දරුවෝ එක්ක කේක් කපලා කේක් කෑල්ලක් කාලා. තේ එකක් බීලා සින්දුවක් එහෙම කියලා තමයි එන්නේ. ඒක ඇත්තටම සුන්දර මොහොතක් මට, මූලිකව හැම උපන් දිනයකම ඒ දේ සිදු වෙනවා. හදිසියේ හරි මට ඒ දවසට විදෙස් ප්‍රසංගයකට හෝ සම්බන්ධ වෙන්න වුණොත් ඒ වැඩ කටයුත්ත අනිවාර්යයෙන් මගේ බිරීඳ තිළිණි අතින් තමයි සිදු වෙන්නේ. ඒ වැඩ කටයුත්තට අමතරව ඉතින් අනිවාර්යයෙන්ම ගෙදර සාදයක් තියෙනවා. විවාහයෙන් පසුව ආපු හැම උපන් දිනයක්ම වගේ ගොඩක් විශේෂ වුණා. ඇත්තටම ඒ දවස අපේ ගෙදර හරි කලබලකාරී දවසක්. උදේ ඉඳන් ගෙදර කෑම, බීම හදනවා. ගෙරදට තෑගි ලැබෙනවා. යාළුවෝ එනවා ඒ වගේ  ගොඩක් දේවල් සිද්ධ වෙනවා. 


කේක් එහෙම ගොඩක් ලැබෙනවා ඇති. ඒ අතර සිත්ගත් කේක් ආකෘතියක් තිබිලා නැද්ද?

අම්මෝ ඇත්තටම කේක් ගොඩක් ලැබෙනවා. සමහර වෙලාවට මගේ උපන් දිනය වෙනුවෙන් දවසට කේක් තුන හතරක්ම කපන අවස්ථාත් තියෙනවා. ගෙදර හිටියත්, ප්‍රසංග වේදිකාවේ හිටියත්, නාලිකාවක වැඩ සටහනකට සම්බන්ධ වෙලා හිටියත්, කොතැනක හිටියත් ඒ සැමරිම කේක් එකක් කපලා සිදු කෙරෙනවා. ඉතින් ඒ කපන කේක් විවිධ ආකෘති වලින් නිර්මාණ වුණ ඒවා. ඒ අතර ඉතින් වැඩිපුරම තිබිලා තියෙන්නේ මම සංගීතයත් එක්ක බැඳිලා ඉන්න නිසා ඒ සම්බන්ධ ආකෘති වගේ තමයි, ලොකු විශේෂයක් නැහැ. ඒ ලැබෙන හැමදේම මම කැමැතියි. 


බිරිඳගෙන් දරුවන්ගෙන් ලැබුණු විශේෂ තෑගි ගැන සඳහන් කළොත් ?

වටිනාම තෑග්ගක් විදියට මම දකින්නේ රෑ 12ට බිරිඳ මගේ ළඟට ඇවිල්ලා හාදුවක් දිලා ඒ දවසේ සුබ පැතුම් එකතු කිරීම තමයි, ඒ දේ මට ගොඩක්ම වටිනවා. ඒ වගේම මම ගෙදර ඉන්නවා නම් ඒ දවසට මගේ දුවත් පුතාලා දෙන්නත් මට හොරෙන් සුබ පැතුම් පත් හරි ලස්සනට නිර්මාණය කරලා දෙනවා. ඒ මොනවා හරි තෑග්ගක් එක්ක සමහර වෙලාවට පුංචිම පුතා මගේම මොනවා හරි දෙයක් අරගෙන ඒවා තෑග්ගක් විදියට පැක් කරලා ආයෙත් මටම දෙනවා. රෑ 12 පහු වෙද්දිම තිළිනිත්, දුවත් පුතාලා දෙන්නත් ඒ දේවල් මගේ අතටම ගෙනත් දෙනවා. ඒ දේවල් ඉතින් ගොඩක්ම විශේෂයි. 


ලැබුණු සර්ප්‍රයිස් එහෙම ඇති ? 

සර්පයිස් වැඩිපුරම ගෙදරින් ලැබිලා තියන්නේ . ඒ වගේම සංගීත කණ්ඩායමෙනුත් ලැබෙනවා. ප්‍රසංගවල දී උපන්දින සැමරුම් ගොඩක් සිදු වෙලා තියෙනවා. සමහර වෙලාවට පිටරට වල ප්‍රසංග වලට සම්බන්ධ වුණාම සංවිධායකවරු, රසිකයෝ කේක් අරන් ඇවිල්ලා ප්‍රසංගය අවසන් වෙනකම් බලාගෙන ඉන්නවා. කේක් කපන්න ඒ වගේ ලොකු ආදරයක් නම් දෙස් විදෙස් ප්‍රසංග වලදී ලැබිලා තියෙනවා.



ඉතින් ඒ රසික ආදරය ඒ දවසට සුබ පැතුම් එක්ක එකතු වෙන විදිය ගැන කියමු ?

ඒ දවසේ රෑ 12 පැනපු ගමන් මට සුබ පැතුම් ගලාගෙන එනවා. දුරකථන ඇමතුම්, කෙටි පණිවිඩ ඒ හැමදේම වගේම සමාජ ජාලා වෙබ් අඩවි ඔ ස්සේ අති විශාල විදියට සුබ පැතුම් එකතු වෙනවා. ඇත්තටම ඒ දේවල් කළමනාකරණය කර ගන්න බැරි තරම්. ගිය වසරේ උපන් දිනය දවසේ මට හිතා ගන්න බැරි වුණා. ඒ ආපු සුහ පැතුම්. ඒ තරම් විශාල සංඛ්‍යාවක් ආවා. ඒ හැම සුබ පැතුමකට තනි තනි වශයෙන් ප්‍රතිචාර දක්වන්න. ඇත්තටම බැරි තරම්. ඒ නිසා මගේ ඒ ආදරණියයන්ට ස්තූති කරලා සටහනක් දැම්මේ පොදුවේ. ඒ FB සහ මගේ පෑන් පේජ් (Fan page) ඒක හරහා. ඉතින් ඒ විදිහට ලැබෙන ප්‍රතිචාර අති විශිෂ්ටයි. ඒ දේවල් ලොකු වාසනාවක් කියලා මට හිතෙන්නේ.


ඒ තරමට ලැබෙන ආදරේ ගැන කොයි වගේ හැඟීමක් ද තියෙන්නේ? 

මනුෂ්‍යයෙක් විදිහට මම සාමන්‍ය පවුලක ඉපදිලා බොහොම ආර්ථික අපහසුතා මැද ජීවත් වෙලා. ඒ පවුලෙන් සමාජෙට ඇවිල්ලා මට තිබුනු හැකියාවක් සමාජ ගත කරලා ඒ හැකියාවට මට අද වෙද්දි ලොකු වටිනාකමක් ලැබිලා තියෙනවා. ඒ දේ ලැබිලා තියෙන්නේ මගේ දක්ෂතාවයට විතරක්ම නෙමෙයි, ජීවත් වෙන විදියත් එක්ක. විශේෂයෙන්ම මම විශ්වාස කරන දෙයක් තියෙනවා. ඉදිරියට යන්න නම් හැකියාවයි. හැඳියාවයි දෙකම එකට යන්න ඕනෑ කියලා. මේ දෙකම හොඳින් ගෙන ගියොත් මිනිසුන්ගේ ආදරේ වැඩියි. සමහරු හිතනවා කලාකරුවෙකුගේ කලා නිර්මාණ පමණයි වැදගත්. පෞද්ගලික දේවල් අදාළ නැහැ කියලා. පිටරට නම් ඇත්තටම එහෙමයි. නමුත් ලංකාවේ අපේ රටේ තියෙන සංස්කෘතියත් එක්ක කලාකරුවන්ට රසිකයෝ හදවතින්ම වැළඳ ගන්නවා.