කුඩා කල සිටම පාසල් වේදිකාවට සම්බන්ධ වී සිටි ඔහු රංගනය වෙනම විෂයක් ලෙස හැදෑරුවේය. ලැබෙන ඕනෑම චරිතයටක සාධාරණයක් ඉටු කරමින් ප්රේක්ෂක ආදරය නොඅඩුව ලබන්නට ඔහුට පන්නරයක් වූයේ පාසල් වේදිකාව යැයි කීම නිවැරැදිය. මේ දිනවල ස්වාධීන රූපවාහිනියේ විකාශය වන පහේ ළමයි ටෙලිනාට්යය හරහා ප්රේක්ෂකයන් අතරට එන ඔහු නමින් සංගීත් සතරසිංහය.
ඔබ මේ දිනවල පහේ ළමයි ටෙලි නාට්යය හරහා ප්රේක්ෂකයින් අතරට එනවා. කොහොමද ලැබෙන ප්රේක්ෂක ප්රතිචාර?
පහේ ළමයි කියන්නේ ඉතාමත් කෙටි කාලයක් තුළ ප්රේක්ෂකයන්ගේ ආදරය දිනාගත් කතාවක්. ඒකට ලොකුම හේතුවක් තමයි ඒකෙ ප්රබල පිටපත. මුල්ම ගෞරවය හිමිවෙන්න ඕන ලක්ෂාන් වත්තුහේවාට. ඒ වගේම අධ්යක්ෂණය ශාන් ජයරත්නගේ. ඇත්තටම පහේ ළමයි කියන්නේ වෙනස්ම විදිහේ ලස්සන කතාවක්.
සන්තුෂ්ගේ චරිතය ඔබට දැනෙන්නේ කොහොමද?
සන්තුෂ් කියන්නේ හීන ගොඩාක් මැද්දේ ජීවන වෘත්තිය ගෙන යන චරිතයක්. ජීවිතයට එන නොයෙක් හැල හැප්පීම්, විවිධ ප්රශ්න හමුවේ පවුලේ සතුට රැක ගන්න උත්සාහ කරන වෙනස්ම චරිතයක්. ඒ චරිතයේ පරාසයන් ගොඩක් තියෙනවා. පහේ ළමයි හැමෝම බලන්න ඕන කතාවක් කියලයි මට හිතෙන්නේ.
ඔබට එකිනෙකට වෙනස් චරිත ලැබෙනවා. ඒ ගැන මොකද හිතෙන්නේ?
විවිධ චරිත ලබන්න ඇත්තටම මම වාසනාවන්ත වුණා. මට ලැබුණු චරිත වගේම අධ්යක්ෂකවරුත් විවිධාකාරයි. ඔවුන් හැම වෙලාවෙම වෙනස් මඟකට යොමු කරන්න උත්සාහ කරනවා. නළුවෙක් වුණහම හරියට මැටි ගුලියක් වගේ වෙන්න ඕන. අධ්යක්ෂවරයාගේ, පිටපත් රචකයාගේ තියෙන කොටස් සහ අපෙත් දේවල් එකතු කරලා ඒක අවශ්ය විදිහට හැඩ කරන්න.
මෙතෙක් ලැබුණු චරිතවලින් ඔබට අභියෝගයක් වුණු චරිත තියේද?
චණ්ඩි කුමාරිහාමි එකේ චරිතය ඇත්තටම අභියෝගයක් වුණා. ඒක ඉතිහාස කතාවක්. භාෂා උච්චාරණය,හැසිරීම ගැන ගොඩක් හිතන්න වුණා. රඟ දක්වන්න පරාසයන් ගොඩාක් තිබුණා. චණ්ඩි කුමාරිහාමි චරිතය ප්රේක්ෂකයින් ඉතාමත් ආදරයෙන් වැලඳ ගත්තා. අනිත් චරිත එහෙම නෑ කියනවා නෙවෙයි. අපි හැම වෙලාවෙම පිටපතක් ලැබුණම වෙනස් කැටයමක් ඒ චරිතය තුළ නිර්මාණය කරන්න උත්සාහ කරන්න ඕන. එතකොට තමයි ඒ චරිතය වෙනස්වෙලා පේන්නේ.
මේ දිනවල ඉතාම ජනප්රිය චංචල රේඛා ටෙලි නාට්යය ගැන කතා කරනවා නම්?
ඒක මට ලැබුණු ලොකු වාසනාවක්. සිංහල සිනමාවේ ස්වර්ණමය යුගයක තිබුණු චංචල රේඛා චිත්රපටිය ඇසුරින් දිග හැරෙන සමන් කුමාර ලියනගේ අධ්යක්ෂණයක්. චිත්රපටයක් ටෙලි නිර්මාණයකට හැරෙද්දි චිත්රපටයට හානියක් නොකර යම් යම් වෙනස්කම් සිද්ධ වෙනවා. චිත්රපටයේ පොඩි රාලහාමි කියන චරිතයට රංගනයෙන් දායක වුණේ විමල් කුමාරද කොස්තා. ඒ චරිතය තමයි මම නිරූපණය කරන්නේ. නමුත් එය ප්රතිනිර්මාණයකට වඩා වර්තමානයට ගැළපෙන අයුරින් කර තියෙනවා. අසූ ගණන්වල විදිහට තමයි කතාව විකාශනය වෙන්නේ. අධ්යක්ෂකවරයාගේ කැමැත්ත පරිදි පිටපත අනුව රංගනයේදී යම් යම් වෙනස්කම් සිදුවෙනවා. ඒක හැමෝටම ආදරයෙන් වැලඳගන්න පුළුවන් විදිහේ හැඩයකට නිර්මාණය වෙලා තියෙනවා. පොඩි රාලහාමි කියන මගේ චරිතයත් වෙනස්ම චරිතයක්.
සිනමාවට ඔබේ සම්බන්ධතාව ගැන කතා කළොත්…
ටෙලි නාට්යවලට අමතරව මං රංගනයෙන් දායක වුණු චිත්රපටියක් එන්න තියෙනවා. එහි රූගත කිරීම් අවසන්. ලබන අවුරුද්දේ බලාගන්න පුළුවන්. තවත් චිත්රපටියකට ආරාධනා ලැබිලා තියෙනවා. රංගනයට අමතරව මම ගොඩක් ආසයි ගායනයට. හැමෝටම රස විඳිය හැකි මගේ අලුත්ම සිංදු කිහිපයක් ඉක්මනටම අහන්න ලැබේවි.
ඔබේ රංගන ජීවිතයට පවුලේ අයගෙන් ලැබෙන දායකත්වය ගැනත් කියමු…
රංගනයට විතරක් නෙවෙයි මගේ ජීවිතේ හැමදේටම මට උඩින්ම උදවු කරන්නේ මගේ මැණික. එයා තමයි මගේ එකම හයිය හැමදේටම. එයා තමයි මගේ වැඩ මුලින්ම බලන්නේ. මාව ගොඩක් දිරි ගන්වන්වනවා. හැම දේකටම උදවු කරනවා. අපි සන්තෝසෙන් ඉන්න ලොකුම කාරණාවත් ඒක.
ක්ෂේත්රයට එන නවක රංගන ශිල්පීන්ට ඔබට කියන්න තියෙන්නේ මොකක්ද?
දැන් දැන් අලුතින් ගොඩාක් අය මේ ක්ෂේත්රයට එකතු වෙනවා. රංගනය කියන්නේ හොඳ විෂයක්. ඒක හදාරන්න පුළුවන්නම් ඉතාම වටිනවා. මම කොළඹ තර්ස්ටන් විද්යාලයේ ඉගෙන ගන්න කාලෙ ඉඳන්ම වේදිකාවට සම්බන්ධ වුණා. ඊට පස්සෙත් මම රංගනය වෙනම හදාරලා තියෙනවා. ලෝකෙ තියෙන අනෙක් විෂයයන් වගේම රංගනයත් ඉගෙන ගෙන ඉවර කරන්න බැහැ. ඉගෙන ගන්න ගොඩාක් දේවල් තියෙනවා. පිටපත කියවන තැන ඉඳන්ම අපිට යම් හික්මීමක් තියෙනවනම් අපිට වෘත්තීය ජීවිතය ගොඩනඟා ගන්න හරිම පහසුයි. අද තරුණ පිරිස හරිම දක්ෂයි. හැදෑරීම තමයි අංක එක. ඕනෑම දෙයක් හැදෑරුවොත් වරදින්නෑ .
