පහේ ළමයි සමඟ ඉන්න රෂිනි ටීචර්ට අද ලොකු – කුඩා සැමගේ ආදරය ලැබෙමින් තිබේ. කුඩා දරුවන්ට ආදරය, දක්වන, දරුවන්ගේ ආදරය නොමඳව ලබන, ‘රෂිනි ටිචර්’ ලෙස කාගේත් සිත් ඇදගන්නා සුලු රංගනයක ශේෂාද්රි ප්රියසාද් නිරත වන්නීය. ශාන් ජයරත්න අධ්යක්ෂණය කළ ‘පහේ ළමයි’ ටෙලිනාට්යයේ ප්රධාන චරිතය වන රෂිනි ටීචර් ගැන කතාකරන්නට ශේෂාද්රි ප්රියසාද් මෙසේ ‘රසඳුන’ හා එක්වූවාය.
‘’මේ දවස්වල ‘පහේ ළමයි’ එක්කයි කාලය ගතකරන්නේ. රෂිනි ටීචර්ට ඉතා හොඳ ප්රතිචාර ලැබෙනවා. රෂිනි කියන්නේ හරිම ආදරණීය ගුරුවරියක්. ප්රාථමික පන්තිවලට උගන්වන ගුරුවරියන් දරුවන්ට බොහෝ ආදරය දක්වනවා. රෂිනි ටීචර්ත් ඒවගේ.
හැබැයි, එක ළමයෙක් නිසා රෂිනිගේ චරිතයට යම් බලපෑමක් ඇතිවෙනවා. මේ චරිතයට අදාළව වෙනම ආදර කතාවකුත් ගලාගෙන යනවා. ඒ හැමදෙයක්ම ටෙලිනාට්යයේ ඉදිරි කොටස්වලදී දකින්න පුළුවන්. අධ්යක්ෂ ශාන් ජයරත්න තමයි මට මේ චරිතයට ආරාධනා කරන්නේ. කතාව සහ මගේ චරිතය ගැන ශාන් මනා පැහැදිලි කිරීමක් කළා. කතාව ගලායන විදිහ අනුවත් මට සමීප චරිතයක් නිසාත් මේකට ආස හිතුණා”
කුඩා දරුවන් සමඟ වැඩ කිරීමේදී ඇයට දැනුණු හැඟීම ප්රකාශ කළේ ඇයත් කලක් ගුරුවරියකගේ භූමිකාවේ නිරතව සිටි බව ද සිහිකරමිනි.
“ළමයි එක්ක වැඩකරන්න මම හරි ආසයි. සමහරු හිතනවා ළමයි පාලනය කරන්න අපහසු වෙයි කියලා. එහෙම නැහැ. මමත් කාලයක් ගුරුවරියක් ලෙස වැඩ කළා. එහිදී දැනුණු දෙයක් තමයි දරුවන් එක්ක වැඩ කිරීම ‘තෙරපි’ එකක් වගේ කියලා. ඔවුන්ගේ ලෝකයට අපිත් යනවා වගේ හැඟීමක් දැනුණා. දැන් ළමයි හැම අතින්ම දක්ෂයි. එයාලා සමඟ වැඩ කරන්න හරිම ලේසියි”
‘පහේ ළමයි’ ටෙලියේ ශේෂාද්රි සමඟ ප්රධාන චරිතය රඟනුයේ රොෂාන් රණවනයි. ඔහු සමඟ රංගනයේ යෙදීම ගැනද ඇය කතා කළාය.
” රෂිනි චරිතය රඟපාද්දී රොෂාන් අයියා උපරිම සහයෝගයක් දෙනවා. ඔහු කලා ලොවේ සිටින නිහතමානී, විනයගරුක, කාටත් ගරු කරන රංගන ශිල්පියෙක්. ඒ ගුණාංග එදා වගේම අදත් එහෙමයි. මීට වසර ගණනාවකට පෙර උදයකාන්ත වර්ණසූරිය මහතාගේ ‘චැලේන්ජස්’ චිත්රපටයේ මම රොෂාන් අයියා එක්ක රඟපෑවා. ‘පහේ ළමයි’ ටෙලිනාට්යයේදී පවා චරිතයට අදාළ වෙනස්කම් පවා ඔහු එක්ක කතාකර වෙනස් කරගන්න පුළුවන් ”
ශාන් ජයරත්න ‘පහේ ළමයි’ අධ්යක්ෂවරයාය. ඔහු සමඟ ශේෂාද්රි කටයුතු කරන ප්රථම අවස්ථාව ද මෙයයි.
” ශාන් මටත් වඩා වයසින් බාලයි. ඒත් දක්ෂ අධ්යක්ෂවරයෙක්. අධ්යක්ෂණයේදී ප්රවීණ මට්ටමේ අධ්යක්ෂවරයෙක් ලෙස ක්රියා කරන්නේ. චරිතයේ යම් වෙනස්කම් කරගන්න උපරිම නිදහස දීලා තියෙන්නේ. ශාන් අධ්යක්ෂණය කළ ‘වීදුරු තිර’ මම ආසාවෙන් නැරඹුවා. ‘පහේ ළමයි’ කියන්නේ ශාන්ගේ හොඳ අධ්යක්ෂණයක්.”
ශේෂාද්රි පුංචිතිරය හා මෙවර එක්වනුයේ බොහෝ කලකට පසුවය. 2021දී පමණ අවසන් වරට ටෙලි රංගනයේ යෙදුණද මවු පදවිය ලැබීමත් සමඟ රංගනයට විරාමයක් තැබීමට ඇයට සිදුවූවාය. එකී කාලපරාසය තුළ ශේෂාද්රි සිනමා නිර්මාණයකට හෝ ටෙලි නිර්මාණයකට දායක නොවූ අතර, ලබන වසර මුලදී නවතම චිත්රපටයක දායකවීමට බලාපොරොත්තුවෙන් සිටින්නීය.
කුඩා කල සිටම සිනමාවට, කලාවට ළැදි පරිසරයක් ඇගේ නිවෙස තුළ විය. කලාව ඇයට එකල සිටම ආගන්තුක නොවීය.
” කුඩා කාලයේ ඉඳන්ම මම දැක්කේ අපේ ගෙදරට තාත්තිගේ යාළුවෝ විදිහට කලා ක්ෂේත්රයට සම්බන්ධ අය පැමිණීමයි. ඔවුන් මට ඒ දවස්වල ඉඳන්ම හුරුපුරුදුයි. ඉස්සර ඉඳන්ම නිළියක් වෙන්න ආසාව මට තිබ්බා. චූටි කාලයේ මම සාරි පටලවගෙන ගෙදර රඟපෑවා. මට ගමනක් යන්න තියෙන මාර්ගය ඒක තමයි කියා සිතනවා”
අද වෙද්දී සිනමාවේ යම් සුබවාදී තත්ත්වයක් දක්නට ලැබෙන බව ඇයගේ මතයයි.
” පසුගිය කාලයේ හොඳ චිත්රපට රැසක්ම තිරගත වුණා. House Full වෙන චිත්රපට දකිද්දි හරිම සතුටුයි. එතකොට මගේ ඇඟට මාරම ශක්තියක් එනවා, අපේ සිනමාව හොඳ තැනක තියෙනවා නේද කියා සිතෙනවා. එසේම ඉස්සර චිත්රපට රූගත කර තිරගත වෙන්න කාලයක් ගියා. අද වෙද්දි චිත්රපට රූගත කර වසරෙන් දෙකෙන් පෙන්වනවා. ඒ වගේම ප්රවීණ – නවක ශිල්පීන්ගේ ද හොඳ දායකත්වයක් සිනමාවට තිබෙනවා. ඒකත් හොඳ තත්ත්වයක්. ”
නිර්මාණයකට ආරාධනා ලද විට චරිතය කවරාකාරද යන්නත්, තම සීමාවලින් එහාට යන දෙයක් වෙතොත් අධ්යක්ෂවරයා සමඟ සාකච්ඡා කර විසඳුම් ලබාගන්නා බවත්, නිර්මාණයට දායක වන අධ්යක්ෂ ඇතුළු අනෙක් රංගන ශිල්පීන් පිළිබඳ සොයා බලන බවත් පැවසූ ශේෂාද්රි, සිය සොහොයුරියන් දෙදෙනා වන ඩිනක්ෂි ප්රියසාද් සහ ශනුද්රි ප්රියසාද් ගැනත් සිය අදහස් මෙසේ පළ කළාය.
” අක්කියි නංගියි දෙන්නම ජනප්රිය රංගන ශිල්පිනියන්. මටත් වඩා ඒ දෙන්නට ප්රේක්ෂකයෝ ආදරය කරනවා. අපි තිදෙනාගේ රංගනය ගැනත්, විශේෂත්වය ගැනත් ප්රේක්ෂකයා තීරණය කරාවි. එක් එක්කෙනා දකින කෝණය වෙනස්නේ. අක්කි රංගනයට වගේම අනෙකුත් කලා අංශයන්ට මටත් වඩා දක්ෂයි. නංගි වයසට වඩා බොහෝ අත්දැකීම්වලට මුහුණදුන් කෙනෙක්. ඒ විදිහට අක්කිගෙයි නංගිගෙයි විශේෂත්වයන් මම දකිනවා.”
රංගන කටයුතුවලදී සිය සැමියා ලබාදෙන සහයෝගය ගැන කීමටද ශේෂාද්රි අමතක නොකළාය.
“හස්බන්ඩ්ගේ සහාය නොලැබුණානම් මට මේවා කරන්න ලැබෙන්නේ නැහැ. ‘පහේ ළමයි’ට ආරාධනා ආවම ඔහු කිව්වේ “ෂා, නියමයි, ටීචර් කෙනෙක්නේ” කියලා. ඔහු කවදාවත් මගේ රංගනයට තහංචි දමා නැහැ. මට නිදහස දී තිබෙනවා. ටෙලිනාට්යයත් මාත් එක්කම නරඹනවා. එවේලේම කෙළින්ම මුහුණටම Comment එක දෙනවා. මම ෂූටින් ගියාම බබා බලාගන්න රාජකාරිය උපරිමයෙන් කර දෙනවා. එවැනි සැමියෙක් ලබන්න මම වාසනාවන්තයි. ඔහු ගැන මට ආඩම්බරයි..”
