දිනිති වල්ගම ගැන මොනවා හෝ සටහනක් තියන්න සූදානම් වෙනකොට දිනිති කියන්නේ කවුද, එයා මොනවද කරන්නේ වගේ අටුවාටීකා ලියන්න ඕනෙ නැහැ. දිනිති ගැන හැමෝම දන්නවා. කෙටියෙන් සරලවම කියනවා නම් දිනිති කියන්නේ ලංකාවේ ඉන්න ජනප්‍රියම තරුවක්. දිනිති එක්ක සමහරු තරහයි. එහෙමත් නැත්නම් දිනිතිව ඇතැමුන්ට රුස්සන්නේ නැහැ. ඒකට හේතුව මොකක්ද කියන්න දන්නෙත් නැහැ. ඇයට අසීමිත ඇලුම් කරන පිරිස නම් කියන්නේ ඒක පැහැදිලි ඊර්ෂ්‍යාව කියලයි. ඔව්, සමහර විටෙක ඒක බොරුය කියන්නත් බැහැ. මොකද, තමන්ට යන්න බැරි තැනකට කවුරු හරි ගිහින් ඉන්නවා දකිනකොට කුහක හිත් තියෙන අයට ඒක දරාගන්න බැරි වෙනවා.
දිනිතිත් තමාව රුස්සන්නේ නැති අය ගැන කියන්නේ එහෙම කතාවක්ද?
අපොයි නැහැ. දිනිති ඒ වගේ දේවල් ගණන් ගන්නෙත් නැහැ. කවුරු ඇයට මොනවා කිව්වත් ඒකට විරුද්ධව ඇය එකම එක වචනයක්වත් කියන්නේ නැහැ. කවුරු කොහොම කිව්වත් වැඩි හරියක් දෙනා කියන විදියට දිනිති කියන්නේ සරල සැහැල්ලු චරිතයක්. කාවවත් විවේචනය කරන්නේ නැහැ. කාටවත් මඩ ගහන්නේ නැහැ. සම්මානයක් ලැබිය යුතුම අවස්ථාවක වුණත් එය නොලැබුණත් කිසිම තැනකදී ඈ ජූරිය විවේචනයට ලක් කරන්නෙත් නැහැ.
‘හොඳම නිළියට නිර්දේශ වෙනවා කියන්නෙත් සම්මානයක් ලැබුණා හා සමාන වටිනා අත්දැකීමක්. ඒ හින්දා අහවලාට ලැබුණම මමයි ඒකට සුදුසු කියලා හිතන්න වෙහෙසෙන්න ඕනෙ නැහැ…’ දිනිතිගේ අදහස ඒකයි.
විලාසිතාවට අනුව අඳින්න පලඳින්න ඈ හරි මනාපයි. ඇගේ ව්ලොග් බලන්න හුඟක් අය උනන්දු වෙන්නෙ ඇගේ ඒ විලාසිතාමය ආකර්ෂණය නිසයි.
දිනිති මේ ලෝකේ වැඩිපුරම ආදරේ කරන්නේ එයාගේ පවුලට. එයාගේ ජීවිතේ පළමු තැන හිමි වෙන්නෙත් එයාගේ ෆැමිලි ලයිෆ් එකටයි. ඇගෙයි සංගීත්ගෙයි ජීවිතය ලස්සනට ගෙවෙන්නේ ඒ දෙන්නා අතර තියෙන අවබෝධය ආදරය නිසයි.
‘අපි දෙන්නා මොනවා හෝ යමක් කරන්න කලින් ඒ ගැන කතාබහ කරනවා. මොනවා හෝ තීරණයක් ගන්න කලින් අපේ අදහස් විමසනවා. දෙන්නගෙම කැමැත්තමතයි අවසාන තීරණයට එන්නේ…’
දිනිති එයාගේ ව්ලොග් එකක් ඔස්සේ දවසක් එහෙම කියලා තිබුණා. ගෙදර ඉන්න දවසට සංගීත්ට රසම රස කෑම ජාති හදලා දෙන්න ඈ ආස වුණාට ඇයට වඩා රසට සංගීත්ට උයන්න පුළුවන් කියලයි ඇය කියන්නේ. ඒ වගේම දිනිති ආසා කරන කෑම ජාති හදලා දෙන එක සංගීත්ට හොබී එකක්ලු. කොහේවත් යන්නේ නැතුව දිනිති එයා ළඟටම වෙලා ඉන්නවා නම් එයාට ඊට වැඩිය දෙයක් නැහැල්ලු. අනේ ඉතින් ඒ ආදරේට ඇස්වහක් නම් වදින්න එපා කියලා අපි ප්‍රාර්ථනා කරමු…
මල්මි කෞශල්‍යා
Send
