කලා ලොව යනු දක්ෂතා රැසක් මැද තමන්ටම අනන්‍ය වූ මංසලකුණු තබමින් ඉදිරියට යා යුතු අපූර්ව ගමනකි. එහිදී ජනප්‍රියත්වය පමණක් නොව, තමන් නිරූපණය කරන චරිතය තුළින් ප්‍රේක්ෂක හදවත් ස්පර්ශ කිරීමට සමත් වීම ද කලාකරුවකු ලබන සැබෑ ජයග්‍රහණයකි. රංගනයේ එවැනි සුවිශේෂීත්වයක් සොයා යන ගමනකදී තිලක්ෂිණි රත්නායක නාමය ද අවධානයට ලක්වන්නේ ඇයගේ රංගන දායකත්වය සහ චරිත නිරූපණය තුළින් මතු වන කලාත්මක හැකියාව හේතුවෙනි. ‘දුස්රා’ චිත්‍රපටය ඔස්සේ සම්මානනීය ඇගයීමකට පාත්‍ර වූ ඇය, මේ දිනවල ‘ඩිංගා’ චිත්‍රපටය ඔස්සේ ද ප්‍රේක්ෂකයන් හමුවට පැමිණෙන්නීය
“ඩිංගා කියන්නේ අපි කණ්ඩායමක් විදිහට එකතු වෙලා කරපු ලස්සන වැඩක්. මේ චිත්‍රපටයට සම්බන්ධ වුණු හැමෝටම තිබුණේ සාමූහික හැඟීමක්. තිර පිටපතක් තියෙනවා, ඒකට අධ්‍යක්ෂවරයෙක් ඉන්නවා, නිෂ්පාදකවරයෙක් ඉන්නවා, අවශ්‍ය කරන නළු නිළියෝ ටික ඉන්නවා. ඔය විදිහට තමයි සාමාන්‍යයෙන් කලා කටයුත්තක් කෙරෙන්නේ. මේ චිත්‍රපටය ඉන් ඔබ්බට ගිය එකක්. තිර පිටපත ලියූ තැනේ සිට මංගල දර්ශනය දක්වාම තිබුණේ සාමූහික බවක්. හැමෝටම වගකීමක් තිබුණා. තමන්ගේ කොටස කරලා කවුරුත් ඉවත් වුණේ නැහැ. මෙතන හිටියේ ඔක්කොම චිත්‍රපට උණ තියෙන අය. ඒ සම්බන්ධයෙන් යම් කැක්කුමක් තියෙන අය. නිර්මාණයක සාර්ථකත්වය ඉන්නේ එතනින්ම කියලයි මට හිතෙන්නේ.
ඩිංගා මට විශේෂ වෙන්නේ මම සම්මානනීය වෙන්නත් කලින් මුලින්ම වගේ රඟපාපු චිත්‍රපටයක් නිසා. ඩිලංක ඇතුළු චිත්‍රපටයේ හැම කෙනාටම බෙහෙවින්ම ස්තුතියි මාව විශ්වාස කරලා හේෂානිගේ චරිතයට තෝරා ගත්තට. ඩිංගා ඩිලංක රත්නායකගේත් පළමු චිත්‍රපටය. මම ඒ පසුතලයට ගියේ රඟපාන්න නිළියක් විදිහට විතරක්ම නෙමෙයි. අපි ගියේ චිත්‍රපටයක් කරන්න. එතකොට චිත්‍රපටය මගේ කියන හැඟීම ඇති වෙනවා. අපි හැමෝම හිටියේ එහෙම හැඟීමක. මම නිර්මාණයකට සම්බන්ධ වෙන්නෙම එහෙම හැඟීමකින්.”
‘ඩිංගා’ කියන්නේ කවුද කියලා ඔයාලටත් හිතේවී. ඩිංගාට සිහිනයක් තියෙනවා කොළඹ පාරවල් ගානේ ඇවිදින්න, පාක් එකක වාඩිවෙලා කතා කර කර ඉන්න, රොමෑන්ටික් වෙන්න ඕන. හේශානි කියන්නේ ඩිංගාට එදා දවසේ හමුවන ගැහැනු ළමයා.
“මේ චිත්‍රපටය ප්‍රේක්ෂකයන් නරඹා අවසානයේ කතිකාවතක් ඇතිවෙනවා නම් එයට දායක වුණු කණ්ඩායම විදිහට අපි හරිම කැමතියි.
රොමෑන්ටික් කියා මිනිස්සු බලාපොරොත්තු වෙන්නේ මොනවාද? සම්බන්ධයක් ඇතිකර ගත්තම කොල්ලෙක්ගෙන් කෙල්ලෙක් බලාපොරොත්තු වෙන්නේ මොනවාද? ඒ වගේම කෙල්ලෙක්ගෙන් කොල්ලෙක් බලාපොරොත්තු වෙන්නේ මොනවාද? කොල්ලෝ කෙල්ලෝ ගැන හිතන්නේ මොනවද? කෙල්ලෝ කොල්ලෝ ගැන හිතන්නේ මොනවද? ඩිංගා වගේ අය ඉන්නවද? එහෙම අය ඉන්න බැරිද? හේෂාවි වගේ ගර්ල් ෆ්‍රෙන්ඩ් කෙනෙක් ඉන්නවද? එහෙම කෙනකුට ඔයා කැමතිද? ඩිංගාට අනුව නම් එය රොමෑන්ටික් ආදරයකි. ඒ ඔහුට ඕනෑ වෙන්නේ අත්වැල් අල්ලගෙන පාරවල්වල ඇවිදින්න.
ඇත්තටම අනෙක් අය ආදරය දකින්නේ කොහොමද? ආදරය දැනෙන්නේ කොයි විදිහටද? මෙහිදි කතා කරන්නේ වැඩිහිටි ආදරයක් පිළිබඳ. ඡන්ද අයිතිය ඇති වැඩිහිටියන්ගෙ ආදරයක් පිළිබඳව. මේ අය උසස් අධ්‍යාපනයේ නියැළෙනවා වෙන්න පුළුවන්. රැකියාවක් කරනවා වෙන්න පුළුවන්. නිවෙසේ රැඳී ඉන්නවා වෙන්න පුළුවන්. එවැනි ප්‍රජාවගේ ආදර හැඟුම් රොමෑන්ටික් බව පිළිබඳවයි මෙහිදී කතා කරන්නේ . ඒ නිසාම මේ චිත්‍රපටය18ට වැඩි එකක්. සරල ලෙස රස විඳිය හැකි ආදර කතාවක් ලෙසයි මෙය ප්‍රේක්ෂකයාට තිළිණ වන්නේ. ලොව බිහිවූ අතිශය දැවැන්ත නිර්මාණවල වගේම අසාර්ථක වුණු නිර්මාණවල පවා ආදරේ ගැන ඕනෑ තරම් කතා කර ඇති.
මේ චිත්‍රපටයේ ආදරය කරන කෙනාට ගොඩක් දේවල් නැහැ. වීරයෙක් නෙවෙයි. දුර්වලකම්, නැති බැරිකම් තියෙනවා. අපි පිරිමියෙක්ගෙන්, ඔතෑනිබවක්, ළඳ බොළඳකමක්, අහිංසකකමක් කෙසේවත්ම බලාපොරොත්තු වෙන්නෙ නැහැනේ.”
තමන්ට දැනෙන ආදරය කියාගන්න බැරි, ඒ නිසාම ඒ ආදරය විඳගන්න බැරි පිරිමිත් මේ සමාජයේ ඉන්නවා නේද කියලා මේ චිත්‍රපටය බලද්දි දැනෙනවා.
ආදරය කියන දේ ඇතුළේ පෞරුෂය පිළිබඳ ප්‍රශ්න, ආර්ථික ප්‍රශ්න, ආගමික ප්‍රශ්න, භාෂාවේ ප්‍රශ්න, රටේ ප්‍රශ්න පවා අදාළ වෙන්න පුළුවන්. මේ චිත්‍රපටය ගලාගෙන යද්දි හරි වැරැද්ද පිළිබඳව ප්‍රශ්න පවා මතුවෙනවා.
“පිළිවෙළින් ගත්තම වේදිකාවේ, සිනමාවේ, පුංචි තිරයේ යනාදි ලෙස නිර්මාණවලට සම්බන්ධ වෙද්දි ලැබූ අත්දැකීම්ම හැදැරීම් බවට පත්වෙනවා. තාක්ෂණික අතින් ගත්විට මේවා එකිනෙකට වෙනස්. ඒ වෙනස අත්විඳින්නට නම් නිර්මාණවලට සම්බන්ධ විය යුතුමයි. ඉවරයක් නැතිවම තවමත් ඒ වෙනස අත් විඳිනවා. රඟපෑම කියන දේ තවත් හොඳින් කරන්න අවශ්‍ය ගූණාංග සපුරාලීමටයි මම වැඩිම කාලයක් යොදවන්නේ. මේ දේ මට වැඩිය හොඳටම කරන අයව ආශ්‍රය කරන්න, පොතපත කියවන්න, වෙනත් විෂයයන් කියවන්න විශේෂයෙන්ම, දර්ශනය, සමාජ විද්‍යාව වගේ විවිධ ආගම්, විවිධ රටවල් විවිධ භාෂාවන් පිළිබඳ ලබන දැනුම හරිම වැදගත්. ලංකාවේ නාට්යකරුවන්ගේ නාට්‍ය පිටපත් සොයාගෙන කියවන්නේ නම් මනා දැනුමක් ලබාගත හැකි වේවී.”
ඇගේ සැමියා නලින් ලුසේනා තිලක්ෂිණි මෙන්ම කණ්ඩායම් හැඟීමෙන් කලා කටයුතුවල නියැළෙන කෙනෙකි.
“වේදිකාවට පා තැබූ දවසේ ඉඳන්ම වගේ මම නලින් ලුසේනාව දන්නවා. අපි හොඳ යාළුවෝ විදිහට තමයි හිටියේ. පස්සේ කාලෙකදී තමයි එය ආදර සබඳතාවකට පෙරළුණේ.”
තිලක්ෂණි එක්වූ පාලිත පෙරේරාගේ ‘මායා බෝංචි’ චිත්‍රපටය ඉදිරියේදී තිරගත වීමට නියමිතයි. “.හරිම ලස්සන කතාවක්. හරිම ආසාවෙන් කරපු චිත්‍රපටයක්. දරුවන් හරිම ආසාවෙන් නරඹාවී. තවත් ටෙලිනාට්‍යයක වැඩ කෙරෙමින් පවතිනවා.
