මේ දිනවල බොහෝ විට ඔහු අපට හමුවන්නේ රිදී තිරයේදීය. රාණී, වාලම්පූරි, ආයු මෙන්ම මාරියා සිනමාපට ඔස්සේ පෑ දස්කම් උදෙසා ඔහු හොඳම නළුවා ලෙස දෙස් විදෙස් සම්මාන හිමිකරගත් දක්ෂ රංගන ශිල්පියෙකි. ප්රවෘත්ති නිවේදකයෙක් ලෙස ක්ෂේත්රයට පිවිසි ඔහු රංගනයට මෙන්ම සිංහල, ඉංග්රීසි භාෂා ද්විත්වයෙන්ම නිවේදනයට දස්කම් පාන්නෙකි. ඔහු නමින් අශාන් ඩයස්ය.
පුංචි කාලෙ ඉඳන්ම කලා ක්ෂේත්රයට එන්න ආසාවක් තිබුණද?
පුංචි කාලෙ ඉඳන් ක්රීඩාවෙන් ඉදිරියට යන්න තමයි මට ආසාවත් තිබුණේ. කලාව විෂයයක් වශයෙන් කළා. වෘත්තියක් විදිහට නම් මේ ක්ෂේත්රයට එන්න බලාපොරොත්තුවක් තිබුණේ නෑ.
ඔබ ක්ෂේත්රය හඳුනාගන්නේ ප්රවෘත්ති නිවේදකයෙක් විදිහට. ඒ ගැන මතක් කරනවා නම්?
මම කුඩා කාලයේදී රංගනයට තිබුණු ආසාව නිසාම වේදිකා නාට්යය, සංගීත තරඟ, නිවේදන තරගවලට සහභාගි වෙනවා. ඒත් සමඟම මාධ්ය ක්ෂේත්රයට එන්න පොඩි ආසාවක් එනවා. මේ නිසාම මම මාධ්ය ආයතනයකට සම්බන්ධ වෙනවා. එතැනදී මම වාර්තාකරුවෙක් විදිහට සම්බන්ධ වෙලා පසු කලෙක ප්රවෘත්ති නිවේදකයෙක් බවට පත්වෙනවා. වසර හතක් පුරාවට වෘත්තිමය ප්රවෘත්ති නිවේදකයෙක් වශයෙන් කටයුතු කළා.
රංගනයෙන් දායක වුණ මුල්ම චිත්රපටය මතකද?
මම වේදිකා නාට්යයක් කරන අතරතුර චන්ද්රන් රත්නම් මහතා මට චිත්රපටයකට ආරාධනා කරනවා. ඒ එතුමාගේ අලිමංකඩ චිත්රපටයට, ඔහු එහි කෘතිය සහ තිරපිටපත මට දෙනවා. කෘතියෙහි ජනප්රියත්වය නිසාත් තිරපිටපතෙහි හොඳ කතාවක් තිබුණ නිසාත් මම ඒ සඳහා කැමති වෙනවා. එතැනි තමයි මගේ සිනමා පිවිසීම.
ප්රවීණයන්ගෙන් ලැබුණු සහයෝගය කොහොමද?
මම හරිම වාසනාවන්තයි. මොකද මම වැඩ කරපු හැම නිර්මාණයකම ප්රවීණ නළු නිළියන් සිටියා. මගේ ප්රථම නිර්මාණය තුළම ජෝ අබේවික්රම, සනත් ගුණතිලක, වීණා ජයකොඩි වගේ ප්රවීණ නළු නිළියෝ සිටියා. එයාලා මට ලොකු සහයෝගයක් දුන්නා. ඒ වගේම මම රංගනයෙන් දායකවුණු සෑම නිර්මාණයකදීම ප්රවීණයන්ගෙන් ලොකු සහයෝගයක් ලැබුණා.
මාරියා ගැන කතා කරනවා නම්?
මාරියා චිත්රපටය තුළ තියෙන්නේ මාස හයක මුහුදු යන ධීවරයෝ හය දෙනෙකුගේ කතාවක්. සමීප මිතුරන් හයදෙනෙක්. ඩයියා කියන චරිතය මං කළේ. සම්පූර්ණයෙන්ම මුහුදේ රූගත කළ අභියෝගාත්මක චිත්රපටයක් කිවුවත් හරි.
‘මාරියා‘ රූගත වෙන්නේ මුහුද මැද. ඒ අත්දැකීම කොහොමද?
කිසිම අත්දැකීමක් නොමැති නිසා සමහර අය මුහුදු යන්න බයයි. නමුත් මම මුහුදු ගිහින් තියෙනවා. මට පීනන්නත් පුළුවන්, හැබැයි සති දෙක තුනක් මුහුදේ මැද රූගත කිරීමක් කරනවා කියන්නේ වෙනමම අත්දැකීමක්. මොකද ගොඩ බිමේ ඉඳලා මුහුදට ගිහින් ඒ වගේ දවස් යන කොට වෙනමම ලෝකෙකට ගියා වගේ දැනෙනවා, මේ නිසාම කතාවේ පැවති නිර්ව්යාජ බව රැක ගන්න පුළුවන් වෙනවා. ඒ වගේම බෝට්ටුවකදි කළ යුතු හැමදේම අපිට ඉගෙන ගන්න සිදුවුණා. ඉතින් ඒක ගොඩක් හොඳ අත්දැකීමක්.
සිනමාවේ ඔබට ඉහළම ප්රේක්ෂක ප්රතිචාරයක් ලැබුණු චරිතය මොකක්ද?
සිරි පැරකුම් චිත්රපටයේ පතිරාජ සෙනෙවිගේ චරිතයට මට ලොකු ප්රතිචාරයක් ලැබුණා. ඊට පසුව වැඩිම කාලයක් කතා වෙන සහ අදටත් කතා කරන චරිතයක් තමයි සරිගම චිත්රපටයේ කැප්ටන්ගේ චරිතය.
ක්ෂේත්රය තුළ ඔබට ලැබුණු ජයග්රහණ මොනවාද?
මේ ක්ෂේත්රය තුළ වැඩ කරමින්, ජීවත් වෙන්න මුදල් හම්බ කරගෙන තමන් ආස කරන දේ කරගෙන ඉන්න එකම මට ලොකු ජයග්රහණයක්.
සිනමාව තුළ වෙනස් විය යුතු යැයි ඔබ සිතන කරුණු කාරණා තියෙනවද?
පෙර වසරවල සිනමා ක්ෂේත්රය කඩා වැටිලා කියලා කිව්වත් පහුගිය වසරේ තිරගත වුණු සියලුම චිත්රපට ගොඩක් ජනප්රිය වුණා. සිනමාව මෙතෙක් පැවත ආ ක්රමවේද වෙනස් කළ යුතු බව මේ වසර තුළ පැහැදිලි වුණා. කලින් තරුණ පරපුරේ නිර්මාණ යට කරපු අවස්ථා තිබුණා. කාගෙවත් සහයෝගයක් නොමැතිව මේ වසර තුළ ඔවුන් සාර්ථක වැඩ කිහිපයක්ම කළා. ඒ ක්රමවේදය ඒ ආකාරයටම ගෙන ගියානම් හොඳයි කියලා මම විශ්වාස කරනවා. ඒ වගේම නිර්මාණයක් කරනවානම් ඉහළ ගුණාත්මක භාවයකින් ඉදිරිපත් කළ යුතුයි. එවිට ප්රේක්ෂකයන් අනිවාර්යයෙන්ම සිනමාව හා රැඳී ඉඳියි.
ක්ෂේත්රයට එන නවක කලාකරුවන්ට ඔවුන්ගේ හැකියාවන් ප්රගුණ කර ගන්නට ඔබ දෙන අදහස කුමක්ද?
තමන් රංගන ක්ෂේත්රයට එන හේතුව මුලින්ම දැනගන්න. ක්ෂේත්රයට එන්නේ ජනප්රිය වෙන්න පමණක් නම් අවශ්ය දේ කරගෙන ජනප්රියත්වය අරගෙන සතුටින් ඉන්න. එහෙම නැතුව වෘත්තියට හා රංගනයට කැමැත්තෙන් සහ ආදරයකින් එනවා නම් ඒ පිළිබඳව දිනෙන් දින ඉගෙන ගන්න, ජ්යෙෂ්ඨ රංගන ශිල්පීන් සමඟ කතා කරන්න. අලුතින් දේවල් ඉගෙන ගන්න. ක්ෂේත්රය තුළ කෙටි පාරවල් නෑ. ඉදිරි ගමන නොනැවතී අලුත් දේවල් හොයමින් යන්න. අනිවාර්යයෙන්ම ඔබ සාර්ථක වේවි.
ඉදිරි වැඩ කටයුතු මොනවාද?
දැනට මම පෙබරවාරි මාසයේ රඟ දැක්වෙන වේදිකා නාට්යයක පුහුණුවීම් කරනවා. එතෙක් කිසිම වැඩක් භාරගන්න කටයුතු කරන්නේ නැහැ. කලින් කරපු චිත්රපට කිහිපයක් රූගත වෙන්න නියමිතයි. ඒ අතරිනුත් ධර්ම යුද්ධය- 2 සහ සූරිය සුළඟ යන චිත්රපට ළඟදීම තිරගත කිරීමට නියමිතයි.
මෙතෙක් පැමිණි ගමන් මඟේ ඔබට සහාය වූවන් ඇති. ඒ ගැනත් මතක් කරමු?
කුඩා කාලයේ සිටම මම කලාවට ආසා කළේ මගේ මව්පියන් නිසා. ඒ වගේම මේ තැනට එන්න හුරු කළේ මගේ පාසල් ගුරුවරුන්. ඉතින් නම් වශයෙන් කියන්න බැරි පිරිසක් මට සහයෝගය ලබා දුන්නා. ඒ අතරින් විශේෂයෙන්ම මතක් කරනවා චන්ද්රන් රත්නම් මහත්මයාව. ඔහු නිසා තමයි මම සිනමා ක්ෂේත්රයට එන්නේ. ඒත් එක්කම මා හා වැඩ කළ අධ්යක්ෂකවරු නිෂ්පාදකවරු ජ්යෙෂ්ඨ රංගන ශිල්පියෝ නිසා තමයි අද මම මෙතන ඉන්නේ.
