දුමී වන්නිආරච්චි ප්රේක්ෂක ඔබට මුලින්ම හමුවන්නේ සංගීතේ ටෙලි නිර්මාණයේ කටකාර තුෂාරිගේ භූමිකාවෙනි. 4චූන් RESIDENCYහි තාරා, තත්පරයක් දෙන්න බන්ටී මෙන්ම ‘ද ලේක්’හි මානසික රෝගී චරිතය ද පුංචි තිරය මත ඇයගේ ප්රබලම රංගනයන් ලෙස පෙන්වා දිය හැකිය. මේ දිනවල රූගත කෙරෙන දොරකඩ දෙවොල ඇයගේ සිතැඟිවලට අනුකූලව රංගනයේ යෙදීමට ලැබුණු අභියෝගාත්මක අවස්ථාවකි. ජයන්ත චන්ද්රසිරිගේ ‘දේවි කුසුමාසන’ සිනමාපටය ඔස්සේ සිනමාවට පිවිසි දුමී සංජය නිර්මාල්ගේ නවතම සිනමාපටය ඔස්සේ මේ දිනවල සිය සිනමා රංගනය ද අභියෝගයකට ලක්කරමින් සිටින්නීය.
දුමී මේ දවස්වල දම් රැජිනිත් එක්ක මොකද කරන්නේ?
මේ දිනවල දම් රැජිනිත් එක්ක සංජය නිර්මාල්ගේ නග්න චිත්රපටයේ රූගත කිරීම්වලට සම්බන්ධ වෙලා ඉන්නවා. ප්රධාන චරිත තුනක් ඔස්සේ කතාව ගලාගෙන යනවා. මම, නිසල, සේමිණී අක්කා. ද ලේක් එකෙන් පස්සේ නැවතත් සේමිණී අක්කා එක්ක සම්බන්ධ වෙන්න ලැබුණා. දම් රැජිනි බස් රථය කියන්නෙත් මේකෙ ප්රධාන චරිතයක්. සංජය සර් ඉතින් හැමදාම වෙනස්ම දෙයක් කරන කෙනෙක්නේ. අනිවාර්යයෙන්ම ‘නග්න’ බොහෝ දෙනාගේ කතාබහට ලක්වන චිත්රපටයක් බවට පත්වේවි.
මේ ඔබේ දෙවැනි සිනමා අත්දැකීම. කොහොමද ආරාධනා ලැබෙන්නේ?
පළමුවැනි අත්දැකීම ලබන්නේ විශ්වවිද්යාලයක් වගේ අධ්යක්ෂවරයෙක් වන ජයන්ත චන්ද්රසිරි සර්ගේ දේවි කුසුමාසන චිත්රපටයෙන්. ඒ වගේ කෙනෙක්ගෙන් මූලික අඩිතාලම වැටෙනවා කියන්නෙම වාසනාවක්. ඒක ලොකු පිරිසක් එක්ක මාස තුනක විතර කාලයක් ගත කළ ලොකු ප්රඩක්ට් එකක්. නග්න කියන්නෙ ඊට හාත්පසින්ම වෙනස් දින කිහිපයක් ඇතුළත රූගත කෙරුණු සිනමාපටයක්. ඒ වගේම ලොකු අභියෝගවලට මුහුණ දුන් නිර්මාණයක්. සංජය නිර්මාල් කියන්නේ මං ගොඩක්ම කැමැති අධ්යක්ෂවරයෙක්. ඔහුගේ සංසාරණ්යයේ දඩයක්කාරයා ටෙලි නිර්මාණය මං හරිම ආසාවෙන් බැලුවා. එදා ඉඳන්මයි මං ඔහුත් එක්ක වැඩ කරන්න ආසාවෙන් හිටියේ. ඔහුගෙන් මට ආරාධනාව ලැබෙන්නේ මේකට නෙවෙයි. ඔහුගේ වෙනත් චිත්රපටයකට. අපි කතාබහ කරගෙන යද්දි ඒකට කලින් මේ චිත්රපටය කරන්න ඕන කියන අදහස ඔහුට ඇවිල්ලා තිබුණා. ඒ විදිහට තමයි මට මේ චිත්රපටයට සම්බන්ධ වෙන්න ලැබෙන්නේ.
නග්න ඔබට ලොකු අභියෝගයක් වුණා කියලත් ආරංචියි?
ඔව්. ඒක ලොකු අභියෝගාත්මක චරිතයක්. මමයි අම්මයි තාත්තයි තුන්දෙනාම ගෙන්නලා සංජය සර් චරිතය ගැන පැහැදිලි කළා. මේක ප්රධාන චරිතය මෙන්න මේ වගේ එකක් තමයි කරන්න තියෙන්නෙ, කැමතිද කියල ඇහුවා. ඒ වෙලාවෙ නම් මට පොඩි චකිතයක් ඇති වුණා. මොකද මේක මගේ ශානරය ඇතුළේ ලොකු අභියෝගයක්. මගේ අම්මයි තාත්තයි අයියලා දෙන්නයි එතනදි මාව දිරිමත් කළා. ඔයා කරන්නෙ කැරැක්ටර් එකක්. අනික ඔයා ඉගෙන ගත්තෙ ඩිග්රිය කළේ රංගනය පැත්තෙන්. ඒ නිසා ඔයා මේක භාරගන්න කියල ඔවුන් හැමෝම කිවුවා. අධ්යක්ෂවරයාගෙන් වගේම නිසලගෙනුත් මට ලොකු සහායක් ලැබුණා. නිසල කියන්නෙත් ගොඩක් දක්ෂ හරිම සපෝටිව් කෙනෙක්. මගේ චරිතය සාර්ථක කරගන්න ඔහු ගොඩක් උදවු කළා. සේමිණී අක්කගෙන් ලැබුණු සහායත් උපරිමයි. ඒ හැමෝගෙම සහායෙන් මං ඒ චරිතයට සාධාරණයක් කළා කියල හිතනවා.
ඉරගිනි මද්දහන අධ්යක්ෂවරයාගේ අලුත්ම නිර්මාණයටත් ඔබට ආරාධනා ලැබෙනවා. ඒ අත්දැකීම කොහොමද?
ඇත්තම කිවුවොත් මං අභියෝගාත්මක චරිත රඟපාන්න පටන් ගත්තෙ ලලිත් රෝහිත අයියගේ දොරකඩ දෙවොල ටෙලි නිර්මාණයෙන්. ඒකට මාව යෝජනා කරල තිබුණේ වියළි අධ්යක්ෂ චන්දන ඉරුගල්බණ්ඩාර අයියා සහ සහාය අධ්යක්ෂ ප්රියන්ත ශ්රී. මං ඔවුන්ට ගොඩක් ස්තුතිවන්ත වෙනවා. ඒ පරිසරය, ජීවන රටාව, වචන උච්චාරණය ඇත්තටම මට ලොකු අභියෝගයක් වුණා. මගේ කටහඬ පවා ග්රාමීය පරිසරයට ගැළපුණේ නැහැ. ඒත් ලලිත් අයියා ලොකු රිස්ක් එකක් අරගෙන මාව විශ්වාස කරලා මාව තෝරාගැනීම ගැන ගොඩක් ස්තුතිවන්ත වෙනවා.
ඒ චරිතය ගැන කතා කරනවා නම්?
ඒ චරිතය හරිම ආවේගශීලී, ආදරය ගොඩක් බලාපොරොත්තු වන ඇතුළතින් හරියට විඳවන ගැහැනියකගේ චරිතයක්. කෝපවෙන කෑගහන, රණ්ඩුවෙන චරිතයක්. මං ගෙදර ඇවිල්ලත් ඒ විදිහටම හැසිරෙන වෙලාවල් තිබුණා. චරිතය සාර්ථක කරගන්න දසුන් පතිරණ අයියගෙනුත් ලොකු සහායක් ලැබුණා. අනෙක් විශේෂම කාරණය තමයි ඒක උඩරට පාරම්පරික නර්තන ශිල්පිනියකගේ චරිතයක්. මගේ ජීවිතේට ගොඩක් සමීපයි. මං පුංචි කාලෙ ඉඳන්ම උඩරට නර්තනය හදාරපු විශ්වවිද්යාලයේත් විෂයක් විදිහට හදාරපු කෙනෙක්. මගේ හැකියාව නිර්මාණයක් තුළට ගෙන යන්න හැකිවීම ගැන මට ගොඩක් සතුටුයි. මහාචාර්ය මුදියන්සේ දිසානායක සහ නිෂාදිනී රත්නායක කියන මගේ ගුරුවරු දෙන්නව මං ගෞරවයෙන් මතක් කරනවා. ඒ නිසා ආත්මීය චරිතයක් විදිහට මට ඒක කරන්න පුළුවන් වුණා.
ද ලේක් කියන්නෙත් ඔබේ වෙනස්ම පැතිකඩක්?
ඔව්. ධනුෂ්ක රේමන්ගේ ලංකාවේ ටෙලිවිෂනය වෙනස් කළ නිර්මාණයක්. සයිකොලොජි ත්රිලර් ශානරයේ නිර්මාණයක් ලංකාව ඇතුළෙ කෙරුණු පළමු අවස්ථාව. ඩුවල් පර්සනල් ඩිසෝඩර් කියන මනෝ ආබාධය තියෙන දරුවෙක්. රන්දි සහ රංගම්මා කියන්නේ එකම චරිතයේ පැතිකඩ දෙකක්. මේක ද්විත්ව චරිතයක් නෙවෙයි. මං වැඩිපුරම හෝම්වර්ක් කළ චරිතය කිවුවත් හරි. දමිළ භාෂාව හැදෑරීම වගේම මෙම රෝගය ගැන මට ලොකු අධ්යයනයක් කරන්න වුණා. ඒත් ලැබෙන ප්රතිචාර දිහා බැලුවම මං සාර්ථකයි කියල හිතෙනවා.
දුමී වන්නිආරච්චි කියන්නේ හරිම වාසනාවන්ත නිළියක් කියල කිවුවොත් මොකද හිතෙන්නේ?
ඇත්තටම ඔව්. විශ්වවිද්යාලයේ අවසන් අවුරුද්ද පටන් ගනිද්දි ද ලේක් පළමු අදියරයි දේවි කුසුමාසන සිනමාපටයයි ඉවර කරල තිබුණේ. අවසන් වසරේ විභාග කටයුතු නිසා අවුරුද්දක් විතරම මං කිසිම නිර්මාණයකට සම්බන්ධ නොවී රංගනයෙන් ඈත්වෙලා හිටියා. වසර අවසන් වෙද්දි කරපු නිර්මාණ දෙකම එළියට ආවා. ඒ නිසා නිහැඬියාව ගැටලුවක් නොවී ආයාසයකින් තොරවම මට හොඳ අභියෝගාත්මක චරිතවලට අවස්ථා ගොඩක් ලැබුණා. ඒ අතින් මං හරිම වාසනාවන්තයි.
