සත්‍යය හෙළි වෙන­කම් බලන් ඉන්නවා - චූලා පත්මෙන්ද්‍රන්

Monday, October 11, 2021 , 0 Comments




කලින් කලට සමාජ මාධ්‍යයෙන් විවිධ පුවත් කරළියට එනවා. ඒ පුවත් අතරට ප්‍රසිද්ධ චරිතවල නම් එකතු වීම නම් අරුමයක් නෙවෙයි. කෙසේ වෙතත් ප්‍රවීණ මෝස්‌තර නිරූපිකාවක් වන චූලා පත්මෙන්ද්‍රන් කුමාරපතිරණ ගැනත් පහුගිය දිනවල විවිධ කතා සමාජ මාධ්‍ය තුළ සැරිසරන්නට වුණා. ඒ අතර ප්‍රබල දේශපාලඥයකු සමඟ එල්ලුම් ගහ බලන්න ගිය සුරූපිනිය ඇය කියලත් සමාජ මාධ්‍ය තුළ හුවමාරු වුණා. ඔය කරුණු එසේ වෙද්දී පසුගිය දිනෙක ඇයව කොළඹ අපරාධ පරීක්ෂණ දෙපාර්තමේන්තුවට(CID) කැඳවා තිබිණි. මේ සියල්ල චූලා පුවත්පතක් සමඟින් මෙලෙස විස්තර පවසා තිබුනා.


අපි CID එකට ගිය කතාවෙන්ම කතාව පටන් ගමු


ඔව්. මේ වෙද්දී අත්අඩංගුවේ සිටින කීර්ති රත්නායක නමැති මාධ්‍යවේදියාව මා හඳුනන්නේ කොහොමද කියන එක අහන්න තමා මාව කැඳවා තිබුණේ.


ඉතින් මම දන්නා දේ ප්‍රකාශයක් ලෙසින් ලබා දුන්නා.


 


ඇත්තටම චූලා කොහොමද ඔහුව දන්නේ


විශේෂ දැනහැඳුනුම්කමක් නැහැ. මේ ක්ෂේත්‍රයට ආව මුල් කාලයේ ඉඳන් අද වෙනකම් ම මාධ්‍යවේදීන් අපිට කතා කරනවා. ඒක ඇත්තටම සාමාන්‍ය දෙයක්. දැන් බොහෝ විට මාධ්‍යවේදීන් සම්මුඛ සාකච්ඡා ගන්නේ දුරකතනයෙන්. මේ මොහොතේ ඔබ පවා මා සමඟ මේ සංවාදය ගන්නේ දුරකතනයෙන්නේ. ඉතින් ඒ වගේ කීර්ති රත්නායක නමැති මාධ්‍යවේදියාත් මා සමඟ කතා කරා. ඔහු පමණක් නෙවෙයි විදෙස් මාධ්‍යවේදීන් පවා අපිට දුරකතන ඇමතුම් දෙනවා. මම දන්නවා පුරවැසියෙක් විදිහට වරදක් කරලා නැහැ කියලා. ඒ නිසා CID එකට එන්න කිව්වම මම ගිහින් කට උත්තරයක් දුන්නා.


 


එතකොට මේ එල්ලුම්ගහ බලන්න ගියා කියලා ගිය කතාවේ ඇත්ත නැත්ත මොකක් ද?


මිනිස්සු මරණ තැනක් බලන්න රෑට බීලා යන්න තරම් මගේ මනස විකෘති නැහැ. කෙටියෙන්ම කියනවා නම් ඔය කියන දේශපාලඥයාව මම පෞද්ගලිකව දැක කතා බහ කරලාවත් නැහැ. අනිත් එක එතනට ගිය කාන්තාව විසින් වාහනය පදවාගෙන ගිහින් තියෙනවා කියන්නේ, මම අදටත් වාහන පදවන්නේ නැහැ. ඒ එක්කම මම නිතර ප්‍රභූ කියා ගන්නා පැලැන්තිය ඇසුරු කරන කෙනෙක් නෙවෙයි. මම තවත් එක් සාමාන්‍ය පුරවැසියෙක් විතරයි. මේ වෙද්දී ලංකාවේ මිනිස්සු ගොඩක් අය දන්නවා කවුද ඔහොම ගියේ කියලා. ඉතින් කවදා හරි සත්‍ය එළියට එයි.


 


සමාජ මාධ්‍ය එක්ක ඔබේ නම කොහොමහරි එකතු වෙනවා, මේ දේවල් දකින්නේ කොහොමද?


මම බෞද්ධයෙක්. අටලෝදහම එක්ක ජීවත් වෙන කෙනෙක්. ඒ නිසා නින්දා ප්‍රසංසා ලාබ අලාබ මට විතරක් නෙවෙයි මේ ලෝකයේ ජිවත් වෙන හැමෝටම පොදුයි. මම මේ දේවල් දකින්නේ අපි අතින් වුණු කර්මයක් අපි ගෙවනවා එක්කම තව කෙනෙක් අකුසලයක් රැස් කර ගන්නවා විතරයි.


 


කට කතා ගොසිප් චූලා දකින්නේ කොහොමද?


සයිබර් බුලින් නම් මට ආදාළ ම නැහැ. මොකද මට තව මනුස්සයෙක් හිතන විදිය වෙනස් කරන්න බෑ. හැබැයි මම හැමදාම හිතන දේ තමා කවදා හරි ඇත්ත එළියට එනවා කියන එක. හැමදාම අයුක්තිය වෙනුවෙන් පෙනී සිටිය කෙනෙක් මම. අපි හැමෝටම කරපු කියපු දේවල් ගැන තීරණය වන දවසක් එනවා. එදාට උඩ ඉන්න දෙවියන් තිරණය කරයි. අනිත් එක අපේ රටේ හොඳ අහන්න වෙන්නේ මැරුණට පස්සේ.ඒ නිසා සියල්ලට නොසැලී මුහුණ දෙන්න ශක්තිමත් හිතක් හදාගෙන ඉන්න ඕනේ.


 


චූලා මේ දවස් වල මොනවද කරන්නේ


මේ දිනවල CHULPADMENDRA CATWALK STUDIO හි ඔන්ලයින් වැඩවලට ඔටිසම් දරුවන් ගැන සහ බර අඩු කරගන්නට අවශ්‍ය කරන වැඩසටහන් සඳහා තමා වැඩි කාලයක් දීලා තියෙන්නේ. මේ වෙද්දී විදෙස් සිසුන් පවා අපි එක්ක එකතු වෙලා ඉන්නවා. ඉස්සරහට අපි ටැලන්ට් බෑන්ක් එකක් ප්ලෑන් කරලා තියෙනවා.





නිරූපණ ක්ෂේත්‍රයට පිළිගැනීමක් නැහැනේ


ඒකට වෙලා තියෙන්නේ රැම්ප් එකක්වත් කරපු නැති ළමයින් ෆොටෝ ශුට් එකක් දෙකක් කරලා ඒ අය නිරූපණ ක්ෂේත්‍රයේ ඉන්නේ කියලා කියනවා. මොඩ්ල් කෙනෙක් කියන්නේ ඊට එහා ගිය දෙයක්. අනිත් එක තමා පැජන්ට් ෂෝ සංවිධායකයන් කියා ගන්නා පිරිසක් නිසා මේ ක්ෂේත්‍රයට වෙලා තියෙන හානිය සුළුපටු නැහැ. පැජන්ට් එකකට පෙනී සිටි පමණින් මොඩ්ල් කෙනෙක් වෙන්නේ නැහැ. නිරූපණ ක්ෂේත්‍රය කියනෙ වෘත්තීය ගරුත්වය ඇතිව කරගෙන යා හැකි හොඳ කලාවක්. හොඳම උදාහරණය ඇපල් සමාගමේ නිර්මාතෘ වූ ස්ටීව් ජොබ්ස්ගේ දුව මේ සැරේ පැරිස් ෆැෂන් වීක් එකේ මොඩ්ල් කළා. දැනුමක් නැතිව කරගෙන යන පිරිස නිසා තමා ලංකාවේ මේ නිරූපණ ක්ෂේත්‍රයට පිළිගැනීමක් නැති වෙලා තියෙන්නේ. ඒ අතර වෘත්තීය ගරුත්වය තියාගෙන වැඩ කරන අයත් ඉන්නවා.


 


මේ වෙද්දී කොහොමද තාරුණ්‍යයේ තියෙන නැඹුරුව


හොඳ ප්‍රවණතාවක් තියෙනවා. මගේ පන්තිවලට විවිධ වයස් සිමාවල දරුවන් සහභාගී වෙනවා. ඇතැම් අය පෞරුෂත්වය වර්ධනය කර ගැනීමට අපි එක්ක එකතු වෙලා ඉන්නවා. විශේෂයෙන්ම මම මගේ පන්තිවලට සහභාගී වන 16න් පහළ කුඩා දරුවන්ට නම් ඒ අයගේ දෙමාපියන් හෝ භාරකරුවෙක් එක්ක තමා පන්තියට සහභාගී කර ගන්නේ. මමත් අම්මා කෙනෙක් නිසා මට අවශ්‍ය වෙන්නේ ළමයෙක්ගේ ආරක්ෂාව.


 


කෙනෙක් කැමති නම් මේ ක්ෂේත්‍රයට එන්න, මොකක් ද දෙන උපදෙස


අරමුණක් ඇතිව මේ ක්ෂේත්‍රයට ආදරයක් ඇතිව එන්න. එහෙම නැතිව ජනප්‍රිය වෙන්න බලාගෙන මේ ක්ෂේත්‍රයට එන්න එපා. අනිත් දේ තමා අධ්‍යාපනය කඩාකප්පල් කරගෙන මේ ක්ෂේත්‍රයට එන්න එපා. මේක කලාවක් උගත්කම විනය ආත්ම විශ්වාසය පෞරුෂය කියන හැමදේම ඉතාම වැදගත් නිරූපණ ක්ෂේත්‍රයට. ධනය බලය එක්ක මේ ක්ෂේත්‍රයේ ගමනක් යන්න බෑ. ලංකාව ඇතුළෙ මොන දේ කළත් ජාත්‍යන්තරයට ගියාම ඒ අය බලන්නේ ටැලන්ට් එක විතරයි. ඒ නිසා තමා කැරොලයින් ට වාසනාව ලැබුණේ අපේ රටට කිරුළක් ගේන්න. ඇයට තිබ්බ බුද්ධිය ශරීරයේ හැඩය, පැහැය, කැපවීම මේ හැමදේම තමා ජයග්‍රණයට හේතු වුණේ.


 


නිරූපණ ක්ෂේත්‍රයේ ඉස්සරහට යන්න සුදු වෙන්න ඕනෙද?


අද බොහෝ දෙනා හිතන්නේ සුදු වුණාම ඔක්කොම හරි කියලා. ජාත්‍යන්තර තරගවල සුදු අය ඕනේ තරම් ඉන්නවා. අපිට උරුම පැහැයක් තියෙනවා. එහි වටිනාකම නොදන්නා අය තමා බිලිචින් හෝ ඉන්ජෙක්ෂන්වලින් සුදු වෙන්න හදන්නේ. මුලින්ම තමන් තමන්ට ආදරය කරන්න. එහෙම නැතුව තමන්ට උපතින් ලැබුණු පැහැය වෙනස් කරගෙන වැඩක් නැහැ.