නිළිකමට මැදි වුණේ පුංචි කෙල්ලක කාලේ - කෞෂල්‍යා ප්‍රනාන්දු

Wednesday, June 30, 2021 , 0 Comments

 




තරුවක් නොවූ, චරිතාංග නිළි කැල අතර අග්‍රගණ්‍ය මට්ටමේ මතක සටහන් තැබූ රංගනවේදිනියන් කිහිප දෙනෙකු වේ නම්, කෞෂල්‍යා ප්‍රනාන්දු ද ඒ අතර එක් අයෙකි. ඒ සඳහා නිදසුන් අවැසි නම්.., දුන්හිඳ අද්දර, බොරදිය පොකුණ සහ අසන්ධිමිත්තා හරිම පහසුවෙන් පෙළගසා ඒ සඳහා දෙන්නට පුළුවන්ය. එපමණක් නොව.., මෑතක සිට ස්වාධීන රූපවාහිනියෙහි විකාශනය ආරම්භ වූ ‘සකර්ම’ තුළින්ද මේ ප්‍රවීණ රංගනවේදිනිය සිය කුසලතාව මනාව ඔප්නංවන්නීය. ඉතින්.., ‘කෞෂල්‍යා ප්‍රනාන්දු’ ගැන තව මොන කතාද? අප ‘මව්රට’ට ඈ කී කතාව ඔබට කියන්නට මේ සූදානම් වන්නේ ඒ හින්දාමය, මේ තරුවක නොව.., රූප රාජනියක නොවූ චරිතාංග නිළියක ගැන කතාවයි.


ඉතින් කෞෂල්‍යා.., පිළිගන්නවා බොහොම සුහද සිතින් ඔබව ‘මව්රට – හදවත’ට.

ස්තුතියි.., මමත් පිළිගන්නවා සුහද සිතින් ඒ ආරාධනාව.


සකර් ම’ තුළින් ඔබ නැවැතත් කලඑළි බැහැලා?

රංගනයෙන් මම ඈත්ව හිටියේ නැහැ කවදාවත්… අලුත් වැඩ කිහිපයකට අතගසා තිබුණා. කනගාටුයි කියන්න කොරෝනාව ඒ සියලු උත්සාහයන් අඩපණ කළා.


 අලුත් වැඩ කිහිපයෙන් එකක්වත් කියමුද අපට?

අලුත් වේදිකා නාට්‍යයක් නිම කරමින් සිටියා. ‘සඟ, වෙද, ගොවි, කම්කරු’ යන නමින්. පුහුණුවීම් අවසාන වෙමින් තිබූ කාලයේ එහි වැඩකටයුතු අතරමග නතර වුණා.


ඔබ ඒ ගැන කලකිරීමකද මේ දිනවල කල් ගෙවන්නේ?

අපොයි නැහැ.., ලෝවාසී සියලුම කලාකරුවනට මුහුණපාන්නට සිදුව තිබෙන අභාග්‍යයක වූ ‘කොරෝනාව’ ගැන කලකිරීමකට පත්වීමෙන් මොන පලක්ද? මේ කටුක විරාමයට අප හැමෝම උපේක්‍ෂාවෙන් මුහුණ දිය යුතුයි.


ඉඳහිට විතරක් රඟපාන්නේ නිතර පෙනී සිටීම ඔබේ චරිතාංග නිළි වෘත්තියට පටහැනි නිසාද?

එහෙම දෙයක් එතැන නැහැ. මම චරිත තෝරනවා. එහි ප්‍රධානම හේතුව මට සහ ප්‍රේක්‍ෂකයාට වින්දනය ලැබිය හැකි චරිත නිරූපණයන්ට පමණයි මම දායක වන්නේ. අනෙක් හේතූන් අතර මගේ කාර්යබහුල බව විශේෂයි. එකක් මම ගුරුවරියක්. අනෙක ජයවර්ධනපුර විශ්වවිද්‍යා ලයේ බාහිර කථිකාචාර්යවරියක ලෙස සේවය කරනවා. තවත් කාරණයක් වන්නේ නාට්‍ය සහ රංගන කලාව පිළිබඳව නවක රංගනවේදීන් හට වැඩමුළු පවත්වනවා. සුවිශේෂීවම සඳහන් කළ යුතුයි, මගේ දරුවන් තවම කුඩායි. රාජකාරි බොහොමයක් අතරතුර දෝලනය වෙලා රංගනයටත් නිතර කාලය දෙන්නට ගියොත් මගේ දරුවන්ට අම්මාගේ සෙනෙහස අහිමි විය හැකියි. ඒ නිසා තිර පිටපත් තෝරා ගැනීමේදී නිතර පරෙස්සම් වෙනවා.


 ඔබ නිළිකමට යොමු වුණේ ඔබේ මව ‘සෝමලතා සුබසිංහ’ වූ හේතුවටද?

අම්මගේ අනුග්‍රහය මත තමයි එය සිදුවූයේ. ඒ වගේම ඇගේ ජාන මා තුළද තිබුණා. හැබැයි රංගවේදිනියක වූයේ මමත් එයට යම් කැමැත්තක සිටි නිසයි. ඒ කැමැත්ත තුළ වූයේ හීනයක් සැබෑකර ගැනීමේ ආශාවක් නම් නෙවෙයි. මගේ හීනය තුළ සිටියේ ගුරුවරියක්. නිළිකමට මැදි වුණේ පුංචි කෙල්ලක කාලේ ඉඳන්ම වේදිකාව මට බොහෝ හුරුව තිබූ නිසයි.


අම්මා ප්‍රවීණ රංගවේදිනියක වීම, ඔබට හොඳ නිර්මාණකරුවන් සමග ගැටීමේ වාසනාව උදා කළා?

සම්පූර්ණ වැරැදි නිගමනයක්. සෝමලතා සුබසිංහ නම් ප්‍රවීණ රංගවේදිනියගේ දියණිය වීම තුළ මම රංගනයට ප්‍රවිෂ්ට වීම වඩාත් අපහසු කාරණයක් වුණා. අම්මා මට දුන් මුල් උපදෙස වුණේ කරන්නන්වාලේ රංගනයට යොමු වීම කිසිදා නොකරන්න කියලයි. අනෙක ඈ මට කිව්වා… සෝමලතා සුබසිංහගේ දුව ලෙස නොව කෞෂල්‍යා ප්‍රනාන්දු ලෙස රංගනය ජයගන්න කියලා.


ඒ කාලේ දැන් වාගේ නාට්‍ය සහ රංග කලාව සඳහා පන්ති පාඨමාලා තිබුණේ නැහැ. මම වේදිකාව කියෙව්වා. වේදිකාව ශ්‍රවණය කළා. එය නැරැඹුවා. ඒ අතර අම්මා ආරම්භ කොට තිබූ ළමා නාට්‍ය කණ්ඩායමේ සාමාජිකාවක වුණා. අන්න එතැනදී වේදිකාව තුළ අණසක පතුරුවා සිටි ප්‍රවීණයන්ගෙන් මට ආරාධනා ලැබුණා. ඒ ගමන ඉදිරියට යන විට උසස් නිර්මාණකරුවන් ඇසුරු කිරීමේ වරම තුළ මම හොඳ නිර්මාණ සඳහා දායක වෙමින් වෘත්තීමය වශයෙන් රංගනයට පිවිසුණා.


වේදිකාව තුළ ප්‍රවීණත්වයට පත් ඔබ පළමුව කැමරාවක් අබියස සිටගත්තේ හඳගමගේ ආරාධනයටයි?

ඔව්… ‘දුන්හිඳ අද්දර’ට මට ආරාධනා කළාට මම අශෝක හඳගමට ස්තුති කරනවා.


 එය ඔබේ විශිෂ්ට රංගනයක්, හඳගම එය අගය කළාද?

නැහැ… ඔහු එය අගය කළේ නැහැ… ඔහු එහෙම කරන කෙනෙක් නෙවෙයි. හැබැයි ඒක හරි නැහැ. මම හිතපු විදිය නෙවෙයි’ කියා ඔහු නොකියන්නේ යම් රූගත කිරීමක් සාර්ථක වූ විට කියලයි මම හිතන්නේ.


ඔබ රංගනයට මැදිවන්නේ අම්මාගේ රංගන ශෛලියන් තුළින් ගත් යමක් හරහාද?

කවදාවත් මම ඇයව කොපි කළේ නැහැ. හැබැයි ඇයගෙන් උගත් දේ අපමණයි. මම බොහෝ තැන්වල චරිතයනට ආරූඪ වන්නේ මගේ වටපිටාවේ සිටින සජීවී සැබෑ චරිත තුළින්. නිවෙසක මෙහෙකාරියක්, දරුවන් සමග නිතර වෙහෙස වන මවක්… කම්කරු ගැමිලියක්, ඇඟලුම් කම්හලක සේවිකාවක්… වැනි අයගේ හැසිරීම් සහ දිවි රටාවන් මම මට ලැබෙන තිර පිටපත් සඳහා ආභාෂයට ගන්නවා.


ප්‍රවීණ, දේශීය සහ විදේශීය නිළියන්ගෙන් ඔබ යම් කිසිවක් සියුම්ව සොරාගත් අවස්ථා නැතිද?

තියෙනවා… ඔබ කීවා වාගෙම මම ස්වර්ණා මල්ලවආරච්චි, චාන්දනී සෙනෙවිරත්න සහ මෙරිල් ස්ටී්‍රෆ් වැනි අයගේ රංගන චර්යාවන් තුළින් යම් යම් දෑ උකහා ගත් තැන් තිබෙනවා. ඒ වාගේම හිටපු උතුරු ඉන්දීය නිළි ‘ස්මිතා පටෙල්’ගේ රංගන ශෛලියටද මම ඉතාම මනාපයි. ඈ මට සුවිශේෂී කෙනෙක්.


ඒ ඔබ ‘ස්මිතා පටෙල්’ගේ පෙනුමට මඳක් සමාන නිසාද?

ඔබ මට සරදමක් කරනවාද මන්දා… ස්මිතා පටෙල් ඉතාම හැඩකාරයි. කෞෂල්‍යා ප්‍රනාන්දු කියන්නේ සාමාන්‍යයන් අතරද ඉතාම සාමාන්‍ය පෙනුමක් ඇති කෙනෙක්. තරුවක් නොවූ මම චරිතාංග නිළියක වූයේද ඒ පෙනුම නිසයි.


 ඔබ සිටින්නේ ඔබ ගැන පැහැදිලි වැටහීමක?

සත්තකින්ම… මම කවුද… සිටිය යුතු තැන කොතැනද… මට රිසි, නොරිසි දෑ මොනවාද යන්න මම හොඳින්ම දන්නවා.


දමයන්ති රේණුකා ප්‍රනාන්දු