මේ දිනවල අතිශයින්ම ජනප්‍රිය පාට කුරුල්ලෝ ටෙලි නිර්මාණයේ ප්‍රධාන භූමිකා හා සමානවම කතාබහට ලක්වන භූමිකාව උදාර යැයි කිවහොත් නිවැරැදිය. නිවුණු, තැන්පත් ගතිපැවැතුම් ඇති පෞද්ගලික ලේකම්වරයෙක් වන උදාරගේ භූමිකාවට පණ පොවන ඔහු රංග විජේවික්‍රමය.
තම දිවියේම පැතිකඩක් වන් උදාරට පණ පෙවීම සම්බන්ධයෙන් රංග අප හා පැවසුවේ මෙවන් කතාවකි.
“සිවා අයියා එක්ක මං සම්බන්ධ වෙන පළමු නිර්මාණය පාට කුරුල්ලෝ. මං මීට කලින් චාමර සමරවික්‍රම නිෂ්පාදනය කළ දිව්‍යාදරී ටෙලි නිර්මාණයට සම්බන්ධ වුණා. ඒ හරහා තමයි මට පාට කුරුල්ලෝ සඳහා ආරාධනා ලැබෙන්නේ. එහි සහාය අධ්‍යක්ෂ තරංග නිරිඇල්ලවත් ආදරයෙන් සිහිපත් කරනවා. පාට කුරුල්ලෝට අමතරව ආලවන්තී ටෙලි නිර්මාණයත් මේ දිනවල විකාශය වෙනවා. සුරංග ලක්මාල්ගේ බැමි කියල අලුත් නාට්‍යයකත් වැඩ ඉවර කළා.“
උදාරට ආදරය කරන අතිවිශාල ප්‍රේක්ෂකාගාරය ගැන රංග ගෞරවපූර්වකව සිහිපත් කළේය.
“මං දැන් ක්ෂේත්‍රයට ඇවිත් අවුරුදු 20කටත් වැඩියි. ඒත් ගොඩක් අය ඒක දන්නෙ නෑ. මුලින්ම රංගනයෙන් දායක වුණු නිලංජනා ටෙලි නිර්මාණයෙන්ම මං ගොඩක් ජනප්‍රිය වුණා. පස්සේ මගේ බිස්නස් වැඩ කටයුතු නිසා ටික කාලයක් ක්ෂේත්‍රයෙන් ඈත්වෙලා ඉන්න වුණා. උදාර නිසා දැන් ආයෙමත් මිනිස්සු මා ගැන හොයන්න පටන් අරන්. මං සෝෂල් මීඩියා පැත්ත වැඩිය ෆලෝ කරන්නෙ නැහැ. සජිත තමයි දවසක් මට කිව්වෙ අයියෙ ඔයාට මාර කමෙන්ට්ස්නෙ තියෙන්නෙ කියලා. ඊට පස්සෙ තමයි මාත් බැලුවෙ. මිනිස්සු හරිම ආදරෙන් උදාරව අල්ලගෙන තිබුණා.
මුල් කොටස් පහ විකාශය වෙද්දී බුද්ධිකගෙම කටින් කියවුණා උදාර ටිකක් මදි කියන එක. ඒ වෙලාවෙ මං කිව්වෙ ඔය ප්ලේ එක ඔහොමම අල්ලගෙන යන්න දෙන්න. එක තැනකදි මම ඕක වෙනස් කරන්නම් කියලා. පස්සේ මං සිවා අයියත් එක්ක කතා කරලා උදාරව වෙනම පැත්තකට හරව ගත්තා. ඇත්තටම මේක අපි දැනගෙන කරන වැඩක්නේ. පිටපත කියවගෙන යද්දි මට තේරුණා මේ සෙකට්‍රි මේ වගේ වෙන්න ඕන කියලා. ලියැවුණු විදිහත් එක්ක ඒක හරියටම වැඩ කළා. ගොඩක් අය කියන්නෙ අද කාලෙ බොස් කෙනෙකුට ඉන්න ඕනෙ මේ වගේ සෙකට්‍රි කෙනෙක් කියලා.
ඇත්තටම මගේ ජීවිතේ බොහෝ තැන් උදාරට සමානයි. ඒ නිසාම වෙන්න ඇති මට උදාර වෙන්න ගොඩක් පහසු වුණේ. අනේ අපිටත් හිටිය නම් මේ වගේ සෙකට්‍රි කෙනෙක් කියල ප්‍රතිචාර දක්වන පිරිස වැඩියි. ඒ වගේ චරිත අද සමාජයේ විරලයි. ඒ නිසාම වෙන්න ඇති මේ චරිතය මේ තරම්ම ජනප්‍රිය වෙන්න ඇත්තේ. පහුගිය දවසක අපි ජොගින් ට්‍රැක් එකක ෂූට් කළා. වැල නොකැඩී මිනිස්සු ඇවිත් කතා කරන්න පටන් ගත්තා. කොහොමහරි රෑ වෙනකලුත් අදාළ සීන් ටික කරගන්න බැරි වුණා.“
ආලවන්තීහි ජෙහාන් උදාරට හාත් පසින්ම වෙනස් චරිතයක් බව පැවසු රංග එය තම වාසනාවට ලැබුණු චරිතයක් බව ද පැවසීය.
“ආලවන්තී ගත්තොත් ජෙහාන් කියන්නෙ සී. අයි. ඩී ඔෆිසර් කෙනෙක්. උදාර ළඟ තියෙන නිවුණු ගති ජෙහාන් ළඟ නැහැ. මිනිස්සු එක්ක ටිකක් තදින් ගනුදෙනු කරන සාධාරණ වගේම සූක්ෂ්ම චරිතයක්. මීට කලින් සම්බන්ධ වුණු දිව්‍යාදරී ටෙලි නාට්‍යයේ යොහාන් කියන්නෙත් උදාරට සමාන චරිතයක්. ඒ නිසා ජෙහාන් මගේ රංගන ජීවිතේ වෙනස් පැතිකඩක් නිරූපණය කළා. මේ ඉන්නෙ උදාරම ද කියන ප්‍රශ්නාර්ථය මිනිස්සුන්ට ඇතිවෙලා තියෙනවා. මගේ පැත්තෙන් බැලුවොත් ඒක මට වාසියක්. ඒකාකාරී බවින් මිදෙන්නෙ ලැබුණු අවස්ථාවක්. ඒ අතින් මං වාසනාවන්තයි කියල හිතෙනවා.“
රංගනයට පිවිසීමේ කිසිදු බලාපොරොත්තුවකින් නොසිටි රංග ළමා නිවේදකයකු ලෙස ගුවන්විදුලියට පිවිසි අතීතය ද සිහිපත් කළේය.
“මං ක්ෂේත්‍රයට එන්නේ ළමා ගුවන්විදුලි නිවේදකයෙක් විදිහට මොරටුව 838 ශ්‍රී මුතුහර ළමා සමාජය හරහා. 2000 වසරේ තමයි වෘත්තිය නිවේදකයෙක් විදිහට හිරු, සිරස වගේ එෆ්. එම්. නාළිකාවලට සම්බන්ධ වෙන්නේ. ඊට කලින් නිදහස් මාධ්‍යවේදියෙක් විදිහටත් වැඩ කළා. වැඩසටහන් නිෂ්පාදකවරයෙක්, නිවේදකයෙක් විදිහට සිරස නාළිකාවේ වැඩකරන අතරේ රූකාන්ත ගුණතිලකගේ ‘අනාත මාරුතේ’ ගීතයේ රූප රචනයට සම්බන්ධ වෙන්න අවස්ථාවක් ලැබුණා. ඒ ගීතය ගොඩක් හිට් වුණා. ගොඩක් අය මාව හඬින් හඳුනගෙන හිටියට රූපෙන් හඳුනගත්තේ ඒ ගීතයත් එක්ක. අද මේ ඉන්න තැනට මූලික අඩිතාලම වැටුණෙ එතැනින්. ඉන්දියාවේ ආනන්ද බාබු කියන අධ්‍යක්ෂවරයා නිලංජනා ටෙලි නිර්මාණය අධ්‍යක්ෂණය කරමින් ඒ දවස්වල ලංකාවේ හිටියේ. ඔහුට සපෝටිව් කැරැක්ටර් එකකට කෙනෙක්ව ඕන වෙලා හොය හොයා ඉඳල තියෙන්නෙ. මගේ ඔය ගීතය දැකල මෙන්න මේ වගේ කෙනෙක් තමයි මට ඕන කියල, කියලා තියෙනවා. මගේ වෙලාවට මාව දන්න සමන් සිල්වා කියන අධ්‍යක්ෂවරයා එතැන ඉඳලා මාව ගෙන්නල දෙන්න පොරොන්දු වෙලා. ඒ විදිහට තමයි මට ආනන්ද බාබු හමුවෙන්නේ. නිලංජනා තමයි මගේ කුලුඳුල් ටෙලි අත්දැකීම. යොහාන් කියන සාධාරණ, තැන්පත් ඇමැති පුතාගේ චරිතය ගොඩක් ජනප්‍රිය වුණා. ඒක මට ජීවිතේට අමතක වෙන්නෙ නැහැ. පළවෙනි චරිතයම හිට් වෙනව කියන්නේ හිතාගන්න බැරි වාසනාවක්. ඊට පස්සේ ගොඩක් ආරාධනා ලැබුණා. රංගනයට ගොඩක් ආරාධනා ලැබෙද්දි රංගනය ද නිවේදනය ද කියන එක තෝරගන්න වුණා.
රංගනයට මං ගොඩක් ආස වෙලා හිටිය නිසා රංගනය තෝරගත්තා. මේ වෙද්දි ටෙලි නිර්මාණ හතළිහකට විතර සම්බන්ධ වෙලා තියෙනවා. 2023 න් පස්සෙ තමයි ගොඩක්ම නිර්මාණවලට සම්බන්ධ වුණේ.
