විමුක්ති, ඔබ කලකට පෙර අපිට ජාතික රූපවාහිනියෙන් සමීප වුණා. මේ ගමනේ ආරම්භය ගැන කතා කරමු.
මාධ්ය ක්ෂේත්රයට මම එන්න ඕන කියන හීනේ මගේ හිතේ පැළ වුණේ පාසල් කාලයේදීමයි. මුලින්ම ඉගෙන ගත්තේ නෙළුව ජාතික පාසලෙන්. පාසලේ හිටපු වැඩිමල් සහෝදර, සහෝදරියන්ගේ කථික, නිවේදන දක්ෂතා දැක්කම මට ආසා හිතුණා. විශේෂයෙන්ම මගේ මාමාගේ පුතා එවක පාසලේ හිටපු දක්ෂ නිවේදකයෙක්. මට ඒ චරිත නිවේදනය තෝර ගන්න උත්තේජනයක් දුන්නා. මට පාසලේ මාධ්ය ඒකකයේ සාමාජිකයෙක් වෙන්න අවස්ථාව ලැබෙන්නේ වීණා විජයානි අමරසිංහ අක්කා නිසා. වීණා අක්කා මට ලබා දුන්න ආරම්භය තමයි මාව මාධ්ය ලෝකයේ මේතාක් දුරකට ගෙනාවේ.
උසස් පෙළට ගාල්ල රිච්මන්ඩ් විද්යාලයට පැමිණීමත් එක්ක මට විශාල අවකාශයක් ලැබුණා. හර්ෂ ප්රසන්න සර් තමයි රිච්මන්ඩ් විද්යාලයේ මාධ්ය ඒකකයට යොමු වෙන්න මට අවස්ථාව ලබා දුන්නේ. මොකද ගාල්ල රිච්මන්ඩ් කියන්නේ දක්ෂයින් රැසක් එක් වුණු පාසලක් නිසා තරගකාරීත්වය වැඩියි. පාසල් කාලෙදීම මම ජාතික නාළිකා එක්ක සම්බන්ධ වුණා.
මුලින්ම රුහුණු ගුවන් විදුලියට ළමා නිවේදකයෙක් විදියට සම්බන්ධ වුණා. අනතුරුව ජාතික රූපවාහිනියේ ළමා වැඩසටහන් නිවේදකයෙක් විදියට “පැහැසරණිය, අතුරු මිතුරු, ඊ මිතුරෝ” වැඩසටහන් නිවේදනය කළා. ඊට අමතරව හඬකැවීම් වැඩසටහන්වලට දායක වුණා. උසස් පෙළින් පස්සේ 2014 දී ජාතික රූපවාහිනියේ පුහුණු වැඩසටහන් නිෂ්පාදකවරයෙක් විදියට වැඩ කරන්න අවස්ථාව ලැබෙනවා. ඒ ඔස්සේ මම වැඩසටහන් නිෂ්පාදකවරයෙක්, අධ්යාපන, තරුණ, සඟරාමය වැඩසටහන් රැසක නිවේදකයෙක් විදියට වැඩ කළා. මම ජාතික රූපවාහිනියේ නිවේදකයෙක් විදියට මෙහෙයවපු “Thursday Knowledge 1st, සංහිඳ, සුක්කානම” කියන වැඩසටහන් එවක ප්රේක්ෂකයා අතර ජනප්රිය වුණා.
ඔබේ අධ්යාපන කටයුතු සිදු වෙන්නේ කොහොමද?
උසස් පෙළින් පස්සේ ශ්රී ජයවර්ධනපුර විශ්වවිද්යාලයේ ජනමාධ්ය ඩිප්ලෝමාව හැදෑරුවා. මට ඉංජිනේරු උපාධියකට යන්න අවස්ථාව ලැබුණත් මාධ්යය ක්ෂේත්රයට තියෙන ආසාව නිසාම ජාතික රූපවාහිනියේ රැකියාව තෝර ගත්තේ බොහෝ දෙනෙක්ගේ විරෝධතා මත. පාසල් කාලෙදි මම නිවේදනයට විතරක්ම සීමාවුණේ නැහැ. සංගීත, නාට්යය අංශවල තරඟවලට සම්බන්ධ වෙලා සමස්ත ලංකා මට්ටමෙන් හොඳම නළුවා, හොඳම ගායකයා විදියට ජයග්රහණ ලබා ගත්තා.
ඔබේ අනාගත හීනයද මේ ඉෂ්ඨ වුණේ?
ඔව්, අනාගතයේදී නිවේදකයෙක් වෙන්න ඕන කියලා මට ලොකු හීනයක් තිබුණා. හැබැයි ජාතික රූපවාහිනියට සම්බන්ධ වුණාට පස්සේ වැඩසටහන් නිෂ්පාදකවරයෙක්, අධ්යක්ෂකවරයෙක් වගේම පිටපත් රචකයෙක් කියන භූමිකාවල හිටපු නිසා නිවේදකයෙක්ට පමණක් සීමා නොවී මගේ හැකියාවන් පෙන්නන්න උත්සහ කළා. ඊට අමතරව මට රංගන ශිල්පියෙක් වෙන්න පොඩි ආසාවකුත් තිබුණා. අවස්ථා කීපයක් ලැබුණත් මම ඒ පැත්තට යොමු වුණේ නැහැ.
මාධ්ය ක්ෂේත්රයෙන් ඔබට ලැබුණු සුවිශේෂී අවස්ථා මොනවද?
පිටපත් රචකයෙක් විදියට ලොකු ජයග්රහණ ලබා ගත්තා. කෙටි චිත්රපට නිර්මාණවලින් පිටපත් රචනය, අධ්යක්ෂණය අංශ යටතේ ජාත්යන්තර ඇගයුම් ලබා ගන්න මට හැකි වුණා. හිතුවට වඩා අඩු වයසකින් මාධ්ය ක්ෂේත්රයට පිවිසෙන්න හැකියාව ලැබුණු එකට මං සතුටුයි.
මේ වෙද්දි පාසල්වල පවත්වන මාධ්ය දිනයන් හා සමගාමී තරගවල විනිසුරුවෙකු ලෙස සහභාගි වෙනවා. “පොඩ්ඩන්ට මීඩියා” කියලා මාධ්ය ක්ෂේත්රයට පිවිසෙන්න කැමැත්තෙන් ඉන්න දරුවන්ට මම ප්රායෝගික අත්දැකීම් ලබා දෙන වැඩසටහනක් කරගෙන යනවා. ගීත රූප රචනා, වාර්තා වැඩසටහන්, අලෙවි ප්රවර්ධන වීඩියෝ වගේ වැඩ නිවේදනයට අමතරව මම කරගෙන යනවා. ඉදිරියේදි ටෙලි ෆිල්ම් එකක් කරන්න බලාපොරොත්තු වෙනවා.
මේ වෙලාවේ විශේෂයෙන් මතක් කරන්න ඕන ජාතික රූපවාහිනියේ වැඩසටහන් නිෂ්පාදක උපතිස්ස පී. නිශ්ශංක මහතාව. ඔහු තමයි ජාතික රූපවාහිනිය හරහා මාව ඔසවා තබන්න මූලික වුණේ.
කුමුදිකා ඩී. සපුතන්ත්රී
