සංජානා නෙත්මිණි කියන්නේ දක්ෂ නැඟී එන ජනප්‍රිය රංගන ශිල්පිනියකි, මෝස්තර නිරූපිකාවක්. පුංචි තිරය හරහා ප්‍රේක්ෂකයින් අතරට ආ සංජානා නෙත්මිණි දැන් මඟ බලන් ඉන්නේ රිදී තිරය හරහා ප්‍රේක්ෂකයින් අතරට එන්න. ඒ අසංක සායක්කාර කුලුඳුල් සිනමා නිර්මාණය වන කොටු හරහා.
මුලින්ම සංජානා ගැන විස්තර කරොත්
මගේ නම සංජානා නෙත්මිණි. මම ඉන්නේ සීදුව ප්‍රදේශයේ. මම පාසල් ගියේ මීගමුව Newsted Girls’ College එකට. මගේ පවුලේ ඉන්නේ අම්මයි තාත්තයි, නංගියි, මල්ලියි.
කොහොමද කලාවට සම්බන්ධ වෙන්නෙ?
කලාවට එන්න මගේ කිසිම අදහසක් තිබුණේ නැහැ. හැබැයි මගේ අම්මා ආස කළා මම කලාවට එනවා දකින්න. මම කලාවට එන්න කලින් නිරූපණ ශිල්පිනියක්. මම ලංකාව නියෝජනය කරලා මිස් ටීන් ඉන්ටර් නැෂනල් පැජන්ට් එකටත් සහභාගී වෙලා තියෙනවා.
මොකක්ද මුල්ම නිර්මාණය?
මගේ මුල්ම ටෙලි නිර්මාණය වෙන්නේ අසංක සායක්කාර අයියාගේ සින්ටෝ ටෙලි නිර්මාණය. ඒක මගේ ජීවිතේ එක හැරවුම් ලක්ෂ්‍යක් වෙනවා. එතැනදී සායක්කාර අයියා කිව්වා දුඹුරු හම තියෙන අය දාලා අපේ අලුත් වැඩක් වෙනවා. ඒකට ඔඩිෂන් තියෙනවා. ඇවිත් බලන්න කියලා. මම ඒ ආරාධනාව සතුටින් භාර ගත්තා. මම ඔඩිෂන් එකට සාර්ථකව මුහුණ දුන්නා. ඒ නිසා මට ඒ අලුත් වැඩේ ප්‍රධාන චරිතය ලැබුණා. ඒ නාට්‍යය තමයි ‘ඇයි අපි සුදුද ?‘. ඒක තමයි මම ප්‍රධාන චරිතයක් කළ පළමු නාට්‍යය. එහි මගේ චරිතයේ නම වුණෙත් සංජානා. ඉසුරංග එක්ක තමයි රඟපෑවේ.
නිරූපණ ශිල්පිනියක් වෙන්න හිතුවෙ ඇයි?
මම පොඩි කාලේ ඉඳන්ම ලස්සනට අදින්න ආසයි. ෆැෂන් කරන්න ආසයි. මේකප් කරන්න ආසයි. ඒ නිසා ආසාවක් ඇති වුණා ඒ පැත්තෙන් යන්න. දවසක් මම දැක්කා මිස් ටීන් ශ්‍රී ලංකා තරගයට ඔඩිෂන් තියෙනවා කියලා දැන්වීමක්. ඒකට ඇප්ලයි කරලා ඔඩිෂන් ගිහින් තේරිලා එකේ අවසන් තරගය වෙනකම් ආවා. ඊට පස්සේ 2024 දී මිස් ටීන් ශ්‍රී ලංකා විදියට ජයග්‍රහණය කළා. ඊට පස්සේ ලංකාව නියෝජනය කරලා ජාත්‍යන්තර තරඟවලට සහභාගි වුණා.
මේ දිනවල පුංචි තිරෙන් දකින්න ලැබෙන නිර්මාණ මොනවද?
මේ දවස්වල නම් ටෙලි නිර්මාණ අලුතින් භාර ගත්තේ නැහැ. වැඩි කාලයක් දුන්නේ ‘කොටු‘ සිනමා නිර්මාණයට. ඉදිරියේදී වෙනස් විදියේ අලුත් වැඩවලින් ප්‍රේක්ෂකයින් අතරට එන්න ආසාවෙන් ඉන්නවා.
ඔබ සිනමාවට එන්නෙ කොටු හරහා නේද?
ඔව්. කොටු හරහා තමයි මම සිනමාවට එන්නේ.
කොටු චිත්‍රපටයට ආරාධනා ලැබුණම මොකද හිතුණේ?
මම කොටු ටෙලි නිර්මාණයට රංගනයෙන් දායක වූ කෙනෙක් නෙවෙයි. ඇත්තම කිව්වොත් මම කොටු ප්‍රේක්ෂිකාවක්. මොකද ඒක සායක්කාර අයියාගේ වැඩක් සහ අපේම සහෝදර ශිල්පීන් ඉන්න නිසා. මටත් පොඩි ආසාවක් තිබුණා මටත් මේකේ පොඩි හරි චරිතයක් කරන්න තිබුණා නම් කියලා. එක දවසක් සායක්කාර අයියා කතා කරලා කිව්වා නංගි කොටු නාට්‍යය හරහා සිනමා නිර්මාණයක් එනවා එකේ චරිතයක් තියෙනවා කරමු ද කියලා. මම හරිම සතුටින් භාර ගත්තා. එ් වන විට මගේ හිත ඇතුළේ තිබුණු බලාපොරොත්තුවක් නිසා. මට ලැබුණේ කොටු සිනමා නිර්මාණයේ ප්‍රධාන චරිතයක්. මට අභියෝගයක් වුණු චරිතයක් මට ලැබුණේ. මට තිබුණේ ද්‍රවිඩ ගැහැනු ළමයෙක්ගේ චරිතයක්. ඒ කතා විලාශයත් වෙනස්.
රංගනයේදි පනවා ගත් සීමාවන් තියේද?
එහෙම විශේෂයෙන් කියලා සීමාවන් නැහැ. මට මම වෙලා රංගනයේදී මගේ හෘද සාක්ෂියට එකඟව කරන්න පුළුවන් දේවල් මම කරනවා. ඒ වගේම හෘද සාක්ෂියට එකඟව කරන්න බැරි දේවල් මම කරන්නේ නැහැ.
මේ ගමන එන්න ගෙදරින් ලැබෙන සහයෝගය කොහොමද?
අම්මා, තාත්තා, නංගි, මල්ලි ඒ හැමෝගෙන්ම ලොකු සහයෝගයක් ලැබෙනවා. මගේ හැම ගමනකදීම අම්මා මා එක්ක ඉන්නවා. අම්මගේ ආරක්ෂාවත් එක්ක ලොකු ගමනක් යන්න පුළුවන් කියලා මට දැනෙනවා.
ප්‍රේක්ෂක ආදරේට කියන්න දෙයක් ඇති නේද?
මේ ගමන පටන් ගත්ත දවසේ ඉඳන් මා එක්ක ප්‍රේක්ෂක පිරිසක් මා වටා ඉන්නවා. ඒ අය නිසා තමයි අද මම මෙතන ඉන්නේ. හැමදාම මා එක්ක ඉන්න ඉදිරියේදී ලස්සන නිර්මාණ ටිකක් බලාගන්න පුළුවන්.
අනාගත බලාපොරොත්තු මොනවාද?
මම තාම මේ ගමන පටන් ගත්තා විතරයි. තාම මට වයස අවුරුදු 19යි. ඉදිරියේදී තෝරා බේරාගෙන ලස්සන ගමනක් යන්න බලාපොරොත්තු වෙනවා.
