ගයාන් ගුණවර්ධන නමින් අද ඔහු නොහඳුනන කෙනෙක් නැති තරම් ය. හිරු නාළිකාවේ විකාශය වන ‘තරු ආදරේ’ ටෙලි නිර්මාණයේ සඳගෝමි ලෙසින් මේ දිනවල ඔබේ ආදරය දිනා සිටින ඔහු තම පියාගේ අඩිපාරේ යමින් ගායකයකු ලෙස ක්ෂේත්රයට පිවිස මේ වන විට ගායකයකු, රංගන ශිල්පියකු, ව්යාපාරිකයකු ඇතුළු භූමිකා රැසක් ඔස්සේ තම දක්ෂතා පෙන්වමින් සිටියි. ඔහුගේ ගමනට නිරතුරු සවිය වෙමින් ඔහු පසුපස සිටින ඇය ද දක්ෂ රංගන ශිල්පිනියකි. ඇය නමින් පූජනී භාග්යාය. ඔවුන්ගේ සොඳුරු කැදැල්ලේ තොරතුරු ද සමඟින් අද අප හා එක්වන්නේ ගායනයෙන් මෙන්ම රංගනයෙන් ද ඔබේ ආදරය දිනූ ගයාන් ගුණවර්ධනය.
සඳගෝමි කියන්නෙත් ගායන තරුවක්. ඔබ මේ දවස්වල තරු අතරේ තරුවක් වෙලා නේද?
ඔව්. ඔව්. මේ දිනවල ධනුෂ්ක රත්නායකගේ ‘තරු ආදරේ’ ටෙලි නිර්මාණයේ සඳගෝමි කියන ප්රධාන භූමිකාවෙන් ප්රේක්ෂකයින් අතරට එනවා. සඳගෝමි කියන්නෙත් මගේ සැබෑ ජීවිතේට සමීප චරිතයක්. ‘තරු ආදරේ’ ධනුෂ්ක ප්රනාන්දුගේ නිෂ්පාදනයක්. තිර පිටපත බුද්ධිනී ජයවර්ධනගේ. සඳගෝමි කියන්නේ ගායන ක්ෂේත්රයේ නිහතමානී ගමනක් යන ගායන තරුවක්. තම රසිකාවියක් හා පෙමින් වෙළෙන සඳගෝමිට පියාගේ ව්යාපාරික මිතුරෙකුගේ සොහොයුරියකගෙනුත් යෝජනාවක් එනවා. තුන්කොන් ප්රේමයක් අතරේ දෝලනය වන කතාවක් කිවුවත් හරි. ටෙලිනාට්ය පැත්තෙන් ගත්තොත් ඒක තමයි මේ දිනවල විකාශය වෙන්නේ. ඊට අමතරව තවත් අලුත් ටෙලි නිර්මාණයක් ගැන සාකච්ඡා වෙමින් යනවා. එය ඇක්ෂන් සහ කොමඩි පැත්ත මූලික කරගත්ත ටිකක් වෙනස් විදිහේ ටෙලි නිර්මාණයක්. ඉදිරියේදී රූගත කෙරෙනවා. මාත් සමඟින් සංගීත් ප්රභූ, කැළුම් ශ්රී, සංජය මුරමුදලි රංගනයෙන් දායක වෙනවා.
හැමදාම ප්රේමවන්තයාටම කොටු වෙලා කියල හිතෙන්නෙ නැද්ද?
බොහෝදුරට එහෙම වුණා. මේ වෙද්දි මං ටෙලි නිර්මාණ එකොළහකට රංගනයෙන් දායක වෙලා තියෙනවා. හිතුවක්කාරයා ගත්තොත් අසම්මත ආදර කතාවක්. හුස්මක් තරමට පාසල් ප්රේමයක්. මුල් කාලෙදි අවස්ථාව ලැබුණෙම ප්රේමවන්තයා වෙන්න. ඔය අතරේ පාර දිගේ රංගනය ප්රේමවන්තයා කියන රාමුවෙන් එළියට ගිහින් වෙනසක් කරන්න මට අවස්ථාව ලබා දුන්නා. ඒක තමයි මගේ රංගන ජීවිතේ හැරවුම් ලක්ෂ්යය වුණේ. අඟුලාන පරිසරයේ ජීවත්වුණු දුප්පත් අහිංසක වීදි කලාකරුවෙක්. සීසර්ලා ගත්තොත් වාහන සීස් කරන සීසර්ලාගේ ජීවිතය ගැන කතාවෙන නිර්මාණයක්. ඔය විදිහට එහෙන් මෙහෙන් පොඩි පොඩි වෙනස්කම් වුණත් ආදරවන්තයා කියන රාමුව ඇතුළෙ තමයි ගොඩක් නිර්මාණ කෙරුණේ.
රාහුල හාමුදුරුවෝ වෙන්න ලැබුණු අවස්ථාව ගැන මොකද හිතෙන්නේ?
ඒක තමයි මෙතෙක් මගේ රංගන ජීවිතේ ලබපු අභියෝගාත්මකම අත්දැකීම. සුවිනීතා වීරසිංහගේ අධ්යක්ෂණයෙන් නිමවුණු ‘සාධි’ කියන සිනමාපටයේ රාහුල හාමුදුරුවන්ගේ චරිතය කරන්න අවස්ථාව ලැබුණා. සුවිනීතා වීරසිංහ කියන්නෙ මගේ නැන්ද කෙනෙක්. පාර දිගේ නාට්යයේ මගේ රංගනය දැකලා ඇයට ඕනවෙලා තිබුණා ඇගේ පළමු සිනමා අධ්යක්ෂණයේ ප්රධාන චරිතය වන රාහුල හාමුදුරුවන්ගේ චරිතයට මාව යොදාගන්න. සාමාන්යයෙන් මං කෑගහල, දඟලලා හරිම විනෝදයෙන් ඉන්න චරිතයක්. සෙට් එකේදි වුණත් ගෙදරදි වුණත් ඒක එහෙමමයි. ඒත් රාහුල හාමුදුරුවන්ගේ චරිතයට පණ පොවද්දී නිවුණු, තැන්පත්, හොඳ බුද්ධියක්, දර්ශනයක් තියෙන, දැනුවත් හාමුදුරු නමක් විදිහට මගේ පර්සර්නැලිටි එක සම්පූර්ණයෙන්ම වෙනස් කරගන්න වුණා. උන් වහන්සේ විශ්වවිද්යාල ශිෂ්යබල ව්යාපාරයේ නායකයා. රාහුල හාමුදුරුවන්ගේ චරිත ස්වභාවය හොඳින් අධ්යයනය කරලා, ඒ පසුබිම සොයා බලලා, දිගු කාලයක් ඒ වගේ චරිත කිහිපයක් හොඳින් අධ්යයනය කරලා තමයි මං මේ චරිතයට දායකත්වය දුන්නේ. මං හිතනවා මං මගේ උපරිමය කළා කියලා. නුදුරේදීම ‘සාධි’ තිරගත වේවි. චිත්රපටය බලලා ඔයාලගෙ අදහස කියන්න කියලත් මම ඉල්ලනවා.
කෙළිලොල් යෞවනයට නිවුණු තැන්පත් බවක් ආරෝපණය කරගන්න එක අභියෝගයක් වුණේ නැද්ද?
පැහැදිලිවම ලොකු අභියෝගයක් වුණා. කෑගහල, දඟලල, කාලා බීලා හරිම විනෝදෙන් හිටිය මට තැන්පත් වෙන එක ගැන සෑහෙන්න හිතන්න වුණා. සිවුර ඇඳගත්ත දවසේ ඉඳන් මං පේ වුණා. මස්, මාළුවත් නොකා ඒ වෙනුවෙන් කැපවෙලා තමයි සිවුර ඇන්දේ. එක භික්ෂූන් වහන්සේ නමක් ඇවිත් මට සිවුර අඳින විදිහ කියල දුන්නා. මේ චරිතය ඇතුළෙ ජීවත් වෙද්දි මට ලොකු නිදහසක් දැනුණා. ඇත්තටම ඒක වෙනස්ම අත්දැකීමක්. මං මට හැකි උපරිම ගෞරවයෙන් ඒ චරිතයට සාධාරණයක් කළා.
ඔබ ක්ෂේත්රය හඳුනාගන්නේ ගායකයෙක් විදිහට. රංගනයෙන් ඔබ්බට ගිහින් සංගීතය පැත්ත කතා කරනවා නම්?
සංගීතය තමයි මං වැඩිපුරම ෆෝකස් කරල තියෙන්නේ. තනි ගායකයෙක් විදිහට මම ගයාන් ගුණවර්ධන විදිහටත් මගේ පියා නුවන් ගුණවර්ධන විදිහටත් අපි සංගීත කටයුතු කරගෙන ගියා. ඒ සමඟම මගේ සංගීත කණ්ඩායම වන රෝඩ්ස් එක්කත් සංගීත කටයුතු කරගෙන යනවා. ඉදිරියේදී සංගීතය පැත්තෙන් ගොඩක් දේවල් දැකගන්න පුළුවන්.
ඔබ පියාගේ අඩිපාරේ ආපු පුතෙක් වගේම පියා වෙනුවෙන් බොහෝ දේ කරන පුතෙක්. ඒ ගැනත් කියන්න යමක් ඇති?
ඔව්. මගේ පියා නුවන් ගුණවර්ධන ගැයූ ගීත 400කට අධික ප්රමාණයක් තියෙනවා. චිත්රපට ගීතත් විශාල ප්රමාණයක් තියෙනවා. ඒවා සුරක්ෂිත කරමින් නුවන් ගුණවර්ධන ගීත බැංකුවක් ස්ථාපිත කිරීමේ වැඩපිළිවෙළක් මේ වන විට ක්රියාත්මක කරමින් ඉන්නවා. ගීතවල අයිතිය පිළිබඳ ගැටලු නිරාකරණය කරගනිමින් අදාළ නිර්මාණකරුවන් සමඟ සාකච්ඡා කරමින් ඒවායේ අයිතිය ලබාගන්න මේ දිනවල කටයුතු කරමින් ඉන්නවා. ඒ වගේම මතු පරපුරට ඔහුව හඳුන්වා දීමේ අරමුණෙන් ඔහුගේ ජීවිත කතාව සම්බන්ධ ඩොකියුමන්ට්රි එකක් එළිදක්වන්නත් ක්රියා කරමින් ඉන්නවා. ඔහු චිත්රපට පසුබිම් ගායනය කළ ලංකාවේ ප්රවීණ රංගන ශිල්පීන්, අධ්යක්ෂවරුන් වගේම ඔහුගේ සමකාලීන ගායන ශිල්පීන් ශිල්පිනියන් එක්ක මේ දිනවල එහි රූගත කිරීම් පටන් අරන් තියෙන්නේ. ලබන දෙසැම්බර් මාසයේ පැවැත්වෙන නුවන් උපහාර ගී ට්රිබියුටි නුවන් ප්රසංගය දවසට එය එළිදක්වන්න කටයුතු යොදා තියෙනවා.
රෝඩ්ස් කියන්නේ ඔබේ නායකත්වය යටතේ ක්රියාත්මක වන සංගීත කණ්ඩායම. ඒ ගැන කතා කරනවා නම්?
රෝඩ්ස් සංගීත කණ්ඩායම කියන්නේ එකෝස්ටික් බෑන්ඩ් එකක්. වෙඩින්, කෝපරේට් ඉවෙන්ට්ස්, ඩිනර් ඩාන්ස්, කොන්සට් වගේ ඒවා තමයි අපි කරන්නේ. සාමාජිකයින් අට දෙනෙක් ඉන්නවා. තුන් දෙනෙක්ම ආර්ටිස්ට්ලා. මමත් එක්ක රශ්මික අභිෂේක් ගායනයෙන් සම්බන්ධ වෙනවා. ඊට අමතරව බේස් ගිටාරයෙන් රෙහාන් ශෙනත්, කීබෝඩ් වාදනයෙන් ශම්මි ගීෂාන්, ගිටාරයෙන් මනූෂ ප්රනාන්දු, ඩ්රම්ස් වාදනයෙන් සෙමිනෙත් දේවාශ්, පර්කෂන් වාදනයෙන් අභිෂේක් කුරේ. සංගීත කණ්ඩායමේ ගීතත් ගොඩක් තියෙනවා. පහුගිය දවස්වල අපි බහරේන් සංචාරයකටත් සහභාගි වුණා. ලබන අවුරුද්දෙත් සංචාර කිහිපයකට ආරාධනා ලැබිල තියෙනවා. ඒ වගේම මං කැමැතියි අපේ බෑන්ඩ් එක ආර්ටිස්ට් කෙනෙක් විදිහට හඳුන්වනවට. බෑන්ඩ් එකක් කියන්නේ ආර්ටිස්ට් කෙනෙක්. බොහෝ දුරට අපේ රටේ සංගීත කණ්ඩායමක් හඳුන්වන්නේ කලා ශිල්පීන්ට බැක් කරන බැකින් බෑන්ඩ් එකක් කියලා. එහෙම නෙවෙයි ලින්කින්පාක්, ක්වීන්, මෙරුන්සා වගේ විදෙස් සංගීත කණ්ඩායම් හඳුන්වන්නේ ආර්ටිස්ට් කියලා. අපේ රටෙත් මේරියන්ස්, ජිප්සීස්, ඩැඩී ගත්තොත් ඒ වගේ. අපේ බෑන්ඩ් එකත් ඒවා ෆලෝ අප් කරන බෑන්ඩ් එකක් විදිහට තමයි යන්නේ.
ගායකයෙක්, රංගන ශිල්පියෙක්ට අමතරව තවත් අංශ කිහිපයකම ඔබ ක්රියාකාරියි නේද?
ඔව්. මට ශබ්දාගාරයක් තියෙනවා නුගා ස්ටුඩියෝ ඇන්ඩ් ඇකඩමි කියලා. නුගා කියන්නේ නුවන් ගයාන් සංකලනයෙන් අපි හදාගත්ත බ්රෑන්ඩ් එකක්. දැන් අවුරුදු හතක් තිස්සේ අලුත් ශිල්පීන් ශිල්පිනියන්ට හඬ පුහුණු කරලා ක්ෂේත්රයට මුදා හරිනවා. ගීත, ටෙලි පසුබිම් ගීත, චිත්රපට පසුබිම් ගීත, වෙළෙඳ දැන්වීම් ගීත නිර්මාණය වෙනවා. ඊට අමතරව ගිටාර්, කීබෝඩ්, හඬ පුහුණු පන්ති කරගෙන යනවා. ඒ වගේම ව්යාපාරයකුත් කරගෙන යනවා. මේ සියල්ල සමබර කරගනිමින් තමයි කලා කටයුතුවලත් නියැළෙන්නේ.
ඔබේ ගීත නිර්මාණ පැත්ත ගත්තොත්?
ටෙලිනාට්ය ගීත වගේම මගේම ගීතත් දැන් හතළිහක් විතර තියෙනවා. ඒ අතරින් යං, ඉසබෙලා, සංසාර සංචාරේ, ආදරය ගින්දරක්, හිතේ කතාවේ වගේ ගීත ගොඩක් ජනප්රිය වුණා. ඊට අමතරව තවත් ගීත දෙකක් නිර්මාණය කරල තියෙනවා. ඒ අතරින් ෂෙනාල් මද්දුමගේ එක්ක ගායනා කරන ගීතය මේ අවුරුද්දේ රිලීස් වෙනවා. ඊට අමතරව සංගීත කණ්ඩායමේ ගීතත් එන්න තියෙනවා.
පූජනී කියන්නෙත් කාර්යබහුල චරිතයක්. කොහොමද ඇගෙන් ලැබෙන සහයෝගය?
ඇත්තටම ඇගෙන් තමයි ලොකුම සහයෝගය ලැබෙන්නේ. අපි අවුරුදු 5ක් ආදරය කරලා තමයි විවාහ වෙන්නේ. අපි දෙන්නා අපි දෙන්නගේ වැඩකටයුතු කරගෙන යනවා. ඒ අතරේ අපි එකට සම්බන්ධ වෙලා කරන වැඩත් තියෙනවා. අපි අන්තිමටම එකට වැඩ කළේ සීසර්ලා ටෙලි නිර්මාණයේ. ඉදිරියේදී තව නිර්මාණයකට ආරාධනා ලැබිල තියෙනවා. ගයියා- පූජි නමින් යුටියුබ් නාළිකාවක් කරගෙන යනවා. සෝෂල් මිඩියා පැත්ත කරගෙන යන්නේ පූජනී. ඇයට ඒ පිළිබඳ හොඳ හැකියාවක් තියෙනවා. අපේ එදිනෙදා ජීවිතේ සිදුවන දේවල් ස්ටෝරි විදිහට ඇය යූටියුබ් නාළිකාව ඔස්සේ මුදා හරිනවා. ඒවටත් සෑහෙන්න ප්රතිචාර ලැබෙනවා.
බොහෝ දෙනා උත්සාහ කරනවා කපල් විදිහට ජනප්රිය වෙන්න. එතකොට ගයාන්-පූජනී කියන්නේ?
ඇත්තම කිවුවොත් ගයාන් – පූජනී කියන්නේ තම තමන්ගේ දක්ෂතාවලින් ජනප්රිය වෙන්න කැමැති දෙන්නෙක්. ඇය ඇයගේ දක්ෂතා පැත්තෙන් යනවා. මම මගේ හැකියාවන්ගෙන් දක්ෂතා පෙන්වනවා. අපිට කපල් වෙලා ජනප්රිය වෙන්න අවශ්ය නෑ කියන තැනයි මම ඉන්නේ. කපල් එකක් විදිහට සහභාගි වෙන්න අවශ්ය තැනදි අපි එහෙම කරනවා. ඔබ වෙනුවෙන් ගීතය නිර්මාණය වෙන්නේ අපි දෙන්නගෙ දායකත්වයෙන්. ඒක ගොඩක් ප්රතිචාර ලබමින් ගොඩක් ජනප්රිය වුණා. වෙඩින්වල අනිවාර්යයෙන්ම ගැයෙන ගීතයක් බවට පත්වුණා. අනෙක් හැම වෙලාවෙම අපි දෙන්න අපි දෙන්නගෙ දක්ෂතාවලින් ඉදිරියට යන්නයි වඩාත් කැමැති. ඒ නිසා අපි දෙන්නට ගොසිප් හැදෙන බොහෝ තැන් අපි දැන් මඟහරිනවා.
