සුහන්දි උපේත්මා වෝසදී ඔබ හොඳින්ම හඳුනා ගන්නේ ධනුෂ්ක රත්නායකගේ ‘මන්දාරම් කතාවේ’ සුන්දර හුරුබුහුටි ආදරවන්තිය විදූ ලෙසිනි. එදවස අරුන්-විදූ ආදර කතාවට පෙම් නොකළ අයකු නොවූ තරම්ය. ඇය ප්‍රධාන භූමිකාවකින් හමුවුණු පළමු අවස්ථාව ලෙස එය ප්‍රේක්ෂක ඔබේ මතකයේ තවමත් රැඳී ඇතුවාට සැකයක් නැත. සියත නාළිකාවේ විකාශය වන ‘සින්ධූ’හි සින්ධුජා, ස්වාධීන රූපවාහිනී නාළිකාවේ විකාශය වන ‘රාග’ ටෙලි නිර්මාණයේ දසුනි මෙන්ම හිරු නාළිකාවේ විකාශය වන ‘මලක්’ ටෙලි නිර්මාණයේ නිකිණි ද ඇයයි. නාළිකා ත්‍රිත්වයක ටෙලි නිර්මාණ ත්‍රිත්වයකින් මේ දිනවල ප්‍රේක්ෂක ඔබ හමුවන සුහන්දි තම අත්දැකීම් අප හා මෙසේ බෙදා ගත්තාය.
“හිරු නාළිකාවේ විකාශය වන මලක් ටෙලි නිර්මාණයේ නිකිණි තම සිත සංවේදී කළ අත්දැකීමක් වූ බව ඇය අප හා පැවසුවාය.
මලක් ටෙලි නිර්මාණයේ නිකිණි කියන්නේ පිළිකා රෝගයට ගොදුරු වෙලා ඉන්න තරුණියක්. ඇය මල් කොල්ලෙකුට ආදරය කරනවා. තමන්ගේ පෙම්වතියගේ ජීවිතය බේරගන්න ඔහු සල්ලි හොයන්නේ රේස් දුවලා. ගොඩක් හැලහැප්පීම් එක්ක ගෙවෙන නිකිණිගේ දුක්බර ජීවිතය මටත් සංවේදී අත්දැකීමක් වුණා. නුදුරේදීම මලක් ටෙලි නිර්මාණය අවසන් වේවි.
අධ්‍යක්ෂ ජයප්‍රකාශ් සිවගුරුනාදන්ගේ ‘රාග‘ ටෙලි නිර්මාණයේ දසුනි කියන්නෙත් මට අලුත් අත්දැකීමක්. මවුපියන් ළඟ ආදරෙන් හැදෙන වැඩෙන දසුනි මේ වෙද්දි ජීවිතය ගැන කලකිරීමට පත්වෙලා මෙහෙණියක් වීමේ සූදානමින් ඉන්නේ. සින්ධුහි සින්ධුජා ලොකු පැලැන්තියක දුවක් වුණත් සරල ජීවිතයකට කැමති කෙනෙක්. ඇයට ඕනෑ සාමාන්‍ය ජීවිතයක් ගත කරන්න. ඒ වෙනුවෙන් ඇය ගන්නා ඇතැම් පියවර නිසා ඇයට ජීවිතයේ දුක් ගැහැටවලට මුහුණ දෙන්නත් සිදු වෙනවා. එකිනෙකට වෙනස් චරිත තුනකින් තමයි මං මේ දිනවල පුංචි තිරයේ දකින්න ලැබෙන්නේ.
ඇය පළමුවරට ප්‍රධාන භූමිකාවකින් දායක වුණු නුවර අහස යට දිගහැරුණු මන්දාරම් කතාවේ ඇයට ජීවිතයේ අමතක නොවන අත්දැකීමක් බවට පත්විය. විදූට පෙම් බැඳි පිරිස මෙන්ම අරුන් – විදූ ආදර කතාවට පෙම් බැඳි අතිවිශාල ප්‍රේක්ෂකාගාරයක් නිර්මාණය වී තිබූ බව සුහන්දි අප හා පැවසුවාය.
“ධනුෂ්ක රත්නායකගේ මන්දාරම් කතාවේ පුරාම ප්‍රේක්ෂකයින්ගෙන් මට ලැබුණේ ආදරයම විතරයි. ඒක මට කවදාවත් අමතක වෙන්නෙ නෑ. කතාව ඉවරවෙලා ගොඩක් කල් ගිහිල්ලත් අදටත් අරුන් – විදූ ආදර කතාව ගැන මතක් කරන අය ඉන්නවා. මන්දාරම් කතාව ඉවර වුණාට නුවරට පය තියද්දිම අරුන් – විදූ ආදර කතාව මතක් වෙනවා කියන ප්‍රේක්ෂක පිරිසක් අදටත් ඉන්නවා. මගේ හිතටත් ගොඩක්ම දැනුණ නිර්මාණයක්. ඒ ආදරේ කවදාවත් අමතක වෙන්නෙ නෑ. ඒ වගේම චාමර පීරිස්ගේ අමුතු දීගේ ටෙලි නිර්මාණයේ ශාරදා කියන චරිතයත් මට අමතක නොවන අත්දැකීමක්. ජීවිතයේ එක් එක් අවස්ථා පියවරෙන් පියවර විකාශය වුණු කතාවක්. පොඩි ළමයෙකුගේ පටන් දරුවො දෙන්නෙක් එක්ක තනිවුණු ගැහැනියක් දක්වා කතාව ගලාගෙන ගියා. ශාරදා කියන්නේ මට බොහෝ අත්දැකීම් එකතු කළ ටෙලි නිර්මාණයක්.“
ළඟදීම පුංචි තිරයට එන අමුතුම කතාවක් ගැන කියන්නත් ඇය අමතක කළේ නැහැ.
“ඉන්දික ධර්මතිලකගේ අලුත්ම ටෙලි නිර්මාණයේ වෙනස්ම භූමිකාවකින් මං ළඟදීම ප්‍රේක්ෂකයින් අතරට එනවා. ඒක අමුතු ලස්සන කතාවක්. ප්‍රේක්ෂකයින්ටත් ඒක අලුත්ම අත්දැකීමක් වේවි කියල හිතනවා.“
ඉතාම කෙටි කාලයක් තුළ පුංචි තිරයේ ආකර්ෂණීය තරුවක් බවට පත්වුණු සුහන්දි නුදුරේදීම රිදී තිරයේ ද දකින්න ලැබේවි.
“ලක්මාල් වීරසිංහ සහ සුනෙත් මාලිංගගේ සුසංයෝගයෙන් නිර්මාණය වුණු ‘සිරදෙටුවෝ‘ සිනමාපටය ළඟදීම තිරගත වීමට නියමිතයි. මං ප්‍රධාන භූමිකාවකින් රිදී තිරයට එන පළමු අවස්ථාව. පුංචි දරුවන්ට නර්තනය උගන්වන නැටුම් ටීචර් කෙනෙක්. මං පොඩි කාලෙ ඉඳන්ම නර්තනය හැදෑරුවා. රංගන කටයුතු නිසා නර්තනයෙන් ඈත් වෙන්න වුණත් ආයෙම නර්තනය පැත්තට යොමු වුණොත් හොඳයි කියලත් හිතෙනවා. නර්තන හැකියාව තිබුණ නිසා මට මේ චරිතය අභියෝගයක් වුණේ නැහැ.“
මේ වනවිට අසීමිත ප්‍රේක්ෂක ආදරයක් විඳිමින් සිටින සුහන්දි මේ තාක් දුර එන්නට අඩිතාලම වැටුණු අතීතය ගැන ද සිහිපත් කළාය.
“මං මුල්ම රංගන අත්දැකීම ලබන්නේ රනිල් කුලසිංහගේ 1990 ටෙලි නිර්මාණයෙන්. රනිල් කුලසිංහ අයියට මාව හඳුන්වලා දීලා මට ඒ සඳහා අවස්ථාව ලබාදෙන්නේ නිල්මිණි තෙන්නකෝන් අක්කා. ඊට පස්සෙයි ඔඩිෂන් එකට සම්බන්ධ වෙන්නේ. මන්දාරම් කතාවේ ප්‍රධාන චරිතයට ආරාධනා ලැබෙන්නේ ඊටත් පස්සේ. මන්දාරම් කතාවේ විදූ තමයි මගේ රංගන ජීවිතේ හැරවුම් ලක්ෂ්‍යය. ඊට පස්සේ See You ටෙලි නිර්මාණය. ඒ අතරේ දෙරණ අවුරුදු ටෙලි ෆිල්ම් එකක ප්‍රධාන චරිතයට ආරාධනා ලැබුණා. ‘දෙවරක් චක්කරේ‘ අංජලී වගේම ‘ආදරේ ගීතයක්‘ ටෙලි නිර්මාණයේ මෙහෙන්දිත් මගේ රංගන දිවියේ අත්දැකීම් බවට පත්වුණා.“
ඇයට ආදරය කරන සුවහසක් ප්‍රේක්ෂකයින් වෙනුවෙන් ඇයගේ පෞද්ගලික තොරතුරු බිඳක් පැවසීමට ද ඇය අමතක නොකළාය.
“මගේ ගම කඩවත. මට ඉන්නේ අම්මයි, නංගියි, අප්පච්චියි. ඒ වගේම මං ආදරවන්තියක් විදිහටත් ආදරය ලබනවා. අප්පච්චි ව්‍යාපාර කටයුතුත් එක්ක ඉන්න නිසා අම්මා තමයි මගේ හෙවණැල්ල වගේ හැමවෙලේම පස්සෙන් ඉන්නේ. ඒ වගේම මං මේ දිනවල පුංචි ව්‍යාපාර කටයුත්තකටත් සම්බන්ධ වෙලා ඉන්නවා. නුදුරේදීම ඒ තොරතුරු ඔයාලට දැනගන්න ලැබේවි.“
ඡායාරූප – තිලක් පෙරේරා
