” ‘ ඉන්ගම්මාරුව’ ටෙලියෙන් රංගනයට ආව මම, එදා සිට විවිධ චරිත රඟපෑවා. ඒ අතරින් මේ දිනවල ස්වර්ණවාහිනියේ විකාශය වන ‘පිරිමි ළමයි’ හි ‘අකුරණ හාමිනේ’ විශේෂයි. සැරපරුෂ, නිතරම කිපෙනසුලු අකුරණ හාමිනේ ප්රේක්ෂකයා ආදරයෙන් වැලඳගැනීම ගැන සතුටුයි. ඇය විවාහයත් සමඟම තමන්ගේ හිස මත කඩාවැටුණු වලව් පෙළැන්තියේ ගෞරවය ආරක්ෂා කිරීමට ප්රයත්න දරන, තම දරුවන් සමාජය හා ගැටීමේදී ඇතිකරගන්නා ගැටලු නිසා පීඩාවට පත්වී තම සැමියා හා ගම්වැසියන් සමඟත් ගැටුම් ඇතිකරගන්නා කාන්තාවක්. එහෙත් අකුරණ හාමිනේ තුළ සැහැල්ලු, නිදහස් ජීවිතයක් ගතකරන්න කැමැති බොහොම සංවේදී ගැහැනියකුත් ජීවත්වෙනවා ”
එම චරිතයට බොහෝ ප්රේක්ෂක ප්රතිචාර ලැබෙන බවද ඇය පැවසුවාය.
” ඉතා හොඳ ප්රතිචාර ලැබෙනවා. බොහෝ අය මට අකුරණ හාමිනේ කියලත් කතා කරනවා ”
‘පිරිමි ළමයි’ රංගනයේදී අධ්යක්ෂ හා අනෙක් ශිල්පීන් පිරිස ගැන මතක් කිරීමටද ඇය අමතක නොකළාය.
“අධ්යක්ෂ ශිවගුරුනාදන් මහතා බොහොම සුහදශීලීව උපදෙස් දෙමින් නළුනිළියන් මෙහෙයවනවා. ඔහුගේ මඟපෙන්වීමෙන් තමතමන්ගේ වගකීම හොඳින්, නිවැරදිව තේරුම් ගත් බොහොම සහයෝගයෙන් වැඩ කළ හැකි සහෝදර ශිල්පීන් කණ්ඩායමක් සමඟයි මම වැඩ කරන්නේ. ඔවුන් එක්ක වැඩ කිරීම ලෙහෙසියි” අධ්යක්ෂ ඇතුළු සහාය දැක්වූ හැමෝටම ස්තූති කරනවා.
නවක නළුනිළි පිරිසක් සමඟ රංගනයේ නිරතවීමට අවස්ථාව ලැබීම ගැන ඇයගේ සිතේ ඇත්තේ සුබවාදී ආකල්පයකි.
” රංගන ක්ෂේත්රයේ නවකයන් අතර බොහෝ දක්ෂයෝ ඉන්නවා. නවකයන්ද, ප්රවීණයන්ද යන්නට වඩා අපි හැමදෙනාම එකම පවුලක් ලෙස සිතුවොත් හැමදෙනා සමඟම වැඩකිරීම පහසුයි. ‘පිරිමි ළමයි’ තුළින් මට හොඳ දූ දරුවන් පිරිසක් හමුවුණා.. ඔවුන් බොහොම වගකීමෙන්, නිවැරදිව සිය කාර්යය කරන, තමන්ගේ වෘත්තියට ආදරය කරන අය. අඩුපාඩු වෙතොත් ඒවා මනා අධ්යයනයකින් සම්පූර්ණ කරගෙන නවක, ප්රවීණ දෙපිරිසම ඉදිරියට යායුතුයි. ”
සිනමාවේ නයනා හෙට්ටිආරච්චි භූමිකාව ආරම්භ වන්නේ ප්රසන්න විතානගේ අධ්යක්ෂණය කළ ‘පුරහඳ කළුවර’ චිත්රපටයේ රංගනයත් සමඟය. ඉන්පසු ඉනෝකා සත්යාංගනීගේ ‘සුළං කිරිල්ලි ‘ , රොහාන් පෙරේරාගේ ‘ගෝල්’ , ප්රියන්ත කොළඹගේගේ ‘ මන්දාරා’ , ලලිත් රෝහිතගේ ‘තට්ටු දෙකේ ඉස්කෝලේ’ චිත්රපටවලත්, ‘Mother Theresa, Return to Banglow’ වැනි ජාත්යන්තර චිත්රපට කිහිපයකටත් සිය රංගන ප්රතිභාව මුසු කිරීමට නයනා හෙට්ටිආරච්චි සමත් වූවාය.
ඇයගේ සැමියා, ප්රසන්නජිත් අබේසූරිය ද විශිෂ්ට ගණයේ නාට්යකරුවෙකි; රංගන ශිල්පියෙකි. ඔහු සමඟ නිර්මාණකරණයට නයනා ද දායක වූවාය.
“ප්රසන්නජිත් ‘දුග්ගන්නාරාල, දෝර්දණ්ඩා, කුවේණි, සකුන්තලා’ ආදී වේදිකා නාට්ය කිහිපයක්ම අධ්යක්ෂණය කළා. ඒ සෑම නාට්යයකටම මගෙන් වගේම දරුවන්ගේ සහායත් ඔහුට ලැබුණා. ඉදිරියේදීත් තව වේදිකා නාට්ය නිර්මාණය කරන්න බලාපොරොත්තු වෙනවා. ”
සංස්කෘතික අමාත්යාංශයෙන් පවත්වාගෙන ගිය රාජ්ය නාට්ය පාසලේ දෙවසරක අධ්යයනයේදී වේදිකා නාට්ය අධ්යක්ෂවරුන්ගෙන් බොහෝමයක් ගුරුහරුකම් ලබාගැනීමට ඇය වාසනාවන්ත වූවාය. එහිදී විශිෂ්ට නාට්යවේදිනී සෝමලතා සුබසිංහයන්ගේ ළමා හා යොවුන් රංගපීඨයට ඇතුළත්වීමෙන් නයනාගේ රංගන දිවියට වඩාත් හොඳ මඟපෙන්වීමක් ලැබී තිබිණි. සෝමලතා සුබසිංහ අධ්යක්ෂණය කළ ‘විකෘති, කතාන්දර දෙකක්, එක්කෝමත් එකරටක, The Trial Of Dedan Kimathi , පාර හරහා ‘ වේදිකා නාට්යවල රංගනයට මෙන්ම ධම්ම ජාගොඩයන්ගේ ‘සකල ජන’ , මහාචාර්ය එදිරිවීර සරච්චන්ද්රයන්ගේ ‘ එලොව ගිහින් මෙලොව ආවා’ , වෙල්ලවැහුම්, පබාවතී, මඟුල් ප්රස්තාව ආදියේත් රංගනයට ඇයට අවස්ථාව උදාවිය..
ඉදිරි නිර්මාණ කාර්යයන් ගැන සිහි කිරීමටද ඇය අමතක නොකළාය.
“රූගත කිරීමට නියමිත සුපුන් රත්නායකගේ ‘ විලම්බීත ‘ ප්රියන්ත කොළඹගේගේ ‘බැද්දේගම’ චන්දන ඉරුගල් බණ්ඩාරගේ ‘පිරිනිවන් කන්ද පාමුල’ ආදී ටෙලිනාට්යවලටත් , රොහාන් පෙරේරාගේ ‘සීගිරි” ඇතුළු චිත්රපට කිහිපයකටත් ඇරයුම් ලැබුණා”
ඇයට සිටිනුයේ පුතුන් දෙදෙනකි. ඔවුන් ගැන ද අවසන් වශයෙන් නයනා සිහිපත් කළාය. ” මගේ ලොකු පුතා උවිඳු, කොතලාවල ආරක්ෂක විශ්වවිද්යාලයේ කථිකාචාර්යවරයෙක්. පොඩි පුතා රංගජිත් සෞන්දර්ය විශ්වවිද්යාලයේ නාට්ය හා රංගකලා උපාධියෙන් අනතුරුව අධ්යයන කටයුතුවල නිරතව සිටිනවා. ඔහු ටෙලිනාට්ය , වේදිකා නිර්මාණවලට රංගනයෙන් එක්වෙනවා. අපේ මුළු පවුලම කලා පවුලක්. “
