බොලිවුඩ් රංගන ශිල්පී සල්මන් ඛාන්ට එරෙහිව නව නීතිමය ගැටලුවක් මතු වී ඇති අතර, ගෝවා ප්රාන්තයේ කැන්ඩොලිම් ප්රදේශයේ පිහිටි දේපළක් සම්බන්ධයෙන් වෙරළබඩ නියාමන කලාප (CRZ) නීති උල්ලංඝනය කර ඇති බවට ගොනු කර ඇති මහජන හිතකාමී පෙත්සමක් සලකා බැලීමෙන් අනතුරුව ගෝවා හි පිහිටි බොම්බේ මහාධිකරණය විසින් ඔහුට නොතීසි නිකුත් කර තිබේ. මෙම නඩුව තවදුරටත් ඉදිරියට ගෙන යාමට ප්රථම, පෙත්සමේ නම් කර ඇති සියලුම පාර්ශ්වයන්ගෙන් පිළිතුරු ලබා දෙන ලෙස අධිකරණය නියෝග කර ඇත.
මෙම මහජන හිතකාමී පෙත්සම ගොනු කර ඇත්තේ කැලන්ගුට් මැතිවරණ කොට්ඨාස සංසදය විසිනි. ඔවුන් පෙන්වා දෙන්නේ කැන්ඩොලිම් හි පිහිටි අදාළ භූමියේ සිදු කර ඇති ඉදිකිරීම්, සංවර්ධන කටයුතු තහනම් කර ඇති මීටර් 100 කලාපය තුළ එනම් CRZ III රෙගුලාසි යටතේ පිහිටා ඇති බවයි. පෙත්සමට අනුව, සින්ක්වෙරිම් ගඟේ ඉහළ වඩදිය රේඛාවේ සිට මීටර් 55 ක් වැනි ආසන්න දුරකින් නේවාසික විලා සහ පිහිනුම් තටාක ඉදි කර ඇති අතර, එය පාරිසරික හා වෙරළබඩ නියාමන නීති සම්පූර්ණයෙන්ම උල්ලංඝනය කිරීමක් බව පෙත්සම්කරු අවධාරණය කරයි
මෙම මතභේදයට තුඩු දී ඇති ඉදිකිරීම් ව්යාපෘතිය ක්ලැසික් සිටි ඉන්වෙස්ට්මන්ට්ස් ප්රයිවට් ලිමිටඩ් නම් සමාගමක් විසින් සිදු කර ඇති අතර, සල්මන් ඛාන් එහි කළමනාකාර හවුල්කරුවෙකු ලෙස කටයුතු කරන බවට පෙත්සම මගින් චෝදනා කර ඇත. එපමණක් නොව, අනුමත ගොඩනැගිලි සැලසුම්වල සීමාවන් ඉක්මවා යමින් මෙම ඉදිකිරීම් ව්යාප්ත කර ඇති බවටද එමගින් ගැටලු මතු කර තිබේ.මීට අමතරව, 2025 අප්රේල් 30 වැනි දින කැන්ඩොලිම් ග්රාම පංචායතනය විසින් මෙම දේපළ සඳහා නිකුත් කරන ලද පදිංචිවීමේ සහතිකය සම්බන්ධයෙන්ද පෙත්සම මගින් ප්රශ්න කර ඇත. අදාළ සහතිකය ලබා දීමේදී ක්රියාපටිපාටික අක්රමිකතා සිදුවී ඇති බවට චෝදනා එල්ල වන බැවින්, එහි වලංගුභාවය ද අධිකරණය ඉදිරියේ අභියෝගයට ලක් කර තිබේ.
මෙම නඩුවේ වගඋත්තරකරුවන් ලෙස සල්මන් ඛාන්ට අමතරව තවත් බලධාරීන් කිහිපයක්ම නම් කර ඇත. ඒ අතරට ගෝවා ප්රාන්ත රජය, ගෝවා වෙරළ කලාප කළමනාකරණ අධිකාරිය, කැන්ඩොලිම් ග්රාම පංචායතනය සහ පරිසර, වන හා දේශගුණික විපර්යාස අමාත්යාංශය ද ඇතුළත් වේ. මහජන හිතකාමී පෙත්සමෙහි අන්තර්ගතය සලකා බැලීමෙන් පසු, අදාළ සියලුම වගඋත්තරකරුවන් වෙත නොතීසි නිකුත් කර ඇති මහාධිකරණය, මෙම චෝදනාවලට අදාළව තම පිළිතුරු ගොනු කරන ලෙස ඔවුන්ට නියෝග කර තිබේ. අදාළ පිළිතුරු ලබා දීමෙන් පසුව නඩුව වැඩිදුර විභාගය සඳහා ගැනීමට නියමිතය. කෙසේ වෙතත්, මේ අවස්ථාවේදී අධිකරණය විසින් නිකුත් කර ඇත්තේ නොතීසි පමණක් වන අතර, චෝදනාවල නිරවද්යතාව සම්බන්ධයෙන් මෙතෙක් කිසිදු නිශ්චිත නිගමනයකට එළඹී නොමැත. එසේම, මෙම පෙත්සම හෝ එහි අඩංගු චෝදනා සම්බන්ධයෙන් සල්මන් ඛාන් මෙතෙක් ප්රසිද්ධියේ ප්රතිචාර දක්වා නැති අතර, සියලුම වගඋත්තරකරුවන් සිය කරුණු දැක්වීම් අධිකරණයට ඉදිරිපත් කිරීමෙන් පසු මෙම මූලික අදියරේ පවතින නීතිමය ක්රියාවලිය තවදුරටත් ඉදිරියට යනු ඇත.
