2018 වසරේ රූ රැජිනක වී කලා ලොවට ආ ඇයල අද වන විට රංගනයෙන් මෙන්ම ගායනයෙන්ද ප්රේක්ෂක හදවත් දිනාගත් දක්ෂ කලාකාරිනියකි. ඇය නමින් වත්සලා කල්පනී. ජනප්රියත්වය පස්සේ පන්නන්නේ නැතිව තෝරා බේරාගත් නිර්මාණ හරහා තම අනන්යතාවය ගොඩනඟා ගත් වත්සලාගේ අලුත්ම තොරතුරු දැනගන්න අපි ඇය සමග සම්බන්ධ වුණේ මේ විදියටයි.
සුබ අලුත් අවුරුද්දක් වේවා වත්සලා…
එසේම වේවා. මගේ ආදරණීය ප්රේක්ෂක ජනතාවගේ සිතුම් පැතුම් ඉටුවන සුබ අලුත් අවුරුද්දක් වේවා..
කොහොමද අවුරුදු, හොඳට සැමරුවද?
සුපුරුදු පරිදි චාරිත්ර වාරිත්ර ඉටුකළා.
ඉතින් අවුරුදු සමයත් එක්ක ඔබේ කලා කටයුතු කොහොමද?
අලුත් ටෙලිනාට්ය දෙකකට සම්බන්ධ වෙන්න අවස්ථාව ලැබුණා. ‘ස්මාට්’ සහ ‘තාල මණ්ඩිය’ ඒ ටෙලිනාට්ය දෙක. ඒවායේ රූගතකිරීම්වලට සම්බන්ධ වෙමින් ඉන්නේ.
වත්සලා අවුරුදු කුමරිය තරගයට ඉදිරිපත් වුණේ නිළියක් වීමේ සිහිනය ඇතිවද?
එහෙම හිතාගෙන සම්බන්ධ වුණේ නැහැ. අවුරුදු ගණනාවක ඉඳලා මගේ යාළුවෝ කිව්වා මටත් ඉදිරිපත් වෙන්න කියලා. පස්සේ මවුපියන් සමග කතාබහ කරලා තමයි මම ඉදිරිපත් වුණේ. 2018 වර්ෂයේ සෑහෙන පිරිසක් ඒ සඳහා ඉදිරිපත් වෙලා තිබුණා. එදා මම හිතුවේ නැහැ අවසන් තරගකාරියන් පස්දෙනා අතරටවත් මට එන්න ලැබේවි කියලා. මොකද තරගයට ඉදිරිපත් වුණු සියලු දෙනා දක්ෂයි. කොහොම හරි අවසානයේ තුන්වැනි තැනට එන්න මට හැකිවුණා.
එතකොට ඔබ චරිතයක් බවට පත්වෙන්නේ කොහොමද?
දෙරණ රූපවාහිනිය හරහා තමයි මට මේ අවස්ථාව ලැබුණේ. මම මුලින්ම රඟපෑවේ ටෙලි චිත්රපටයක ප්රධාන චරිතයක්. එය තමයි මගේ ප්රථම රංගන අත්දැකීම.
ඊට පස්සේ චරිතාංග රංගන ශිල්පිනියක් වෙන්න අවස්ථාව ලැබුණා?
ඔව්. දිලූක ප්රසාද් අධ්යක්ෂණය කළ ‘පාවෙලා වලාකුළේ’ ටෙලිනාට්යයේ මම නපුරු චරිතයක් රඟපෑවා. ‘මිණි කිරණ’, ‘සිත නිදි නෑ’ ඇතුළු තවත් නිර්මාණ කිහිපයකට මම සම්බන්ධ වුණා.
අමාලි චරිතයට මගතොටදි ලැබුණු ප්රතිචාර දරුණු වුණා?
ඇත්තටම මට ඒ අවස්ථාව තාමත් මතකයි. ප්රේක්ෂකයන් ඒ තරමට චරිතය සමග බැඳිලා ඉන්නවා කියලා මට එදා තමයි දැනුණේ. පාරෙදි හමුවුණු කාන්තාවක් මට හොඳටම බැණගෙන ගියා. මොනවා කරන්නද ඉතින්. ඒ වචන ටික ආදරයෙන් අහගෙන හිටියා. අමාලි චරිතයට නම් ඉතින් හතර වටින්ම බැණුම් තමයි. ඒ තරමට අමාලි නපුරුයි.
මේ තරම් හොඳට කොහොමද ඔබ රඟපාන්නේ? කලාවට පවුලේ කවුරු හරි සම්බන්ධද?
මගේ පවුලේ කිසිම කෙනෙක් කලාවට සම්බන්ධ නැහැ. අඩු තරමේ මම පාසලේදිවත් රඟපාලා නැහැ. මගේ පාසල තමයි නුගේගොඩ අනුලා විද්යාලය. මම පාසලේදී නැටුම් හැදෑරුවා. ක්රීඩාවටත් මම දක්ෂයි. හැබැයි ඉදිරිපත් කිරීමේ හැකියාව ලැබුණේ සහ බය, ලැජ්ජාව මට නැතිවුණේ මගේ පාසල හරහා. පාසලේදී මම බාහිර ක්රියාකාරකම්වලටත් වැඩි අවධානයක් දැක්වූවා.
පසුකාලීනව ඔබ මල් ළඳක් වුණා?
මගේ ලොකු ආශාවක් තිබුණා චිත්රපටයක රඟපාන්න. මගේ හිතවත් හිරංග අයියාගේ මගපෙන්වීම යටතේ ‘ගුත්තිල’ චිත්රපටයේ තිර පරීක්ෂණයට මම ගියා. ‘මල් ළඳුන්’ පස්දෙනකුගෙන් එක් මල් ළඳක් වීමට මට අවස්ථාව ලැබුණා. මගේ ප්රථම සිනමා අත්දැකීම තමයි ඒ. නැවතත් චිත්රපටයකට සම්බන්ධ වෙන්න අවස්ථාව ලැබුණා. ඒ වැඩකටයුතු පටන්ගන්නකම් ඉන්නවා.
වත්සලා මොකක්ද මේ පින්සාර ආදර කතාව?
විශාරද පළමු කොටස උපාධිය මම හැදෑරුවා. පාසල් කාලයේ ඉඳලම මම ගායනයට දක්ෂයි. ටෙලිනාට්ය හරහා ලබපු ජනප්රියත්වය සමග මට රූපවාහිනී වැඩසටහන්වලට සම්බන්ධ වෙන්න ලැබුණා. එහිදී මම විවිධ ගීත ගායනා කළා. ‘පින්සාර ආදරය’ මගේ කුලුඳුල් ගීතය. එය පද රචනා කළේ වසුන්දරා හෙට්ටිආරච්චි. අවුරුදු සමය නිසා මේ දවස්වල ප්රසංග වේදිකාවෙත් මම ඒ ගීතය ගායනා කරනවා.
වසර ගණනාවක අත්දැකීම් එක්ක මොකද අද ගැන හිතෙන්නේ?
මම කලාවට සම්බන්ධ වෙලා වසර අටක් වෙනවා. සම්බන්ධ වුණු නිර්මාණවල චරිත දෙස බලනකොට ගොඩක් සතුටුයි. දිගු කාලයක් ක්ෂේත්රයේ හිටියත් අතේ ඇඟිලි ගානටවත් මම රඟපාලා නැහැ. ඒකට හේතුව මම තෝරා බේරාගෙන රඟපාන එක. චරිතය ගැන වගේම මම ඇඳුම ගැනත් ගොඩක් හිතනවා. ඒ කොහොම වුණත් මම සතුටු වෙනවා මගේ මවුපියන් වගේම මගේ සැමියා මට මේ ගමනට දෙන සහායට. මගේ ඉදිරි ගමන මීටත් වඩා ලස්සන වේවි.
