ජනප්රිය බොලිවුඩ් නිළි මෞනි රෝයි සහ ඇයගේ ස්වාමිපුරුෂයා වන ව්යාපාරික සුරාජ් නම්බියාර් අතර පවතින විවාහ සබඳතාව නිල වශයෙන් අවසන් වී ඇති බවට මේ වන විට ඉන්දීය මාධ්ය සහ සමාජ මාධ්ය ඔස්සේ දැඩි කතාබහක් නිර්මාණය වී තිබේ. කලක සිට ඔවුන් දෙදෙනා අතර විරසකයක් පවතින බවට පැතිර ගිය තොරතුරු තහවුරු කරමින් නවතම වාර්තා පෙන්වා දෙන්නේ මෙම යුවළ මේ වන විටත් දික්කසාද වී වෙන්ව ජීවත් වන බවයි. විනෝදාස්වාද ක්ෂේත්රයේ පුවත් වාර්තා කරන රූපවාහිනී නාලිකා මගින්ද මෙම තොරතුරු අනාවරණය කිරීමත් සමඟ ඔවුන්ගේ රසිකයන් දැඩි කනස්සල්ලකට පත්ව සිටිති.
මෙම අර්බුදයේ ආරම්භය සනිටුහන් වූයේ මෞනි සහ සුරාජ් ඔවුන්ගේ ඉන්ස්ටග්රෑම් ගිණුම් ඔස්සේ එකිනෙකාව අනුගමනය කිරීම (Unfollow) නතර කිරීමත් සමඟ වන අතර ඉන් නොනැවතී සුරාජ් විසින් සිය ගිණුමේ තිබූ මෞනි සමඟ ලබාගත් ජායාරූප රැසක් ඉවත් කර ඇති බව ද වාර්තා වේ. මෙම තත්ත්වය තවත් බැරෑරුම් කරමින් සුරාජ් නම්බියාර් විසින් ඔහුගේ ඉන්ස්ටග්රෑම් ගිණුම සම්පූර්ණයෙන්ම අක්රිය කර හෝ මකා දමා තිබීම හේතුවෙන් මොවුන් අතර පැවති සබඳතාව බිඳ වැටී ඇති බවට පවතින සැකය තවදුරටත් තහවුරු වී ඇත. කෙසේ වෙතත් මෞනිගේ සමාජ මාධ්ය ගිණුම්වල තවමත් ඔවුන් දෙදෙනාගේ පැරණි ඡායාරූප කිහිපයක් ඉතිරිව තිබීම විශේෂත්වයකි.
ඩුබායි නුවරදී 2019 වසරේදී පොදු මිතුරන් මාර්ගයෙන් හඳුනාගත් මෙම යුවළ පසුව පෙම්වතුන් බවට පත්වූ අතර ඔවුන්ගේ ආදර කතාව කාගෙත් අවධානය දිනාගත් එකක් බවට පත්විය. කොවිඩ් වසංගත සමයේ මෞනි ඩුබායිහි ගත කළ කාලය තුළ මෙම සබඳතාවය තවත් ශක්තිමත් වූ බවත්, ඉන් අනතුරුව 2022 වසරේ ජනවාරි මාසයේදී ගෝවාහිදී ඔවුන් ඉතා අලංකාර ලෙස විවාහ උත්සවය පැවැත්වූ බවත් සඳහන් වේ. බෙංගාලි සහ දකුණු ඉන්දීය සම්ප්රදායන් මුසු වූ ඔවුන්ගේ විවාහ මංගල්යය එකල අන්තර්ජාලය තුළ ඉහළම ප්රතිචාර ලැබූ සිහිනයක් බඳු උත්සවයක් ලෙස ද හැඳින්විණි.
මෙම වෙන්වීම සම්බන්ධයෙන් පවතින දැඩි කතාබහ මධ්යයේ වුවද මෞනි රෝයි හෝ සුරාජ් නම්බියාර් මේ දක්වා නිල වශයෙන් කිසිදු ප්රතිචාරයක් දක්වා නොමැති වීම නිසා මෙම ගැටලුව තවදුරටත් අභිරහසක්ව පවතී. ඔවුන් දෙදෙනා පවත්වාගෙන යන මෙම නිශ්ශබ්දතාවය හේතුවෙන් ඔවුන්ගේ වසර දෙකක විවාහ දිවිය නිම වී ඇති බවට පැතිර යන කටකතා දිනෙන් දින තවදුරටත් වර්ධනය වෙමින් පවතී.
