කොණ්ඩෙ දිග දිලිනි. ඒ ඇගේ ක්ෂේත්‍රය තුළ අනන්‍යතාවයි. දිලිනිලා කොතෙක් හිටියත් ඒ අනන්‍යතාව ඇගේය. කාලයක් ඇය ගැන කතාබහක් නැතුවම ගෙවී ගියේය. මේ දිනවල ජාතික රූපවාහිනියේ විකාශය වන ‘ඉර හැංගිලා‘ ටෙලි නිර්මාණයේ ‘දිලීමාත්‘ සමඟින් දිලිනි නැවතත් කරලියට පැමිණ සිටින්නීය. 2008 වසරේ ස්වාධීන රූපවාහිනී අවුරුදු කුමරිය ලෙස කිරුළු පැලඳි ඇය ජානක සිරිවර්ධනගේ පිනි බිංදු ටෙලි නිර්මාණයට දායක වෙමින් කලා ක්ෂේත්‍රයට පිවිසියාය. 2010 වසරේ හොඳම නැඟී එන නිළිය ලෙස රයිගම් සම්මානයෙන් පිදුම් ලබන්නේ ද ඇයයි. හදිසියේම ලංකාවට පැමිණ සිටින දිලිනි ලක්මාලි අප හා කතාබහට එක්වූවාය.
සෑහෙන කාලෙකට පස්සේ නැවතත් දිලිනිව පුංචි තිරයේ දකින්න ලැබෙනවා. මොකද හිතෙන්නේ?
ඉර හැංගිලා ටෙලි නිර්මාණය මේ දිනවල ජාතික රූපවාහිනියේ විකාශය වෙනවා. එහි පළමු ෂෙඩියුල් එක විතරයි කලින් අපි ඉවර කරලා තිබුණේ. මං විවාහයෙන් පස්සේ නවසීලන්තයේ පදිංචියට ගියා. ඉර හැංගිලා ජාතික රූපවාහිනියේ විකාශය කිරීමට භාර ගැනීමත් එක්ක ඉතිරි කොටස් රූගත කිරීම සඳහා මට ලංකාවට එන්න වුණා. මේ දවස්වල නැවතත් මගේ රටේ ජනතාවගේ ආදරය ලබනවා. ලංකාවෙන් ඈත් වෙලා හිටියත් ඔවුන්ට මාව අමතක වෙලා නෑ කියලා හිතෙද්දී ලොකු සතුටක් දැනෙනවා.
ඔබ විදෙස්ගත වෙලා ඉඳලා නැවත රංගනයට පිවිසෙන්නේ සෑහෙන කාලෙකින්. අභියෝගයක් වුණේ නැද්ද?
අභියෝගය වුණේ රංගනය නෙවෙයි. මං ලංකාවට එද්දිත් ඉර හැංගිලා විකාශය ඇරැඹිලා තිබුණේ. පහුගිය 18 වැනිදා උදේ 12.30 වගේ ලංකාවට ආවේ. ගෙදර ඇවිත් පොඩ්ඩක් නිදාගෙන ඉඳලා හවස 5 වෙද්දි ෂූටින්වලට ලෝකේෂන් එකට ගල්ගමුවේ යන්න වාහනේ ආවා. 19 ඉඳන් ෂූටින් පටන් ගත්තා. නවසීලන්තයේ මේ දවස්වල වින්ටර් එක. ආපු ගමන්ම මෙහේ දේශගුණයට මුහුණ දෙන්න වුණු එක තමයි අභියෝගය වුණේ. රංගනය ගැටලුවක් වුණේ නැහැ. කොහොමත් මගේ ඔළුවේ දිලීමා කියන චරිතය තිබුණා. මොන වෙලාවෙ හරි නැවත කතා කරයි කියන විශ්වාසය මට හිතේ තිබුණ නිසා දිලීමා මගේ ඇඟෙන් ගිලිහුණේම නැහැ. රූපවාහිනී චැනල් එක ලැබුණ ගමන්ම අධ්‍යක්ෂ චාරුක මට කතා කරලා ඇහුවා දිලිනිට එන්න පුළුවන් ද කියලා. ඒ වෙද්දි මට එන්න පුළුවන් වටපිටාවක් තිබුණු නිසා සති දෙකක් ඇතුළත ප්‍රඩක්ෂන් එකෙන් සියල්ල සූදානම් කරලා මාව ලංකාවට ගෙන්න ගත්තා. පහුවෙනිදා ඉඳන්ම ෂූටින් පටන් ගත්තා.
දිලීමා කියන්නෙත් ගැමි චරිතයක්. දිලිනිට ලැබෙන්නෙම ගැමි චරිත නේද?
මාත් ආස කරන, මගේ ටයිප් එකට ගැළපෙන විදිහ ඒක කියලයි මාත් විශ්වාස කරන්නේ. ප්‍රේක්ෂකයින් වඩාත්ම කැමතිත් මාව ඒ විදිහට දකින්න. මං ලංකාවෙන් යන්න කලින් අන්තිමට සම්බන්ධ වුණේ හිත ළඟ හිනැහුණා ටෙලි නිර්මාණයට. දිලීමා කියන්නේ දරුවෙක් එක්ක තනි වුණු, ප්‍රශ්න රාශියකට මුහුණ දෙමින් තනියම ජීවිතේ ගැටගහ ගන්න දිරිය කාන්තාවක්. දිලීමට මේ වෙද්දිත් ගොඩක් හොඳ ප්‍රතිචාර ලැබෙනවා. මේ දවස්වල ලංකාවේ එහෙට මෙහෙට යද්දි මට දිලීමා කියලා කතා කරනවා. ඒ ගැන ගොඩක් සතුටුයි.
චරිතයක් ආදේශ නොකර දුරු රටක ඉන්න ඔබම ගෙන්න ගන්න හේතුව මොකක්ද?
‘ඉර හැංගිලා‘ කියන්නේ අධ්‍යක්ෂ චාරුක දිල්හාර අරනායකගේ කුලුඳුල් ටෙලි නිර්මාණය. ඔහු වසර 15ක් තිස්සේ සහාය අධ්‍යක්ෂණයෙන් අත්දැකීම් ලබලා පළපුරුද්ද තිබුණට මේක ඔහුගේ පළමු අධ්‍යක්ෂණය. තිර පිටපත ලියන්නෙත් දක්ෂ පළපුරුදු තිර රචක සුනෙත් වර්ණසූරිය. නිෂ්පාදනය ප්‍රින්ස් මල්දෙණියගේ. ආනන්ද කුමාර උන්නැහේ, නෙතලි නානායක්කාර, මල්කාන්ති ජයසිංහ, චානුක ප්‍රබුද්ධ. කසුනි කාවින්දි, සංජය මුරමුදලි ඇතුළු පිරිසක් රංගනයෙන් එක්වෙනවා. චාරුක මට පිටපත දෙද්දිම කිව්වා දිලීමාට ඔයාව තමයි ඔළුවට ආවේ කියලා. එතැනදි සුනෙත් කිව්වෙත් දිලීමා ලිව්වේ දිලිනිව හිතේ තියාගෙනමයි කියලා. ඒ කතාත් එක්ක මටත් හරි ආස හිතුණා. මේ වෙද්දි ඉතිරි කොටස් රූගත කෙරෙමින් යනවා. ගොඩක් අය දන්නවා මං විදෙස්ගත වෙලා ඉන්න බව. වැඩක් අතරමඟ දාල නොගිහින් වෙන නිළියක් ආදේශ කරන්න ඉඩ නොදී මමම ඇවිත් කරන එක අගය කරලා ගොඩක් කමෙන්ට්ස් තිබුණා.
චරිත්ගෙන් ලැබෙන සහයෝගය මොනවගේද?
මගේ සැමියා චරිත් ෆොන්සේකා. ඔහු රැකියාව කරන්නේ නවසීලන්තයේ. හරිම ලස්සන පරිසරයක අපි ජීවත් වෙන්නේ. ඔහුත් කලාකාමී හදවතක් තියෙන කෙනෙක්. ඒක මගේ කලා කටයුතුවලටත් ලොකු හයියක් වුණා. සින්දු කියන්න, චිත්‍ර අඳින්න වගේම ඡායාරූපකරණයටත් ඔහු ගොඩක් දක්ෂයි. අපි දැන හඳුනගන්නේ ෆේස්බුක් එකෙන්. ඔහු මගේ ෆ්‍රෙන්ඩ් කෙනෙක්. මං වේදිකා නාට්‍යයකට නවසීලන්තේ ගිය වෙලාවේ ගත්ත ෆොටෝ එකක් ෆේස්බුක් දැම්මා. ඒක දැකලා මාත් ඔය ලොකේෂන් එක ආසන්නයේ තමයි ඉන්නේ කියලා ඔහු මට එවලා තිබුණා. ඒ කතාව දුර දිග ගිහින් වසර දෙකක් ආදරය කරලා අපි විවාහ වුණා. විවාහ වෙලත් දැන් අවුරුදු දෙකක්. ඔහුගෙන් ලැබෙන සහයෝගය ගැන කියන්න වචන නෑ. ඔහු මට හමුවුණේ ඇත්තටම මගේ වාසනාවකට. අපි හරිම සතුටින් ජීවිතේ ගෙවනවා.
