කොහොමද මේ දවස්වල ජීවිතේ?
වෙනසක් නැහැ. සතුටින් ඉන්නවා.
ඔබ මේ දවස්වල ප්රේක්ෂකයන් අතරට එන්නේ හිද්දලයෝ ටෙලි නාට්යයෙන්. ඒ ගැන මොකද හිතෙන්නේ?
ඔව්. මම හිද්දලයෝ ටෙලි නිර්මාණයට සම්බන්ධ වෙලා ඉන්නවා. මගේ චරිතය ගැන හොඳින්ම එහිදී දැකගන්න පුළුවන්.
බත්තම්මා චරිතය ගැන කතා කළොත්?
හිද්දලයෝහි මගේ චරිතය බත්තම්මා. සාමාන්යයෙන් බත්තම්මා කියලා කියන්නේ පවුලට හරිම ළෙන්ගතු, හැමෝවම ආදරයෙන් බලා ගන්න, පවුලට හරිම හිතවත් කෙනෙක්. ඉතින් ඒ චරිතය මට දැනුණේ හරිම ළෙන්ගතු පවුලට ගොඩක්ම ළැදි චරිතයක් විදිහටම තමයි.
ඓතිහාසික පසුබිමක් තුළ නිර්මාණය වුණු ටෙලි නාට්යයක් නිසා විශේෂ සූදානම් වීමක් වුණාද?
ඓතිහාසික පසුබිමක් තුළ නිර්මාණය වුණු ටෙලි නාට්යයක් නිසා යම්තාක් දුරකට අභියෝගයක් වුණා. මොකද භාෂා ව්යවහාරය අපි කතා කරන භාෂාවට වඩා ටිකක් වෙනස්. ඒ වගේම තමයි tone එකත් වෙනස්. මුලින් ටිකක් අමාරු වුණා. හොඳ සූදානමකින් යුතුව තමයි මං බත්තම්මාගේ චරිතය නිරූපණය කරන්න ලෑස්ති වුණේ.
රූගත කිරීමේ දී සිදු වුණු දුෂ්කර හෝ අභියෝග අවස්ථාවන් ගැන කිව්වොත්?
කොළඹින් බැහැර සුන්දර ස්ථානවල තමයි රූගත කරන්නේ. ඒ පරිසරය හරිම ලස්සනයි. හරිම සීතලයි. අපි හැමෝම හරිම එකමුතුවෙන් වැඩ කරන්නේ. හැමෝම එකමුතු වුණොත් ඕනෙම දෙයක් ජයග්රහණය කරන්න පුළුවන්. ඉතින් හැමෝගෙම උත්සාහයෙන්, එකමුතුවෙන් ලස්සනට වැඩේ කරගෙන යනවා.
අධ්යක්ෂකවරයාගෙන් වගේම අනෙක් රංගන ශිල්පීන්ගෙන් ඔබට ලැබුණු සහයෝගය කොහොමද?
අධ්යක්ෂ රනිල් අයියා මතක් කරන්නම ඕන. ඔහුගෙන් වගේම අනෙකුත් රංගන ශිල්පීන්ගෙන් ශිල්පිනියන්ගෙන් ලොකු සහයෝගයක් ලැබුණා බත්තම්මාගේ චරිතය නිරූපණය කරන්න. ඒ වගේම අනෙකුත් කලා ශිල්පීන් හැමෝගෙන්මත් ලොකු සහයෝගයක් ලැබෙනවා.
ඔබ එකිනෙකට වෙනස් චරිත රඟපාන කෙනෙක්. අභියෝග වුණු චරිත තියෙනවද?
මම ගොඩක් කැමතියි එකිනෙකට වෙනස් චරිත රඟපාන්න. මං කරපු චරිත අතරින් ඇත්තටම මට අභියෝගයක් වුණ චරිතය තමයි ගරුඩ මුහුර්තයේ බිළිඳුගේ චරිතය. ඒකෙ භාෂාව වෙනස්. උඩරටට ආවේණික භාෂාවක්. කතා කරන භාෂාව වෙනස් නිසා ටිකක් අමාරු වුණා චරිතය කරන්න. ඒ චරිතය කාල පරාසයන් තුනකට විතර දිවගියා. මම අම්මලත් එක්ක ගෙදරට වෙලා සතුටින් ඉන්න කාලේ, බැඳලා ගියාට පස්සේ කාලෙ සහ බබාලා හම්බ වුණාට පස්සේ මම ඉන්න විදිහ කියන කාල පරාස තුනක මගේ චරිතය දිවගියා. ඒ නිසා ඒ චරිතය තමා මට ලොකුවටම අභියෝගයක් වුණු චරිතය.
ඉදිරියේ දී රඟපෑමට ආසාවෙන් ඉන්න චරිත තියෙනවද?
ඔව්. පෙම්වතියගේ චරිතයටම කොටු වෙන්නේ නැතුව වෙනස් චරිත කරන්න මං කැමතියි. ‘මේකප්‘ ගොඩක් දාගෙන ඉන්නවට වැඩිය වෙනස් චරිත කරන්න කැමතියි. මොකද ඒ චරිතවල කරන්න දෙයක් තියෙනවා. අන්ධ කෙනෙක්ගේ හරි යාචකයෙක්ගේ හරි චරිතයක් ගත්තොත් අපිට කරන්න දේවල් වැඩියි. සාමාන්ය ජීවිතයේ පෙම්වතියකගේ චරිතයක් ගත්තොත් අපි සාමාන්යයෙන් කතා කරන විදිහටනේ කතා කරන්නේ. වෙනස් චරිතයකදි ඒ චරිතය අධ්යයනය කරන්න ඕන. අධ්යයනයක් කරන්නේ නැතුව කරන්න අමාරුයි. ඉතින් මම ආසයි ඒ වගේ චරිතයක් කරන්න.
ආලෝකාට ආදරය කරන ප්රේක්ෂකයන්ට මොකක්ද කියන්න තියෙන්නේ?
ලස්සන නිර්මාණ ඉදිරියට එන්න තියෙනවා. ඒ නිසා දිගටම මාත් එක්ක ඉන්න කියලා තමයි කියන්න තියෙන්නේ. ඒවා බලලා හොඳ නරක, අඩුපාඩු කියන්න. මම හැමෝ එක්කම සුහදව කතාබහ කරලා ඉන්න කෙනෙක්. වෙනදා වගේම මාත් එක්ක ආදරෙන් ඉන්න කියලා තමයි කියන්න තියෙන්නේ.
ඉදිරියේ දී බලාපොරොත්තුවෙන් ඉන්න අලුත් වැඩ ගැනත් කියමුද?
මේ දවස්වල නම් හිද්දලයෝ ටෙලි නාට්යයත් එක්ක සම්බන්ධ වෙලා ඉන්නේ. ඒ වගේම තව කරපු නාට්ය කිහිපයක් එන්න තියෙනවා. ජනවාරිවල අලුත් ඩ්රාමා එකකට සම්බන්ධ වෙන්න බලාපොරොත්තුවෙන් ඉන්නවා.
අලුතින් එන්න ඉන්න නවක රංගන ශිල්පීන්ට කියන්න තියෙන්නේ මොකක්ද?
කලාව කියන්නේ හරිම හොද තැනක්. වෘත්තිමය විදිහට අපිට කරගෙන යන්න පුළුවන් හොඳම දෙයක්. කලාවට එනවනම් ඉගෙන ගෙන එන්න. ඉගෙන ගෙන ආවොත් මේකෙ පැවැත්මක් තියෙනවා. මොකද එක පාරින් පායලා එක පාරින් බැහැලා යන තරුවක් වෙන්නේ නැතුව දෙයක් ඉගෙන ගෙන ආවොත් අපිට කාලයක් මේ ක්ෂේත්රයේ රැඳී ඉන්න පුළුවන්. ප්රවීණයන්ට ගරු කරන්න පුරුදු වෙන්න. ඇත්තටම අපිට ප්රවීණයන්ගෙන් ගන්න දේවල් ගොඩක් තියෙනවා.