රංගන ශිල්පියකු, නර්තන ශිල්පියකු ලෙස කලා ලොවේ ගමනක් යමින් සිටින තරුණයකු වන කවිඳු මධුෂාන් සිය නිර්මාණකරණ දිවිය පිළිබඳ කතා කිරීමට අප හා මෙසේ එක්විය. තමන් රංගනයෙන් දායකවන නවතම නිර්මාණ ගැන අදහස් දැක්වූ කවිඳු මෙසේ කීය.
“මගේ පළමු චිත්‍රපටය ‘මෝඩ තරිඳුයි. එය හෙට අනිද්දම තිරගත වීමට නියමිතයි. දෙවනුව රඟපෑ චිත්‍රපටය වන ‘නීරා’ චිත්‍රපටය පසුගියදා තිරගත කිරීම් ආරම්භ වුණා. එයට හොඳ ප්‍රතිචාර ලැබෙමින් පවතිනවා. ඒවගේම මම රඟපෑ ‘වීදුරු තිර’ ටෙලිනාට්‍යය ඉකුත්දා විකාශය නිමාවුණා. විකාශය නිමවුණත් තවමත් ප්‍රේක්ෂකයා ඒ ටෙලිනාට්‍යය ගැන කතා වෙනවා. හොඳ ප්‍රතිචාර තවමත් ගලා එනවා.”
‘වීදුරු තිර’ හි හිමාෂ් ඔහුයි. වෙනස්ම තේමාවක් රැගත් ටෙලිනාට්‍යයක් වූ ‘වීදුරු තිර’හි හිමාෂ් ගැන කවිඳු මෙසේ අදහස් දැක්වීය
‘වීදුරු තිර’ හි හිමාෂ් මමයි. මගේ රංගන දිවියේ හැරවුම් ලක්ෂ්‍යය ‘වීදුරු තිර’ කිව්වොත් හරි. මට දැනටත් බොහෝ අය කතා කරන්නේ හිමාෂ් කියලා ඒ චරිතයේ නමින්මයි. හිමාෂ්ට සෑහෙන්න ප්‍රේක්ෂක ප්‍රතිචාර ලැබෙනවා. ඒ ගැන සතුටුයි. ලංකාවෙ තිබෙන එහෙත් කතාබහට ලක්නොවන මාතෘකාවක් මෙසේ එළිපිට කතා කරද්දී ප්‍රේක්ෂකයාට තිබෙන සතුට ප්‍රතිචාර මඟින් දක්වනවා. මුලින්ම සමාජ මාධ්‍යයේ පවා මා ගැනයි කතා කළේ. පසුවයි චමීරයි, චතුරංගයි ළඟට ඒ කතාබහ ගියේ. ශලනි තාරකා අක්කා තමයි මට මේ චරිතයට ආරාධනා කළේ. මුලින්ම මම මේ චරිතය භාරගන්න බැහැ කිව්වා. ඒත් එක්කම පැයක් ඇතුළත මම ශලනි අක්කට කතා කරලා මම කැමැතියි ඒ චරිතය කරන්න කියලා කිව්වා. මුලින්ම බෑ කියලා චරිතය ප්‍රතික්ෂේප කළා නම් අපරාදේ කියලා දැන් මට හිතෙනවා.”
කලකට ඉහතදී බොහෝ ප්‍රේක්ෂක ප්‍රතිචාර මධ්‍යයේ විකාශය වූ ‘සිහින ගෙනෙන කුමාරියේ’ ටෙලිනාට්‍යයේ සදෙව් වූයේත් ඔහුයි. ඒ පිළිබඳ මතකාවර්ජනය කරන්නට ද කවිඳු අමතක නොකළේය.
“මම රඟපෑමට ආසාවක් තිබ්බ කෙනෙක් නෙවෙයි. මුලින්ම රංගනයකට කියලා ආරාධනා ලැබෙන්නේ හිරු නාළිකාවේ විකාශය වූ ‘සිහින ගෙනෙන කුමාරියේ’ ටෙලිනාට්‍යයටයි. ඒකටත් මුලින්ම මම බැහැ කිව්වා. පසුව රඟපෑවා. අදටත් අනුරාධපුරය වගේ ඈත ප්‍රදේශයකට ගියාමත් ප්‍රේක්ෂකයා මාව සදෙව් නමින් හඳුන්වන්නෙ. මේ ටෙලිනාට්‍යය අවුරුදු 70-75 වගේ වයසේ ප්‍රේක්ෂකයාත් නරඹලා තියෙනවා. ඔවුනුත් සදෙව් කියලා මාව ආදරයෙන් බදාගනිද්දී හරිම සතුටුයි. සදෙව් ගේ චරිතය නිසා තවමත් මිනිස්සු හඳුනනවා.”
රංගනයේ ආරම්භයත්, පාසල් සමයේ කලා කටයුතුවලට දායක වූ අයුරුත් කවිඳු සිහිකළේ මෙලෙසිනි.
“මම අධ්‍යාපනය ලැබුවේ පිළියන්දල මධ්‍ය මහා විද්‍යාලයෙන්. ඒ කාලයේ හිටිය මංජුලා මිස් වගේම මගේ පාසලේ අක්කලා අයියලා දිහා බලලා බොහෝ දේ ඉගෙනගත්තා . පාසලේදී නර්තනයට යොමුවුණා. එකල වෙළෙඳ දැන්වීම්, නොයෙක් චිත්‍රපටත් කළා. ඩාන්සින් වැඩත් කළා. විදුහල්පති ඇතුළු කාර්යමණ්ඩලය මට ගොඩාක් උදව් කළා. 2019දි හිරු සුපර් ඩාන්සර් සීසන් 02වලට සම්බන්ධ වුණා. ඉන්පසුවයි මට මුල්ම රංගනය වූ ‘සදෙව්’ චරිතයට ආරාධනාව එන්නේ. අම්මා කැමැතියි මම රඟපානවා බලන්න. අපේ ඩාන්සින් ටීචර් ගයාන් අයියත් කිව්වා රඟපාන්න කියලා. ඒ එක්ක මම රඟපෑමට ආවා. ඉන්පසු මගේ නර්තන දිවියේ වෙනස්කම් රැසක්ම වුණා. නර්තන ශිල්පියකුට හැඟීම් කියන දේ වැදගත් . හැඟීම් ප්‍රකාශනය කොහොමද ස්වාභාවිකව සිදුකළ යුත්තේ කියන අදහස ආවේ කැමරාවක් ඉදිරියේ රඟපාන්න පටන්ගත්තට පසුවයි.”
කවිඳු නර්තන ශිල්පියකු ලෙසත් සුවිශේෂී පියවර රැසක් තිබෙන අතර ඉන් ජයග්‍රහණ ද ලබාගැනීමට සමත්ව තිබේ.
“මම හිතන්නේ ප්‍රේක්ෂකයා මගේ නර්තනයට ගොඩාක් කැමැතියි කියලා . 2009දී තමයි මම නර්තන ක්ෂේත්‍රයට පිවිසෙන්නේ. ඉන්පසු ක්‍රමක්‍රමයෙන් ඉදිරියට ඇවිත් අද වෙද්දී නර්තන පුහුණුකරුවෙක් විදිහට ජනතාව අතරට ගිහින් තිබෙනවා. මම හරිම කැමැතියි ප්‍රේක්ෂකයාට අලුත් දෙයක් දෙන්න. නර්තන ශිල්පියෙක් ලෙස මාව හඳුන්වනවටත්, මාව අනුකරණය කරනවටත් මම කැමැතියි . නර්තනයෙන් 2009දී දෙරණ ලිට්ල් ස්ටාර් තරගයෙන් අනු ශූරතාව දිනුවා. 2017දී සිරස ඩාන්සින් ස්ටාර් අවසන් 16 දෙනා අතරට ආවා. ඒ වසරේදීම දෙරණ Dance Unlimited Derana තරගයෙන් ජය ලැබුවා. 2019දී හිරු සුපර් ඩාන්ස්හි පළමු වටයට තේරුණා . හිරු මෙගා ස්ටාර්හි ශනුදි එක්ක පළමු වටයට ආවා. නැවත රියැලිටි තරගවලට යෑමේ අදහසක් නම් නැහැ . කැමරාවක් ඉදිරියේ කොහොමද නර්තනය ප්‍රේක්ෂකයාට දෙන්නේ කියන අදහස මට තේරුණේ ඇක්ටින් සහ ඩාන්සින් දෙකම එකට කළවිටයි. නළුවකු විදිහට කැමරාවක් ඉදිරියට ආවම මට තේරුණා නර්තනයට රඟපෑම කොච්චර අවශ්‍ය ද කියලා . නර්තනයෙන් ඉදිරියට යන්න බලාපොරොත්තු වෙනවානම් එයට රංගනය කියන දේ හරිම වැදගත්. අලුත් අයට කියන්නේ නර්තනය කරනවානම් අනිවාර්යයෙන් රංගනයත් ඉගෙනගන්න. එවිටයි නර්තනයේ හෝ රංගනයේ ඉලක්කයට යන්න පුළුවන් වෙන්නෙ. මට ‘නමස්තේ’ නමින් නර්තන කණ්ඩායමකුත් ස්ටුඩියෝවකුත් තිබෙනවා . ඕනෑම අයකුට ලස්සන ස්ටුඩියෝවක වීඩියෝවක් ගන්න ඕනනම් මට කතා කරන්න. ”
මේ දිනවල තිරගත වන ‘නීරා‘ චිත්‍රපටයෙන් සිනමාව තුළ කවිඳුගේ රංගනයන් දැකගත හැකියි. ‘නීරා’ ඔහුගේ දෙවැනි සිනමා නිර්මාණයයි. පළමුවෙන් රඟපෑ ‘මෝඩ තරිඳු’ චිත්‍රපටය හෙට අනිද්දාම තිරගත වීමට නියමිතය.
“මේ ළඟදීත් චිත්‍රපටයකට ආරාධනාවක් ආවා. ඒකටත් පුරුදු විදිහටට බැහැ කියලයි කිව්වේ. පස්සේ කරමු කියා මම කිව්වා. බලමු ඉතින්.”
වේදිකාව පිළිබඳ ඔහුට ඇත්තේ මෙවැනි කියවීමකි.
” වේදිකාව තුළ මම වෙනස්ම පුද්ගලයෙක් කියා සිතනවා. මම කලාවට ගරු කරනවා. වේදිකාව තුළින් තමයි හොඳ කලාකරුවන් බිහිවෙන්නේ.”
ඉදිරි නිර්මාණ කාර්යයන් ගැන කීමටත් අවසන් වශයෙන් ඔහු අමතක නොකළේය. ” මම රඟපෑ චිත්‍රපටයක් එන්න තියෙනවා . ‘අසන්ධිමිත’ නම් ටෙලිනාට්‍යයට සම්බන්ධ වී සිටිනවා. ඒ ටෙලිනාට්‍යය ශලනි තාරකා අක්කාගේ තිර රචනයක්. අධ්‍යක්ෂණය කරන්නේ ශාන් ජයරත්න අයියයි. ඒකෙදී අලුත්ම නමකින් මාව රූපවාහිනී ප්‍රේක්ෂකයාට දැකගන්න ලැබේවි.”
