එච්. ආර්. ජෝතිපාලයන්ගේ ජීවිත කතාව සිනමාවට නැඟෙයි

gossiplanka image 1
 මෙරට සංගීත ක්ෂේත්‍රයේ නොමැකෙන සලකුණක් තැබූ ප්‍රවීණ ගායන ශිල්පී එච්. ආර්. ජෝතිපාල මහතා අභාවප්‍රාප්ත වී වසර 39ක් ගතවන අවස්ථාවේදී, එතුමාගේ ජීවිත කතාව ඇසුරෙන් චරිතාපදාන චිත්‍රපටයක් නිර්මාණය කරන බව පසුගියදා නිල වශයෙන් ප්‍රකාශයට පත් කෙරිණි. 1956 වසරේ තිරගත වූ ‘සුරතලී’ චිත්‍රපටයේ ‘සිරියාමේ සාරා’ ගීතය ගායනා කරමින් චිත්‍රපට පසුබිම් ගායනයට පිවිසි ජෝතිපාලයන්, චිත්‍රපට 33කට රංගනයෙන්ද දායක වී තිබේ. දශක ගණනාවක් ගෙවී ගියද අදටත් රට පුරා එකසේ ජනප්‍රියත්වයක් හිමි එතුමාගේ ජීවිත කතාව රිදී තිරයෙන් දැකගැනීමට බලා සිටි රසිකයන්ට මෙය සුවිශේෂී පුවතක් වී ඇත.


මහාචාර්ය සංජීව පුෂ්පකුමාර විසින් අධ්‍යක්ෂණය කරනු ලබන මෙම සිනමා කෘතිය ඔහුගේ පස්වැනි චිත්‍රපටයයි. සුදේශ් මුතු සහ කිත්සිරි කරුණාරත්න මෙහි නිෂ්පාදකවරුන් ලෙස කටයුතු කරන අතර, අසංක ඕපාත, ශාන්ත මාවරණ සහ දිලුපා නිරෝෂනී ද අල්විස් සම නිෂ්පාදනයෙන් දායක වෙති. චිත්‍රපටය නිෂ්පාදනය කිරීම සඳහා අවශ්‍ය නීතිමය අවසරය ලබාගැනීම සහ නිල ගිවිසුම් අත්සන් කිරීම අධ්‍යක්ෂ සංජීව පුෂ්පකුමාර සහ ජෝතිපාල මහතාගේ පවුලේ සාමාජිකයන් අතර සිදු විය. මෙම අවස්ථාවට ජෝතිපාලයන්ගේ දියණිය වන ක්‍රිෂ්ණි ජෝතිපාල මහත්මිය මෙන්ම එතුමාගේ සහෝදරියන් වන ලලිතා හෙට්ටිආරච්චි සහ අයිරාංගනී වර්ණකුලසූරිය යන මහත්මීන්ද එක්ව සිටියහ.


මෙම දැවැන්ත සිනමා නිර්මාණයේ කැමරාකරණය ප්‍රභාත් රෝෂන් විසින්ද, සංගීත අධ්‍යක්ෂණය සුරේෂ් මාලියද්ද විසින්ද සිදු කරනු ලබයි. නිෂ්පාදන සැලසුම්කරණය එරල් කෙලීටත්, කලා අධ්‍යක්ෂණය මංජුල අයගමටත්, ඇඳුම් නිර්මාණය අජන්ත අලහකෝන්ටත් පැවරී තිබේ. වේෂ නිරූපණය විදුර අබේදීරගෙන් වන අතර සංස්කරණය අජිත් රාමනායක සහ වර්ණ සංයෝජනය ආනන්ද බණ්ඩාර විසින් සිදු කිරීමට නියමිතය. කෙසේ වෙතත් එච්. ආර්. ජෝතිපාලයන්ගේ චරිතයට පණ පොවන රංගන ශිල්පියා කවුරුන්ද යන්න මෙතෙක් නිල වශයෙන් ප්‍රකාශ කර නොමැත.


නිල දැනුම්දීමෙන් අනතුරුව අදහස් දැක්වූ ක්‍රිෂ්ණි ජෝතිපාල මහත්මිය සඳහන් කළේ, මෙරට චරිතාපදාන චිත්‍රපට දිගින් දිගටම නිර්මාණය වන පසුබිමක තම පියා පිළිබඳවද එවැනි නිර්මාණයක් කරන ලෙස බොහෝ දෙනා ඉල්ලා සිටි බවයි. සංජීව පුෂ්පකුමාර සමඟ වසර ගණනාවක සිට මේ පිළිබඳව කතාබහ කළ බවත්, මෙම නිර්මාණය කිරීමට ඔහු තුළ දැඩි ආශාවක් ඇති බව පසුව දැනගත් බවත් ඇය පැවසුවාය. වාණිජ අරමුණු පමණක් මූලික කරගත් ප්‍රේම කතාවක් වෙනුවට, තම පියා බොහෝ දුක් ගැහැට සහ කම්කටොළු මැදින් සාර්ථකත්වයට පැමිණි ආකාරය පෙන්වන ආදර්ශවත් කතාවක් නිර්මාණය කිරීම තමන්ගේත් පවුලේ සියලු දෙනාගේත් අපේක්ෂාව වූ බව ඇය කියා සිටියාය. අදටත් ලංකාවේ ජනප්‍රියම ගායකයා තම පියා බව විශ්වාස කරන බව පැවසූ ඇය, සංජීව පුෂ්පකුමාර සහ ඔහු වටා සිටින කණ්ඩායම තම පියාට සාධාරණත්වයක් ඉටු කරමින් හොඳ චිත්‍රපටයක් ප්‍රේක්ෂකයන්ට තිළිණ කරනු ඇතැයි දැඩි විශ්වාසය පළ කළාය.


මේ අවස්ථාවේදී අදහස් දැක්වූ අධ්‍යක්ෂ මහාචාර්ය සංජීව පුෂ්පකුමාර මහතා, තමන් කෙරෙහි විශ්වාසය තබා මෙම අවස්ථාව ලබාදීම පිළිබඳව ජෝතිපාලයන්ගේ දියණියට සහ සහෝදරියන්ට ස්තුතිය පළ කළේය. මෙම ව්‍යාපෘතිය පිළිබඳව කාලයක් තිස්සේ කිත්සිරි කරුණාරත්න සමඟ සාකච්ඡා කළ බවත්, තමන් මෙතෙක් කළ සියලු චිත්‍රපටවලට වඩා විශාල පිරිවැයක් වැයවන මෙම චිත්‍රපටය සඳහා සුදේශ් මුතුගෙන් විශාල සහයෝගයක් ලැබුණු බවත් ඔහු පැවසීය. දිලුපා නිරෝෂනී ද අල්විස් ඇතුළු සම නිෂ්පාදන කණ්ඩායමේ එක්වීම විශාල ශක්තියක් බවත්, ඓතිහාසික තොරතුරු නිවැරදිව ප්‍රේක්ෂකයා වෙත ගෙන යාමට මෙරට හොඳම සම්පත් භාවිත කිරීමේ අරමුණින් එරල් කෙලී සහ සුරේෂ් මාලියද්ද වැනි විශිෂ්ටයන් සම්බන්ධ කරගත් බවත් ඔහු සඳහන් කළේය.


මූල්‍යමය ප්‍රතිලාභ අරමුණු කර නොගෙන තම ආත්මය සුවපත් කිරීම සඳහා චිත්‍රපට නිර්මාණය කළද, විශාල ප්‍රාග්ධනයක් යොදවන මෙම නිර්මාණය විශාල ප්‍රේක්ෂකාගාරයක් වෙත ගෙන යාමේ වගකීම තමන් සතු බව සංජීව පුෂ්පකුමාර පැවසීය. තම ළමා කාලයේ සිටම ජෝතිපාලයන්ගේ හඬට දැඩි ලෙස ඇලුම් කළ බවත්, අදටත් විවේකී අවස්ථාවල ඔහුගේ ගීත ශ්‍රවණය කරන බවත් ඔහු කියා සිටියේය. ජෝතිපාලයන්ගේ ළමා කාලයේ ඇතැම් සිදුවීම් සහ සමාජයෙන් ලැබුණු පිළිගැනීම් හා නොපිළිගැනීම් තම ජීවිතයටද සමානකම් දක්වන බව ඔහු සිහිපත් කළේය. ජෝතිපාලයන් යනු ලෝකයේ අනෙකුත් ශ්‍රේෂ්ඨ ගායකයන් සමඟ සමපාත කළ හැකි සුවිශේෂී හඬක් හිමි ගායකයෙකු බව පැවසූ අධ්‍යක්ෂවරයා, තමන්ට ඔහු හුදෙක් වාණිජ අංගයක් පමණක් නොව ආත්මය සුවපත් කරන මහා පුරුෂයෙකු බවත්, ඉහළ සිනමා සෞන්දර්යයකින් යුතුව ඔහුට රූප සහ ශබ්ද සත්කාරයක් පිදීම තම අරමුණ බවත් සඳහන් කළේය. ලබන වසරේ රූගත කිරීම් ආරම්භ කිරීමට නියමිත මෙම චිත්‍රපටයේ, බොහෝ දෙනා දන්නා ජෝතිපාලයන්ගේ සංකීර්ණ ජීවිතය ප්‍රතිනිර්මාණය කිරීම දුෂ්කර අභියෝගයක් වුවද එයට මුහුණ දීමට සූදානම් බවත්, ප්‍රධාන නළුවා තවමත් තෝරාගෙන නොමැති බවත් ඔහු වැඩිදුරටත් පැවසීය.


මීට පෙර ක්ලැරන්ස් විජේවර්ධන සහ මිල්ටන් මල්ලවාරච්චි යන කලාකරුවන්ගේ චරිත ඇසුරෙන් නිර්මාණය වූ චිත්‍රපටවලද සංගීත අධ්‍යක්ෂණය සිදු කළ සුරේෂ් මාලියද්ද මහතා මෙම චිත්‍රපටයේ සංගීත අභියෝගය පිළිබඳව අදහස් දැක්වීය. ජෝතිපාලයන් මියයන සමයේ තමන් ක්ෂේත්‍රයට පිවිසීමටවත් සිතා නොසිටි නමුත්, 1997 වසරේදී එතුමාට සංගීතය සැපයූ ස්ටැන්ලි පීරිස් ප්‍රමුඛ ‘ෆෝචූන්ස්’ වාදක මණ්ඩලයේ අවසන් සාමාජිකයා ලෙස එක්වීමට වාසනාව ලැබුණු බව ඔහු සිහිපත් කළේය. ජෝතිපාලයන් ජීවිතයෙන් සමුගත්තේද ෆෝචූන්ස් වාදක මණ්ඩලය සංගීතය සැපයූ ප්‍රසංගයකින් අනතුරුව බවත්, එතුමා පිළිබඳ සියලු විස්මිත තොරතුරු තමන් දැනගත්තේ ස්ටැන්ලි පීරිස් මහතාගෙන් බවත් ඔහු පැවසීය. සමාජ තල දෙකකටම ආමන්ත්‍රණය කළ ජෝතිපාලයන්ගේ ඕනෑම ගීතයක් තමන් දන්නා බවත්, අධ්‍යක්ෂ සංජීව සමඟ දීර්ඝ ලෙස සාකච්ඡා කර මෙම කාර්යයට සූදානම් වූ බවත් ඔහු සඳහන් කළේය. චිත්‍රපටය සඳහා ගීත තෝරාගැනීම තවමත් අවසන් කර නොමැති බව පැවසූ සුරේෂ් මාලියද්ද, ජෝතිපාලයන්ගේ පැරණි රසිකයන්ගේ රසවින්දනය රැකගන්නා අතරම වයස අවුරුදු 20 පමණ වන නව පරපුරේ සංගීත රුචිකත්වයටද ගැළපෙන අයුරින් මෙම ගීත ඉදිරිපත් කරමින් අධ්‍යක්ෂවරයාගේ අභිමතය ඉටු කිරීම තම එකම අරමුණ බව ප්‍රකාශ කළේය.


ENGLISH SUMMARY: A biopic based on the life of Sri Lanka’s legendary playback singer and actor H. R. Jothipala has been officially announced, 39 years after his passing. The film will be directed by Professor Sanjeewa Pushpakumara as his fifth feature film, with filming scheduled to begin next year. Official legal agreements were recently signed between Pushpakumara and Jothipala’s family, including his daughter Krishni Jothipala and his sisters Lalitha Hettiarachchi and Iranganie Warnakulasuriya. Produced by Sudesh Muthu and Kithsiri Karunarathne alongside co-producers Asanka Opatha, Shantha Mawarana, and Dilupa Niroshani de Alwis, the project features a prominent crew including cinematographer Prabath Roshan, music director Suresh Maliyadde, production designer Errol Kelly, art director Manjula Ayagama, costume designer Ajantha Alahakoon, makeup artist Vidura Abeydheera, editor Ajith Ramanayake, and colorist Ananda Bandara. The actor portraying Jothipala has not yet been announced. Krishni Jothipala stated that the family wanted an inspiring story highlighting her father's struggles and rise to fame rather than a purely commercial romance. Sanjeewa Pushpakumara described Jothipala as a deeply meaningful figure beyond a commercial subject, while Suresh Maliyadde—a former member of Stanley Peiris’s Fortunes band—aims to honor longtime fans while connecting Jothipala’s music with the younger generation.

gossiplanka image 1
gossiplanka image 2
gossiplanka image 3
gossiplanka image 4
gossiplanka image 5
gossiplanka image 6
gossiplanka image 7
Previous Post Next Post