විශ්රාමික විනිසුරුවරියක ලෙසින් නිළි රැජන සිය භූමිකාවට මනා සාධාරණයක් ඉටු කරද්දී යූටියුබර් කෙනෙක් වන ඇගේ දියණිය නිමංසා ලෙස පෙනී සිටින්නේ ඇගේ ඥාති දියණියක වන සමනලී ෆොන්සේකාය. නිමංසාගේ දියණිය චනුලී ලෙස පෙනී සිටින කුශේන්්යා ෆොන්සේකා සමනලීගේ ඥාති දියණියයි. ශ්යාම් ප්රනාන්දු මහාචාර්ය කවීන්ද්ර සේනානායක ලෙසින් ඔවුන්ගේ චරිත හා ගැටෙමින් යම් සුවිශේෂී කරුණක් සමාජගත කරයි. මේ නිර්මාණය හරහා වටිනා අදහසක් සමාජගත කිරීමට කල්පන සහ වින්දන ගන්නා උත්සාහය සාර්ථක වී ඇති බව පැහැදිලිය.
‘මලකි දුවේ නුඹ’ ගැන කතා කරන්නට අද අප හා එක්වන්නේ නිමංසා සහ චනුලී ලෙසින් එහි ප්රධාන චරිත මවන සමනලී ෆොන්සේකා සහ කුශේන්්යා ෆොන්සේකාය.
පළමුව අපි නිමංසා ගැන සමනලීගෙන් විමසුවෙමු.
‘මලකි දුවේ නුඹ’ මේ දිනවල ඉතාම සාර්ථකව තිරගත වෙනවා. නිමංසා වෙන්න ලැබීම ගැන මොකද හිතෙන්නේ?
ලැබෙන ප්රතිචාරත් එක්ක ඇත්තටම ගොඩක් සතුටුයි. ඒ වගේ චරිත අද සමාජයේ ඕන තරම් ඉන්නවා. මම හරිම ආසාවෙන් කළ චරිතයක්.
ඔබේම පවුලේ පරම්පරා තුනක සාමාජිකයන් සම්බන්ධ වීමත් විශේෂත්වයක් වෙන්න ඇති?
ඒක හොඳ අත්දැකීමක් වුණා. මං නැන්දලා එක්ක නම් කලිනුත් රඟපාල තියෙනවා. දමයන්ති නැන්දා එක්කත් රඟපාලා තියෙනවා. ඒ වගේම දෙවැනි පරම්පරාව එක්කත් රඟපාල තියෙනවා. ඒ නිසා ඒක නම් අලුත්ම අත්දැකීමක් නෙවෙයි. නමුත් පරම්පරා තුනක් එකට එකම වැඩේ ඉන්න එක ටිකක් විශේෂ තැනක් වුණා.
නිමංසාට ලැබෙන ප්රතිචාර ගැන කතා කරනවානම්?
ප්රතිචාර ඉතාම ඉහළයි. මේ වසරේ එළියට ආපු පළමුවැනි චිත්රපටය විදිහට මිනිස්සු හරි ආදරෙන් වැලඳ ගනිමින් ඉන්න එක ගැන ලොකු සතුටක් තියෙනවා. මොරටුවේ චිත්රපට ප්රදර්ශනය කරන තැනට අපි ගිය දවසේ හතේ ෂෝ එක හවුස්ෆුල් වෙලා තිබුණා. චිත්රපටය බලලා එළියට ආපු මිනිස්සු හරිම සංවේදී විදිහට ඒ ගැන කතා කළා. ඔවුන් චිත්රපටය හොඳටම විඳලා තිබුණා. සමාජ සංස්කෘතික තලයේ මේ ඇතිවන පෙරළිය ගැන ගොඩක් සතුටුයි.
නිමංසාව ඔබට දැනුණෙ කොහොමද?
නිමංසා කියන්නේ හරිම ශක්තිමත් චරිතයක්. පිරිමි කාන්තාව වෙනුවෙන් තීරණ ගන්න ලෝකෙක ඇය තමන් වෙනුවෙන් තීරණ අරගෙන වැරදුණු තැන්, හරියන තැන්වල වගකීම භාරගෙන හරි ලස්සනට ඉස්සරහට යන කාන්තාවක්. වැටෙන තැන් බොහොමයක් තිබුණත් ඇය හැම තැනදිම නැඟිටිනවා. ඇය ඇයව ස්වාධීන කරගන්නවා. ආර්ථිකමය විදිහටත් ගත්තත් නිර්මාණශීලී විදිහට ගත්තත් යූටියුබර් කෙනෙක් විදිහට ඇය ඇයගෙ අනන්යතාව ගොඩනඟාගන්න උත්සාහ කරනවා. ඇයව ආරක්ෂා කරගන්න යොදාගෙන තියෙන පලිහ තමයි ඒක. ආදරයේදී, සම්බන්ධතාවලදී දියණිය නිසා ඇයව ප්රතික්ෂේප වෙනවා. ඒ හැම වෙලාවෙම ඇය දියණිය තදින් තුරුලු කරගෙන යන ගමනක් තමයි තියෙන්නේ.
මෙවන් චරිත මේ සමාජයේත් ඉන්නවා. ඒ වගේ අයගෙන් ප්රතිචාර ලැබිල තියෙනවද?
දෙතුන් දෙනෙක් මට කතා කළා. ඒ වගේම මං දන්න මේ වගේ යාළුවොත් ඉන්නවා. දැන් සමාජය ඉදිරියට යමින් තියෙන්නේ. බුද්ධිමය විදිහට වගේම ආර්ථිකමය වශයෙනුත් කාන්තාව ස්වාධීන වෙමින් ඉන්නවා. එවන් වෙලාවක තමන්ට ගෞරවයක් හිමි නොවන තමන් වේදනාවට පත් කරන පරිසරයට හෝ සමාජයට බය වෙලා ගුලිගැහිලා ඉන්නෙ නැතුව එතනින් ඉස්සරහට යන්න කාන්තාවට හැකියාවක් ලැබිලා තියෙනවා. මව කියන කොටස කිසිවෙලාවක අතහරින්නේ නැතුව තමන්ගේ දරුවට හොඳ ජීවිතයක් හදල දෙන්න සම්බන්ධතා පවා අතහැරලා ඇවිත් තමන්වත් තමන්ගෙ දරුවවත් අතහරින්නේ නැතුව ලස්සනට ජීවත් වෙන නිමංසා වගේ අම්මලා අද සමාජයේත් ඕන තරම් ඉන්නවා.
යූටියුබර් කෙනෙකුට සමාජයට ලොකු බලපෑමක් ඇති කරන්න පුළුවන් කියල හිතනවද?
මෙහෙමයි යූටියුබ් කියන්නේ අඩුවෙන්ම වාරණයට ලක්වෙන මාධ්යයක්නේ. මාධ්ය කොහොමද හසුරුවන්නේ කියන එක සම්බන්ධයෙන් ඔවුන්ට දැනුමක් තියෙනවා. හැබැයි ඒක හොඳ, නරක දෙපැත්තම සිදුවෙනවා. මේකෙ විදිහට නම් නිමංසා පාවිච්චි කරන්නේ හොඳ පැත්ත. සමාජයේ සිදුවන දූෂණ, වංචා, අසාධාරණකම් ප්රශ්න කරන්න තමයි නිමංසා යූටියුබ් නාලිකාව යොදාගන්නේ.
ඔබේ දුව චනුලි කියන්නේ ඔබේම අයියාගේ දුව. කොහොමද ඒ අත්දැකීම?
අපි දෙන්නා කොහොමත් යාළුවෝ වගේ ඉන්නේ. අපිට රිදී තිරය ශෙයාර් කරගන්න ලැබීම ලොකු සතුටක්. විශේෂයෙන්ම නැන්දත් අපිත් එක්ක හිටියා. අපි තුන්දෙනාම රඟපාපු සීන් එකයි තිබුණේ. ගොඩක් ඒවා තිබුණේ වෙනම. දුවට ගොඩක් ඒවා තිබුණේ මාත් එක්කයි නැන්දා එක්කයි වෙන වෙනම. මං නැන්දත් එක්ක සීන් දෙක තුනක් කළා. හරිම සුන්දර දවස් කීපයක් ගත කළා. චූටි දුවගේ ඇතුළෙ තියෙන සාරය මං දැක්කා. එයාට ඒක කරන්න පුළුවන් කියන එක දැක්කා. ඒක ඔළුවට දාගන්න මට පුඵවන් විදිහට මං ඇයට උදවු කළා.
මේ නිළි රැජන අවසන් වරට දායක වුණු රංගනය. ඒ ගැන මොකද හිතෙන්නේ?
ඔව්. ඇත්තටම නැන්දා අන්තිමට සම්බන්ධ වුණේ මේකට. ඇය ආසාවෙන් බලාගෙන හිටියා. නමුත් ඇයට නරඹන්න අවස්ථාවක් ලැබුණෙ නැහැ. චිත්රපටය දකිද්දි හරිම දුකයි.
කුශේන්්යා ගැනත් දැන් දැන් අනාවැකි පළ වෙනවා. ඔබටත් අහන්න ලැබිලා ඇති?
ඔව්. බොහෝ දෙනෙක් මටත් කියල තියෙනවා. ඇයට හැකියාව තියෙනවා. නමුත් ඇය දිගටම රඟපානවද නැද්ද කියන එක ගැන තාම තීරණයක් අරන් නැහැ. ඔය වගේ කාලයක් මටත් තිබුණා. පවුලෙන් අපිට උරුම වුණාට ඔය වයසෙදි අපේ ඇතුළතින් අපි තීරණය කරල නැති වෙන්න පුළුවන්. ඇය තාමත් ඒ වයස පහුකරමින් ඉන්නේ. ඇය දිගටම රඟපාවි කියන විශ්වාසය මට තියෙනවා. මම නම් කැමතියි ඇය රංගනයට එනවට. ඒක ඉතින් එයාගේ මුළු ලෝකෙම කරගෙන කළොත් තමයි හොඳ.
කුශේන්්යායි ඔබයි අම්මයි දුවයි වගේමයි කියන බොහෝ පිරිසක් හිටියා. ඔබටත් ඇහිලා ඇති?
ඔව්. අම්මයි දුවයි වගේ තමයි. ඇයත් මං වගේමයි. කොහොමත් පොඩි අයියයි මායි එක වගේ. අපේ පවුලේ කාටත් ඒ හුරුව තියෙනවා.
ඉදිරියේ දී ඔබව දකින්න ලැබෙන නිර්මාණ ගැනත් කතා කරමු?
දෙසැම්බර් මාසේ ප්රසන්න ජයකොඩිගේ චිත්රපටයක වැඩ අවසන් කළා. මහේන්ද්ර පෙරේරා, හේමාල් රණසිංහ සහ මං වටා කතාව යන්නේ. පාලිත පෙරේරාගේ කැමරා අධ්යක්ෂණයෙන් නිමවුණු එය ප්රසන්න ජයකොඩිගේ චිත්රපට ලිස්ට් එකේ වෙනස්ම වැඩක් වේවි කියල හිතනවා. මාසයක් තිස්සේ ෂූට් කළා. ලලිත් රත්නායකගේ ඩෙල්ෆ් සිනමාපටයත් එන්න තියෙනවා. මම, සජිත ඇන්තනී, දසුන් පතිරණ, සේවියර් කණිෂ්ක, මෞලී, උමා අසේනි, ප්රියන්තසිරි කුමාර, ඔහුගේ දුව රංගනයෙන් දායක වුණා. ඒකත් මාසයක් විතර ඩෙල්ෆ් දූපතේ නතරවෙලා කළ ලස්සන නිර්මාණයක්. ඊට පස්සේ විමුක්ති ජයසුන්දරගේ ස්පයින්ස්ටාර්ස් (සාංකා) සිනමාපටයට සම්බන්ධ වුණා. ඒක ඉන්දියාව, ශ්රී ලංකාව සහ ප්රංශය හවුල් නිෂ්පාදනයක් විදිහටයි කෙරෙන්නේ.
‘මලකි දුවේ නුඹ’ ගැන සමනලී එසේ පවසද්දී කුශේන්්යා පැවසුවේ ද එය ඇයට ද ආගන්තුක අත්දැකීමක් නොවුණු බවයි.
මේ දිනවල රිදී තිරයේ පිපුණු පුංචි මල ඔබ. කොහොමද ඒ අවස්ථාව ලැබෙන්නේ?
කල්පන අංකල් සහ වින්දන අංකල් එක්ක මම මීට කලින් ‘රූකඩ පැංචී‘ චිත්රපටයේ වැඩ කරල තිබුණා. ඒ අත්දැකීමත් එක්ක තමයි ඔවුන් මට මේ සඳහා ආරාධනා කළේ.
කොහොමද මේ දවස්වල චනුලිට ලැබෙන ප්රතිචාර?
ගොඩක් හොඳ ප්රතිචාර තියෙනවා. ගොඩක් දෙනා කියනවා හොඳයි ලස්සනයි කියලා. ඉතින් ගොඩක් සතුටුයි.
චනුලිගේ චරිතය ලැබුණම මොකද හිතුනේ?
ඒ චරිතය ලැබුණහම මට හිතුනේ මේ මමම නේද කියලා. ඇත්තටම ලොකු ගැළපීමක් තියෙනවා. මමත් කේන්ති යන, තරහ ගන්න, රණ්ඩු කරන කෙනෙක්. ඒ චරිතයේ අත්දැකීම් නැති නිසා විතරයි පොඩ්ඩක් අමාරු වුණේ. ඒත් චරිතය ලැබුණම සතුටු හිතුනා. නැන්දයි, ලොකු ආච්චියි හිටිය නිසා තවත් සතුටු හිතුනා.
ආච්චිගෙනුයි නැන්දගෙනුයි ලැබුණෙ මොනවගේ සහයෝගයක්ද?
ලොකු ආච්චිත් එක්ක මට කරන්න තිබුණේ සීන් කිහිපයක් විතරයි. ඒත් ඇය මට ලොකු සහයෝගයක් දුන්නා. කරන්න ඕන විදිහ කියල දුන්නා. චිත්රපටය තිරගත වෙද්දි ලොකු ආච්චි හිටිය නම් කියල හිතුනා. ඇය එක්ක රඟපාන්න ලැබුණු එක මට ලොකු ආඩම්බරයක්. ඒ වගේම නැන්දා මට ගොඩක් උදවු කළා. එයා තමයි මුල ඉඳන් අන්තිම දක්වාම ඩයලොග් කොහොමද කියන්න ඕන, මුහුණෙ ඉරියව් කොහොමද පවත්ව ගන්න ඕන කියන එක කියල දුන්නේ. ශ්යාම් අංකල් වගේම අධ්යක්ෂවරුන්ගෙනුත් ලොකු සහයෝගයක් ලැබුණා.
කුශේන්්යා තවම ක්ෂේත්රයට නවකයෙක්. ඒ අතීතය සිහිපත් කරනවා නම්?
ඔව්. මං මුලින්ම දායක වෙන්නේ මලිත් හෑගොඩ අධ්යක්ෂණය කළ ‘දැකල පුරුදු කෙනෙක්‘ සිනමාපටයට. ඊට පස්සේ තමයි රූකඩ පැංචී. ‘මලකි දුවේ නුඹ‘ කියන්නේ මගේ තුන්වැනි සිනමා අත්දැකීම. මම පොඩි කාලෙදිම වෙළෙඳ දැන්වීම්වලට සම්බන්ධ වුණා. ඊට පස්සේ මලිත් අංකල් ‘දැකලා පුරුදු කෙනෙක්‘ සිනමාපටයට සම්බන්ධ කරගන්න සමනලී නැන්දාගෙන් අහලා තිබුණා. ඒ වෙද්දි මට අවුරුදු හය හතක් ඇති. ඊට පස්සේ මගේ සීයා ආනන්ද ෆොන්සේකා ගනිපු පොටෝ වගයක් සමනලී නැන්දා ෆේස්බුක් දාල තිබිලා දැකලා තමයි කල්පන සහ වින්දන අංකල්ලා රූකඩ පැංචී එකට මට ආරාධනා කරන්නේ. ‘මලකි දුවේ නුඹ‘ සිනමාපටයට ආරාධනා ලැබෙන්නෙත් ඔවුන්ගෙන්මයි.
කුශේන්්යාගේ අනාගතය මොන පැත්තට යාවි කියලද හිතන්නේ?
මට රඟපාන්න ලොකු ආසාවක් නැහැ. ඒත් නැන්දා තමයි මාව ඒ පැත්තට තල්ලු කරන්නේ. ඊට අමතරව අම්මා තාත්තා, ආච්චී හැමදේටම උදවු කරනවා. මගේ පවුලේ ඉන්නේ මම විතරයි. දැනට මම NIBM එකේ මානව සම්පත් අංශයෙන් මගේ උසස් අධ්යාපන කටයුතු කරගෙන යනවා. ඒ පැත්තෙන් ඉදිරියට යන්න තමයි බලාපොරොත්තුව. මං තවම රංගනයෙන් ඉදිරියට යනවද නැද්ද කියන එක ගැන නම් හිතලා නැහැ.
