මේ දිනවල ස්වාධීන රූපවාහිනී නාළිකාවේ විකාශය වන වීදුරු තිර ටෙලි නිර්මාණය බොහෝ පාර්ශ්වයන්හි අවධානය දිනාගෙන ඇති ටෙලි නිර්මාණයකි. සමරිසි ඇසුර වටා ගෙතුණු කතා තේමාවක් ඔස්සේ ගලා යන වීදුරු තිර සමාජයෙන් ගැරහුම් ලබන සමාජ කොට්ඨාසයක් ගැන කතාබහට ලක් කරයි. එහි සුලෝචනගේ භූමිකාවට පණ පොවන චමීර විවිධ භූමිකා ඔස්සේ ඔබේ ආදරය දිනාගත් දක්ෂ රංගන ශිල්පියෙකි. ඔබ අසීමිතව ආදරය කළ ඉරගිනි මද්දහනේ මහතුන් ඔහුය. සුලෝචන මේ දිනවල විවේචනාත්මක ප්‍රතිචාර ලබන භූමිකාවකි. රන්තිලිවැවේ අහිංසක දාසය. තව නොබෝ දිනකින් හිද්දලයෝහි පුංචි බණ්ඩාර නිලමේ බවට පත්වී ඔබේ අවධානය දිනාගනු ඇත.
භාරගත් ඕනෑම චරිතයකට උපරිම සාධාරණයක් ඉටු කරන ඔහු මහතුන්, පුංචි බණ්ඩාර හෝ සුලෝචන ලෙසින් සමාජගත වන්නේ වෘත්තීය මට්ටමෙනි. රාවණ ටෙලි නිර්මාණයේ කාලනේමි ඍෂිවරයා ලෙසින් ඔබේ මනෝභාවය උසස්ම තැනකට ගෙන ගියේද ඔහුය. අභීත සටන්කාමී භූමිකාවකින් නුදුරේදීම ඔබට ඔහු නැවත හමුවනවා ඇත. අද අප හා කතාබහට එක්වන්නේ ඕනෑම චරිතයක් ජීවමාන කළ හැකි අපූරු රංගන ශිල්පියකු වන චමීර ලියනගේය.
‘මහතුන්‘ නිසා අසීමිත ප්‍රේක්ෂක ආදරයක් ලැබූ ඔබ මේ දිනවල සුලෝචන නිසා විවේචනයට ලක් වෙනවා නේද?
ඔව්. සුලෝචනට කැමති අය වගේම අකමැති අයත් ඉන්නවා. ඉරගිනි මද්දහන ටෙලි නිර්මාණයේ මහතුන්ගේ චරිතයට හිතාගන්න බැරි තරම් ප්‍රේක්ෂක ආදරයක් ලැබුණා. අදටත් ඒකෙ අඩුවක් නෑ. සුලෝචනගේ චරිත ස්වභාවය මහතුන්ට හාත්පසින්ම වෙනස්. ඒ නිසා වෙන්න ඇති ඔහුට විවේචන එල්ලවෙන්නේ. මේ දවස්වල ඒක මට හොඳටම දැනෙනවා. සාමාන්‍යයෙන් නළුවෙක් කෙළින්ම ඇහැ ගැටුණම මිනිස්සු ටිකක් බලාගෙන ඉඳලා ඇහැ ඉවතට ගන්නේ සතුටින්නේ. ඉස්සර මිනිස්සු මාව දැක්කම හරිම සතුටින් හිනා වෙලා ගියා. ඒත් දැන් සුලෝචන නිසා සමහරු මං දැක්කම බිම බලාගන්නවා.
සුලෝචන භාරගනිද්දි මෙහෙම වෙයි කියල හිතුණේ නැද්ද?
මෙහෙමයි. නළුවෙක් කියන්නේ ඕනෙම අභියෝගයක් භාරගන්න කෙනෙක්. මමත් කැමැතියි විවිධ චරිත නිරූපණය කරන්න. සුලෝචන කියන්නෙත් මේ සමාජයේ ඉන්න එක්තරා චරිතයක්. වීදුරු තිර අධ්‍යක්ෂ ශාන් ජයරත්නට ස්තුතිවන්ත වෙනවා මට ඒ අවස්ථාව ලබාදීම සම්බන්ධයෙන්. කතා සංකල්පය සහ නළු නිළියන් තෝරාගැනීම ශලනි තාරකාගේ. තිරපිටපත ගයනි අශිංසලා. නිෂ්පාදනය කුෂාන් පෙරේරා. මේ හැමෝගෙම සහයෝගය නිසයි සුලෝචන සාර්ථක වුණේ. දැන් නම් ටිකක් මිනිස්සු තේරුම් අරන් තියෙනවා අපි මේ උත්සාහ කරන්නේ සමාජයට මොකක්හරි පණිවුඩයක් දෙන්න කියන එක. සමහරු මේ දිහා මතුපිටින් බලලා තීරණ ගන්නවා. මේක ඇතුළෙ ලොකු හරයක් තියෙනවා. දැන් දැන් මිනිස්සු තේරුම් ගනිමින් ඉන්න නිසාද මන්ද මේ වෙද්දි හොඳ ප්‍රතිචාර ලැබෙනවා. ඇත්තම කතාව තාම සුලෝචනගේ පරිච්ඡේදය හරියට පටන් ගත්තෙ නැහැ. චේතනීටයි සචිත්‍රටයි මැදි වෙලා සුලෝචන මේ ජීවිතේට මුහුණ දෙන්නේ කොහොමද කියන එක දැන් තමයි පටන් ගන්නේ.
සුලෝචන කියන්නේ සමාජයේ ප්‍රතික්ෂේපිත චරිතයක්. සුලෝචනගෙ චරිතය සඳහා ඔබ සූදානම් වුණේ කොහොමද?
මේ වගේ චරිත සම්බන්ධයෙන් ලියවුණු පොතපත කියවලා, චිත්‍රපට බලලා ලොකු අධ්‍යයනයක් කළා. ඊට අමතරව අපිට මනෝ විද්‍යා චිකිත්සකවරියකගෙන් උපදෙස් ලැබුණා. ඇය ළඟට ආපු කේස් අපිට අධ්‍යයනය කරන්න දුන්නා. අපි දැනගෙන හිටියා සමාජයෙන් ලොකු විවේචන එල්ලවෙයි කියලා. ඒ නිසා මේක ලොකු අධ්‍යයනයකින් පස්සේ කරපු වැඩක්. අපි කොතනින්ද මේක සාධාරණීකරණය කරන්න ඕන, අපි කොතනින්ද මේකෙන් බේරෙන්න ඕන, මේ මිනිස්සුන්ට සාධාරණයක් කරලා මේ අසාධාරණයට ලක්වන ගැහැනුන්ට සාධාරණයක් කරන්නෙ කොහොමද කියන එක තමයි අපි හෙවුවේ. මේ නාට්‍ය පුරාවම අපි කතාකරන්නේ ඒ ගැන.
වීදුරු තිර හරහා සමාජගත කරන්න උත්සාහ කරන්නෙ මොකක්ද?
ඇත්තම කතාව කිවුවොත් සමරිසි පුද්ගලයින් හා විවාහ වීම නිසා ඕන තරම් ගැහැනු ළමයින්ගේ ජීවිත අඳුරු වෙලා තියෙනවා. ඒ වගේ පුද්ගලයින් වුණත් තමන්ගේ ඇත්ත එළියට දාගන්න බැරුව, පවුලේ නම්බුව රකින්න ඕන නිසා විවාහයක් කරගෙන ඒ කාන්තාවට ළමයෙක් හදලා දීල ඒකෙන් ගැලවෙන්න උත්සාහ කරන අවස්ථා ඕන තරම් තියෙනවා. ඒ වගේ අය මේ සමාජයේ ඉන්නවා. ඒ වගේ දෙයක් කතාබහට ලක් කරලා සමාජය දැනුම්වත් කරන එක නිර්මාණකරුවකුගේ වගකීමක් විදිහටයි මං දකින්නේ. කලාකරුවෝ විදිහට අපි ඒ කරන්නේ චරිත නිරූපණයක් විතරයි කියන එක දැන් මිනිස්සු දන්නවා. ඒ නිසායි වීදුරු තිර මේ තරම් ජනප්‍රිය වෙලා තියෙන්නේ. මේ කතා කරන්නේ සමාජ යථාර්ථය. ශලනිට ස්තුතිවන්ත වෙන්න ඕන මේ වගේ සංකල්පයක් ගෙනාවට වගේම මාව මේ චරිතයට තෝරගත්තට. මගේ වෘත්තීය රංගනය. මං රංගනය වෙනුවෙන්ම කැප වුණු කෙනෙක්. ඒ නිසා මට හොඳ චරිතයක් ලැබුණොත් අනිවාර්‍යයෙන්ම ඒක භාරගන්නවා.
මහතුන්, සුලෝචන, පුංචි බණ්ඩාර නිලමේ එකිනෙකට වෙනස් චරිත ත්‍රිත්වයක්. ඒ චරිත ගැන ඔබට මොකද හිතෙන්නේ?
ප්‍රේක්ෂකයින්ගෙන් ලැබෙන ප්‍රතිචාරවලට අනුව ඉරගිනි මද්දහන මහතුන් ජාතියේ පියා වුණා. සුලෝචන ජාතියට අගෞරවයක් වගේ. හිද්දලයෝහි පුංචි බණ්ඩාර නිලමේ ජාතියේ වීරයා බවට පත්වේවි. මේ අවුරුද්දට එකම රාමුවකට කොටුනොවී විවිධාකාරයේ චරිත හතරක් කළා. ඒ වෙනුවෙන් සහාය දුන් හැමෝටම ස්තුතිවන්ත වෙනවා.
සුලෝචනට ලැබෙන විවේචනවලට හොඳම පිළිතුරත් අරන් නේද ඔබ නැවතත් පුංචි තිරයට එන්නේ?
පුංචි බණ්ඩාර නිලමේ කියන්නේ රනිල් කුලසිංහගේ ‘හිද්දලයෝ‘ ටෙලි නිර්මාණයේ මගේ භූමිකාව. හිද්දලයෝ ප්‍රියාල් වීරසිංහගේ තිර රචනයක්. 1848 කුඩාපොළ උන්නාන්සේගේ කතාව තමයි එහි අන්තර්ගත වෙන්නේ. සුද්දන්ගෙන් රට බේරගන්න උන්නාන්සේ ආරම්භ කළ කැරැල්ලට ළඟින්ම ඉඳන් උදවු කරපු කෙනෙක්. මෙතෙක් ලැබුණු චරිත අතරින් වෙනස්ම චරිතයක්. මං කොහොමත් ආසයි වෙනස් වෙනස් චරිත කරන්න. පළමුවැනි ෂෙඩියුල් එක අවසන්. ගොඩක් මහන්සි වෙලා ලොකු කට්ටක් කාලා කරන වැඩක්. ඒ කාලේ විදිහට ඇඳුම් පැලඳුම්, බඩු භාණ්ඩ විතරක් නෙවෙයි කතා කරන භාෂාව වගේම කතා කරන විලාසයත් වෙනස්. ‘හිද්දලයෝ‘ ප්‍රේක්ෂකයින් ආදරෙන් වැලඳ ගනීවි කියන විශ්වාසය තියෙනවා. ඉරගිනි මද්දහනේ සමන්තාට සහ මහතුන්ට ආදරේ කළ ප්‍රේක්ෂකයින් නැවතත් අපි දෙන්නව දකින්න බලාපොරොත්තුවෙන් හිටියා. හිද්දලයෝ කියන්නේ මමයි තරින්දියි නැවතත් එකට රඟපාන ටෙලි නිර්මාණයක්.
පුංචි බණ්ඩාර නිලමේ මොන වගේ අත්දැකීමක් ද?
1848 දී සුද්දන්ට විරුද්ධව පැවති කැරැල්ලේ සක්‍රිය දායකත්වය ලබා දුන්නේ කුඩාපොළ උන්නාන්සේ. උන්නාන්සේට ගොඩක්ම උදවු උපකාර කළ, සිංහල ලේ තියෙන, සුද්දන්ගෙන් රට බේරගන්න ලොකු කැක්කුමකින් ක්‍රියා කළ චරිතයක් පුංචි බණ්ඩාර කියන්නේ. හරිම අභියෝගාත්මක චරිතයක්. සාමාන්‍යයෙන් අපි කතා කරන දෙබස් නෙවෙයි තියෙන්නේ සංස්කෘත වචන. අනිත් එක තමයි මට බුද්ධ ගජ්ජයේ, සකස්කඩේ කවි කට පාඩම් කරන්න වුණා. ඒක තමයි ලොකුම අභියෝගය වුණේ. ළමයින්ට උගන්වද්දි ඒවා කටපාඩමින් කියන්න ඕනේ. ඒ නිසා මට ඒවා කටපාඩමින් කියන්න වුණා.
රනිල් කුලසිංහ කියන්නෙත් සුවිශේෂී නිර්මාණ බිහි කරන අධ්‍යක්ෂවරයෙක්. ඔහුගෙන් ලැබුණු සහයෝගය ගැනත් මතක් කරමු?
රනිල් කුලසිංහ අයියත් එක්ක වැඩ කරන්න මං හරිම ආසයි. ඔහුගේ තියෙන්නේ වෙනම අධ්‍යක්ෂණයක්. ඔහුත් එක්ක වැඩ කරනවා කියන්නෙ වෙනම අත්දැකීමක්. නළුවාගේ උපරිමය ගන්න ටේක් එකක් දෙකක් නෙවෙයි දහයක් හරි ගන්නවා. එයාට අවශ්‍ය දේ නළුවාගෙන් එනකල් එයා උපරිම උත්සාහ ගන්නවා. එහෙම නැතුව ඩයලොග් ටික හරිනම් ඕකේ කරන කෙනෙක් නෙවෙයි. ඔහුගේ ඔළුවෙ මැවිච්ච ඇක්ට් එක එනකල් ටේක් දහයක් හරි ගන්නවා. රියල් විදිහටම ෂූට් කරනවා. ඒ කාලෙ විදිහටම ලොකේෂන් හදලා, අශ්වයෝ පිටේ යන ජවනිකා, සටන් ජවනිකා ඒ විදිහටම කරනවා. මං ගොඩක් සතුටු වෙනවා ඒ වගේ අධ්‍යක්ෂවරයෙක් එක්ක වැඩකරන්න ලැබීම ගැන. වේශ නිරූපණයෙන් මාව සම්පූර්ණයෙන් වෙනස් කළේ මනනුවන්. මේක කොටස් හැටක විතර නාට්‍යයක්. පළමුවැනි ෂෙඩියුල් එක මේ වෙද්දි ෂූට් කරල ඉවරයි. ඊළඟ ෂෙඩියුල් එක ලබන මාසෙ පටන් ගන්නවා. සැප්තැම්බර් 6 වැනිදා සිට හිරු නාළිකාවේ විකාශය වීමට නියමිතයි.
පුංචි බණ්ඩාර නිලමේගේ සටන්කාමීත්වය ගැන කතා කරනවා නම්?
1848 කැරැල්ලෙදි යොදා ගන්නෙත් අංගම්පොර සටන් කලාව. මීට කලින් වැඩවලට ඕන වුණු නිසා මං කොහොමත් අංගම්පොර සටන් කලාව ඉගෙන ගත්තා. මේ දවස්වල නැවත ඒක පුහුණු වෙමින් යනවා. ලංකාවේ විශාලම කාස්ට් එකක් යොදා ගත්ත ටෙලි නිර්මාණයක් කිවුවත් හරි. ඒ වගේ පිරිසක් එක්ක වැඩ කරන්න ලැබීමත් සතුටක්. කුඩාපොළ උන්නාන්සෙට ඉන්නේ සංජීව උපේන්ද්‍ර අයියා. බුද්ධදාස විතානාරච්චි, ප්‍රියංකර රත්නායක, විශ්වජිත් ගුණසේකර, ක්ලීටස් මෙන්ඩිස්, තරින්දි ප්‍රනාන්දු, අවන්ති අපෝන්සු, මොරින් චාරුණී, අනුරාධ මල්ලවආරච්චි, දසුනි නවෝද්‍යා ඇතුළු අතිවිශාල පිරිසක් මේ සඳහා රංගනයෙන් දායක වෙනවා. සටන් අධ්‍යක්ෂණය සුමුදු අමල්ක.
හිද්දලයෝ කියන එකේ තේරුම මොකක්ද?
මමත් මුලින්ම ඕක ප්‍රියාල් අයියගෙන් ඇහුවා. පාලනය කරන්න බැරි හිත ශක්තිමත් මිනිස්සුන්ට තමයි හිද්දලයෝ කියන්නේ. දුටුගැමුණු රජතුමාටත් හිද්දලයා කියල කිව්වා. කොහොමහරි අරගල කරලා රට බේරා ගැනීම තමයි ඔවුන්ගේ එකම අධිෂ්ඨානය. ඔවුන් ඕනෑම අභියෝගයක් ජයගන්න පුළුවන් හිත ශක්තිමත් පුද්ගලයින්. සුද්දට රට පාවල දුන්නට පස්සේ අංගම්පොර සටන්කාමීන් ඔක්කොම හොයල මරල දාන්න පටන් ගත්තා. අංගම්පොර සටන් කලාවේ අන්තිම පුරුක් ටික තමයි මෙතන ඉන්නේ. ප්‍රේක්ෂකයිගේ හිත්වල ජාතිය ගැන විශල හැඟීමක් ඇති කරවන නිර්මාණයක් වේවි. ඒක බලද්දි ප්‍රේක්ෂකයින්ට හිතේවි මේ ඉන්නෙ ඇත්තටම චමීර ද කියලත්.
රාවණ ගැන කතා නොකළොත් ඒක අඩුවක් වේවි. අපි ඒ ගැනත් කතා කරලම අපේ කතාව නිම කරමු?
තුෂාර තෙන්නකෝන්ගේ රාවණ ටෙලි කතා මාලාව මේ දිනවල සිනමාපටයක් ලෙසින් රූගත කෙරෙනවා. මං එහි කාලනේමි ඍෂිවරයාගේ භූමිකාවට පණ පොවනවා. ලංකාවේ විශාලම පිරිවැයක් දරලා කරන නිර්මාණයක්. සිනමා ප්‍රේක්ෂකයින්ට ඉතාම ඉක්මනින් බලාගන්න හැකිවේවි. ඇත්තම කිවුවොත් කවුරුහරි හිතනව නම් රඟපාන එක හරි ලේසි වැඩක් කියලා. නෑ ඒකට බැස්ස කෙනා දන්නවා ඒක හරි අමාරු වැඩක් කියලා. කොතරම් අමාරු වුණත් ඒක සාර්ථක වෙලා ලබන ජයග්‍රහණයත් එක්ක ලබන සතුට කියල නිම කරන්න බෑ.
