නෙත්මි රොෂෙල් කියන්නේ අපේ කලා ක්ෂේත්‍රය තුළ දැකගන්න ලැබෙන දක්ෂ ජනප්‍රිය වගේම සුරූපී රංගන ශිල්පිනියක්. අවුරුදු කුමරියක් ලෙස ක්ෂේත්‍රයට ඇවිත් පුංචි තිරයෙන් ප්‍රේක්ෂක ආදරේ නොඅඩුව ලබන නෙත්මි මේ වෙද්දී පුංචි තිරයට නැතුවම බැරි රංගන ශිල්පිනියක් වෙලා. මේ දිනවල නෙත්මිව අලුතින් දකින්න ලැබෙන්නේ හිරු නාලිකාවේ විකාශය වන බුද්ධිනි ජයවර්ධන රචනා කරන තරු ආදරේ නාට්‍යය තුළින්.
මුලින්ම අපි ‘තරු ආදරේ‘ ගැන කතා කළොත්?
තරු ආදරේ කියන්නේ මම අලුතින්ම රංගනයෙන් දායක වූ ටෙලි නිර්මාණය. මේ නාට්‍යය රචනා කරන්නේ බුද්ධිනි ජයවර්ධන අක්කා. ඒ වගේම අධ්‍යක්ෂණය කරන්නේ සංදේශ් බණ්ඩාර සහ ධනුෂ්ක ප්‍රනාන්දු. නිෂ්පාදනය කරන්නෙත් ධනුෂ්ක ප්‍රනාන්දු. ලස්සන ආදර කතාවක්. මගේ චරිතේ වෙන්නේ යෙහංසා.
යෙහංසා ගැන කෙටියෙන් කිව්වොත්?
යෙහංසා කියන්නේ බොහොම අහිංසක චරිතයක්. කතාවේ හැටියට මගේ අම්මා දමිළ, තාත්තා සිංහල. යෙහංසා පොඩි කාලෙදිම ඇගේ අම්මා පොඩි නැති වෙලා. එතැන් සිට ඇයව හදා ගන්නේ පුංචි. තාත්තා දෙවැනි කසාදයක් කරගෙන. යෙහංසා පෞද්ගලික විශ්වවිද්‍යාලයක ඉගෙන ගන්නවා. ඇයව බලාගන්න ඇගේ පුංචි ලොකු කැපකිරීමක් කරනවා. පුංචි විවාහ නොවී ඉන්න එක එක්කත් යම් යම් හැලහැප්පීම් ඇතිවෙනවා. යෙහංසාට තරුණයෙක් ගැන ආදරයක් ඇති වෙනවා. ඒ ආදරේ ඇති වෙන්නේ ජනප්‍රිය ගායකයෙක්ට. එතැනින් එහාට මොකද වෙන්නේ කියන එක නාට්‍යය බලන්නම වෙනවා.
මේ දිනවල අනෙකුත් නිර්මාණ මොනවද?
‘තරු ආදරේ’ හැරුණම තාම ‘පාරාදීසේ‘ නාට්‍ය විකාශය වෙනවා. ඒ එක්කම තව නිර්මාණ කිහිපයක් ළඟදීම බලා ගන්න පුළුවන්.
පාරාදීසේ ආල්යාට ලැබෙන ප්‍රතිචාර කොහොමද?
ඉතාම හොඳ ප්‍රතිචාර ලැබෙනවා. මමත් ආසාවෙන් කරන චරිතයක්. මාව වෙනස් විදියට ප්‍රේක්ෂකයින් අතරට අරන් ගිය චරිතයක්.
සිනමාවෙන් නම් ජනප්‍රියම නිළිය සම්මානයත් ලැබුණා නේද?
ඔව්. මෙවර 10වෙනි දෙරණ ලක්ස් සිනමා සම්මාන උලෙළේ ජනප්‍රියම නිළියට හිමි සම්මානය දිනා ගන්නට මම වාසනාවන්ත වුණා. ජනප්‍රියම සිනමා නිළිය ලෙස මගේ නම කියවෙද්දී හරියට මට දැනුණේ හීනයක් වගේ. ලොකු සතුටක් හිතට ආවා. මොකද ජනප්‍රියම සිනමා නිළියන් අතරේ මගේ නමත් තිබ්බා. නමුත් මම බලාපොරොත්තු නොවුණු අවස්ථාවක්. මින් පෙරත් ජනප්‍රියම නිළියට හිමි සම්මානයට මම නිර්දේශ වෙලා තියෙනවා. මෙවර තමයි සම්මානය මට ලැබුණේ.
සිනමාවෙන් ඉදිරියට එන්න තියෙන නිර්මාණ මොනවද?
රන්ජන් ප්‍රසන්නගේ ‘සුපෙම් සුළඟක්‘. සාරංග මෙන්ඩිස්ගේ කල්පනා සහ ක්‍රිෂාන්ත මනම්පේරිගේ ‘නේත්‍ර මායම්‘ යන චිත්‍රපට එන්න තියෙනවා.
චරිතයක් බාර ගනිද්දී ඒ ගැන හිතන්නේ මොන විදිහට ද?
මම කොහොමත් වැඩ කරන්නේ, මම ගැහැනු ළමයෙක් විදියට මම ම දා ගත්තු සීමාවන් ටිකක් එක්ක. මම හැමවෙලේම බලන්නේ මට ලැබෙන චරිතයට සාධාරණයක් කරන්න පුළුවන්ද කියලා. මම මට ලැබෙන චරිත වල පිටපත මුල ඉඳන්ම කියවලා බලනවා. අධ්‍යක්ෂවරයා බලාපොරොත්තුවෙන දේ මගේ චරිතය තුළින් කරන්න පුළුවන් ද කියන එකත් බලලා තමයි මම චරිත භාර ගන්නේ. එකිනෙකට වෙනස් චරිත කරන්න තමයි කැමති.
පුංචි තිරයට ද සිනමාවට ද වැඩි කැමැත්ත?
එහෙම එකක් නැහැ. මම පුංචි තිරයටත් සිනමාවටත් හරිම ආදරෙයි. එකිනෙකට වෙනස් චරිත වලින් ප්‍රේක්ෂකයින් අතරට එන්න කැමතියි.
රටේ හැමෝගෙම ආදරේ ලබන චරිතයක් වීම නෙත්මිට දැනෙන්නේ කොහොමද?
ඇත්තටම මට හරිම සතුටුයි. මම කලාවට ආව දවසේ ඉඳන් මම කරපු ‘ජයවතී‘, ‘ආක්ෂා‘ කියන චරිත තුළින් ලැබුණු ආදරේ තාමත් නොඅඩුව ලැබෙනවා. මම හිතන්නේ අපි කලාකරුවන් විදියට ආස ප්‍රේක්ෂක ආදරේ ලැබෙනවාට. අපි කරන දෙයක් මිනිසුන් අගය කරනවට. මම ඒ ආදරේට හරිම ආදරෙයි. ඒ අය දෙන ආදරේ එක්ක තමයි අපි තව තව දිරිමත් වෙන්නේ. වයස් බේදයකින් තොරව ඒ ආදරේ ලැබෙනවා. මෙවර ජනප්‍රියම සම්මානය සිනමාවෙන් මට ලැබුණු පළමු සම්මානය වුණත් මින් පෙරත් මට ජනතා සම්මාන ලැබුණා. ඒ හැමදෙයක්ම මට ලැබෙන්නේ මගේ ආදරණිය ප්‍රේක්ෂකයින් මගෙත් එක්ක හැමදාම හිටිය නිසා. ජනතා ආදරේ ලබන එක ලෙහෙසි පහසු දෙයක් නෙවෙයි. අපි ඔක්කොම ඉන්නේ බිසී ලෝකයක. එහෙම ඉන්න ගමන් එයාලගේ කාලය අපි වෙනුවෙන් කැප කරලා සමාජ මාධ්‍යයට එක් කරන අදහස් පවා අපිට දෙන්නේ පුදුමාකාර ආශීර්වාදයක්. ඒ ආදරේට මම හරිම ආදරෙයි.
