රිදී තිරයේ ප්රේක්ෂක ආකර්ෂණය දිනා ගත් 1981 වසරේ තිරගත වූ සේන සමරසිංහයන් අධ්යක්ෂණය කළ චංචල රේඛා සිනමාපටය ටෙලි නිර්මාණයක් ලෙසින් මේ දිනවල පුංචි තිරෙන් දැක ගන්නට ලැබෙනවා. ඒ හිරු නාලිකාව ඔස්සේ සමන් කුමාර ලියනගේගේ ටෙලි නිර්මාණයක් ලෙසින්. මෙහි එන චරිත අතරේ රූපිකා ලෙසින් ප්රේක්ෂකයන් අතරට එන්නේ අලුත්ම මුහුණක්. ඒ නිසාම ප්රේක්ෂක ඔබත් හොයනවා ඇති මේ රූපිකා කවුද කියලා. නිරූපණ ක්ෂේත්රයෙන් රංගනයට ආ ඇය තමයි ඩිෂානි ෂමීනා. රසඳුන මේ කතාබහ ඩිෂානි ෂමීනා සමඟ
ඩිෂානි ගැන හැඳින්වීමක් කළොත්?
මගේ නම විදාන හේනයලාගේ ඩිෂානි ෂමීනා. වයස අවුරුදු 22යි. උපන් ගම කළුතර. පාසල කළුතර ඥානෝදය ජාතික පාසල. පවුලේ විස්තර කිව්වොත් අප්පච්චියි අම්මයි මමයි මල්ලිලා දෙන්නයි ඉන්නේ.
කොහොමද කලාවට යොමු වෙන්නෙ?
කලාවට යොමු වෙන්නෙ 2024 හිරු අවුරුදු කුමරිය තරගයට සහභාගි වුණාට පස්සෙ. එතැනදී හිරු අවුරුදු කුමරිය 2024 තරගයෙන් අවසන් 7 දෙනා අතරට තේරුණා සහා දන්ත කල්යාණිය කුමරිය ලෙස උප කිරුළක් දිනා ගන්න මට හැකියාව ලැබුණා.
අවුරුදු කුමරි තරගයට ගියේ කලාවට යොමු වෙන්න තියෙන ආසාවටමද?
ඔව්. හිරු අවුරුදු කුමරිය තරගයට සහභාගි වුණේ කලාවට යොමු වෙන්න තිබුණ ආසාව නිසාමයි. චූටි කාලෙ ඉඳන්ම ලොකු ආසාවක්, හීනයක් තිබුණා දක්ෂ නිරූපණ ශිල්පිනියක් වගේම දක්ෂ රංගන ශිල්පිනියක් වෙන්න. ඒ නිසාම හිරු අවුරුදු කුමරිය තරගයට මම සහභාගි වුණා, මගේ අනාගත ගමනට ඒක ලොකු අවස්ථාවක් වෙයි කියන බලාපොරොත්තුවෙන්.
චංචල රේඛා රඟපෑමට අවස්ථාව ලැබෙන්නෙ කොහොමද?
චංචල රේඛා ටෙලි නාට්යට සම්බන්ධ වෙන්න අවස්ථාව ලැබුණෙ අපේ ආදරණීය ගුරු පියාණන් සමන් කුමාර මහත්මයා හරහා. විශේෂයෙන්ම ස්තුතිවන්ත වෙනවා සර්ට මේ අවස්ථාව මට ලබා දීම වෙනුවෙන්.
මොකද හිතුණේ ලැබුණු අවස්ථාව ගැන?
බොහොම සතුටුයි. ඒ වගේම ඒ අවස්ථාවෙන් මගේ චූටි කාලෙ ඉඳන් දැකපු හීනය ලස්සනට පාට කරගන්න බලාපොරොත්තු වෙනවා.
චංචල රේඛා හි ඔබ රූපිකා?
ඔව්. රූපිකා කියන්නේ චූටිගෙ හොඳම යාළුවා. චූටිට කරදරයක් වෙනවට අකමැති චූටි වෙනුවෙන් ඕනිම දේකට කතා කරන චූටිගෙ ප්රශ්න මගේ කරගෙන එයා වෙනුවෙන් සහෝදරියක් වගේ ඉන්න කෙනෙක්.
රඟපාන එක හිතුව තරම් ලේසිද?
රඟපාන එක නම් හිතුව තරම් ලේසි නැහැ, ඉගෙන ගන්න ගොඩක් දේවල් තියෙනවා. හැමදේම ඉගෙනගෙන ඉදිරියට යන්න බලාපොරොත්තු වෙනවා.
ප්රවීණයන් රැසක් එක්ක වැඩ කරද්දී ලැබෙන අත්දැකීම කොහොමද?
ප්රවීණයන් රැසක් එක්ක වැඩ කරද්දි ඇත්තටම අත්දැකීම් ගොඩක් ලැබෙනවා. ලොකු සහයෝගයක් ලැබෙනවා එයාලගෙන්, දන්නෙ නැති ගොඩක් දේවල් එයාලා කියලා දෙනවා හරිම ආදරෙන්. හරිම ආදරණීය ප්රවීණයන් රැසක් එක්ක තමයි මට මගේ පළමු ටෙලි නාට්යය රඟපාන්න අවස්ථාව ලැබුණේ ඒක මගේ ජීවිතේට ලොකු භාග්යක් ලෙස සලකනවා.
දිගටම රඟපාන්නද කැමැත්ත?
ඔව්. රංගන කටයුතු වගේම නිරූපණ කටයුතුත් කරගෙන ඉදිරියට යන්න තමයි කැමතියි.
මනාලියක් විදියට මේ වෙද්දී කී වතාවක් හැඩ වෙලා තියෙනවාද?
මනාලියක් විදිහට මේ වෙද්දි 200කට ආසන්න වතාවක් හැඩ වෙලා තියෙනවා
වැඩියෙන්ම හැඩවෙන්න ආස, උඩරටද ඉන්දියන්ද බටහිරද?
එහෙම බැලුවොත් නම් වැඩියෙන්ම හැඩ වෙන්න ආස උඩරට මනාලියක් විදිහට.
රංගනයට ලැබෙන ප්රතිචාර කොහොමද?
දැනට ගොඩක් හොඳ ප්රතිචාර ලැබෙනවා මගේ යාළුවොන්ගෙන් නෑදෑයන්ගෙන් වගේම මාව අඳුරන පිරිසගෙන්.
තව නිර්මාණවලට සම්බන්ධ වෙන්න අවස්ථාව ලැබුණද?
තවම නම් අවස්ථා ලැබිලා නැහැ
ගෙදරින් ලැබෙන සහයෝගය කොහොමද?
ගෙදරින් ලොකු සහයෝගයක් ලැබෙනවා. විශේෂයෙන්ම අම්මවයි, ආච්චි අම්මවයි මතක් කරන්න ඕනි. හැමදේකදිම අම්මා මගේ හෙවණැල්ල වගේ පස්සෙන් ඉද්දි ආච්චි අම්මා තමයි ගෙදර ඔක්කොම බලාගන්නෙ. ඉතින් ඒ සහයෝගය නිසා තමයි වැඩ කටයුතු සාර්ථකව කරගන්න පුළුවන් වෙන්නෙ.
අනාගත බලාපොරොත්තු මොනවාද?
දුවෙක් විදිහට මගෙ අම්මා අප්පච්චිව හොඳින් බලාගන්න එක. ඒ වගේම දක්ෂ රංගන ශිල්පිනියක් ලෙස කලා ක්ෂේත්රයෙන් ඉදිරියටම යන්න තමයි බලාපොරොත්තුව.