දුක්විඳලා මහන්සියෙන් මේ තැනට ආවේ, ඒක මට වටිනවා - ජගත් බෙනරගම

Thursday, October 14, 2021 , 0 Comments




රංග ශිල්පීන් අතර කැපී පෙනෙන තවත් සුන්දර හදවතක් ඇති ඒ සුන්දර මිනිසෙකු ලෙසට ජගත් බෙනරගමව හඳුන්වන්නට පුළුවන්. වේදිකාවේ ඉඳලා කලාව පෝෂණය කිරීමට ඔහු කළ කැපකිරීම අතිමහත්ය. කාලෙන් කාලෙට විවිධ චරිත ජීවමාන කරන ඔහු මේ දිනවල ‘රතු’ ලෙසට ඔබට සමීප වුණු නිසා කාලෙකට පස්සේ ඔහු පුවත්පතක් සමඟින් සමග ආගිය තොරතුරු කතා කර තිබුනා.


ජගත් කාලෙකට පස්සේ නැවැත ‘රතු’ ලෙසින් ඔබ ප්‍රේක්‍ෂකයන්ට සමීපවෙලා. ඉතින් කියමු ඒ ගැන බලන්න?

‘චලෝ’ ටෙලිනාට්‍යයේ විකාශය වන අතරමගදී තමයි මම ‘රතු’ ලෙසට සම්බන්ධ වෙන්නේ. මැරුණ චරිතයක අතීත ආවර්ජනයක් ලෙසට තමයි ‘රතු’ව නැවැත ඉස්මතු වෙන්නේ. සමීර හසුන් තරුණ අධ්‍යක්‍ෂවරයෙක්. ඔහුගේ මේ ‘චලෝ’ ටෙලිනාට්‍යයට මාව සම්බන්ධ කරගැනීම ගැන මම ඔහුට ස්තුතිය පුදකරනවා. මම මෙයට පෙරත් ඔහු සමග වැඩ කරලා තිබෙන නිසා හරිම පහසුවෙන් රූගත කිරීම් කරගෙන යනවා.


ඔබ සම්බන්ධ වුණු අනෙකුත් නිර්මාණවලට වඩා ‘චලෝ’ ටෙලිනාට්‍යයේ සුවිශේෂී බවක් දැනුණාද?

ඇත්තටම එය ගැන සඳහන් කළ යුතුමයි. ‘චලෝ’ ටෙලිනාට්‍යයේ අපිට චරිත නිරූපණ කිරීමට තිබුණේ පසුබිම් සංගීතයත් සමගයි. මම මෙයට පෙර කිසිම ටෙලිනාට්‍යයක මේ විදියට චරිත නිරූපණය කරලා තිබුණේ නැහැ.මොකද අපි මෙයට පෙර රඟපාපු නිර්මාණවල පසුබිම් සංගීතය එකතු කරන්නේ නිර්මාණය සංස්කරණය කරන අවස්ථාවලදී තමයි.


ඉතින් පසුබිම් සංගීතය මේ විදියට රූගත කිරීම් කරන අතරතුර දීම සපයන කොට අපි කරන චරිතය නිරූපණය කිරීමට තවත් ජවයක් ඇති වෙනවා. මම හිතනවා ‘චලෝ’ ටෙලිනාට්‍යයේ තරුණ නවක පිරිසක් චරිත නිරූපණය කරනවා. ඉතින් මේ නිර්මාණය සාර්ථක වීමට විශේෂ හේතුවක් මෙය වෙන්නත් පුළුවන්.


වේදිකා නාට්‍යයක් තුළදී නම් ඔබ මේ අත්දැකීම් අනන්තවත් විඳලා ඇති?

ඔව්… එය මම විතරක් නෙවේ, වේදිකා නාට්‍යවල රඟපාපු සියලුම ශිල්පීන් අත්විඳලා තියෙනවා. වේදිකා නාට්‍ය පුහුණුවීම් කරන කාලයේ ඉඳලම අපිට මෙය අත්විඳන්න ලැබුණු නිසා හොඳ සාර්ථක රංගනයක් ප්‍රේක්‍ෂකයන්ට සජීවීව බලන්න ඉඩකඩ සැලසෙනවා. නමුත් ටෙලිනාට්‍යයක මෙහෙම කරන පළමු අවස්ථාව වෙන්නට පුළුවන් මම හිතන විදියට.


ඔබ කාලෙකට නිර්මාණවල දැකගන්නට පුළුවන්. හැබැයි කාලෙකට ඔබ ඉන්නවාද කියලත් අමතක වෙන කාලයක් එනවා?

මම එහෙම තෝරා බේරාගෙන රඟපාපු කාලයක් තිබුණා. නමුත් දැන් එහෙම කරන්න අමාරුයි. හැබැයි ඉතින් මම දීර්ඝ ටෙලිනාට්‍ය සඳහා සම්බන්ධ වීමට කැමැති නැහැ. අවම කොටස් දෙසීයක විතර නිර්මාණයක් වුණාට ප්‍රශ්නයක් නැහැ. හැබැයි ඉතින් මම වඩාත්ම කැමැති කොටස් පනහක විතර විකාශය වන නිර්මාණ සඳහා සම්බන්ධ වෙන්න තමයි. මොකද අපිටත් පහසුයි. අපි කරන චරිතවල ඒකාකාරී බවින් මිදිලා හොඳ චරිත නිරූපණය කරන්නත් පුළුවන් එතකොට තමයි.


පසුගිය කාලය ඔබ ලොකු කැරැල්ලකට සම්බන්ධ වෙලා අරගලයක් කලා නේද?

සුනිල් ආරියරත්න අධ්‍යක්‍ෂණය කරන ‘ක්‍ෂිර සාගරය කැළඹෙයි’ චිත්‍රපටයේ කැරැල්ලක මමත්, හේමාල් රණසිංහත් කණ්ඩායම් නායකයන් ලෙසට වැඩ කළා. කාලෙකට පස්සේ හොඳ චිත්‍රපටයකට සම්බන්ධ වුණා.


වර්තමානයේ නිර්මාණ ගුණාත්මක බවින් මිදී සැකසෙන බව අපට අසන්නට ලැබෙනවා, මෙයට හේතුව?

දැන් කලාව ව්‍යාපාරයක් බවට පත්වෙලා. ඉතින් එහෙම කලබලයෙන් කරන්න ගියාම තමයි ඔහොම ප්‍රශ්න මතුවෙන්නේ. දැන් ගුණාත්මක නිර්මාණ පිටපත් අඩුවක් තිබෙනවා. එහෙම රසවත් නිර්මාණ රචනා කරන රචකයන් දැන් අඩුයි. ඒ කාලේ සෝමවීර සේනානායක, කේ. බී. හේරත්, ආනන්ද අබේනායක වැනි සුවිශේෂී පිටපත් රචකයින් නිර්මාණ බිහි කළා.


මම දකින විදියට වර්තමානයේ සද්ධාමංගල සූරිය බණ්ඩාරගේ නිර්මාණවල සුවිශේෂී බවක් දකිනවා. ඒ පිටපත් සාර්ථකව රචනා කරන නිසා තමයි ඒ නිර්මාණ සඳහා ප්‍රේක්‍ෂකයන් ලොකු නැඹුරුවක් දක්වන්නේ.


අලුත් ප්‍රේක්‍ෂක පිරිසකට නැවැත ‘උක්කුවා’ දැකගන්නට පුළුවන්කමක් ලැබී තිබෙනවා. කොහොමද එයට ලැබෙන ප්‍රතිචාර?

‘පබා’ ටෙලිනාට්‍ය නැවැත සතියේ දවස්වල දහවල් විකාශය වෙනවා. ඉතින් මම එහි නිරූපණය කළ ‘උක්කුවා’ තවමත් ප්‍රේක්‍ෂකයන්ට මතකයි. 2008 වසරේ තමයි ‘පබා’ අවසාන වරට විකාශය වුණේ. ඉතින් දැන් නැවැත විකාශය වෙන කොට ඒ ප්‍රේක්‍ෂක පිරිසට මගේ දරුවොත් එකතුවෙලා ඉන්නවා රසවිඳින්න.


එදා නිර්මාණ සැකැසුණු විදිහ හා අද නිර්මාණ සැකැසුණු විදිහ අතර ඔබ වෙනසක් දකිනවා නේද?

ඒ කාලේ නිර්මාණවල චරිත අදටත් මතක ඒකයි. මොකද පිටපත අරගෙන ගෙදරට එනවා මට මතකයි. පිටපත කියවලා චරිතයට කැමැති නම් චරිතයට ගැලපෙන විදියට රංග වස්ත්‍රාභරණ නිර්මාණය කරලා පෙර පුහුණුවක් ඇතිව නිර්මාණය කරනවා. අද එහෙම නෙවෙයි. දුරකතනයෙන් පිටපත එවනවා.


ගෙදර තියෙන ඇඳුමක් අරගෙන ගිහින් මැරීගෙන රඟපාලා තමයි අපිට ගෙදරයි එන්න වෙලා තියෙන්නේ. මම මේ තැනට අද ඇවිල්ලා ඉන්නේ දුක්විඳලා, මහන්සිවෙලා වැඩ කරපු නිසා. ඒ වටිනාකම මට මිල කරන්න බැහැ. ඒ තරමට මට මේ ආපු ගමන වටිනවා.


වසන්ත විතාරණගේ