කලාව මියෙන්නේ නැත. කලාකරුවා සිටින තාක්කල් කලාවට නව ජීවයක් මුසුවේ. ශ්රී ලාංකීය රංගන ක්ෂේත්රය තුළ ප්රබලත්වයෙන් යුත් රංගනයෙන් කලාකෙත පෝෂණය කරමින් ටෙලිනාට්ය කලාව ඔස්සේ ටෙලි තිරය අතික්රමණය කිරීමට හැකිවීම භාග්යයක්. ටෙලි තිරය හරහා රංගනයට අවතීරණ වෙමින් මියුසික් වීඩියෝ හරහා ප්රේක්ෂක ආදරය හා ප්රතිචාර නොඅඩුව ලබමින් කලා ලොව හැඩ කළ දක්ෂ රංගන ශිල්පිනියක් අද අපිත් එක්ක කතාබහට එකතු වෙනවා. ඇය නමින් රුක්ශානා දිසානායක. මේ ‘මව්රට’ ‘හාට්’ ඇය සමග කළ කතාබහේ පෙළගැස්මයි.Sri Lanka Latest News
ඉතින් රුක්ශානා මේ දවස්වල ජීවිතේ ගෙවෙන්නෙ කොහොමද කිව්වොත්?
මේ දවස්වල විකාශනය වෙන ටෙලිනාට්යයකට සම්බන්ධ වෙලා තියෙනවා. ඊට අමතරව තව අලුත් ටෙලිනාට්ය තුනක් විතර කළා. ඒවත් එක්ක තමා මේ දවස්වල ජීවිතේ ගෙවිලා යන්නෙ. වේදිකා නාට්ය දෙකකට සම්බන්ධ වෙලා තියෙනවා, නර්තන වැඩ කටයුතු ටික කරගෙන යනවා. ඔය විදියට ඉතින් සරලව වැඩ ටික කරගෙන යනවා
ඔබ නිළියක් වෙන්න බලපෑ ප්රධානතම හේතුව ගැන ඇහුවොත්?
ඇත්තටම මට ගොඩක්ම මගෙ ටර්නින් පොයින්ට් එක වුණේ ජාතික තරුණ සේවා සභාවේ මගේ ගුරුතුමා ලලිත් වසන්ත සර්. මගේ ජීවිතේ මට හම්බවෙච්ච හොඳම ගුරුවරයා සහ මම මේ තත්ත්වයේ ඉන්නව නම් ලලිත් වසන්ත මහත්මයා සහ උපුල් නිශාන්ත මහත්මයා නිසා තමයි. ඉතින් ඒ නිසා එයාව මතක් කරන්න ඕනි ගොඩක් ආදරයෙන්. ඊට අමතරව අම්මා, තාත්තා ගෙදර අය මට ගොඩාක් උදව් කරනවා. ප්රියන්ත ලලිත් මහත්තයා හරහා තමයි ඉතින් මම ක්ෂේත්රයට ආවේ.
ඇත්තටම වර්තමානයේ ඉතාමත් හොද ටෙලිනාට්ය බිහිවෙනවා. ඒ කියන්නෙ එක එක කන්සෙප්ට්, එක්ස්පෙරිමන්ට් කරනවා, අත්හදාබැලීම් කරනවා. ඒ ගැන සතුටු වෙන්න ඕනෙ. ඉස්සර වගේ රාමුවකට කොටුවෙලා නැතුව අලුත් නිර්මාණ බිහිකරන්න වෑයමක් තියෙනවා කියලා ඇත්තටම පේනවා. ඉතින් ඒක ඇත්තටම හොඳ තත්ත්වයක්. මං හිතනවා ඉස්සරහට තව තව අත්දැකීම්වලින් සහ වෙනස් ආකාරයේ නිර්මාණ බිහිවෙයි කියලා.
ඔබ සෑම විටම උත්සාහ කරන්නේ මොන විදියේ චරිත කරන්නද?
සීමාමායිම් කිහිපයක් තියෙනවා. විශේෂයෙන් මගේ පෞද්ගලික ජීවිතයට හානි නොවන දේවල් කරන්න හැම විටම මං වගබලාගන්න ඕනෙ. නමුත් නිර්මාණාත්මක පැත්තෙන් සහ චරිතය පැත්තෙන් එහෙම දේවල් මම සාමාන්යයෙන් හිතන්නෙ නැහැ. අභියෝගාත්මක චරිත වෙනස් ආකාරයේ චරිත භාරගන්න මගේ ලොකු අවශ්යතාවක් කැමැත්තක් තියෙනවා.
රංගනයට අමතරව ඔබ නර්තන කටයුතුවලට දායක වෙනවා?
ඇත්තටම නර්තනය කියන්නේ මගේ ජීවිතයේ කොටසක් වගේ. මම විශ්වවිද්යාලය තුළත් හැදෑරුවෙ නර්තනය තමයි. ඉතින් මම ඒ කලාවට ගොඩක් ආදරෙයි. මම හැමතිස්සෙම නර්තනය පැත්තෙන් මොනවා හරි දෙයක් දරුවන්ට උගන්වන්න, ඒ වගේම අලුත් දේවල් ටිකක් කරන්න තමා උත්සාහ කරන්නේ. නර්තනය ගැන කතා කළොත් ඉතින් ඒකෙන් මට මැරෙනකම්ම ගැළවෙන්න බැරිවෙයි. මම ඒ තරම්ම ආසයි, ආදරෙයි රංගනයට වගේම නර්තනයටත්.
කැමැතියි ඔබේ ජීවිතයේ ඔබට ඇති අමතක නොවන සිදුවීම් සහ සොඳුරු හමුවීම් පිළිබඳ කතා කරනවා නම්?
ඔව් එහෙම ඒවා තියෙනවා. ඉතින් අමතක නොවන සිදුවීම් ටෙලිනාට්යවලින් ගොඩක් ලැබිලා තියෙනවා. මෙඩිසිනා වගේ හාස්යෝත්පාදක ටෙලිනාට්ය තුළ අමතක නොවන අත්දැකීම් ගොන්නක් තියෙනවා. ඒ වගේ විවිධ ආකාරයේ දේවල් තියෙනවා. ඉතින් හැම නාට්යයකින්ම වගේ ජීවිතයට අත්දැකීම් එකතු වෙනවා.
නළු නිළියන්ට සමාජ මාධ්ය තුළින් දැන් විවිධ චෝදනා එල්ල වෙනවා. ඉතින් ඔබටත් එවැනි චෝදනා හා බාධා එල්ල වෙලා තියෙනවාද?
මට නම් ඇත්තටම එහෙම චෝදනා එල්ල වෙලා නැහැ. ඒ කියන්නේ ඇත්තටම චෝදනා කියල එහෙම කවුරුත් ගොඩක් අර මට එහෙම එක එක දේවල් කියලා සමාජ මාධ්යවල මඩ ගහන වගේ දේවල් ඇත්තටම මට නැහැ.
ඔබ පැමිණි ගමන් මග පිළිබඳ ඔබ කොතරම් දුරට තෘප්තිමත්ද?
මං මේ වෙනකම් ආපු ගමන ගැන මං ගොඩාක් තෘප්තිමත් වෙනවා. තව යන්න ඕනෙ මග ගොඩාක් තියෙනවා. නමුත් ඉතින් ඒ ගමන් හෙමින් බොහොම සංයමයෙන් යන්න ඕනෙ.
කවීෂා සංදීපනී
