වේදිකාවෙන් ඇරඹුණු ඒ කලා ගමන අද පුංචි තිරය, සිනමාව, ගුවන්විදුලිය, හඬකැවීම්, ලේඛනය සහ අධ්‍යක්ෂණය දක්වා විහිදී ගොසිනි. දශක ගණනාවක් පුරා විවිධ චරිතවලට ජීවය දෙමින්, වචනවලට හඬක් එක් කරමින්, අකුරු අතරින් අලුත් ලෝක මවමින් ඇය තවමත් කලාවේ සක්‍රියව කටයුතු කරයි. කෙටියෙන්ම කිව්වොත් ඇය මෙලනි අශෝකා ය.
“මගේ නම සේමසිංහ වන්නිනායක මුදියන්සේලාගේ මෙලනි අශෝකා නමඩවැව. මගේ අම්මා, තාත්තා සහ මහත්මයා අද ජීවතුන් අතර නැහැ. මට පුතාලා දෙන්නෙක් ඉන්නවා. මගේ පාසල කෝට්ටේ ආනන්ද බාලිකා විද්‍යාලය. මගේ ජීවිතයේ කලා ගමන ආරම්භ වුණේ පාසල් කාලයේදීමයි.
මගේ පාසල් කාලයේදීම රංගනයට අවස්ථාව ලැබුණා. ඒ කාලයේ විනී රංවල මහතාගේ එළිමහන් නාට්‍යවල රඟපාන්නත් මට හැකි වුණා. මගේ පාසලේ විදුහල්පතිනිය ලෙස කටයුතු කළේ කුසුමා වැලිකල මහත්මියයි. එතුමියගේ ස්වාමිපුරුෂයා වූ පී. වැලිකල මහතා ගුවන්විදුලි නාට්‍යයක් ඇසුරින් ‘මං කොමසාරිස්’ නමින් වේදිකා නාට්‍යයක් නිර්මාණය කළා. මට ඒ නාට්‍ය යේ රඟපාන්න අවස්ථාව ලැබුණා.“
පාසලෙන් ලැබුණු ඒ අත්දැකීම් ඇයට කලාව පිළිබඳ වූ උනන්දුව තවදුරටත් වර්ධනය කර ගැනීමට මඟ පෑදීය. පාසල් වේදිකාවෙන් ඇරඹුණු ඇගේ ගමන පසුව ගුවන්විදුලියටත්, එතැනින් ප්‍රසිද්ධ වේදිකාවටත් විහිදී ගියේය.
1976 නොවැම්බර් 14 වැනිදා ඇගේ කලා ජීවිතයේ අමතක නොවන දිනයකි. එදින ලුම්බිණි රඟහලේදී වේදිකාගත වූ ‘සැලීනා’ නාට්‍යය ඔස්සේ ඇය ප්‍රසිද්ධ වේදිකාවට පිවිසියාය. එහිදී ඇය නිරූපණය කළේ ‘කැතරින්’ නම් විප්ලවීය චරිතයයි.
“‘සැලීනා’ නාට්‍යයෙන් තමයි මම ප්‍රසිද්ධ වේදිකාවට ආවේ. එතැනින් පටන් ගත්ත ගමනේදී ‘කතරගම රූමතිය, බීරි අලි, සිකියුරිටි සින්න තම්බි, චෙරියෝ සාජන්ට්, ඩොක්ටර් චිකාගෝ වැනි වේදිකා නාට්‍ය රැසක රඟපාන්න අවස්ථාව ලැබුණා.”
එකම චරිතයකට සීමා නොවී විවිධ චරිත ඔස්සේ තම රංගන හැකියාව ප්‍රකාශ කිරීමට ඇයට ලැබුණු ඒ අවස්ථා, ඇගේ කලා ජීවිතය වඩාත් පුළුල් කළේය. රූපවාහිනිය ශ්‍රී ලාංකික ජන ජීවිතයට සමීප වීමත් සමඟ කලාකරුවන්ට නව මාධ්‍යයකින් ප්‍රේක්ෂකයන් හමුවීමට අවස්ථාව උදා විය. මෙලනිට ද වේදිකා නාට්‍යයෙන් ඔබ්බට ගොස් රූපවාහිනී රංගනයට පිවිසීමට අවස්ථාව ලැබිණි. ‘මනමාලයෝ’ වේදිකා නාට්‍යය ස්වාධීන රූපවාහිනිය ඔස්සේ ටෙලිනාට්‍යයක් ලෙස ඉදිරිපත් වූ අවස්ථාවේදී ඇය එහි රඟපෑවාය. වේදිකාවේදීත්, රූපවාහිනීයේදීත් එකම නිර්මාණයේ රඟපෑමට ලැබීම ඇගේ කලා ජීවිතයේ සුවිශේෂී අත්දැකීමකි. එහිදී ඇය නිරූපණය කළේ ‘රූපා’ නම් චරිතයයි.
“මගේ ටෙලිනාට්‍ය රංගන ගමනේ ආරම්භය ලෙස සිහිපත් කරන්නේ 1980 වසරේ ‘වෙස් බැඳුම’ ටෙලිනාට්‍යයයි. ඉන් පසුව ටෙලිනාට්‍ය විශාල ප්‍රමාණයකට සම්බන්ධ වෙන්න මට හැකි වුණා.”
‘අමිල සෙනෙහස, වනවදුලේ වසන්තය, ස්වර්ණතිසරාවී, ඉර බටු තරුව, මහ ගෙදර, සබඳ පබිලිස්, බබානිස්, මායාරත්න, ආදරවන්තයෝ, දියණි සහ නෙළුනිකා, කියාදෙන්න ආදරේ තරම්, කීටයා සහ මායාවී’ ඇතුළු ටෙලිනාට්‍ය රැසක ඇය රංගනයෙන් දායක වී තිබේ. ඒ සෑම නිර්මාණයක් තුළම තමන්ට පැවරුණු චරිතය වෙනුවෙන් කැපවීමෙන් කටයුතු කිරීම ඇගේ රංගන ජීවිතයේ කැපී පෙනෙන ලක්ෂණයකි.
ටෙලිනාට්‍යයෙන් පමණක් නොනැවතුණු ඇය සිනමාවට ද පිවිසියාය. විශේෂත්වය වන්නේ සිනමා රංගන ජීවිතය ආරම්භයේදීම ප්‍රධාන චරිතයකට පණ පෙවීමට අවස්ථාව ලැබීමයි.
“‘සම්බුදු මහිම’ චිත්‍රපටයේ ප්‍රධාන චරිතය රඟපාමින් තමයි මම සිනමාවට පිවිසුණේ. ඊට පස්සේ ‘යුධ ගිනි මැද, ජොලි හලෝ, නුඹ නාඩන් අපට පිස්සු, ඩබල් ගේම්, මිහිඳුම් වසන්තය’ වැනි චිත්‍රපටවලටත් සම්බන්ධ වුණා. චිත්‍රපට විස්සක පමණ අද වන විට රඟපා තියෙනවා.”
වේදිකාව, පුංචි තිරය සහ සිනමාව යන මාධ්‍ය තුනෙහිම අත්දැකීම් ලබමින් ඇය ගොඩනඟා ගත් කලා ජීවිතය, එක් මාධ්‍යයකට පමණක් සීමා නොවූ ප්‍රතිභාවක සාක්ෂියකි. මෙලනිගේ කලා ජීවිතයේ තවත් වැදගත් පරිච්ඡේදයක් වන්නේ හඬකැවීම් කලාවයි. ජාතික රූපවාහිනියේ‘මල්ගුඩි දවස, අනූපමා, ඔෂින්, එදා, රොබින්සන් අන්දරය, මෙදා’ වැනි නිර්මාණවලට හඬකැවීම් ශිල්පිනියක ලෙස සිය හැකියාවන් පෙන්නුවාය. ඒ සඳහා ඇයට මඟ පෙන්වූයේ අතුල රන්සිරිලාල්ය.
“මම හැමදාම කළේ මට සුදුසුයි කියලා හැඟෙන චරිත විතරයි. මට අනවශ්‍යයි කියලා හිතෙන චරිත කරන්න ගියේ නැහැ. ඒ වගේම මම එකම චරිතයකට කොටු වෙලා හිටියෙත් නැහැ. අවුරුදු ගාණකට සැරයක් හරි හාස්‍යෝත්පාදක චරිතයක් කරන්න හරිම කැමතියි. රඟපෑමට අමතරව
මම පොත් දෙකක් ලියලා තිබෙනවා. ඒ තමයි ‘සිංහල නෑයා’ කියන කෙටිකතා සංග්‍රහය සහ ‘සොල්දාදුවාගේ ප්‍රේමය’ කියන නවකතාව. ඉදිරියේදී තවත් පොත් දෙකක් එළිදක්වන්න බලාපොරොත්තුවෙන් ඉන්නවා.”
ඇගේ කෙටිකතාවක් ඇසුරින් නිර්මාණය කළ ‘සිලින්සීයා’ ඒකාංගික නාට්‍යය ද, ඇය නිර්මාණය කළ ‘භව තිමිර’ ටෙලිනාට්‍යය ද ජාතික හා ස්වාධීන රූපවාහිනී නාළිකා ඔස්සේ විකාශය වී තිබේ.
කලා ක්ෂේත්‍රයේ දීර්ඝ අත්දැකීම් ලබන ඇය අද තමන් සතු දැනුම ඊළඟ පරම්පරාව වෙත ලබා දීමට ද කැපවී සිටින්නීය. නාට්‍ය හා රංග කලාව මෙන්ම නිවේදනය පිළිබඳව ද ඇය ඉගැන්වීම් කටයුතු සිදු කරයි. ලේක්හවුස් මාධ්‍ය ආයතනයේ ආරාධිත දේශකවරියක ලෙස කටයුතු කිරීම ද ඇගේ වෘත්තීය ජීවිතයේ වැදගත් අංගයකි.
“අපිට ඒ කාලයේ හොඳ ගුරු ඇසුරක් ලැබුණා. ඒ ඇසුර තමයි අපිට අද මෙතැනට එන්න අවස්ථාව සැලසුවේ. අද තරුණ පරම්පරාව සමඟ වැඩ කරද්දී ඉවසීමෙන්, ආදරයෙන් සහ නිවැරදි මඟ පෙන්වමින් කටයුතු කරන්න ඕනෑ. මම ඔවුන් සමඟ එක්ව වැඩ කරන්න හරිම කැමතියි. එහෙම කටයුතු කරද්දී යහපත් සිතුවිලි නිරායාසයෙන්ම ගොඩනැගෙනවා.
ඕනෑම කෙනකුට තමන්ගේ ගමන යද්දී බාධක සහ අවහිරතා එන්න පුළුවන්. නමුත් අපි යම් දෙයක නිරත වෙනවා නම් ඒ බාධක දිහා බලාගෙන ඉන්න වෙලාවක් නැහැ. මට කවුද බාධා කරන්නේ, මං ගැන මොනවද කියන්නේ කියන දේවල් දිහා බලාගෙන මම කාලය ගත කළේ නැහැ. කාලය කළමනාකරණය කරගෙන ඒ හැම දෙයක්ම ජයගෙන ඉදිරියට ගියා.”
ඉදිරියේදී වේදිකා නාට්‍යයක් තම ප්‍රේක්ෂකයන් වෙත ගෙන ඒමටත් ඇය බලාපොරොත්තු වෙයි. එමෙන්ම ලේඛන කටයුතු සඳහා වැඩි කාලයක් වෙන් කර ගැනීමට ද ඇය අපේක්ෂා කරයි.
