පහළට වැඩුණු දිගු වරළස දෙකට ගොතා, පාසල් ඇඳුමින් සැරසී, දෑත දෙපා පමණ නොව ළැම උකුළ ද ළෙලවමින්, අඳුරු පැහැ මුව අරා සීරුවට පෙළ ගැසුණු මුතු දසන් දක්වා නංවන පියකරු සිනහවෙන් ප්‍රේක්ෂකාගාරය කීරි ගැන්වූ ඇය බොහෝ කලක් ආර්. ආර්. සමරකෝන්ගේ ‘කැලණි පාලම‘ නාට්‍යයේ ‘සුරංගනී’ වූවා ය. පාසල් දැරියක ව සිටියදීම කැලණි පාලමෙන් වේදිකාවට ගොඩවන්නට වරම් ලද ඇය මේ දක්වා අඛණ්ඩ ව ‘කැලණි පාලම‘ නාට්‍යයේ රඟපාන්නේ අසීමිත සතුටකිනි. කාලයාගේ ඇවෑමෙන් එහි ම ‘රූපාවතී’ බවට පත් වූ ඇය මේ දිනවල ‘කැලණි පාලම‘ සමඟ රටවටා සැරිසරන්නී ය.
1982 වසරේදී ඇය ඩී. බී. නිහාල්සිංහ විසින් අධ්‍යක්ෂණය කරන ලද ‘රිදී නිම්නය‘ චිත්‍රපටයේ ප්‍රධාන චරිතයක් රඟපාමින් සිනමා රංගනයට පිවිසිය ය. ප්‍රවීණ මාධ්‍යවේදී ධර්මසිරි ගමගේ සූරින් අධ්‍යක්ෂණය කළ ‘පූජා‘ චිත්‍රපටයේ ‘වසන්ති’ වූ ඇය එම වසරේ සරසවිය සම්මාන උලෙළේ හොඳ ම නැඟී එන නිළිය වූවා ය. එසේ ම එහිදී හොඳම නිළිය සම්මානය සඳහා ද ඇය නිර්දේශ විය. සිය ප්‍රථම ටෙලි නාට්‍ය රංගනය වූ විජය ධර්ම ශ්‍රීගේ ‘රන් දොරටුව‘ ඇයට හොඳම ටෙලි නිළිය සම්මානය හිමි කර දීමට සමත් විය. ආනන්ද ෆොන්සේකාගේ ‘කෙම්මුර‘ ටෙලි නාට්‍යයේ රංගනය උදෙසා ඇය 2001 වසරේදී හොඳම සහාය නිළිය සම්මානය ද දිනා ගත්තාය. එදා මෙදා තුර දශක ගණනාවක ගුවන්විදුලිය, වේදිකාව, සිනමාව, ටෙලි නාට්‍ය ආදි මාධ්‍යයන් ඔස්සේ රංගනයෙන් ද ගායනයෙන් ද ශ්‍රාවක ප්‍රේක්ෂක ආදරය විඳිමින් මේ සියලු මාධ්‍යයන්හි තවමත් සක්‍රීය ව කලා කටයුතුවල නිරත වන ඇය ගීතා කාන්ති ජයකොඩි ය.
කොළඹ වැල්ලම්පිටිය සහ අවට ප්‍රදේශ බොහෝමයක ප්‍රකට ආයුර්වේද වෛද්‍යවරයෙක් වූ සිරිසේන ජයකොඩි ඇයගේ ආදරණීය පියා යි. මව වයලට් කුරුවිට ආරච්චි ය. ජයකොඩි පවුලේ වැඩිමලා කමල් ය. දෙවැනියා ගීතා කාන්ති ය. තෙවැන්නා පියල් ය. ඔහු ගුවන්විදුලියේ සරළ ගී ගායන ශිල්පියෙකි. සිව්වැන්නා ශ්‍රියාණි ය. බාලයා රත්නා ලාලනී ය. ඇය ද අතිශය ජනප්‍රිය රංගවේදිනියකි. එසේ ම සංගීත ගුරුවරියකි. ගායිකාවකි. කුඩා කල පටන් මේ දරුවන් පස් දෙනා ඉතා මිහිරි ලෙස ගී ගයමින්, මිදුලේ නාට්‍ය රඟමින් පෑ දක්ෂතා මවත්, පියාත් බලා සිටියේ ඉමහත් ප්‍රීතියෙනි. පියා නිතර ගායනා කළ කවි, ශ්ලෝක, ගාථා ආදියෙහි ආභාසයෙන් දරුවන් පස් දෙනා ද ජන ගායනා තරගවලින් නිතර ජය ගෙන පසුව ගීත ගයන්නට ද පෙළඹිණි. මේ දරුවන් පස්දෙනාගේ දරුවන් ද අද වනවිට කලා ක්ෂේත්‍රයේ ජනප්‍රිය ශිල්පීන් ය. කමල්ගේ දරුවන් වන බිමල්, රනිල්, යශෝදා, සවිනි ද බිමල්ගේ බිරිඳ සුජානි මේනකා ද ගීතා කාන්ති සහ පද්මකීර්ති පතිරගේ එකම දරුවා වන පබෝදා ද පියල් සහ අජන්තාගේ දරුවන් වන රංගාමල් හා පුබුදු ලක්මාල් ද ශ්‍රියාණි සහ සුනිල් බණ්ඩාර‍ගේ දරුවන් වන සචිත්‍ර හා කවිඳු ද රත්නා ලාලනී සහ සම්පත් තෙන්නකෝන්ගේ එකම දරුවා වන මංජිත ද අඩුවැඩි වශයෙන් කලාවෙහි දක්ෂයෝ ය.
“අපේ මේ විශාල කලා පවුලට එක්වුණු අලුත් ම සාමාජිකයා මගේ මුනුපුරා සවේන් ජිත්සරයි. එයා එක්ක ගත කරන කාලය මට පුදුම සතුටක් ගෙන දෙනවා. එයත් ගයන්න දක්ෂයි. අපේ පවුලේ කලාවට මුලින් ම සම්බන්ධ වුණේ මමයි. නන්දා රත්නතුංග මහත්මිය ඒ දවස්වල ‘ජසයා ලෙන්චිනා හි ලෙන්චිනාට රඟපාමින් සිටියා. ඇය අපේ ඥාතිවරයකු සමඟ විවාහ වුණා. මගේ දක්ෂතා දැකලා අම්මා මාව අයදුම්පතක් දාලා ගුවන්විදුලියේ ළමා පිටියට යොමු කිරීම සඳහා එක්කගෙන ගියේ නන්දා රණතුංග සමඟයි. එහිදී මම ළමා ගීත ගායනා කළා. මම ගැයූ ළමා ගීත කිහිපයක් පටිගත කළා. ඒ අතරින් සමහර ගීත තවමත් ජනප්‍රියයි. ඒත් ඒ ගී ගැයූ ළමා ගායිකාව ගීතා කාන්ති ජයකොඩි බව බොහෝ අය දන්නේ නැහැ.”
“අත්තා පල්ලා
මුත්තා පල්ලා
මං අල්ලන්නට
බැරුවානේ…”
අපගේ මතකයෙන් මැකී ගොස් නොමැති මේ ගීය ගැයූ ළමා ගායන ශිල්පිණිය ඇය යි. ‘නිලට නිලේ නිල් අහසේ පාවෙනවා..‘ ගීය ද ඇයගේ ළමා ගීතයකි. ‘හඳමාමා‘, ‘ළමා රංග පීඨය‘, ‘ගුවන්විදුලි රඟමඩල‘, ‘සරස්වතී මණ්ඩපය‘, ‘ළමා සංගීත සන්ධ්‍යාව‘ ආදි වැඩසටන්වලට ද ඇය ගායනයෙන් හා රූපණයෙන් සම්බන්ධ වූවාය. ගුවන්විදුලි නිවේදිකාවක ලෙස ද තේරුණු ඇය “ගීතයෙන් ගීතය” ආදි වැඩසටහන් රැසක නිවේදිකාව ද වූවාය. පසුව ඇය සුපර් ග්‍රේඩ් නාට්‍ය ශිල්පිනියක වූවාය. ප්‍රවීණ ගුවන්විදුලි නාට්‍ය ශිල්පී ආනන්ද සිරිසේනයන්ගේ අතිශය ජනප්‍රිය ගුවන්විදුලි නාට්‍යයක් වූ ‘වජිරා‘ හි ප්‍රධාන චරිතයක් වූ‘වජිරා’ ලෙසින් බොහෝ කලක් ඇය රඟපෑවා ය. ගුවන්විදුලි රඟමඩලේ ද නාට්‍ය රැසක ඇය රඟපෑවාය. ‘රන් ගල් තලාව‘, ‘මුවන්පැලැස්ස‘ යන ගුවන්විදුලි නාට්‍යවලත් ඇය රඟපෑ අතර මුවන්පැලැස්ස‘ නාට්‍යයේ කදිරාගේ පෙම්වතිය වූයේ ඇය යි. තවමත් සඳුදා රාත්‍රියේ අපට ඇසෙන ‘මුවන්පැලැස්ස‘
ගුවන්විදුලි නාට්‍යයේ ‘බිනරි‘ ලෙසින් හඬ රංගනයේ යෙදෙන්නේ ඇයයි. කුඩා කල පටන් විවිධ දක්ෂතා දැක්වූ ගීතා කාන්තිගේ ජීවන ගමනේ එකී සියලු කුසලතා වර්ධනය කර ගන්නට පාසල තෝතැන්නක් විය.
“වැල්ලම්පිටිය සේදවත්ත ශ්‍රී සිද්ධාර්ථ මහා විද්‍යාලයෙන් මූලික අධ්‍යාපනය හදාරලා මම උසස් පෙළට රොස්මිඩ් බාලිකා පාසලට ගියා. පොඩි කාලේ ඉඳලා පාසලේ නැටුම් කළා. නැටුම්වලින් මට ශිෂ්‍යත්වයකුත් ලැබුණා. සංගීතයත් කළා. නෙට්බෝල් සහ සරඹ කණ්ඩායම්වල නායිකාව වුණා. පන්ති නායිකාවත් මමයි. පාසල නියෝජනය කරමින් විවිධ තරගවලට මම ඉදිරිපත් වුණා. ජයග්‍රහණ ලැබුවා. නර්තන, ගායන, ක්‍රීඩා අංශවලින් විවිධ දේවලට ඉදිරිපත් වුණත් රඟපෑමක් ගැන කිසි උනන්දුවක් හෝ බලාපොරොත්තුවක් තිබුණේ නැහැ. අපේ සේදවත්ත ගමේ ඉස්සර හරියට තරග තිබුණා. විකට ඇඳුම් තරග එහෙමත් තිබුණා. නමුත් මම ඉදිරිපත් වුණේ ගායන අංශයේ තරගවලට හැර රඟපාන්න තිබුණු චරිතවලට නෙවෙයි. ඒ කාලේ සිනමාවේ සිටි රංගන ශිල්පිනියන් ඉතා ම සුරූපී අය යි. මම කළු පැහැති සමක් ඇති තැනැත්තියක් නිසා මේ පෙනුමට රඟපාන්න අවස්ථාවක් ලැබෙයි කියලා හිතුවේ නැහැ. පාසල් ඇරිලා නිල ඇඳුමෙන් ම ගුවන්විදුලියට ඇවිත් වැඩසටහන්වලට සම්බන්ධ වුණා. ඒ කාලෙ ම ආර්.ආර්. සමරකෝන් මහත්මයා පාසල් ළමයෙක් ඔහුගේ ‘කැලණි පාලම‘ නාට්‍යයට සොයමින් ඉඳලා තියෙනවා. ජේ. එච්. ජයවර්ධන මහතා මං ගැන කිව්වාම සමරකෝන් මහත්තයා ගුවන්විදුලියට ඇවිත් මම ගුවන්විදුලි නාට්‍යවල දෙබස් රඟන හැටි බලාගෙන ඉඳලා පසුව මට එන්න කියලා තැපැල් පතක් එවලා තිබුණා. මම අම්මා එක්ක ගියා. නාට්‍යයේ දෙබස් කිහිපයක් මම කිව්වා. මාව තෝර ගත්තා. 1978දී මුලින්ම වේදිකාගත වුණා. එදා ඉඳලා අද දක්වා ‘කැලණි පාලම‘ නාට්‍යයට තියෙන ප්‍රේක්ෂක ප්‍රතිචාර ඉතා ඉහළයි. සමහර කාලවල නාට්‍ය බලන්න ඇවිල්ලා ශාලාවට ඇතුළු වෙන්න බැරුව විශාල පිරිස් ආපහු හැරිලා ගිහින් තියෙනවා. සමහර කාලවල ප්‍රේක්ෂකාගාරය පිරිලා මුලු නාට්‍ය ම හිටගෙන බලලා තිබුණා. අදටත් ඈත පළාත්වල පවා විශාල පිරිසක් මේ නාට්‍ය තියෙනවා කිව්වොත් බලන්න එනවා. කිසිම හැලහොල්මනක් නැතුව නාට්‍ය අවසන් වනතුරු නාට්‍ය බලනවා. මේ නාට්‍යයේ එක ගීතයක්වත් නැහැ. සමරකෝන් මහත්තයාගේ වචන ගීතයක් තිබුණා ද නැද්ද කියලාවත් දැනෙන්නේ නැති තරමට රසවත් බවක් ගෙන දෙනවා. මේ නාට්‍යයේ අඛණ්ඩ ව රැඳී සිටින්න ලැබීම මගේ වාසනාවක්. මම රංගන ශිල්පිණියක් වුණේ ‘කැලණි පාලම‘ නිසා තමයි.”
ඒ ඇරඹි ගමනේ එදා මෙදා තුර වේදිකා නාට්‍ය, ගුවන්විදුලි නාට්‍ය, සිනමා ආදි ක්ෂේත්‍ර ගණනාවක් ඔස්සේ මේතාක් පැමිණි මඟ බොහෝය. ආදරවන්තයෝ, යශෝරාවය, අහසින් වැටුණු ගැහැනියක්, බත් අම්මා, ගල් පිළිමය සහ බොල් පිළිමය, හංස පිහාටු, හිමගිරි අරණ, හිම පියළි, ඉන්ද්‍රචාපා, ඉර හඳ පායන ලෝකය, කෙම්මුර, කිරි අම්මාවරු, මතක සුළඟ, මායාවි, මයුර අසපුව, මිරිඟුවෙන් එහා, නිල් නෙතු, පෙම් පියවර, පස්සෙ ගෙනා මනමාලි, පින්ගල දනව්ව, පොඩි මාමා, රන් දොරටුව, සක්වා ළිහිණියෝ, සව්සිරි උයන, සේපාලිකා, ස්නේහා ආදිය ඇය රඟපෑ ටෙලි නාට්‍ය අතර කිහිපයකි. රිදී නිම්නය, පූජා, ඔක්කොම රජවරු, හොඳින් නැත්නම් නරකින්, පෙම් රජ දහන, චණ්ඩි රජා, සඳරේඛා, දොරකඩ මාරාව, සඳ යහනට, සුදු කළුවර, ආදර මීනා, ගාමණි, හෝ ගාන පොකුණ, හත් පණ ආදිය චිත්‍රපට අතර වේ.
කැලණි පාලම, අහසින් වැටුණු මිනිස්සු, මාල වළලු, රයිනෝසිරස්, නාගගුරුල්ලා, පුත්‍ර සමාගම, සිවම්මා දනපාල, සක්ඛාය දිට්ඨි ආදියට අමතරව රත්නශීලා පෙරේරාගේ ‘ශ්‍රී වික්‍රම‘ වේදිකා නාට්‍යයේ පුස්සැල්ලාවේ කුමාරිහාමිගේ චරිතය නිරූපණය කරන්නේ ද ගීතා කාන්තිය. එය පැරණි නූර්ති ගී ද ඇතුළත් වුණු ඉතා රසවත් සංගීතමය වේදිකා නාට්‍යයකි. මේ දිනවල ‘ශ්‍රී වික්‍රම‘ නාට්‍යය ද රටපුරා වේදිකා ගත කෙරේ. ධනුෂ්ක රත්නායකගේ ‘පරාග‘ චිත්‍රපටයේ ඇය සිය ඥාති පුත්‍ර යශ් වීරසිංහත් සමඟ අම්මයි පුතයි ලෙස රංගනයේ යෙදේ. ඉතාම නුදුරු දිනක එය තිරගත වීමට නියමිතයි. එරික් හා මනීෂාගේ අධ්‍යක්ෂණයෙන් ඉදිරියේදී තිරගත වීමට නියමිත ‘වන්දි‘ චිත්‍රපටයේ ද ඇය රඟපෑවා ය. සෝමවීර සේනානායකගේ පොතක් ඇසුරෙන් දයාරත්න රටගෙදර අධ්‍යක්ෂණය කළ ‘ඉර හඳ පායක ලෝකේ‘ ටෙලි නාට්‍යයේත්, මේ දිනවල විකාශය වෙමින් පවතින ‘හිරු කුමරු ආදරේ ගෙනැල්ලා‘ ටෙලි නාට්‍යයේත් ගීතා කාන්තිගේ අපූරු රූපණයන් දැක ගත හැකිය. ඉදිරියේදී විකාශය කිරිමට නියමිත ‘තප්පර කට්ටා‘ නාට්‍යයේ ද වැඩ අවසන්ව ඇත. මීට වසර කිහිපයකට පෙර ඇය ‘ආශිර්වාද‘ නමින් පොහොය නාට්‍යයක් අධ්‍යක්ෂණය කළාය.
“මගේ දුව පබෝධා සන්දීපනීයි, මමයි මුලින් ම එකට රඟපෑවේ ‘යශෝරාවය‘ ටෙලි නාට්‍යයේ. එතකොට දුවට අවුරුදු පහක් විතර ඇති. ඊට පස්සේ ‘බෝපත් සක්කියා‘ ටෙලි නාට්‍යයේ එකට රඟපෑවා. ඉදිරියේදී තිරගත වීමට නියමිත ‘ශ්‍රී සද්ධා‘ චිත්‍රපටයේත් දුවයි, මමයි එකට රඟපෑවා. කැලණි පාලම වේදිකා නාට්‍ය කැමරාගත කරලා 1982දී රූපවාහිනියේ විකාශය කළා. විජය ධර්ම ශ්‍රී මහත්මයා ඒක දැකලා ඔහුගේ ‘රන් දොරටුව‘ ඒකාංගික ටෙලි නාට්‍යයට මාව නීතිඥවරියකගේ චරිතයකට තෝරා ගත්තා. ඒ කාලේ ඒ චරිතය පුදුම විදිහට ජනප්‍රිය වුණා. ඒ චරිතයට මට සම්මානත් ලැබුණා. මම රඟපෑ ‘බත් අම්මා’ චරිතයත් ජනප්‍රිය වුණා. ‘හිමගිරි අරණ‘ ටෙලි නාට්‍යයේ බිරිඳ මරා දැමූ වෛද්‍යවරයාගේ බිරිඳ හැටියටත්, ඒ මිනීමැරුම ගැන හොයන දුවගේ චරිතයත් රඟපෑවා. එකම නාට්‍යයේ තරුණ හා මැදිවිය චරිත දෙකක් කළා. ඒක මට වෙනස් අත්දැකීමක් වුණා. ‘යශෝරාවය‘ ටෙලි නාට්‍යයේ බලදේවගේ බිරිඳ හැටියට රඟපෑ චරිතයත් ජනප්‍රිය වුණා. කේ. බී. හේරත්ගේ “මායාදේවි” නාට්‍යයේ මමයි, මගේ බාල නංගි රත්නා ලාලනි එකට රඟපෑවා. පුංචි කාලේ ඉඳලා මම නැටුමටයි, ගැයුමටයි තමයි වැඩි දක්ෂතාවක් තිබුණේ. වසර කිහිපයකට කලින් එක්තරා ප්‍රධාන උත්සවයක් සඳහා ඉදිරිපත් කිරීමට ප්‍රවීණ නර්තන ශිල්පී චන්දන වික්‍රමසිංහ සමඟ ප්‍රධාන නර්තන අංගයක පුහුණුවීම් දිගටම කළා. නමුත් අවසාන උත්සවය දවසේ මට ‘කැලණි පාලම‘ නාට්‍ය වේදිකාගත කිරීමක් තිබිලා ඒකට යන්න සිදු වුණා. ඒකෙන් නැටුම කරගන්න බැරි වුණා. එදා නම් මම ගොඩාක් දුක් වුණා.”
