ෆර්හාන් අක්තාර්ගේ එක්සෙල් එන්ටර්ටේන්මන්ට් ආයතනය නිෂ්පාදනය කිරීමට සැලසුම් කළ ‘ඩොන් 3’ චිත්රපටයෙන් සුපිරි නළු රන්වීර් සිංග් ඉවත් වූ බවට පැතිර යන ආරංචිත් සමඟ නිර්මාණය වූ දැඩි කතාබහ මේ වන විට අනපේක්ෂිත නීතිමය මුහුණුවරක් ගෙන තිබේ. බොලිවුඩ් සිනමා ක්ෂේත්රයේ ප්රවීණ නිෂ්පාදකයකු වන ටී. පී. ඇගර්වාල් විසින් මුම්බායිහි ඩින්ඩෝෂි සිවිල් අධිකරණය හමුවේ පෙත්සමක් ගොනු කරමින් සිනමා ක්ෂේත්රයේ වෘත්තීය සමිති හා සංවිධානවලට සිය සාමාජිකයන්ට එරෙහිව තහනම් නියෝග හෝ සහයෝගය නොදැක්වීමේ නියෝග නිකුත් කිරීමට පවතින නීතිමය බලය ප්රශ්න කර ඇත. බටහිර ඉන්දීය සිනමා සේවක මහා සම්මේලනය (FWICE) සහ ඉන්දීය චලන චිත්ර නිෂ්පාදකයන්ගේ සංගමය (IMPPA) යන ආයතන වගඋත්තරකරුවන් කරමින් ඔහු මෙම පියවර ගෙන තිබේ.
මෙම නීතිමය පියවර ගැනීමට මූලික හේතුව වී ඇත්තේ ‘ඩොන් 3’ ව්යාපෘතිය සම්බන්ධයෙන් ඇති වූ මතභේදය මුල් කරගනිමින් රන්වීර් සිංග් වෙත බටහිර ඉන්දීය සිනමා සේවක මහා සම්මේලනය විසින් පනවනු ලැබූ සහයෝගය නොදැක්වීමේ නියෝගයයි. කිසියම් පුද්ගලයකු සමඟ වෘත්තීය මට්ටමින් කටයුතු කිරීම වැළැක්වීමට මෙවැනි සංවිධාන කටයුතු කිරීම ඔවුන්ට පැවරී ඇති නීත්යානුකූල බලතල ඉක්මවා යාමක් බව පෙන්වා දෙන මෙම පෙත්සමට අදාළව අධිකරණය විසින් මේ වන විටත් අදාළ සිනමා සංවිධාන ද්විත්වයටම නිවේදන නිකුත් කර ඇත.
ටී. පී. ඇගර්වාල් යනු වසර 17ක් පුරා ඉන්දීය චලන චිත්ර නිෂ්පාදකයන්ගේ සංගමයේ සභාපතිත්වය දැරූ මෙන්ම සිව් වතාවක් ඉන්දීය සිනමා සම්මේලනයේ සභාපති ලෙස තේරී පත් වූ හින්දි සිනමාවේ අතිශය ජ්යෙෂ්ඨතම චරිතයකි. සිනමා කර්මාන්තය රඳා පවතින්නේ සාමූහික එකඟතාව මත බැවින් මෙවැනි ගැටලු නිසි නීතිමය සහ වෘත්තීය ක්රමවේද හරහා විසඳිය යුතු බවත්, පුද්ගලයන්ගේ ජීවනෝපායට සහ නිර්මාණාත්මක නිදහසට බලපාන මෙවැනි සීමා කිරීම් සාධාරණ සහ විනිවිදභාවයකින් යුතුව විසඳිය යුතු බවත් ඔහු අවධාරණය කරයි.
රන්වීර් සිංග් සහ කියාරා අද්වානි ප්රධාන චරිත සඳහා තෝරා ගනිමින් ‘ඩොන් 3’ චිත්රපටය නිල වශයෙන් ප්රකාශයට පත් කළේ 2023 වසරේදී වුවද, විවිධ ප්රමාදයන් හේතුවෙන් රන්වීර් පසුව එයින් ඉවත් වූ බව වාර්තා විය. සිනමා ක්ෂේත්රයේ වෘත්තීය සමිති සතු බලතල සහ සීමාවන් පිළිබඳ විශාල සාකච්ඡාවක් මතු කරන මෙම නඩුකරය පිළිබඳව වැඩිදුර අදහස් දැක්වීම රන්වීර් සිංග්ගේ මාධ්ය ප්රකාශකයා විසින් ප්රතික්ෂේප කර තිබේ.
