ස්වාධීන රූපවාහිනියේ විකාශය වන කුෂාන් සමීරගේ අලුත්ම ටෙලිනාට්‍යය වන “මගේම දෝ” හරහා මේ දිනවල අප හමුවට එන දක්ෂ රංගන ශිල්පියෙක් තමයි ආකාශ් බුද්ධි. මේ කතාවේ යළිදු කියන චරිතය උසස් අධ්‍යාපනය හදාරන ජීවිතය දිනන්න වෙර දරන සාමාන්‍ය තරුණයෙක් නිරූපණය කරනවා.
“දැනටමත් මේ නාට්‍යයට ගොඩක් ප්‍රේක්ෂක ප්‍රතිචාර ලැබෙනවා. ඒ නිසා මම හිතනවා මේ ටෙලිනාට්‍යයේ යළිදුගේ චරිතයටත් හොඳ ප්‍රේක්ෂක ප්‍රතිචාර ලැබෙයි කියලා. ළඟදිම දෙරණ නාළිකාවෙන්ද තවත් අලුත් ටෙලි නාට්‍යයකින්ද මට ආදරේ කරන ප්‍රේක්ෂකයන්ට මාව දැක බලා ගන්න පුළුවන්”
පුංචි කාලේ පටන්ම ගුවන් නියමුවෙක් වෙන්න සිහින දැකපු ආකාශ්ට රංගනයට යොමු වෙන්න අදහස පහළ වන්නේ සාමාන්‍ය පෙළ විභාගයෙන් පසු චිත්‍රපට බැලීමත් සමඟයි.
මේ ආශාව තවදුරටත් වර්ධනය කරගන්න, IMPASS ආයතනයේ නාට්‍ය හා රංග කලාව පිළිබඳ පාඨමාලාව හදාරපු ආකාශ්, ක්ෂේත්‍රයේ ප්‍රවීණයන්ගෙන් උපදෙස් සහ අවවාද අනුශාසනාද අරගෙන තියෙනවා. ඔහු ක්ෂේත්‍රයට එන්නේ රුවන් පෙරේරාගේ අනුදැනුම යටතේ.
එහිදී මුලින්ම උරුමක්කාරයෝ ටෙලිනාට්‍යයේ සුළු චරිතයකට රඟ පෑ ඔහු සූරිය වජ්ජසා, ගමනාන්තය, හුස්මක් තරමට මෙන්ම රවිදු විජේරත්නගේ උමතු යන ටෙලිනාට්‍යවලත් අහස් මාලිගා ටෙලිනාට්‍යයේ අකිලගේ චරිතයත්, හිතුවක්කාරී ටෙලිනාට්‍යයේ ශානකගේ චරිතයත්, එන්කවුන්ටර් ටෙලිනාට්‍යයේ උමේශ්ගේ චරිතයත්, මටත් හොරෙන් ටෙලිනාට්‍යයේ දිනුකගේ චරිතයත්, හර්ෂ උඩකන්ද අයියාගේ දියණි ටෙලිනාට්‍යයේ බන්ටි චරිතයත්, ලොක්කිගේ කතාවේ බට්ටාගේ චරිතයත් සිදු කරලා තියෙනවා.
” ආකාශ් බුද්ධි කියන චරිතය ජනතාව අතරට ගියේ අහස් මාලිගා ටෙලිනාට්‍යයේ අකිලගේ චරිතයෙන්. දැනටත් ඒ චරිතයට ලැබෙන ප්‍රතිචාර වැඩියි. දියණි ටෙලි නාට්‍යයේ බන්ටිගේ චරිතය වෙනස් පැතිකඩයකට ගලා ආ නිසා ඒ චරිතය සමාජයේ ගොඩක් කතාබහට ලක්වුණා. බොහෝ ප්‍රේක්ෂක ප්‍රතිචාර ලැබුණු ටෙලි නාට්‍ය චරිතයක් විදියට ලොක්කිගේ කතාවේ බට්ටාගේ චරිතයටත් මගේ රංගන ජීවිතය සාර්ථක කළා ”
ඔහුට ලැබුණු බොහෝ චරිත හාස්‍යජනක වුවත්, සැබෑ ජීවිතයේදී එතරම් විනෝදකාමී චරිතයක් නොවන බවත් තමන්ට ලැබෙන ඕනෑම චරිතයකට සාධාරණයක් කරන්න උත්සාහ කරන බවත් ඔහු වැඩිදුරටත් සඳහන් කළා. රෝස ආදරේ සිනමා සිත්තමේ ගොළුවෙකුගේ චරිතයද රඟපෑමට ඔහුට අවස්ථාව ලැබුණු බව සදහන් කළේ ඉතා සතුටිනි.
රංගනයට අමතරව ඡායාරූපකරණයට සහ ගායනයට දක්ෂකම් දක්වන ආකාශ්, “මගේම දෝ” නමින් ගීතයකුත් නිකුත් කර තිබෙනවා.
රංගන ගමනට අත්වැලක් වුණ රුවන් පෙරේරා අයියාටත්, හර්ෂ උඩකන්ද අයියාටත්, කුෂාන් සමීර අයියාටත් පවුලේ අය ඇතුළු නන් අයුරින් උදව් කළ සියලු දෙනාටමත් ස්තූතිවන්ත වන බව ඔහු ප්‍රකාශ කළා.
“මගේ එකම අධිෂ්ඨානය තමයි ලංකාවේ සම්මානනීය චරිතාංග නළුවෙක් වෙන එක”
