මෙගා වලට මොකද වෙන්නේ?

Tuesday, August 24, 2021 , 0 Comments




මේ දවස්වල රටේ පවතින තත්ත්වයත් එක්ක සියලුම ජනතාව පීඩාවිඳින මොහොතක් තමයි දැන් උදාවෙලා තියෙන්නේ. මේ පීඩාවල් මැද්දේ ඔබේ මනස සුවපත් කිරීමට කලා ක්‍ෂේත්‍රයේ ශිල්පීන් විශාල කැපකිරීමක් පසුගිය දවස්වල සිදුකළා. ඔවුන්ද පසුගිය කාලය ඇතුළත මේ කොරෝනා වසංගතයට මුහුණ දුන්න බව ඔබ දන්නවා ඇති. එහෙත් මේ දිනවල විකාශය වන මෙගා ටෙලිනාට්‍ය රූපගත කිරීම් ඉදිරියට සිදු කරනවාද, නැතිනම් ඒ සියල්ලම නතර කළයුතුද කියන තීරණය මත ක්‍ෂේත්‍රයේ විවිධ අයගේ විවිධ අදහස් සමාජ මාධ්‍ය ජාල හරහා පැතිරෙනවා. ඉතින් මෙගා ටෙලිනාට්‍ය සඳහා දායකවන ශිල්පීන් කිහිප දෙනෙකුගෙන් අපි එය ගැන විමසා බැලුවා ඔවුන්ගේ අදහස් කොයි වගේද කියලා.


රූපගත කිරීම් කරන්න ඕනේ…

හිරුෂි වසුන්දරා 


ටෙලිනාට්‍ය නතර කිරීම වැදගත් කියලා මම අදහස් කරන්නේ නැහැ. රූපගත කිරීම් කටයුතු ඉතාමත් ක්‍රමවේදයක් යටතේ ආරක්‍ෂාකාරීව, පිළිවෙළකට කිරීමයි වැදගත්.


මේ මොහොතේ රටේ ජනතාව මානසිකව පීඩා විඳින මොහොතක ඔවුන්ට රසවින්දනයක් ලබා දිය යුතුයි. මේ දවස්වල මම ‘ටීචර් අම්මා’ ටෙලිනාට්‍යයේ තමයි වැඩ කරන්නේ.


එහි රූපගත කිරීම් බෙලිහුල්ඔය ප්‍රදේශයේ තමයි සිදුකරන්නේ. අපේ අධ්‍යක්‍ෂතුමා අපි සියලු දෙනාම සුරක්ෂිතව රකිමින් ඉතාමත් පිළිවෙළට වැඩකටයුතු කරනවා.


අපිට කාගේවත් පිහිටක් නෑ…

දිලිනි ලක්මාලි



‘වලවෙට්ටුවා’ ටෙලිනාට්‍යයේ තමයි මම පසුගිය දවස්වල එකදිගට වැඩ කළේ.


අපි සියලුමදෙනාගේම ආරක්‍ෂාව ගැන හිතලා ටෙලිනාට්‍ය අධ්‍යක්‍ෂ රනිල් කුලසිංහ ‘වලවෙට්ටුවා’ රූපගත කිරීම් පසුගියදා නතර කළා. එක දිගට විකාශය වෙන නිර්මාණයක් වුණත් ඔහු ගත්ත මේ තීරණය ඉතා අගයකොට මම සලකනවා.


රංගන ශිල්පිනියන් විදියට අපිට එහෙම මාක්ස් දාගෙන වැඩ කරන්න අපහසුයි. අපිට කාගෙවත් රැකවරණ පිහිටක් නැහැ. මේ වෙලාවේ අපි රැකිය යුතුයි සියලුම කලාකරුවන්. මේ වෙලාවේ එකම තීරණයකට ඇවිත් ජීවිතය ගැන හිතන්න.



හැමදේකටම කළින් ජීවත් වෙලා ඉන්න ඕනේ…

ඩිස්නි රාජපක්‍ෂ



පසුගිය දවස්වල මමත් නිර්මාණ කිහිපයක වැඩ කළා. ඒ මොහොතේ මම දැක්කා සියලුමදෙනා වැඩ කරන පිළිවෙළ.


මේ ක්‍ෂේත්‍රය දැන් වගකීමක් නැති තැනට පත්වෙලා. මේ මොහොතේ මුදල ගැන නොහිතා ජීවිත ආරක්‍ෂාව ගැන සිතීමයි වැදගත්.


ඒ නිසා රූගත කිරීම් නතර කිරීම ඉතාමත් වැදගත් මොහොතක් තමයි උදාවෙලා තියෙන්නේ. මේ මොහොතේ රජය මැදිහත් විය යුතුයි කියලා මම කියන්නේ නැහැ. මොකද රජය කලා ශිල්පීන් ගැන හිතලා කිසිම දෙයක් කරන්නේ නැහැ. සියලුම ශිල්පීන් එකම තීරණයක ඇවිත් ගතයුතු තීරණයක් තමයි දැන්.


අලුත් නිර්මාණවලට යන්නේ නෑ…

චන්දිමා කරුණාදාස




මේ දිනවල ‘පාරදිගේ,’ ‘වියළි’ ටෙලිනාට්‍ය දෙකට සම්බන්ධවෙලා වැඩ කරගෙන යනවා.


නමුත් මේ දිනවලනම් මට රූගත කිරීම් නැහැ. සම්බන්ධ වුණත් ආරක්‍ෂිතව අදාළ උපදෙස් පිළිපදිමින් වැඩකටයුතුවල නිරත වෙනවා. රටේ පවතින තත්ත්වය එක්ක අලුත් නිර්මාණ මම බාර ගන්නේ නැහැ.


තවම ‘කොවිඩ්’ එක්ක ගන්න තීන්දු, තීරණ එක්ක අපි වැඩකටයුතු කරන්න සූදානම්.


රූපගත කිරීම් නවත්වන්න ඕනේ…

දමයන්ති ෆොන්සේකා



මේ මොහොතේ අපි සියලුම දෙනාම ජීවිතයත්, මරණයත් අතර සටන් කරන මොහොතක් උදාවෙලා තියෙන්නේ. මොන දේ කරන්නත් කලින් අපි සියලුම දෙනා ජීවත් විය යුතුයි. පසුගිය දවස්වල මම ‘සිහින ගෙනෙන කුමරියේ’ ටෙලිනාට්‍යයේ වැඩකටයුතු කරගෙන හිටියේ. ඒ නිර්මාණයට සම්බන්ධ වුණු ශිල්පීන් දෙදෙනෙකුටත් ‘කොවිඩ්’ රෝගය වැලඳුණු නිසා ටෙලිනාට්‍යයේ රූපගත කිරීම් නතර කළා.


මම ප්‍රතිපත්තියක් ලෙස කවදාවත් සම්බන්ධ වුණු නිර්මාණයක් අතරමග දාලා ගිහින් නැහැ. මේ මොහොතේ රූපවාහිනී නාලිකාවලට පාඩු ඇති. නමුත් ටෙලිනාට්‍ය අධ්‍යක්‍ෂවරුන්, නිෂ්පාදකවරුන්, රූපවාහිනී නාලිකාවල අධ්‍යක්‍ෂ මණ්ඩලය, ඒ වගේම සියලුම ශිල්පීන් එකම තීරණයකට ඇවිත් සාකච්ඡා කරලා රූපගත කිරීම් නතර කිරීම වැදගත් කියලයි මම හිතන්නේ. මේ මොහොතේ වෛද්‍යවරුන්ගේ උපදෙස් අපි අනුගමනය කරමින් රැකිය යුතු මොහොතක් උදාවෙලා තියෙන්නේ.


මේ ‘කොවිඩ්’ වසංගතය දුරුවුණු මොහොතක අපි සියලුමදෙනා නැවැත පටන්ගමු. මගේ රටට නිදුක් නිරෝගී, සුවපත් රටක් උදාවේවා කියලා මම හදවතින්ම ප්‍රාර්ථනා කරනවා.


-වසන්ත විතාරණගේ-