අපේ රටේ ජනප්‍රිය රංගන ශිල්පිනියක් පසුගියදා නොසිතූ අනතුරකට මුහුණ දුන්නා. ඒ අනතුරේ වීඩියෝ දර්ශනත් සමාජ මාධ්‍ය තුළ තවමත් සංසරණය වනවා. ඉතින් ඒ හදිසි අනතුරට මුහුණ දුන්නු හිමාලි සිරිවර්ධනගෙන් ඒ ගැන දැනගන්න අපි ඇයට කතා කළා.
හිමාලි දැන් ඔයාට කොහොමද?
දුන් නම් සුවයි. වැටිල්ලට පොඩි වේදනාවක් දැනෙනවා තවම.
සමාජ මාධ්‍යවල විවිධ ආරංචි පැතිරෙනවා. අපි කැමැතියි ඇත්තටම ඔබට එදා සිදුවුණේ මොකක්ද කියලා දැනගන්න?
ඇතත්ටම එදා මම රූගතකිරීම් සඳහා ගිහින් හිටියේ. එදා කාලගුණ තත්ත්වය ඒ තරම් හොඳ නැහැ. මාව මේකප් කළේ උඩ තට්ටුවේ. ඒ කටයුතු අවසන් කරලා මගේ දර්ශනය රූගත කිරීම පහළ තිබුණු නිසා මම පහළට බහිනකොට පඩිපෙළෙන් ලිස්සලා වැටුණා විතරයි මම දන්නේ. වැටුණු පාරට උඩ තිබුණු මල් පෝච්චියක් මගේ මූණට වැටුණා. මමත් සිදුවුණු සිදුවීම දැක්කේ සීසීටීවී කැමරා වීඩියෝවලින්. මට ඒ වෙලාවේ අවශ්‍ය ප්‍රථමාධාර සියල්ලම ටෙලිනාට්‍ය කණ්ඩායම එකතු වෙලා ලබාදුන්නා. මම පොඩි විවේකයක් අරගෙන නැවත රූගතකිරීම්වලට සම්බන්ධ වුණා.
හැබැයි ඉතින් සමාජ මාධ්‍යවල සත්‍ය තොරතුරු නෙවෙයි නේද පළවුණේ?
ඔව්. ඒ ගැන පොඩි කනගාටුවක් තියෙනවා. සමහරු මට නිවන් සුව පතලා තිබුණා. මම කියන්නේ මොනවා හරි දෙයක් පළකරනවා නම් සිදුවීම හරියට දැනගෙන, දැනුවත්ව කළා නම් ගොඩක් වටිනවා. විශේෂයෙන්ම කලා ක්ෂේත්‍රයේ අය ගැන. මොකද ප්‍රේක්ෂකයන් අපි හැමෝටම ආදරෙයි. මට ඒ සිදුවුණු අනතුර දැකලා ගොඩ දෙනෙක් කතාබහ කරලා මගේ සුවදුක් විමසා බැලුවා. ඒ සියලු දෙනාටම ගොඩක් ස්තුතියි.
මීට පෙරත් ඔබ එවැනි අනතුරුදායක සිදුවීම්වලට මුහුණ දුන්නා නේද?
ටෙලිනාට්‍ය කිහිපයකදීම ඒ වගේ සිදුවීම් කීපයකට මුහුණ දෙන්න මට සිදුවුණා. ‘ස්වර්ණපාලි’ ටෙලිනාට්‍යයේ අශ්වයාගේ පිටින් වැටුණු සිදුවීම අමතක වෙන්නේ නැහැ. චරිතය තුළ ජීවත් වෙනකොට ඒ සිදුවන අනතුරු ගැනවත් ඒ මොහොතේ දැනෙන්නේ නැහැ.
කාලයක් ඔබ නිර්මාණ සඳහා සම්බන්ධ නොවී හිටියා. ඒ අදහස වෙනස් වුණාද?
අවුරුදු කිහිපයක්ම මම රංගනයෙන් ඈත්වෙලාමයි හිටියේ. විශේෂයෙන්ම මම මෙගා ටෙලිනාට්‍යවලට සම්බන්ධ වීමට අදහසක් තිබුණේ නැහැ. ඒත් නිර්මාණවලින් කාලයක් ඈත්වෙලා හිටියාම මම හිතුවා හොඳ නිර්මාණවලින් පවා මාව මගහැරෙයි කියලා. නිර්මාණවල ඉන්නවා දැක්කමනේ හොඳ නිර්මාණවලට ආරාධනා එන්නේ. ඉදිරියේදී මම සම්බන්ධ වුණු නිර්මාණ කීපයකින්ම මාව දැකගන්න පුළුවන්.
ප්‍රසංග වේදිකාවේ ඔබේ හැකියාවට තිත තිබ්බද?
ප්‍රසංග වේදිකාවේ මගේ ඩාන්සින් ගෲප් එකට තවමත් ආරාධනා එනවා. මගේ ඩාන්සින් ගෲප් එක මම ප්‍රසංග වේදිකාවට ගෙනයෑම නතර කළා. කාලයක් තිස්සේ නමක් හදාගෙන මම ප්‍රසංග වේදිකාවට ගොඩවුණා. දැන් මගේ පුතාගේ වැඩකටයුතු සමග මට ඒ වෙනුවෙන් ලොකු කාලයක් වෙන් කරන්න බැහැ. පුතාගේ ජීවිතයේ අත්තිවාරම මමයි. ඒ වෙනුවෙන් මට කරන්න ගොඩක් දේවල් තියෙනවා. ප්‍රසංග වේදිකාවෙන් ඈත්වීම ගැන මට දුකක් නැහැ. මම හිතාගෙනම හිටියේ ප්‍රේක්ෂක ප්‍රතිචාර තියෙන තාලෙකම ප්‍රසංග වේදිකාවෙන් ඉවත් වෙනවා කියලා. මම හරිම කාලෙදි ඒ තීරණය ගත්තා.
වසන්ත විතාරණගේ
