හිරිපොද වැස්ස ටෙලි නාට්යයේ චාරුට ජීවය දෙමින් කලාවට ආ සිත්මි එදිරිසිංහ මේ දවස්වල වෙනස්ම ආකාරයේ ටෙලි අත්දැකීමක් ලබලා තියෙනවා. ඒ “…’අ’ යනු හල් ‘ම’ යනු ‘මා’ යනු…” හරහා. ඇත්තටම මොකක් ද මේ. ඒ ගැන වගේම කලා ලොවේ ඇය සම්බන්ධ අලුත්ම තොරතුරු ගැන අපි සිත්මි එක්ක කතා කළා.
මේ දවස්වල කලා කටයුතු කොහොමද?
හිරු නාළිකාවේ විකාශය වන අලුත්ම ටෙලි ෆිල්ම් එකකට දායක වුණා. ඒ තුළින් අලුත්ම අත්දැකීමක් ලැබුවා. ඒ එක්කම මම රංගනයෙන් දායක වෙන හිරිපොද වැස්ස නාට්ය තවම විකාශය වෙනවා.
එහි මගේ චරිතේ වෙනස් වෙලා තියෙන නිසා ලැබෙන ප්රතිචාරත් වෙනස් වේගෙන එනවා. කතාවත් වෙනස් පැත්තකට යොමු වෙලා තියෙනවා. ඒ එක්කම ගොඩක්ම කාලය ගත වෙන්නේ මම කරන ‘බෑන්ඩඩ් ක්ලෝතින් ෂූට්‘ එක්ක. ඒ වගේම මේ ටිකේ වෙළඳ දැන්වීම් කිහිපයක් වැඩියෙන් කරන්න ලැබුණා.
මොකක්ද මේ “…’අ’ යනු හල් ‘ම’ යනු ‘මා’ යනු…” කියන්නෙ?
ඒක තමයි මම අර මුලින්ම කිව්ව වෙනස්ම විදියේ අලුත් අත්දැකීමක් ලබපු ටෙලි ෆිල්ම් එක. හිරු නාළිකාවේ නිරෝෂන් අයියාගේ පිටපතකට අනුව එයාම අධ්යක්ෂණය කළ ලස්සන නිර්මාණයක්. අම්මා ගැන කතා වෙන්නේ. විශේෂත්වය තමයි මෙතෙක් නිර්මාණය නොවුණු විදියේ කතාවක්.
ඉදිරියට එන්න තියෙන නිර්මාණ මොනවාද?
මේ වෙද්දී අලුත් නිර්මාණ දෙකකට ආරාධනා ලැබුණා. ඉන් එක නිර්මාණයක ෂූටින් ලබන මාසේ පටන් ගන්නවා. ඒ නිර්මාණ නම් 2026 අලුත් වසරේදී තමයි අපේ ආදරණීය ප්රේක්ෂකයන්ට බලන්න ලබෙන්නේ. ඒ නිර්මාණ විකාශය වෙද්දී ඒ චරිත ගැන වැඩි විස්තර කියන්නම්.
නිර්මාණයක් භාර ගන්න කලින් මොනවාද බලන්නෙ
මම තවම මේ ක්ෂේත්රයට අලුත්. ඒ නිසා මම බලන්නේ මට දෙයක් කරන්න පුළුවන් ද කියලා. ඒ වගේම මම හිරිපොද වැස්සේ ටිකක් නපුරු චරිතයක් කරන නිසා එවැනිම චරිත වලට කතා කරනවා. ඒ නිසා ඒ එකම විදියේ චරිත භාර නොගෙන එකිනෙකට වෙනස් වූ චරිත කරන්න තමයි මම උත්සාහ කරන්නේ.
චරිතවලදි නැත්නම් රංගනයේදි සිත්මි පනවා ගත්තු සීමාවන් තියෙනවද?
මට මේ වෙනකම් නම් එහෙම සීමාවන් ගැන ලොකුවට හිතලා නැහැ. මට චරිතයකට කතා කළාම මටම දැනුණොත් මට මේ චරිතෙට සාධාරණයක් කරන්න බැහැ කියලා මම භාර නොගෙන ඉන්නවා. ඒ හැර මා එක්ක රඟපාන්න ඉන්න අය සහ අඳින්න වෙන ඇඳුම් ගැනත් බලනවා.
අක්කා නම් සිනමා දොරටු විවර කර ගත්තා, සිත්මිට තවම සිනමාවට ඇරයුම් ලැබුණේ නැද්ද?
සිනමාවට නම් තවම මට හොඳ ඇරයුමක් ලැබුණේ නැහැ. හොඳ නිර්මාණයකට ආරාධනාවක් ආවොත් සිනමාවට එන්න ආසාවෙන් ඉන්නවා.
අක්කා නිළියක් වූ නිසාමද සිත්මිත් නිළියක් වෙන්න හිතුවේ
ඇත්තෙන්ම මට රඟපාන්න ලොකු ආසාවක් තිබුණේ නැහැ. මම හැමදාම හිතුවේ අක්කට හොඳ චරිත ලැබිලා මේ රටේ හැමෝම ආදරේ කරන රංගන ශිල්පිනියක් වෙන්න ලැබෙනවා නම් කියලා. අක්කා ඒ තැනට ගියා. එහෙම ගියාට පස්සේ එයාට ලැබෙන ප්රේක්ෂක ආදරේ දකිද්දී මටත් පොඩි ආසාවක් ඇති වුණා. අනේ ෂෝක්නේ කියලා. ඒ නිසා අක්කා නිළියක් වූ නිසා මාත් නිළියක් වුණා කිව්වත් හරි.
නිළියක් නොවුණා නම් කවුරු වෙන්න ඉඩ තිබ්බද?
පෙර පාසල් ගුරුවරියක්. එහෙම නැත්නම් නැටුම් ගුරුවරියක් වෙන්න ඉඩ තිබුණා. උසස් පෙළින් පස්සේ මම ටික කාලයක් පෙර පාසල් ගුරුවරියක් විදියට සේවයත් කළා. හැබැයි රංගනයට යොමු වුණාට පස්සේ ඒ දේ මඟ හැරුණා.
සිත්මි ‘ආදරේ‘ දකින්නෙ කොහොමද?
ආදරේ කියන්නේ හරි සුන්දර දෙයක්. හරි කෙනා හරි වෙලාවේදී හම්බුවුනොත්. මොන ප්රශ්න බාධක ගැටලු ආවත් දෙන්නට දෙන්නා එකට ඉන්නවා නම් ඒ දේවල් ජය ගන්නවා නම් ඒ ආදරේ හරිම සුන්දරයි.
ඇත්තද අක්කා – නඟා දෙන්නම එකම දවසේ වෙඩින් එක ගන්න අදහසක් තියෙනවා කියන්නෙ
ඒක කොහොමද දන්නේ. ඒක අපේ අක්කා තමයි කියන්නේ. මම නම් තාම එහෙම දෙයක් හිතලාවත් නැහැ. හැබැයි මම හිතන්නේ නැහැ මම එච්චර ඉක්මනට වෙඩින් එක ගනීවි කියලා. ඒක ඉතින් කාලයට භාර දීලා ඉන්නවා. මොකද ඒක එහෙම වෙන්නත් පුළුවන්, නැති වෙන්නත් පුළුවන්.
ප්රේක්ෂකයන්ගේ ආදරේටත් කියන්න දෙයක් ඇතිනෙ…
මම හිතුවේ නැහැ මේ වගේ ප්රේක්ෂක ආදරයක් ලැබෙයි කියලා. ඒ ආදරේට මමත් ආදරෙයි. ඒ ලැබෙන ආදරේ ගැන කියන්න මට වචන නැහැ. මම හරිම සතුටුයි එහෙම ආදරයක් ලබන එකට.
අනාගත බලාපොරොත්තු මොනවාද?
මම ආසයි දක්ෂ රංගන ශිල්පිනියක් වෙන්න. ඒ වගේම මගේම කලෝතින් බෑන්ඩ් එකක් කරනවා. ඒකත් දියුණු කර ගන්න ගමන් කලාවෙන් ඉදිරියට යන්න තමයි කැමති.
