ඇතැම් රංගන ශිල්පීන් අපට හමුවන්නේ තිරය මත පමණි. තවත් සමහරුන් තම රංගන ප්‍රතිභාවෙන් ප්‍රේක්ෂක හදවත් තුළ සදාකාලිකවම ජීවත් වෙති. සිනහවකින් මෙන්ම කඳුළකින් ද ප්‍රේක්ෂකයාගේ හදවත ස්පර්ශ කළ හැකි එවැනි කලා ශිල්පිනියකි, නිල්මිණි තෙන්නකෝන්. ජීවිතයේ විවිධ හැඩතල, ගැහැනියකගේ හදවතේ සැඟවුණු සංවේදනා සහ මනුෂ්‍ය සබඳතාවල සියුම් බැඳීම් රංගනය තුළින් ජීවමාන කිරීමට සමත් වූ ඇය, ශ්‍රී ලාංකේය රංගන ක්ෂේත්‍රයේ තමන්ටම අනන්‍ය වූ සලකුණක් තැබූ ශිල්පිනියකි.
මේ දිනවල ඇය ජයසේන ජයකොඩිගේ ‘අස්වැන්න’ නවකතාවෙන් සැම්සන් කුමාරගේ පුංචි තිරයට ගෙන එන ‘අස්වැන්න’ ටෙලි වෘත්තාන්තයේ ‘දිලෝ’ ලෙස අපූරු රංගනයකින් අප හමුවේ.
“ඉස්සෙල්ලාම මට ගෙනැවිත් දුන්නේ අස්වැන්න නවකතාව. චරිත දෙකකින් එක් චරිතයක් තෝරා ගන්නා ලෙස කියද්දි මම තෝරගත්තේ දිලෝගෙ චරිතය. මේ වෙද්දි මගේ දුවත් ලංකාවේ හිටියා. ඒ දවස්වල දුව ඉස්කෝලේ යනවා. මම මේ නාට්‍යයේ රූගත කිරීම්වලට සම්බන්ධ වුණේ ලොකු කැප කිරීමක් කරලයි. දිලෝ දරිද්‍රතාවයෙන් පෙළුණු පවුලක කෙනෙක් නිසා මට මගේ පෙනුම සෑහෙන්න වෙනස් කරගන්න වුණා. වේල් ගණන් නොකා නොබී මුහුණ කෙට්ටු කර ගත්තා. මේ කතාවේ හැටියට දිලෝ ගේ මහත්තයා හරිම කම්මැලියි. ඒ නිසා දිලෝට ජීවන සටන ගෙනියන්න සෑහෙන්න වෙහෙසක් දරන්න වෙනවා. කපටිකමයි, අහිංසකකමයි මේ ඔක්කොම චරිත ලක්ෂණ තියෙන චරිතයක්. දරුවන්ගේ බඩගින්න නිවන්න ගොඩක් දේවල් කරන්න වෙන නිසයි ඇය එහෙම වෙලා තියෙන්නේ.
දඹුල්ල ආදී ප්‍රදේශවල කැළවල්වලත් රූගත කිරීම් තිබුණා. මීට අවුරුදු කිහිපයකට කලින් මේ ටෙලි නාට්‍යය රූගත කළේ. නවකතාව හරිම ඕනෑකමෙන් කියවපු අය ඒ ඇසුරින් තැනුණු ටෙලි නාට්‍යයක් නරඹන්න ආසාවෙන් හිටියා කියලා සමාජ මාධ්‍යවල පළවන ප්‍රතිචාරවලින් දැනෙනවා. මේ චරිතයට මට හොඳ ප්‍රතිචාර තියෙනවා. මමත් මේ චරිතයේ රංගනය වෙනුවෙන් තෘප්තිමත්. මම හිතන්නේ මම කරපු චරිත අතුරින් ප්‍රේක්ෂකයන්ගේ මනසේ රැඳුණු චරිතයක් බවට ‘දිලෝ’ පත් වේවී. ජාතික රූපවාහිනියේ සතියේ දිනවල ‘අස්වැන්න’ විකාශය වෙද්දී ස්වාධීන රූපවාහිනියේ නිවන්ත ප්‍රසාරගේ ‘මීෂා’ ටෙලි නාට්‍යයත් විකාශය වෙනවා. ‘මීෂා’හි මම පොහොසත් පෙළෙන්තියේ පවුලක නෝනා කෙනෙක්. අන්ත දෙකක චරිත දෙකක් එකවර විකාශය වෙන්නේ. මේ නිසා ප්‍රේක්ෂකයන්ගෙන් ලැබෙන ප්‍රතිචාර විවිධාකාරයි. ‘මීෂා’ විකාශය වන අතරතුරේ රූගත කිරීම් තවම සිදුවෙනවා. නිපුණ පුෂ්පකුමාරගේ අලුත්ම සිනමා නිර්මාණයවන ‘ගගන’හි ප්‍රධාන චරිතය සඳහාත් මම එක් වුණා. ‘ගගන’ ලබන වසරේ වගේ තිරගත වේවි. ෂර්ලී පී. දෙලංකාවලගේ ‘ හන්තානෙට ඇහෙනවද’ මම එක් වුණු තවත් සිනමා නිර්මාණයක්.”
මේ දිනවල තිරගත වන ‘මං හොයන්නේ ප්‍රේමයක්’ චිත්‍රපටයේ නිල්මිණි නිරූපණය කරන්නේ වෙනමම චරිතයකි. නව යොවුන් වියේ පසුවන තරුණ තරුණියන්ගේ සංකීර්ණ හැඟීම්, සමාජ අපේක්ෂාවන් සහ සැබෑ ආදරය සොයා යාම පදනම් කරගත් කතාවකි. මෙහිදී ඇය දරුවන්ගේ ආදරය සහ ජීවිතයේ වගකීම් පිළිබඳව සංවේදීවන මවකගේ භූමිකාවක් නිරූපණය කරයි. ප්‍රකට ටෙලිනාට්‍ය අධ්‍යක්ෂවරයකු වන තිළිණ බොරලැස්සගේ අධ්‍යක්ෂණයක් වන මෙය ඔහුගේ කුලුඳුල් සිනමා අධ්‍යක්ෂණය ද වේ.
“මම කැමැත්තෙන්මයි එකකට එකක් වෙනස් චරිත කරන්නේ. ගම, නගරය කියලා එකක් නැහැ. හැබැයි හැමවෙලේම හැම චැනල් එකේම පෙනී ඉන්න මම කැමති නැහැ. මම රංගනයට ආපු මුල් කාලේ චැනල් දෙක තුනයි තිබුණේ. ඒ කාලේ නාට්‍යවල හිටියේ මමම විතරයි වගේ. එහෙම ඉඳලා මම හදාගත්ත නමක් තියෙනවා. ඒ වෙනුවෙන් විශාල කැප කිරීම් කරලා තියෙනවා. රංගනය ප්‍රායෝගිකව හදාරන්නත් එය මුල් කාලේ මට හොඳම අවස්ථාවක් වුණා. මම නිළියක් වෙන්න හේතු වුණේ අපේ අග්‍රගණ්‍ය නිළි රැජිණ මාලනී ෆොන්සේකා. ඇයගේ රඟපෑම් දැකලයි මට නිළියක් වෙන්න හිතුණේ. පාසැල් යන කාලයේදීම වගේ මම රංගනය හදාරන්න රංගන පාසලකට එකතු වුණා. දයා වයමන්, රංජිත් පෙරේරා වැනි ගුරුවරුන් එහි සිටියේ. එතැනින් රංගනය හදාරපු අය කිහිපදෙනෙක්ම මේ ක්ෂේත්‍රයේ ඉන්නවා. ජර්මනිය වගේ
රටවල්වලින් පවා ඇවිල්ලා අපට ඉගැන්වූවා. හුස්ම ඉහළ පහළ දමන අභ්‍යාස, විවිධ ඉරියව්, අභිනයන් මේ සියල්ල මට රඟපාන මුල් කාලයේ දී, උදව් වුණා. අද මම රංගනය අතින් යම් තැනක ඉන්නවනම් මේ පාසලෙන් ඉගෙන ගත්ත දේවල් බෙහෙවින්ම රුකුලක් වුණා.”
සතුට, දුක, ආදරය, වේදනාව, බලාපොරොත්තු සහ අහිමිවීම් වැනි මිනිස් ජීවිතයට සමීප හැඟීම් චරිතයක් තුළින් ප්‍රකාශ කිරීමේදී ඇය දක්වන හැකියාව ප්‍රේක්ෂකයන්ගේ අවධානය දිනාගන්නා සුවිශේෂී ගුණයකි. චරිතයක බාහිර ස්වරූපය පමණක් නොව එහි අභ්‍යන්තර හැඟීම් ද නිරූපණය කිරීමට උත්සාහ කිරීම, රංගන ශිල්පිනියක ලෙස ඇයගේ ප්‍රතිභාව විදහා දක්වයි.
රංගනයේ සාර්ථකත්වය තීරණය වන්නේ ජනප්‍රියත්වයෙන් පමණක් නොව, තමන් නිරූපණය කරන චරිතය තුළින් ප්‍රේක්ෂකයාට අත්දැකීමක් ලබාදීමට ඇති හැකියාවෙනි. ඇයගේ චරිත නිරූපණයන්ගෙන් ඒ බව මනාව පිළිබිඹු වේ.
“මම දැන් රූපලාවණ්‍ය කටයුතුවල පවා නියැළෙන්නේ හරිම අඩුවෙන්. එදා ඉඳන්ම මා සමඟ සිටි පාරිභෝගිකයෝ සමඟ පමණයි, ඒ කටයුතු කරන්නේ. මනමාලියන්ට ඇන්දවීම නම් දැන් කෙරෙන්නෙම නැති තරම්. දුව විදෙස් රටක උසස් අධ්‍යාපනයේ නියැළෙන නිසා මට සැරින් සැරේට යන්න වෙනවා.
පොදුවේ මම මට ලැබෙන ආරාධනයන් සඳහා සහභාගි වෙනවා. එහෙම ඉද්දි තමයි කලා ලොවේ සැරිසරනවා කියලා හිතෙන්නේ. ජීවිතයේ වරින් වර පැමිණි හැල හැප්පීම් ගැන හිත හිත දුක් වෙන්නේ නැහැ. දැන් මම ගොඩක්ම ආගම දහමට නැඹුරු වෙලයි කාලය ගත කරන්නේ. ජීවිතය හරිම සතුටින් සරලව පවත්වගෙන යනවා.“
තිරය මත ඇය නිරූපණය කරන්නේ චරිතයකි. එහෙත් තිරයෙන් ඔබ්බට ඇය ඉතිරි කරන්නේ හැඟීම්වලින් පිරුණු මතකයකි. ඒ මතකය තුළ නිල්මිණි තෙන්නකෝන් නම් රංගන ශිල්පිනියට හිමි ස්ථානය තවදුරටත් ජීවමානය.
