ඇයත් මේ දිනවල නිර්මාණ රැසක් ඔස්සේ නිතර දකින ජනප්‍රිය රංගන ශිල්පිනියකි. ‘හත්වැනි මනාලිය ටෙලි නිර්මාණයේ නාද්‍යා වන ඇය ‘අසංධිමිත ටෙලි නිර්මාණයේ තරිනිය. අලුත් සර්හි ශකිලාය. ප්‍රවීණ රංගන ශිල්පී ශ්‍යාම් ප්‍රනාන්දුගේ කොටුව පිටකොටුව ටෙලි නිර්මාණයේ ධනුෂ්කාය. පසුගියදා විකාශය ඇරැඹුණු හසුන් සමීරගේ වැලි කඩදහි ටෙලි නිර්මාණය ඔස්සේද ඔබ හමුවන්නීය. ඉදිරියේ විකාශයට නියමිත රිදී ටෙලි නිර්මාණයන්ද ඔබ හමුවීමට නියමිතය. ඇය නමින් අනුරාධා එදිරිසිංහය. අද අපගේ පිළිසඳරට එක්වන්නේ ඇයයි.
අනුරාධා මේ දවස්වල හත්වැනි මනාලිය වෙලා. ඒ අත්දැකීම මොන වගේද?
හත්වැනි මනාලිය තිළිණ බොරලැස්සගේ ටෙලි අධ්‍යක්ෂණයක්. අනෝමා විජේවර්ධනගේ තිරපිටපතක්. මාත් එක්ක ප්‍රධාන භූමිකාවෙන් සම්බන්ධ වෙන්නේ රවීන් කණිෂ්ක. මං ඒකෙ නාද්‍යා. දේව් කියන්නේ රවීන්ට. දේව් සහ නාද්‍යා අතර ප්‍රේමය හටගන්නේ සරසවියේදී. ඔවුන් කොතරම් ආදරෙන් හිටියත් එක් වැරැදි වැටහීමක් නිසා දැන් ඔවුන් ඈත් වෙලා. ඔවුන් අතරේ පවතින ගැටුම් එක්ක තමයි කතාව ගලාගෙන යන්නේ.
ඒ කියන්නේ නාද්‍යා දේව්ගේ ‘හත්වැනි මනාලියද ?
නාද්‍යා දේව්ගේ පළමුවැනි මනාලිය. සරසවියේදී බැඳුණු ප්‍රථම ප්‍රේමය. මේකේ මනාලියන් හත් දෙනෙක් ඉන්නවා. ඊටත් වඩා මේකට හත්වැනි මනාලිය කියන්න හේතුව වෙන්නේ දේව්ට මනාලියන් හොයන කපු මහත්තයා හැම වෙලාවෙම කියන කතාවක්. ඔහු නිතරම කියන්නේ දේව්ට හරියන්නේ බලන්න යන හත්වැනි මනාලිය කියලා. යෝජනා හතක් බලලා හත්වැනි එක තමයි හරියන්නේ. නැත්නම් හරියන්නෑ කියන කතාව ඔහු නිතරම කියනවා. ඒ නිසා මේ ටෙලි නිර්මාණයට හත්වැනි මනාලිය කියන නම දාල තියෙනවා.
හත්වැනි මනාලිය ටෙලි කණ්ඩායම ගැන කතා කරනවා නම්?
මං මේ තිළිණ අයියත් එක්ක වැඩ කරන පළමු අවස්ථාව. හරිම සුන්දර අධ්‍යක්ෂවරයෙක්. ක්ෂේත්‍රයේදී අවුරුදු ගණනාවක් හමුවෙලා තිබුණත් වැඩ කරන්න ලැබිලා නැහැ. මේ කණ්ඩායමත් හරිම සුහදව කටයුතු කරන පිරිසක්. සාමාන්‍යයෙන් අපි නිර්මාණවලට ගියාට, හැමෝම එක්ක සුහදව වැඩ කළාට අපිට ෆැමිලියර් වෙන තැන් අඩුයි. හත්වැනි මනාලිය කණ්ඩායම කියන්නේ එහෙම බොන්ඩ් එකක් තියෙන කණ්ඩායමක්. මම හරිම කැමැත්තෙන්, හරිම සතුටින් ඔවුන් එක්ක වැඩ කරනවා.
නාද්‍යා ටිකක් නපුරු වගේ. කොහොමද ලැබෙන ප්‍රතිචාර?
ඔව්. මෙතනදි නාද්‍යා තමයි දේව් එක්ක තරහින් ඉන්නේ. දේව් තරහ නැහැ. මේ තරම් ආදරෙන් ඉඳලත් ඇයි දැන් මේ නපුරුකම් කරන්නේ, ඇයි මේ තරහකාරයෝ වගේ ඉන්නේ කියලා ගොඩක් අය අහනවා. ඒකට හේතුවකුත් තියෙනවා. ඉදිරියේදී ඔයාලට දැනගන්න ලැබේවි. කොහොම වුණත් නාද්‍යා කියන්නේ දේව්ගේ ආදරෙන් ගැලවෙන්න බැරුව ඒ ආදරය මත්තේම ඉන්න ගෑනු ළමයෙක්. කොතරම් යෝජනා ආවත් කිසි එකකට කැමැති වෙන්නෙත් නැහැ. නාද්‍යා අම්මත් නැතුව තාත්තයි අයියයි ළඟ හැදෙන තරුණියක්. ඒ නිසා මට බැහැ කියලා දැනට යෝජනාවලින් බේරිලා ඉන්නවා. දේව් කියන්නෙත් එහෙම කෙනෙක්. ඔහුත් ගෙදරින් මනාලියන් බලන්න එක්ක යන්නේ මරන්න ගෙනියන්න වගේ. ඉදිරියේදී වෙන දේ දිහා බලාගෙන ඉන්නකෝ.
‘අසංධිමිත’ මේ දිනවල බොහෝ දෙනාගේ කතාබහට ලක්වන ටෙලි නිර්මාණයක්. එහි සතුටින්ම ඉන්න භූමිකාව ලැබිල තියෙන්නේ ඔබට?
‘අසංධිමිත’ ශාන් ජයරත්නගේ අධ්‍යක්ෂණයෙන් සති අන්තයේ විකාශය වන ටෙලි නිර්මාණයක්. ශලිනි තාරකාගේ පළමුවැනි ටෙලි තිරපිටපත. අද සමාජයේ සිදුවන නමුත් වැඩිපුර කතාබහට ලක්නොවන මාතෘකාවක් ගැන කතා කරන නිර්මාණයක්. තරිනි කියන්නේ මානසික පීඩාවකින් තොරව සාමාන්‍ය විදිහට ඉන්න එකම චරිතය. තරිනි කියන්නේ තමන්ගේ සැමියා, අම්මා, සහෝදරයා වගේ තමන්ගේ අයගෙන් වෙන කාට හෝ අසාධාරණයක් වුණත් ඒ වෙනුවෙන් පෙනී සිටින, කතාකරන, ඒ වෙනුවෙන් තමන්ට කරන්න පුළුවන් ඕනෙම දෙයක් කරන කෙනෙක්. මේ කතාව ඇතුළේ හැම චරිතයකටම වගේ ජර්නි තියෙනවා. මිනිසුන් බලාපොරොත්තු වන හැපි ෆැමිලි ලයිෆ් එක ගත කරන එකම ගැහැනු චරිතය කිව්වත් හරි. හැම ගැහැනියක්ම තමන්ගේ සැමියාගෙන් එහෙම නැත්නම් දරුවන්ගේ තාත්තාගෙන් ලැබිය යුතු හෝ ලැබිය යුතුයි කියලා බලාපොරොත්තු වන ආදරයක්, රැකවරණයක් තියෙනවා. ඒ දේ ලබන එකම චරිතය. තරිනිගේ සැමියා විදිහට ඉන්න ගයාන් ගුණවර්ධනත් හරිම ලස්සනට ඒ හැඟීම් දෙනවා. ඔවුන් දෙන්නා තුළ තියෙන සරලකම, සැහැල්ලුව තමයි ඒ දෙන්නාගේ බොන්ඩ් එක. ඒ වගේ සැමියෙක් ලබපු නිසා තමයි තරිනි ඒ විදිහට සැහැල්ලුවෙන් ඉන්නේ. ඒ තැන්වල තමයි සතුට රැඳිල තියෙන්නේ.
අසංධිමිත හරහා සමාජගත කරන පණිවුඩයත් ගොඩක් ප්‍රබලයි නේද?
ගැහැනිය හිර කරන්න යෑම තුළ හෝ වැඩිපුර හොයන්න යෑම තුළ හෝ සැකය නිසා හෝ වෙන මොනයම් හේතුවක් නිසා හෝ පිරිමියා විසින්ම ගිලිහගත්ත දේවල් නිසා ඒ වගේ ප්‍රශ්න ඇති වෙලා තියෙනවා කියලයි මට හිතෙන්නේ. තරිනිගේ සරලකම සහ අනෙක් අයගේ ප්‍රශ්න ටික බැලුවහම ඕනෙම කෙනෙකුට ටයිම් එකයි ස්පේස් එකයි දෙන්නම ඕන කියන එක හොඳටම තේරෙනවා. ඒ නිදහස ඇතුළේ තමයි දෙන්නෙකුට අවබෝධයෙන් ජීවත් වෙන්න පුළුවන් වෙන්නේ. ඕකට සමාජ මාධ්‍යයේ දාල තිබුණු ලස්සනම කියමනක් මම දැක්කා. ‘තමන්ට වෙනවට අකැමැති දේවල් අනෙක් කෙනාට කරන්න එපා’ ඒක හරිම සරලයි. ඕනෑම කෙනෙකුට සාපේක්ෂයි. තරිනිට එහෙම නිදහසේ ඉන්න ආදරණීය බිරියක් බවට පත්වෙන්න හැකියාව ලැබෙන්නේ ඒ වගේ සැමියකුගේ සෙවණේ ඉන්න නිසා. සිංහල ජන සමාජය තුළ ගැහැනු දරුවන් හැදෙන්නේ පියා මූලික වුණු පවුල් පරිසරයක. මෙතැනදිත් පිරිමියාගෙන් ලැබෙන ආදරය, ආරක්ෂාව, ගරුත්වය මත ඒ දේ හරි ලස්සනට සිදුවෙනවා.
ශකිලා කියන්නේ වෙනස් වීම දරාගන්න බැරි කෙනෙක්. ඒ ගැන මොකද හිතෙන්නේ?
අලුත් සර් සුපුන් රත්නායකගේ ටෙලි නිර්මාණයක්. ශකිලා කියන්නෙත් මට ලැබුණු වෙනස්ම චරිතයක්. ශකිලා කියන්නේ මේ ලෝකෙ හැමදේම වෙනස් වන බව විශ්වාස කරන්න අකැමැති ගැහැනු ළමයෙක්. වෙනස් වීම කියන එක දරාගන්න බැරි කෙනෙක්. ඇයට ඕන මේ හැමදේම වෙනස් නොවී පවත්වාගන්න. ඒකත් මට වෙනස්ම අත්දැකීමක් වුණා.
මේ දිනවල අනුරාධා කොටුව පිටකොටුවේදීත් හමුවෙනවා?
ඔව්. කොටුව පිටකොටුව ප්‍රවීණ රංගන ශිල්පී ශ්‍යාම් ප්‍රනාන්දුගේ ටෙලි නිර්මාණයක්. මේ දිනවල අහස නාළිකාවේ විකාශය වෙනවා. එහි ධනුෂ්කා කියන්නෙත් වෙනස් විදිහට හිතන ගෑනු ළමයෙක්. ඇගේ අරමුණ කොළඹ නගරය පිරිසුදු, ලස්සන නගරයක් කරන එක. ඒ වෙනුවෙන් ඇය වෙහෙසෙනවා. ෆයිට් කරනවා. ගොසිප්වලට ලක්වෙනවා. හිත් වේදනා විඳිනවා. ඒ සියල්ල අතරේත් ඇගේ එකම අරමුණ බවට පත්වෙන්නේ කොළඹ නගරය කෙසේ හෝ පිරිසුදු, ලස්සන නගරයක් බවට පත්කිරීම. බිමල් අයියා එක්ක වැඩ කරන්න ලැබුණු අවස්ථාවක්. ඔහු ඇතුළු ප්‍රවීණයන් එක්ක වැඩ කරන්න ලැබීම ලොකු වාසනාවක්. හරියට පාසලකට ගියා වගේ අත්දැකීම් ලැබුවා.
අභියෝගාත්මක චරිතවලට කොටුවුණු ඔබට වැලි කඩදහි ටෙලි නිර්මාණයේ ලැබිල තියෙන්නේ හරිම සැහැල්ලු චරිතයක්?
වැලි කඩදහි කියන්නේ මේ දිනවල ඉතාම ජනප්‍රිය මල්බිඟුන් ටෙලි නිර්මාණයේ අධ්‍යක්ෂ හසුන් සමීරගේ. සති අන්තයේ විකාශය වන ටෙලි නිර්මාණයක්. තිර පිටපත තරංගා දිසානායකගේ. ලැබුණු සැහැල්ලු චරිතයක්. ඇය වේදිකා නිර්මාණවලට සම්බන්ධ වෙලා වැඩ කරන හරිම සැහැල්ලුවෙන් හිතන පතන තරුණියකගේ චරිතයක්.
වැලි කඩදහි ඔස්සේ සමාජගත වෙන්නේ මොන වගේ අදහසක්ද?
අපි අපේ යුතුකම්, වගකීම් ඉටුකරද්දී අපේ ළඟම සම්බන්ධකම් මඟහැරෙන, අතහැරෙන අවස්ථා තියෙනවා. එය මව සහ දරුවා අතර වෙන්න පුළුවන්. පෙම්වතා සහ පෙම්වතිය, සැමියා සහ බිරිය අතර වෙන්නත් පුළුවන්. අනෙක් කෙනා ගැන හිතන්නේ නැතිව අපි අතින් මඟහැරෙන දේවල් නිසා ජිවිත ඇතුළේ මොන තරම් විනාශයන් වෙන්න පුළුවන්ද කියන එක තමයි වැලි කඩදහි ඔස්සේ කතාබහට ලක්වෙන්නේ. කෙනෙකුට මේක බලලා මෙන්න මේ වගේ තැන් තමයි අපට මඟහැරෙන්නේ කියල තේරුම් ගන්න පුළුවන් නම් ඉදිරියේදී හරි ඔවුන්ගේ ජීවිතවල ගොඩක් දේවල් වෙනස් කරගන්න පුළුවන්. අපි ළඟම ඉන්න අයගේ අවශ්‍යතා නොසලකා හැරිම, ඔවුන් කියන දේට ඇහුම්කන් නොදීම වගේ දේවල් නිසා මෙන්න මේ වගේ දේවල් සිදුවිය හැකියි කියන දේ ඔස්සේ ගලාගෙන යන කතාවක් විදිහටයි දැනෙන්නේ.
ඔබ මේ දිනවල නිර්මාණ කිහිපයකින් හමුවෙනවා. ප්‍රතිචාර ගැන කතා කරනවා නම්?
හැම චරිතයකටම වගේ ගොඩක් හොඳ ප්‍රතිචාර ලැබෙනවා. සතියේ දිනවල විකාශය වන සහ සති අන්තයේ විකාශය වන නිර්මාණවලට ලැබෙන ප්‍රතිචාරවල සමහර වෙලාවට වෙනසක් දකිනවා. දැඩි කාර්යබහුලත්වය හමුවේ ඇතැම් ප්‍රේක්ෂකයන්ට සතියේ දිනවල ටෙලි නිර්මාණ බලන්න බැරි වෙනවා ඇති. ඒ නිසා ඔවුන් සති අන්තයේ ටෙලි නිර්මාණ තෝරාගෙන බලනවා වෙන්නත් පුළුවන්. ඒ නිසා ප්‍රේක්ෂකාගාරයේ විවිධත්වයක් තියෙනවා. හැම නිර්මාණයකටම ප්‍රතිචාර දක්වන පිරිසකුත් ඉන්නවා.
අනුරාධාට බොහෝදුරට ලැබිලා තියෙන්නෙ මවගේ චරිතය. ඒක අභියෝගයක් නෙවේද?
මම වැඩිපුරම කරලා තියෙන්නෙත් ඒ වගේ චරිත. ඒ නිසා ඒ චරිතය මට ගොඩක් ළඟයි කියලත් හිතෙනවා. මම සාමාන්‍යයෙන් පැෂන් කරන්න කැමැති, ට්‍රෙන්ඩ් ෆලෝ කරන කෙනෙක් නොවෙයි. ඒ නිසා වෙන්න ඇති මට එහෙම දැනෙන්නේ. ගිරිදේවී ටෙලි නිර්මාණයේ ගැබිනි මවක්. රාවණා හි පුතෙකුගේ අම්මා කෙනෙක්, ගරුඬ මුහුර්ථයේ දරුවන් තිදෙනෙකුගේ මවක්. සකර්මක ගත්තත් ළමයි දෙන්නයි. මට ගොඩක් ලැබුණේ ඒ වගේ චරිත. මේ කාලෙ තමයි මේ විදිහේ චරිත ලැබෙන්න පටන් ගත්තේ. ඇත්තටම මට අභියෝගයක් වෙන්නේ ෆැෂනබල් කැරැක්ටර්ස් මිසක් මේ වගේ ඒව නෙවෙයි කියලයි හිතෙන්නේ.
