පහුගිය දිනවල ලකී, බන්ධුක වගේ විවිධ නම්වලින් පෙනී හිටිය ෆෙරී මේ දිනවල චලිඳු අයියා වෙලා. ඇත්තටම මොකක්ද මේ වෙස් පෙරළිය?
චලිඳු අයියගෙ චරිතයට මට ආරාධනා ලැබෙන්නේ තිමිර අයියගෙන්. සිහිනෙක තනිවෙලා ටෙලි නාට්යයේ තිරපිටපත ලියන්නෙ තිමිර උඩලමත්ත. මීට කලිනුත් තිමිර අයියා මට ඔහුගේ ටෙලි නිර්මාණ කිහිපයකටම ආරාධනා කළත් කාර්යබහුලත්වය නිසා මට සම්බන්ධ වෙන්න බැරි වුණා. මුලින්ම මං ඔහුත් එක්ක සම්බන්ධ වෙන්නේ හිරිපොද වැස්සට. හිරිපොද වැස්ස බන්ධුක කියන චරිතය ගොඩක් ජනප්රිය වුණු නිසාම ඔහුගේ අලුත් ටෙලි නිර්මාණයේ චරිතයකුත් මං වෙනුවෙන්ම ලියවිලා තිබුණා. මගෙන් ඇහුවේ කැමතිද කියල විතරයි. මං දෙපාරක් නොහිතාම චලිඳුට කැමැත්ත දුන්නා.
චලිඳු කියන්නේ කොමඩි චරිතයක් බව දැනගෙන හිටියද?
අධ්යක්ෂ හසිත රාජපක්ෂ අයිය මට කතා කරලා කිව්වා මේක සීරියස් කොමඩි චරිතයක්. මෙහෙමයි සිද්ධ වෙන්න ඕන කියලා. කොහොමත් මං හිරිපොද වැස්සෙත් කළේ සීරියස් කොමඩි චරිතයක්. ඒ නිසා ඒක ලොකු ගැටලුවක් වුණෙත් නැහැ. දැන් නම් චරිතය හොඳටම අල්ලගෙන තියෙන්නේ. නිකිණි කුසුම් ලකී වුණත් මුලින්ම කොමඩි කැරැක්ටර් එකක් වගේ තමයි ප්ලේ වුණේ. පස්සෙයි සීරියස් වුණේ.
ඒ කියන්නෙ ෆෙරී ඉදිරියට කොමඩි චරිතයක්ම වෙයිද?
ඒ බය නම් මටත් තියෙනවා. මොකද දැන් මාත් කොමඩි පැත්තේ අයිකන් එකක් වීගෙන එනව කියන එක මටත් දැනිලා තියෙනවා. සීරියස් කොමඩි කියන එක හැමෝටම කරන්නත් බැහැ. ප්රේක්ෂකයනුත් දැන් මාව කොමඩි චරිතයක් විදිහට පිළිඅරන් කියන එක ප්රතිචාරවලින්ම පැහැදිලි වෙනවා. ඒත් මං කැමැති එකිනෙකට වෙනස් චරිත කරන්න. ඉස්සරත් මං එහෙම චරිත කරලා තියෙනවා. තුෂාර තෙන්නකෝන්ගේ හේල්යන් ටෙලි නිර්මාණයේ ගුරුළු කියන්නෙ ඒ වගේ චරිතයක්.
ප්රතිචාර කොහොමද?
ප්රතිචාර ඉතාම හොඳයි. තාමත් බොහෝ දෙනෙක් කතා කරන්නේ නිකිණි කුසුම් ටෙලි නිර්මාණය ගැන. ඒකෙදි මට රංගනය කියන එක හැම පැත්තකින්ම පෙන්නන්න පුළුවන් වුණා. කොමඩි චරිතයක් වුණා. සීරියස් වුණා. පිස්සෙක් විදිහට හිටියා. ප්රේමවන්තයෙක් වුණා. ඒ වගේ පැතිකඩ කිහිපයකින්ම ප්රේක්ෂකයාට ළංවෙන්න පුළුවන් වුණා. ඒක ගැන තමයි ගොඩක්ම කතා වෙන්නේ. ඒක මං ගොඩක් අත්දැකීම් ලබපු නිර්මාණයක්. ගොඩක්ම බලල තියෙන්නෙ වැඩිහිටි පිරිස. හිරිපොද වැස්සට ගොඩක් දුරට ආකර්ෂණය වෙලා ඉන්නේ තරුණ පිරිස. එතකොට හේල්යන් ගත්තොත් පුංචිම ළමයි තමයි ගොඩක්ම ආස වුණේ. අවුරුදු පහළොවෙන් පහළ වගේ ළමයින්ගෙන් තමයි ගොඩක්ම ප්රතිචාර ලැබුණේ.
මේ දිනවල ෆෙරීගේ ප්රතිරූපය වෙනස්ම කරන චලිඳු ගැන කතා කළොත්?
චලිඳුගේ චරිතය ඉදිරියට ගලාගෙන යන්නේ විලන් කෙනෙක් විදිහට. ඒක එහෙම වෙන්නෙත් ආදරය නිසාම තමයි. ආදරවන්තයයි ආදරවන්තියයි අතරට එන නිසා තමයි ඔහු විලන් කෙනෙක් වෙන්නේ. ඒකෙ මට තිබුණු ප්රධාන අභියෝගය වුණේ කොමඩි විදිහට ඉඳන් කොහොමද නිකී බබාව ලබාගන්නේ කියන එක. මේ දවස්වල නිකී බබාව ලබාගන්න තමයි උප්පරවැට්ටි දාන්නේ. ඒ වගේම මේ කතාවෙන් සමාජයට යම්කිසි පණිවුඩයකුත් දෙනවා. පහුගිය දවස්වල ලංකාවෙත් ලොකු ගැටලුවක් බවට පත්වෙලා තිබුණු පිරමිඩ ජාවාරම ගැනත් කතාබහට ලක් කරනවා. චලිඳුගේ තාත්තා කපටි වුණාට චලිඳුට තියෙන්නේ මෝඩ කපටිකමක්. තාත්තාගේ උපදෙස් විදිහට වැඩ කරලා නිකීගේ තාත්තව පිරමිඩ ජාවාරමේ පටලලා කොහොම හරි නිකී බබාව අල්ලගන්න තමයි ප්ලෑන් කරන්නේ. මේ වගේ දේවල් මේ සමාජයේ වෙලා තියෙනවා. ඒකම වෙන්න ඇති තිමිර අයියා මේ වගේ එකක් ලියන්න ඇත්තෙත්.
ඔබ දායක වන හැම චරිතයකින්ම ප්රේක්ෂකයන්ගේ මතකයේ රැඳෙන්න දෙයක් ඉතිරි කරනවා නේද?
ඔව්. එහෙම දෙයක් තියෙනවා. මගේ චරිත හරහා කියන දෙයකින් බලන ඕනෙම කෙනෙකුට ඒ චරිතය මතකෙ හිටිනවා. ‘හිරිපොද වැස්ස’ ගත්තොත් කමෙන්ට්ස්වල තියෙන්නෙම මාරම ලස්සනයි කියන කෑල්ල. ඒක බන්ධුකගෙ චරිතයේ අනන්යතාව වගේ. හැමෝම ඒක පාවිච්චි කරනවා. සිහිනෙක තනිවෙලා ගත්තොත් චලිඳුගේ කටේ නිතරම තියෙන්නේ නික්කි බබා පව් අම්මෙ කියලා.
ඒ කියන්නෙ චලිඳු කියන්නෙ ඔබට ඇත්තටම අභියෝගයක් වුණු චරිතයක්?
ඒක අභියෝගයක් කියනවට වඩා මං කැමැතියි චලිඳු කියන්නෙ මට ගොඩක් දේවල් ඉගෙන ගන්න ලැබුණු චරිතයක් කියනවට. බොහෝ නිර්මාණවල එක දිගට චරිතය ගලාගෙන යනවා අඩුයි. එක දිගටම ෂූට් වෙනවා අඩුයි. නමුත් මේ නිර්මාණය තුළ මං දැක්ක විශේෂත්වය තමයි චරිතය එක දිගට ගලාගෙන යනවා. ඒක මට අලුත් අත්දැකීමක් වුණා. ඒ හරහා මට ඉගෙන ගන්න ගොඩක් දේවල් තිබුණා. අනිත් කාරණය තමයි එක දිගටම මේන් රෝල් කරන්න ලැබෙන චාන්ස් එක අඩුයිනේ. මට දිගටම අවස්ථා ලැබුණා. තිමිර අයියට මං විශේෂයෙන්ම ස්තුතිවන්ත වෙනවා මාව මේකට තෝරගත්ත එකට.
ෆෙරීගේ ඉදිරි නිර්මාණ ගැනත් කතා කරමු?
තව අලුත් වැඩ දෙකක් පටන් ගන්නවා. ප්රභාත් රෝෂන්ගේ සහ තුෂාර තෙන්නකෝන්ගේ. තවත් එකකට ආරාධනා ලැබිල තියෙනවා. ඉදිරියේදී මං රංගනයෙන් දායක වුණු ක්රිෂ් ඇන්තනීගේ ‘අන්ලොක්’ ෆිල්ම් එක තිරගත වෙන්න තියෙනවා. නිකිණි කුසුම් එකේ ලකී නිසා තමයි මට ඒ සිනමාපටයට ආරාධනාව ලැබුණේ. මොනර කිරිල්ලී එකත් එන්න තියෙනවා. ඒක මගේ පළමුවැනි සිනමා අත්දැකීම. නමුත් ඊට කලින් අන්ලොක් තිරගත වීමට නියමිතයි.
