ස්වාධීන රූපවාහිනී නාළිකාවේ විකාශය වන ‘මල් බිඟුන්’ ටෙලි නිර්මාණය මේ දිනවල මුළු රටේම ජනතාවගේ ආදරය දිනාගනිමින් තිබෙයි. අසල්වැසි නිවාස දෙකක් අතර පවතින අන්‍යෝන්‍ය සබඳකම ආදරණීයව සමාජගත කෙරෙන නිර්මාණයක් ලෙස එය වත්මන් සමාජයම සංවේදී කිරීමට සමත්වී ඇත. දුරේෂ් පවුලේ ලොකු දුව වන අශ්විනීගේ භූමිකාව ඔස්සේ ප්‍රේක්ෂක හදවත් ගැඹුරින්ම ස්පර්ශ කරනු ලබන ඇය නිපුනි ගුණවර්ධනය.
දිගු නිහැඬියාවකින් පසුව රංගනයට පිවිසි නිපුනිට අශ්විනී ගැන ඇත්තේ මෙවන් කියවීමකි.
“මල් බිඟුන්හි අශ්විනී විදිහට මං ප්‍රේක්ෂකයන් අතරට එන්නේ දිගු කාලෙකට පස්සේ. අශ්විනිට හිතපු නැති තරම් ප්‍රතිචාර ලැබෙද්දී ගොඩක් සතුටුයි. ඇත්තටම අශ්විනී කියන්නේ අභියෝගාත්මක චරිතයක්.“
අශ්විනී ගොඩනඟන්නට අධ්‍යක්ෂවරයාගෙන් ලැබුණු සහයෝගය නිපුනී බෙහෙවින් අගය කළාය.
“‘මල් බිඟුන්‘නාට්‍යයට මට ආරාධනා කරන්නේ අධ්‍යක්ෂ හසුන් සමීර. මට වඩා වයසින් මුහුකුරා ගිය චරිතයක් කිව්ව නිසා මුලින්ම මට කැමැත්තක් ඇති වුණේ නැහැ. “ඔයාට තමයි නිපුනි මේක කරන්න පුළුවන්. ඔයාව තමයි මේකට හොඳටම ගැළපෙන්නේ. අපි ට්‍රයි කරමු. මට විශ්වාසයි ඔයාට මේක හොඳටම කරන්න පුළුවන්” කියලා මාව විශ්වාස කරලා මාව සම්බන්ධ කරගත්තේ හසුන් අයියා. මම ඒ චරිතය අධ්‍යයනය කරලා හැකි උපරිම දායකත්වයක් ලබාදුන්නා. මේ වෙද්දි ලැබෙන අසීමිත ප්‍රතිචාරත් එක්ක මම සාර්ථකයි කියලා හිතෙනවා. අශ්විනීගේ චරිතයට මාව තෝරාගැනීම සම්බන්ධයෙන් හසුන් අයියාට ගොඩක් ස්තුතිවන්ත වෙනවා.”
පිටපතට අනුව අශ්විනීගේ භූමිකාව ගොඩනැඟීමේ අරමුණින් මල් බිඟුන් නවකතාව කියවීමෙන් තොරව තම රංගන දායකත්වය ලබාදීමට නිපුනී උත්සුක වී තිබිණි.
“හසුන් අයියත් එක්ක මං මීට කලින් ‘ආලත්ති අම්මා‘ ටෙලි නිර්මාණයේ වැඩ කරලා තිබුණා. මං මේ වෙලාවේ මල් බිඟුන් නවකතාව කියවන්න ගියේ නැහැ. ඒකට හේතුව පොතක් කියවද්දි අපේ හිතේ රූප මැවෙනවා. ඒක ටෙලි පිටපතට බාධාවක් වේවි කියලයි මට හිතුණේ. රංගනයේදී අධ්‍යක්ෂවරයාගේ හිතේ ඉන්න චරිතයයි අප ගොඩනැඟිය යුත්තේ කියන තැනයි මම ඉන්නේ. මෙතැනදි මට ඕන වුණේ තිරපිටපත් රචිකාවියගේ සහ අධ්‍යක්ෂවරයාගේ හිතේ හිටිය අශ්විනීව ගොඩනඟන්න. අශ්විනී කියන්නේ පොතක ලියවිලා ඉවර චරිතයක් නිසා ඒකෙ අභියෝගයත් වැඩියි. ඔවුන්ගේ හිතේ හිටිය අශ්විනීව ගොඩනඟන්න මාත් ලොකු කැපකිරීමක් කළා. මං සාර්ථකයි කියන එක රචිකාවියගෙන්ම අහන්න ලැබීම මට ලොකු සතුටක්.”
අශ්විනී ලෙසින් දුරේෂ් පවුලේ වගකීම් සියල්ල කරට ගන්නා නිපුනී එය තම සැබෑ දිවියටද අත්දැකීමක් කරගෙන තිබීම විශේෂත්වයකි.
“මං අපේ පවුලේ බාලයා. මට ඉන්නේ අයියලා දෙන්නයි අක්කලා දෙන්නයි. ඒ නිසා මට පවුලේ කිසිම වගකීමක් දැනිලා නැහැ. අක්කලා අයියලාගේ භූමිකා කොතරම් බරයිද කියලා මට තේරුම් ගියේ මේ චරිතය නිරූපණය කරද්දී. පවුලක බාලයා ගන්න තීරණ, එයාලා කළයුතු නොකළ යුතු දේ, එයාලගේ අනාගතය ගැන හිතන එක, මේ දේවල් එයාලගේ හිතට කොතරම් වදදෙනවා ඇද්ද? කියන එක මට තේරුණේ මේ චරිතය නිරූපණයත් එක්ක.”
අශ්විනීට ලැබෙන අසීමිත ප්‍රතිචාර හමුවේ නිපුනීද මේ දිනවල විස්මිතව සිටින්නීය.
“ප්‍රේක්ෂක ප්‍රතිචාර අසීමිතයි. ඒ වගේම ක්ෂේත්‍රයේ ප්‍රවීණයන්ගෙන් ලැබෙන ප්‍රතිචාර හරිම සතුටුදායකයි. “මේ වගේ අක්කා කෙනෙක් අපිටත් හිටියා නම් මං අද මෙතැන නෙවෙයි ඉන්නේ….“, “ඔයා හොඳටම අක්කගේ චරිතය කරනවා….“ ඔයා වගේ අක්කා කෙනෙක් අපිටත් හිටියා නම්…“ වගේ ප්‍රේක්ෂක ප්‍රතිචාර ගොඩක් ලැබෙනවා. හැමෝටම ගොඩක් ස්තුතිවන්ත වෙනවා. ඒ වගේම ආර්යගෙයි මාගිගෙයි ආදරයට විරුද්ධ වෙන නිසා ලොකූට අකැමැති පිරිසකුත් ඇති. ඒක එක එක්කෙනා දකින විදිහ නිසා අපිට වරදක් කියන්න බැහැ. ඒ මොහොතේ ඔවුන්ගේ අත්දැකීම්, ඔවුන් මුහුණදීලා තියෙන දේවල් එක්ක තමයි ඔවුන් හැසිරෙන්නේ. ඒකටත් මං හරිම කැමැතියි. මං හරිම ආදරෙන් ඕනෙම ප්‍රතිචාරයක් භාරගන්නවා. අක්කගේ චරිතයට, ඒ සහෝදර ප්‍රේමයට ප්‍රේක්ෂකයන් ගොඩක් කැමැතියි. කාර්යබහුලත්වය හෝ ආර්ථික ගැටලු හමුවේ අද කාලෙ ගොඩක් අයට මඟහැරෙන තැනක් මේක. අපිව ජීවත් කරවන, ශක්තිමත් කරවන, අපිත් එක්ක ඉන්න වටිනාම පිරිස අපේ පවුල කියලයි මට හිතෙන්නේ. අශ්විනී කියන්නෙත් ලොකු වයසක කෙනෙක් නෙවෙයි. අම්මා එයාලව දාල යද්දි මාගිට (සුදූ) අවුරුද්දයි. ඒ නිසා අශ්විනීට මාගිව දැනෙන්නේ තමන්ගෙම දරුවෙක් වගේ. ඒ හැඟීම හරි බරයි. ඒ නිසාමයි කොතරම් හොඳ කෙනෙක් වුණත් දික්කසාද වෙලා ළමයෙක් ඉන්න ආර්යට මාගිව දෙන්න ලෝබ. ඒ හැඟීමත් එක්කයි එයා සුදූව ආරක්ෂා කරන්න උත්සාහ කරන්නේ. ඇත්තටම මල් බිඟුන් පවුල දැන් අපිට අපේම පවුල බවට පත්වෙලා. අපි අතර තියෙන මේ සහයෝගය නිසාම තමයි මේ චරිතත් හොඳින් ගොඩනැඟෙන්නේ.”
‘අන්සතු ඔබ’ මියුසික් වීඩියෝ රංගනය ඔස්සේ අසීමිත ප්‍රේක්ෂක ආදරයක් දිනාගත් නිපුනී වෙළෙඳ දැන්වීම් නිරූපිකාවක ලෙස ක්ෂේත්‍රයේ දිගු ගමනක් පැමිණියාය. ඉන් පසුව නාඩගම්කාරයෝහි ගීතානි මිස් ලෙසින් පුංචි තිරයේ ස්ථාවර රංගනයක නියැළුණු ඇය මේ වනවිට වේදිකාව, පුංචි තිරය මෙන්ම සිනමාව ද ජයගනිමින් සිටින්නීය.
